1-3. (a) Ne a lagonaga e ‵tau o maua ne tatou e uiga ki muna‵tonu mai te Tusi Tapu? Fakamatala mai. (Ke onoono ki ata i te kamataga.) (e) Ne a fesili ka sau‵tala tatou ki ei i te mataupu tenei?

A TE fakafoki ne tatou se mea ne ‵togi e fai pelā me se faifaiga masani. E isi se sukesukega ne fai i nai fenua kae ne iloa aka ei me toeitiiti ko kātoa te 9 pasene o mea ne ‵togi ne tino ne ‵toe faka‵foki ki sitoa. Kae ko mea kolā ne ‵togi e auala i te itaneti, kāti e silia atu mo se 30 pasene ne toe faka‵foki. Kāti ne iloa aka ne tino kolā ne ‵togi ne latou me e se konā a kope ne fakamoe‵moe latou ki ei, e ma‵sei, io me ne mea kolā e se fetaui mo olotou manakoga. Tela la, ne fakaiku aka ei ne latou ke ‵toe sui olotou mea ne ‵togi io me fakamolemole ke ‵toe faka‵foki atu a olotou tupe.

² E tiga eiloa e mafai o fakamolemole tatou ke ‵toe faka‵foki mai a ‵tou tupe mō mea kolā ne ‵togi ne tatou, kae e se mafai lele eiloa ne tatou o ‵toe fakafoki io me “fakatau” atu ki tua a te “iloaga tonu” e uiga ki muna‵tonu mai te Tusi Tapu telā ne “‵togi” mai ne tatou. (Faitau te Faataoto 23:23; 1 Timo. 2:4) E pelā eiloa mo te mea ne sau‵tala tatou ki ei i te mataupu mai mua, ne maua ne tatou a te munatonu mai te fakaaoga ne tatou a taimi e uke ke tauloto e uiga ki ei. E se gata i ei, ke ‵togi ne tatou a te munatonu, e mafai o tiaki katoatoa ne tatou se galuega ‵togi ‵lei, fakama‵fuliga ne fai ki ‵tou fesokotakiga mo nisi tino, mo ‵fuliga ne fai e uiga eiloa ki ‵tou mafaufau mo ‵tou amioga, io me ko te tiakinaga ne tatou a tuu mo aganuu kolā e fe‵paki mo akoakoga mai te Tusi Tapu. Kae ko te mea telā ne ‵togi ne tatou ki ei a te munatonu, e se fakataitai eiloa  ki te uke o fakamanuiaga ne maua ne tatou.

³ Ka fai ko oko mai ki muna‵tonu mai te Tusi Tapu, e tai ‵pau eiloa a ‵tou lagonaga mo lagonaga o te tagata telā ne fakaasi mai ne Iesu i tena tala fakatusa. E fakaasi mai i te tala tenā a te tāua o te munatonu e uiga ki te Malo o te Atua ki a latou kolā e maua ne latou, i te tala tenā ne faipati eiloa a Iesu ki se tagata faipisinisi. A te ‵tonuga loa, a te penina tenā ne fai pelā me ko te ‵toe penina ‵togi ‵mafa, tenā ne “fakatau” fakavave atu ne ia ana mea katoa ko te mea ke ‵togi ne ia a te penina tenā. (Mata. 13:45, 46) I se auala tai ‵pau, a te munatonu telā ne maua ne tatou—te munatonu e uiga ki te Malo o te Atua fakatasi mo nisi muna‵tonu tāua ne tauloto ne tatou mai te Muna a te Atua—e fai pelā me ne mea tafasili i te tāua ki a tatou, kae ne fai fakavave ne tatou se fakaikuga ke tiakina a mea katoa kolā ne fakatāua muamua ne tatou, ko te mea ke maua ne tatou a te ‵toe mea tafasili i te tāua tenei. A te fakatāua ne tatou a te munatonu, ka fesoasoani mai ke mo a eiloa e “fakatau atu ne tatou ki tua.” Se mea fakafanoanoa ke iloa atu, me e isi ne tino o te Atua ne ‵galo atu i a latou a te tāua o te munatonu ne maua ne latou—kae ne ‵toe fakatau atu ne latou ki tua. Ke mo a eiloa e tupu a te mea tenei ki a tatou! Ke fakaasi atu me e fakatāua ‵ki ne tatou a koloa o te munatonu kae ka sē fakatau atu foki ne tatou ki tua, e fesoasoani eiloa mai a te fakatonuga tenei ke “tumau i te sa‵sale i te munatonu.” (Faitau te 3 Ioane 2-4.) A te sa‵sale i te munatonu—e aofia i ei a te fakamuamua faeloa ne tatou te munatonu i ‵tou olaga kae ola e ‵tusa mo te mea tenā. Ke onoono tatou ki fesili konei: Kaia kae i auala fea e mafai ei o “fakatau atu” ki tua ne nisi tino a te munatonu? E mafai pefea o ‵kalo kea‵tea tatou mai te fai ne tatou se matugā mea ‵se penā? Kae e mafai pefea o fakamalosi ne tatou a ‵tou manakoga ke “tumau i te sa‵sale i te munatonu”?

4. I te senitenali muamua, kaia ne ‵toe “fakatau atu” ei ki tua ne nisi tino a te munatonu?

⁴ I te senitenali muamua, nisi tino kolā ne talia ne latou a akoakoga a Iesu mo te fia‵fia ne seki fakamaoni latou o tumau i te sa‵sale i te munatonu. E pelā me se fakaakoakoga, i te taimi ne fagai fakavavega ne Iesu a te vaitino tokouke, ne tau‵tali atu eiloa a latou i a ia ki te suā feitu o te ‵tai o Kalilaia. I konā loa, ne fai atu ne Iesu se mea telā ne ‵poi masei eiloa latou i ei: “Ka se maua ne koutou te ola seiloga ke ‵kai koutou ki ‵kano o te Tama a te tagata kae inu ki tena toto.” I lō te ‵toe fakafesili atu ne latou a Iesu ke fakamatala atu a te uiga o ana pati, ne loto vāi‵vai latou i ana pati kae ne fai atu penei: “E fakatakalialia a pati konei, ko oi la e fia fakalogologo ki ei?” Kae ko te ikuga, “ne toe ‵foki ei ana soko e tokouke ki mea ko oti ne tiakina ne latou kae ne seki toe sa‵sale fakatasi mo ia.”—Ioa. 6:53-66.

5, 6. (a) I aso nei, kaia ne seki fakamaoni ei a nisi tino o puke‵mau ki te munatonu? (e) E mafai pefea o tapeapea malielie kea‵tea se tino mo te munatonu?

⁵ E fakafanoanoa me isi foki ne tino i aso nei ne seki fakamaoni latou o puke‵mau ki te munatonu. Nisi tino ne seki fia‵fia ki fakama‵fuliga ne fai ki mainaga ‵fou e uiga ki ne manatu i loto i te Tusi Tapu io me ne pati mo faifaiga ne fai sale ne se taina lauiloa i aso mua kae ko fai ne fakama‵fuliga ki ei. A ko nisi tino ne seki fia‵fia ki polopolokiga mai te Tusi Tapu kolā ne tuku atu ki a latou, io me ne tiakina ne latou a te munatonu ona ko te sē ‵lei a olotou vā mo nisi taina Kelisiano. Kae ko nisi tino ne ‵kau atu ki te kau aposetate mo tino ‵teke kolā ne fakaloiloigina ne latou a ‵tou talitonuga. Ne iku atu ei ki te olo “kea‵tea” o nisi tino mai i a Ieova mo tena fakapotopotoga mo te iloa tonu. (Epe. 3:12-14) Ko tafaga la te gali moi ne tumau loa latou i te fakatuanaki kae ‵piki ‵mau ki te olotou loto tali‵tonu ki a Iesu, e pelā mo te mea ne fai ne te apositolo ko Petelu! I te taimi ne fesili atu ei a Iesu ki te kau apositolo me ko fia tiaki foki ne latou a ia, kae tali fakavave atu a Petelu ki a ia: “Te Aliki, ko oi te tino ka olo matou ki ei? A muna o te ola se-gata-mai konā e ‵nofo mo koe.”—Ioa. 6:67-69.

⁶ A nisi tino ne tapea‵pea malielie kea‵tea mai te munatonu, kāti e aunoa mo te lavea ne latou a te mea ko tupu ki a latou. A te tino telā e tiaki malielie ne ia a te munatonu e ‵pau eiloa mo te  pōti telā ko kamata o tapeapea malie kea‵tea mai te kaugutu o te vaitafe. E fakailoa mai te Tusi Tapu ke fakaeteete tatou ke mo a ma ‘tapea‵pea kea‵tea.’ (Epe. 2:1) A te tino telā e tapeapea kea‵tea mai te munatonu e se fai ne ia te mea tenā mo te iloa tonu, e se pelā mo te tino telā e manako tonu ke fano kea‵tea mai te munatonu. E ui i ei, a te tino tenā ko kamata o se ‵lei a tena fesokotakiga mo Ieova kae ko tu loa a ia i se tulaga fakamataku. Kae e mafai pefea o ‵kalo kea‵tea tatou mai i vaegā auala fakama‵taku penei?

7. Se a te mea muamua e ‵tau o fai ne tatou ke mo a e fakatau atu ne tatou ki tua a te munatonu?

⁷ Ke sa‵sale i te munatonu, e ‵tau mo tatou o talia kae faka‵logo ki muna katoa a Ieova. E ‵tau mo tatou o fakamuamua faeloa a te munatonu i ‵tou olaga kae ola e ‵tusa mo fakatakitakiga mai te Tusi Tapu. I tena ‵talo ki a Ieova, ne fai mai te Tupu ko Tavita: “Au ka sasale i tau munatonu.” (Sala. 86:11) Tenā loa te manakoga o Tavita. E ‵tau foki mo tatou o fai ‵tou fakaikuga ke tumau i te sa‵sale i te munatonu a te Atua. Kafai e se fai ne tatou a te mea tenā, ko mafai o fakalotolotolua tatou ki te munatonu telā ko oti ne ‵togi ne tatou, kae kāti ka fakaosoosogina ke toe ‵foki ki mea kolā ko oti ne tiakina ne tatou. I lō te fai penā, e ‵tau o taofi faka‵lei tatou ki te munatonu kātoa. E iloa ne tatou me e se mafai filifili aka ne tatou me tefea te vaega o te munatonu o ‵tau o talia ne tatou mo te vaega telā e ‵tau o tiakina ne tatou. Kae tiga te feitu tenā, e ‵tau mo tatou katoa o sa‵sale i te munatonu “kātoa.” (Ioa. 16:13) Ke onoono nei tatou ki mea e lima ne ‵togi ne tatou ki ei a te munatonu. A te faiga tenā ka fakamalosi aka ne ia ‵tou fakaikuga ke mo a e toe ‵foki o fai a mea kolā ko oti ne tiakina ne tatou.—Mata. 6:19.

8. E mafai pefea o tapeapea kea‵tea se Kelisiano mo te munatonu māfai e se fakaaoga faka‵lei ne ia a ana taimi? Taku mai se fakaakoakoga.

⁸ Taimi. Ke ‵kalo tatou mai te tapea‵pea kea‵tea mo te munatonu, e ‵tau o ‵poto tatou i te auala e fakaaoga ei ‵tou taimi. Kafai e se fakaeteete tatou, ka mafai eiloa o fakaaoga ne tatou a taimi e uke ki fakafiafiaga, ki mea e fia‵fia tatou o fai, ki te itaneti io me ko te onoono ki te televise. E tiga eiloa a mea konei e se ne mea ma‵sei i a latou eiloa, kae e mafai eiloa o kaisoa ne tatou a taimi ne fakaaoga sāle ne tatou ki te faiga o ‵tou sukesukega totino mo nisi mea aka faka-te-agaga ki mea fakafia‵fia konei. Ke onoono tatou ki te mea ne tupu ki se tuagane Kelisiano e igoa ki a Emma. * Mai te taimi koi talavou ei a ia, ne fiafia eiloa tou fafine ki solofanua. I so se taimi e maua ei ne ia se avanoaga, tenā loa te mea ne fai ne tou fafine, ko te tele atu i te solofanua. I se taimi mai tua, ne kamata o se ‵lei ana lagonaga ona ko te uke o ana taimi e fakamāumāu faeloa ki te tele i te solofanua. Ne fai ne tou fafine a fakama‵fuliga kae ne manumalo eiloa a tou fafine fakamuli i ei. Ne fakamalosi atu ki tou fafine a te ‵tala o Cory Wells, se tino e tafao sāle i te tafaoga fakatau‵tele solofanua. * Nei la, ko fiafia a Emma ke fakaaoga ana taimi e uke ki mea faka-te-agaga fakatasi mo tena kāiga faka-te-agaga mo taugasoa. Ko pili kae ‵lei foki a tena fesokotakiga mo Ieova, me e iloa ne tou fafine me e fakaaoga ne ia a ana taimi ki mea aoga.

9. E mafai pefea ne te manako malosi ki koloa faka-te-foitino o fakamalosi atu ki nisi tino ke sē ‵saga atu ki mea faka-te-agaga?

⁹ Koloa faka-te-foitino. Kafai e ma‵nako tatou o tumau i te sa‵sale i te munatonu, e ‵tau o tuku ne tatou a koloa faka-te-foitino i te olotou tulaga tonu. I te taimi ne tauloto ei ne tatou a te munatonu, ne fakatulaga lua ne tatou a koloa faka-te-foitino ki mea faka-te-agaga. Ne fia‵fia eiloa tatou o fai a fakama‵fuliga konei ko te mea ke sa‵sale tatou i te munatonu. Kae i te gasologa o taimi, e mafai o lavea ne tatou a nisi tino e ‵togi ne latou a tivaisi ‵fou io me ko nisi koloa faka-te-foitino. Ko kamata ei o mafau‵fau tatou me isi ne mea e seai i a tatou. Ona ko te sē lotoma‵lie ki kope kolā ko maua ne tatou, ko mafai eiloa o se ‵saga atu tatou ki mea faka-te-agaga, kae ko ‵saga loa tatou o fakaputu a koloa faka-te-foitino.  E fakamasaua mai ne te faifaiga tenei ki a tatou a te ‵tala e uiga ki a Tema. A tena fiafai malosi ki te “olaga tenei” ne iku atu loa ki te tiaki ne ia a tena olaga faka-te-taviniga telā ne fai fakatasi mo Paulo. (2 Timo. 4:10) Kae kaia la ne tiaki ei ne Tema a Paulo? E se fakaasi mai i te Tusi Tapu me ne fiafai malosi a ia ki koloa faka-te-foitino i lō a mea faka-te-agaga io me ko fakaiku eiloa ne ia ke fakagata a tena taviniga fakatasi mo Paulo. E mautinoa eiloa me e se ma‵nako tatou ke maua se vaegā manakoga penā e uiga ki koloa faka-te-foitino, ko te mea ke sē fakalavelave mai ki te ‵tou fia‵fia ki te munatonu.

10. Ke tumau i te sa‵sale i te munatonu, ne a fakamalosiga sē ‵lei e ‵tau o ‵teke atu tatou ki ei?

¹⁰ Fesokotakiga mo nisi tino. Ke tumau te sa‵sale i te munatonu, e se ‵tau o talia ne tatou a fakamalosiga sē ‵lei mai i nisi tino. I te taimi ne kamata ei o sa‵sale tatou i te munatonu, ne kamata o ‵fuli a ‵tou fesokotakiga mo taugasoa mo kāiga kolā e se ne Molimau a Ieova. Nisi tino ne malamalama i ‵tou tulaga; kae ko nisi ne fai eiloa pelā me ne tino ‵teke malosi ki a tatou. (1 Pe. 4:4) E tiga eiloa e taumafai malosi tatou ke ‵lei a ‵tou fesokotakiga mo kāiga kae atafai atu foki ki a latou, kae e ‵tau mo tatou o fakaeteete ke mo a eiloa e gutugutulua ko te mea fakafiafia fua ne tatou a latou. Ka taumafai eiloa tatou ke fai ke ‵lei a ‵tou fesokotakiga mo ‵tou kāiga. Kae ke maina ‵lei foki tatou i te faka‵pulaga i te 1 Kolinito 15:33, ke fai taugasoa fua tatou ki tino kolā e a‵lofa ki a Ieova.

11. E mafai pefea o ‵kalo kea‵tea tatou mai i faifaiga kolā e se fakavae ki te Tusi Tapu?

¹¹ Mafaufauga mo amioga sē amioatua. A latou katoa kolā e sa‵sale i te munatonu e ‵tau o tapu. (Isa. 35:8; Faitau te 1 Petelu 1:14-16.) I te taimi ne ‵kau mai ei tatou ki te munatonu, ne fai katoa ne tatou a fakama‵fuliga ki ‵tou olaga ke fakafetaui aka mo tulaga amio‵tonu o te Tusi Tapu. Kae ne fai loa ne nisi o tatou a fakama‵fuliga ‵lasi ‵ki. Faitalia loa me se a te tulaga e oko atu tatou ki ei, e se ‵tau lele eiloa o toe fakatau atu ne tatou ki tua a ‵tou tulaga ‵mā kae tapu mō te lalolagi lailai tenei mo ana amioga ma‵sei. E mafai pefea o ‵kalo kea‵tea tatou mai i amioga ma‵sei penei? Ke toe mafaufau ki te ‵toe ‵togi lasi ‵ki telā ne ‵togi ne Ieova ko te mea ke tapu tatou—te toto tāua o tena Tama ko Iesu Keliso. (1 Pe. 1:18, 19) Ke fakatumau te ‵tou tulaga ‵mā i mua o Ieova, e ‵tau o fakatāua ne tatou a te taulaga togiola a Iesu Keliso i ‵tou loto mo ‵tou mafaufau.

12, 13. (a) Kaia e tāua i ei ke fakatumau te kilokiloga a Ieova ki aso fakamanatu? (e) Ne a mea ka sau‵tala nei tatou ki ei?

¹² Tuu mo aganuu mo faifaiga kolā e se fakavae ki te Tusi Tapu. Kāti e ma‵nako eiloa a kāiga, taugasoa i te galuega mo te akoga ke ‵kau atu tatou ki aso fakamanatu a latou. Kae e mafai pefea o ‵teke atu tatou ki fakamalosiga ke aofia tatou i tuu mo aso malō‵lo kolā e se faka‵malu atu ki a Ieova? E mafai ne tatou o fai penā māfai e mafau‵fau tatou ki te kilokiloga a Ieova ki vaegā faifaiga penā. E mafai o fesoasoani mai ki a tatou a te onoono ki manatu i ‵tou tusi kolā e fakaasi mai i ei te māfuaga o aso fakamanatu konā. Kafai e masaua ne tatou a pogai faka-te-Tusi Tapu e se ‵tau ei mo tatou o ‵kau ki aso fakamanatu konā, e mautinoa eiloa me ko sa‵sale atu tatou i te auala telā e “talia ne te Aliki.” (Efe. 5:10) A te talitonu ki a Ieova mo tena Muna ka puipui ei tatou mai te “mataku ki tāgata.”—Faata. 29:25.

¹³ A te sa‵sale i te munatonu se mea telā e ‵tau o fakatumau faeloa, ko te auala telā e fakamoe‵moe ke tau‵tali atu tatou i ei ke oko eiloa ki te se-gata-mai. E mafai pefea o fakamalosi aka ne tatou a ‵tou fakaikuga ke tumau i te sa‵sale i te munatonu? Ke onoono nei tatou ki auala e tolu.

14. (a) Ka fakamalosi aka pefea a ‵tou fakaikuga ke tumau i te ‵togi ne tatou te munatonu kae ke mo a ma fakatau atu ki tua? (e) Kaia e fai ei a te poto, polopolokiga, mo te malamalama e pelā me ne mea tāua ‵ki?

¹⁴ Muamua la, ke tumau i te sukesuke ki muna‵tonu tāua mai te Muna a te Atua kae mafaufau ‵loto ki ei. E tonu, ke ‵togi a te munatonu mai te fakaavanoa faeloa ou taimi ke fai au sukesukega ke maua ne koe a muna‵tonu tāua mai te  Tusi Tapu. A te fai penā, ka fai ei ke ‵poko tou loto fakafetai ki te munatonu kae ka fakamalosi aka ei tau fakaikuga ke mo a e fakatau atu ne koe a te munatonu ki tua. E se gata fua i te ‵togi ne tatou a te munatonu, e fai mai te Faataoto 23: 23 me e ‵tau foki o ‵togi ne tatou a te “poto mo polopolokiga mo te malamalama.” E se ‵tau fua o maua ne tatou a te iloaga e uiga ki te munatonu, kae e ‵tau foki o fakagalue aka i ‵tou olaga. Ona ko te malamalama, ka maina lei tatou i te fetaui ‵lei o muna katoa a Ieova. Kae ka fakamalosi aka ne te poto ke fai ne tatou a mea kolā e iloa ne tatou. I nisi taimi, e polopoloki eiloa tatou ne te munatonu, ke fakaasi mai i ei a ‵fuliga kolā e ‵tau o fai ne tatou. Ke taumafai malosi faeloa tatou o tau‵tali ki manatu fakatonutonu konā. Me e tāua atu i lō siliva.—Faata. 8:10.

15. E puipui pefea tatou ne te fusi o te munatonu?

¹⁵ A te lua o mea, ke puke‵mau ki tau fakaikuga ke ola e ‵tusa mo te munatonu i aso takitasi o tou olaga. Ke ‵sai fakatamilo ne koe a te fusi o te munatonu i tou taugasulu. (Efe. 6:14) I aso o te Tusi Tapu, a te fusi telā e fakaaoga ne se sotia e puipui i ei tena taugasulu mo tena foitino. Ko te mea ke maua ne ia a te puipuiga telā e manakogina mai i tena fusi, e ‵tau loa o ofi ‵lei a tena fusi. A te fusi telā e saosao ka sē aoga malosi ki a ia. Kae e puipui pefea tatou ne te ‵tou fusi faka-te-agaga? Kafai e fusi ne tatou a te munatonu ke ‵mau ‵lei, ka puipui eiloa ne ia tatou mai mafaufauga sē ‵lei kae ka fesoasoani mai foki ke fai ne tatou a fakaikuga ‵lei. Kafai e fakaosoosogina tatou io me fe‵paki tatou mo tulaga faiga‵ta, ka fakamalosi aka ne muna‵tonu mai te Tusi Tapu a ‵tou fakaikuga ke fai faeloa ne tatou a te mea tonu. E se mafaufau eiloa se sotia o fano ki te taua e aunoa mo tena fusi, kae e penā foki loa tatou, e se ma‵nako tatou ke fakasaosao io me tapale kea‵tea ne tatou a te ‵tou fusi o te munatonu. I lō te fai penā, e fai eiloa ne tatou a te ‵toe mea e mafai o fai ke ‵mau ‵lei i ‵tou foitino mai te ola e ‵tusa mo te munatonu. A te suā mea e aoga i ei a te fusi o te sotia ko te koga e ‵sulu ne ia ki ei a tena pelu ko te mea ke vave o tapale ne ia. Ka sau‵tala nei tatou ki te suā auala telā e fakamalosi aka ei ‵tou fakaikuga ke tumau i te sa‵sale i te munatonu.

16. I te auala fea e fakamalosi aka ne te akoako atu o te munatonu ki nisi tino ke tumau tatou i te sa‵sale i te munatonu?

¹⁶ A te tolu o mea, ke lasi ‵tou tusaga e fai i te akoako atu o te munatonu mai te Tusi Tapu ki nisi tino i so se avanoaga e maua ne tatou. I te auala tenei, ka ‵piki ‵mau eiloa i ou lima a te pelu faka-te-agaga telā ko te “muna a te Atua.” (Efe. 6:17) E mafai ne tatou katoa o taumafai ke faka‵lei aka a te auala e fai ei a ‵tou akoakoga e pelā me ne faiakoga apo mai te “akoako ‵tonu eiloa ne [tatou] te munatonu.” (2 Timo. 2:15) I te taimi e fakaaoga ne tatou te Tusi Tapu ke fesoasoani atu ki nisi tino ke ‵togi ne latou te munatonu kae ke ‵kalo kea‵tea mai akoakoga ‵se, ko faka‵mautakitaki ne tatou a muna a te Atua i ‵tou mafaufau mo ‵tou loto. I te auala tenei, ka fakamalosi aka ei a ‵tou fakaikuga ke tumau tatou i te sa‵sale i te munatonu.

17. Kaia e tāua ‵ki ki a koe a te munatonu?

¹⁷ A te munatonu se meaalofa tāua ‵ki mai i a Ieova. E auala i te meaalofa tenei, ko maua ei ne tatou a te ‵toe kope tāua ‵ki, ko te ‵tou fesokotakiga ‵pili mo te ‵tou Tamana faka-te-lagi. Ne akoako mai ne Ieova a mea e uke ki a tatou, kae ko te kamataga fua tenā! Kae e tauto mai a ia me ka akoako faeloa ne ia tatou ki te se-gata-mai. Tela la, ke fakatāua a te munatonu e pelā me se penina ‵togi ‵mafa. Ke tumau i te “‵togi mai a te munatonu kae ke mo a eiloa e fakatau atu ki tua.” Kae e pelā mo Tavita, ka tausi ne koe a tau tautoga tenei ki a Ieova: “Au ka sasale i tau munatonu.”—Sala. 86:11.