“我要按你嘅真理而行”
“耶和華啊，求你將你嘅道路指教我，我要按你嘅真理而行。”——詩篇86:11
1-3． （甲）我哋對聖經真理應該有點樣嘅睇法？請舉例。（請睇吓課文開頭嘅圖片）（乙）我哋會喺呢篇課文討論乜嘢問題？
人喺商店買咗嘢之後退貨，係好普遍嘅事。喺某啲國家，店鋪售賣嘅商品估計有將近9%會被消費者退貨。而根據某啲數據顯示，網購商品嘅退貨率甚至超過30%。可能消費者覺得商品唔符合佢哋嘅期望、有瑕疵又或者只係唔合心意，就提出換貨或者退貨。
2 雖然我哋買咗商品之後有可能會退貨，不過，我哋一旦“買”到聖經知識，即係“確切認識真理”，就絶對唔會退貨或者“賣出”。（請讀箴言23:23；提摩太前書2:4）正如上一篇課文討論過嘅一樣，我哋為咗得到真理付出咗好多時間嚟學習。另外，為咗買真理，我哋可能放棄咗收入豐厚嘅工作，要應付人際關係嘅變化，亦都要調整自己嘅思想行為，或者棄絶耶和華唔悦納嘅傳統習慣。不過，同我哋得到嘅福分相比，我哋付出嘅代價真係好少。
3 為咗表明王國真理嘅價值，耶穌講咗一個尋找上好珍珠嘅商旅嘅比喻。一個商旅揾到一粒價值連城嘅珍珠，就“即刻去賣晒”自己嘅一切去買嗰粒珍珠。（馬太福音13:45,46）我哋通過上帝嘅話語揾到真理嗰時，可能都有同樣嘅感覺。上帝王國以及其他寶貴嘅真理，對我哋嚟講有非凡嘅價值。所以，為咗得到呢啲真理，我哋願意馬上作出犧牲。如果我哋珍視得到嘅真理，就絶對唔會“賣出”。不過好可惜，上帝嘅一啲子民睇唔出自己擁有嘅真理有幾咁大嘅價值，甚至將真理賣出去。願呢啲事永遠唔會發生喺我哋身上！為咗表明我哋非常珍視真理而且絶對唔會賣真理，我哋必須聽從聖經嘅勸告，“按真理行事”。（請讀約翰三書2-4）呢個意味住，我哋要將真理放喺首位，而且要實踐出嚟。而家，我哋會討論以下嘅問題：有啲人點解會“賣出”真理？點樣“賣出”？我哋可以點樣避免犯呢個可悲嘅錯誤？我哋可以點樣强化自己“按真理行事”嘅決心？
有啲人點解會“賣出”真理？點樣“賣出”？
4． 點解1世紀有啲人會“賣出”真理？
4 喺公元1世紀，有啲人起初積極響應耶穌嘅教導，可惜佢哋冇繼續按真理行事。例如，耶穌施行奇迹餵飽咗一大群人之後，呢群人就跟住耶穌去到加利利海嘅另一邊。喺嗰度，耶穌對佢哋講：“如果你哋唔食人子嘅肉，唔飲佢嘅血，就冇生命喺你哋裏面。”佢哋聽到耶穌嘅話就覺得好震驚。佢哋冇問耶穌呢番話係咩意思，而係話：“噉樣嘅話駭人聽聞，邊個聽得入呢？”結果，“佢門徒當中有好多人離開，耽於已經撇低嘅事，唔再與佢同行”。（約翰福音6:53-66）
5,6． （甲）點解今日有啲人冇繼續持守真理？（乙）一個人可能會點樣慢慢離開真理？
5 好可惜，今日有啲人冇繼續持守真理。有啲人可能係因為唔接受經文嘅新理解，而有啲人可能係俾一個有職責嘅弟兄嘅所言所行絆倒。亦有啲人可能因為受到嚟自聖經嘅勸告，又或者同其他基督徒同工性格不合而離開真理。仲有啲人支持叛道者同其他反對者，歪曲我哋嘅信仰。結果，有啲人就噉樣“離棄”咗耶和華同會衆。（希伯來書3:12-14）如果佢哋好似使徒彼得噉持守信仰，繼續信賴耶穌，情況就會好好多嘞！當耶穌問使徒係咪想離開嗰時，彼得即刻回答話：“主啊，我哋仲歸附邊個呢？你有永生嘅話語啊。”（約翰福音6:67-69）
6 有啲人好似一隻逐漸遠離岸邊嘅船噉，不知不覺慢慢離開真理。聖經將呢種緩慢嘅變化叫做“隨流漂去”。（希伯來書2:1）同嗰啲故意離棄真理嘅人唔同，隨流漂去嘅人並唔係刻意噉樣做嘅。不過，呢啲人可能最終會失去同耶和華親密嘅關係。我哋可以點樣避免噉樣嘅悲劇發生？
我哋可以點樣避免賣出真理？
7． 乜嘢可以幫助我哋唔會賣出真理？
7 為咗繼續按真理行事，耶和華所講嘅一切我哋都必須接受同遵行。我哋要將真理放喺生活首位，按照聖經原則嚟生活。大衛王向耶和華禱告嘅時候話：“我要按你嘅真理而行。”（詩篇86:11）大衛決心繼續堅定噉按上帝嘅真理行事，而我哋亦都必須噉樣做。否則，我哋就可能會開始諗，自己為真理犧牲咗乜嘢，或者點樣可以攞返曾經失去咗嘅嘢。我哋唔能够選擇接受某啲真理，但係就忽略另一啲。總而言之，我哋必須按照“全部真理”嚟行事。（約翰福音16:13）上一篇課文討論過，我哋為咗得到真理可能喺五方面付出代價。而家嚟睇吓，我哋可以點樣確保自己唔再攞返呢啲已經付出嘅嘢。（馬太福音6:19）
8． 唔明智噉使用時間會點樣導致一個基督徒不知不覺噉離開真理？請舉例。
8 時間。為咗避免不知不覺噉離開真理，我哋必須善用時間。如果我哋唔留意，就可能會喺娛樂、愛好、瀏覽互聯網或者喺睇電視方面耗費過多嘅時間。雖然做呢啲事唔係錯嘅，但係就會佔用個人研讀同埋其他屬靈活動嘅時間。請睇吓愛瑪姊妹嘅例子。 *愛瑪自細就好鍾意馬。只要有機會，佢就會去騎馬。一段時間之後，佢開始覺得自己唔應該將所有嘅時間都用喺個人愛好之上。佢想將自己嘅愛好放喺適當嘅位置，最終成功作出調整。佢亦都從表演花式馬術嘅科莉·韋爾斯姊妹嘅經驗得到鼓勵。 *愛瑪而家好開心可以多啲參與屬靈活動，亦都有更多時間同基督徒家人、朋友喺一齊。佢因為善用時間而感到快樂，亦都覺得同耶和華有更親密嘅關係。
9． 追求物質財富點樣使一啲人將屬靈嘅事放埋一邊？
9 物質財富。我哋想繼續按真理行事，就唔能够太過重視物質財富。我哋學習真理之後，會意識到追求屬靈目標比追求物質財富更加重要。為咗追求真理，我哋好樂意放棄任何物質嘅嘢。不過，隨住時間過去，我哋見到其他人買最新嘅電子産品，或者享用其他用錢買到嘅嘢，就可能覺得自己錯過咗享受嘅機會，而唔再只係滿足於生活嘅必需品。我哋可能為咗積存物質財富，會將屬靈嘅追求放埋一邊。呢個令我哋諗起底馬。佢因為“貪戀呢個制度”，就唔再同使徒保羅一齊事奉上帝。（提摩太後書4:10）點解底馬離開保羅？聖經冇講，不過可能係因為佢貪戀物質嘅嘢就唔重視為上帝服務嘅機會，又或者佢唔想再同保羅一齊過自我犧牲嘅生活。我哋肯定唔希望自己對物質財富嘅慾望再次死灰復燃，以致失去對真理嘅愛。
10． 為咗按真理行事，我哋必須抵受乜嘢壓力？
10 人際關係。我哋想繼續按真理行事，就絶對唔可以因為其他人嘅壓力而屈服。我哋開始按真理行事，同其他非見證人以及家人嘅關係就會發生改變。可能有啲人會尊重我哋嘅新信仰，但亦都有啲人會公然反對。（彼得前書4:4）雖然我哋盡力同家人維持和睦嘅關係，仁慈噉對待佢哋，但係我哋要小心，唔好為咗取悦佢哋而喺真理上妥協。基於哥林多前書15:33提出嘅明確勸告，我哋只會同嗰啲愛耶和華嘅人有親密嘅友誼。
11． 我哋點樣可以避免唔敬虔嘅思想行為？
11 唔敬虔嘅思想行為。所有按真理行事嘅人都必須聖潔。（以賽亞書35:8；請讀彼得前書1:14-16）為咗符合聖經嘅正義標準，所有認識真理嘅人都必須作出調整，有啲人甚至要作出重大嘅改變。無論喺乜嘢情況下，我哋都絶對唔會用我哋純潔嘅生活嚟換取不道德嘅生活。乜嘢可以幫助我哋避免向不道德嘅行為屈服？我哋要沉思耶和華為咗使我哋成聖而付出嘅代價，就係佢愛子耶穌基督嘅寶血。（彼得前書1:18,19）我哋如果想喺耶和華面前保持潔淨，就要謹記耶穌贖價嘅價值。
12,13． （甲）點解清楚了解耶和華對節日嘅睇法好重要？（乙）接住落嚟我哋會討論乜嘢？
12 唔敬虔嘅傳統習慣。家人、同事、同學可能會嘗試説服我哋參加佢哋嘅慶祝活動。乜嘢可以幫助我哋拒絶參加呢啲令耶和華不悦嘅習俗同節日？我哋要清楚了解耶和華對呢啲活動嘅睇法。我哋可以温習吓出版物入面關於節日起源嘅内容。我哋沉思唔參加呢啲節日嘅聖經理由，就可以確信自己係按“主所悦納嘅”方式行事。（以弗所書5:10）只要信賴耶和華同聖經真理，我哋就唔會“戰兢懼怕人”。（箴言29:25）
13 按真理行事係一個持續嘅過程，係一條我哋希望永遠行走嘅道路。我哋可以點樣强化自己按真理行事嘅決心？以下會討論三個方法。
强化按真理行事嘅決心
14． （甲）不斷買真理點樣强化我哋永遠唔會賣出真理嘅決心？（乙）點解智慧、管教同悟性必不可少？
14 第一，繼續學習並沉思上帝話語嘅寶貴真理。冇錯，我哋要買真理。但點樣買呢？就係要經常撥出時間吸收上帝話語當中寶貴嘅真理。噉樣做可以加深我哋對真理嘅體會，强化我哋永遠唔會賣出真理嘅決心。除咗買真理，箴言23:23話，我哋亦都應該買“智慧、管教、悟性”。我哋淨係知道聖經真理係唔够嘅，仲必須喺生活上將真理運用出嚟。悟性可以幫助我哋清楚睇出，耶和華所講嘅一切係和諧一致嘅。而智慧會推動我哋實踐所學到嘅知識。有時，真理會管教我哋，使我哋知道自己需要喺邊方面作出調整。願我哋時刻聽從呢啲管教。聖經話，管教嘅價值遠遠超過銀子。（箴言8:10）
15． 真理嘅腰帶點樣保護我哋？
15 第二，每日堅定不移噉按照真理生活。聖經將真理比作士兵嘅腰帶。（以弗所書6:14）喺聖經時代，腰帶可以為士兵嘅腰部提供支撑力同保護。不過，腰帶要束緊先至可以有效噉發揮作用。如果腰帶鬆咗嘅話，就起唔到支持同保護嘅作用嘞。我哋屬靈嘅真理腰帶點樣保護我哋呢？我哋將真理好似腰帶噉緊緊束上，就可以免受錯誤嘅理論影響，同時能够作出明智嘅決定。我哋受到誘惑或者遭受考驗嘅時候，聖經真理會幫助我哋堅定不移噉做正確嘅事。正如一個士兵會確保自己束緊腰帶先至去作戰，我哋都應該下定決心，永遠唔會鬆開或者除低我哋真理嘅腰帶，確保自己將真理應用喺生活嘅每一方面。腰帶嘅另一個作用係方便士兵掛劍。接住落嚟，我哋會睇吓另一個幫助我哋繼續堅定噉按真理行事嘅方法。
16． 向人分享真理點樣强化我哋繼續按真理行事嘅決心？
16 第三，盡力向人分享聖經真理。呢個方法可以幫助你緊握屬靈嘅劍，即係“上帝嘅話語”。（以弗所書6:17）我哋所有人都可以努力提高自己嘅教導技巧，“正確噉運用真理嘅話語”。（提摩太後書2:15）我哋用聖經幫助人買真理同埋拒絶錯誤道理嘅時候，就會將上帝所講嘅刻喺自己嘅内心同頭腦。噉樣做，我哋繼續按真理行事嘅決心就會受到强化。
17． 點解真理對你好寶貴？
17 真理係嚟自耶和華嘅寶貴禮物。呢份禮物使我哋得到最貴重嘅財産，就係我哋同天父親密嘅關係。我哋而家已經從耶和華嗰度學到好多知識，但呢一切都只係啱啱開始！上帝向我哋保證，佢會永遠教導我哋。要珍視真理，將真理當作價值連城嘅珍珠，要繼續“買真理，唔好賣出”。噉你就可以好似大衛一樣，實踐向耶和華作出嘅承諾：“我要按你嘅真理而行。”（詩篇86:11）
