1-3. (a) Wai du si aida ani naabi gu rengo nga ga Ziazia Kekeapai? Oni funga kpiapai. (Oni bi agu asura duti tonatonaha.) (b) Gini asanahe ani nika wisigoho rogo gi kekeapai re?

AREME, gu sino nga ga ngbehe kini ru ka gasaha berewe ima kio dagba aboro. Agu aringbisapai i namangihe nayugo gupai nga rogo kura aringara, aboro nagasa ribua rii kama nga ga agu ahe i angbehe rogo ababagaahe. Na agu ahe aboro angbehe rogo Internet kini gasihe ima rengba ka susa 30 rii kama. Isoke, i nagasaha mbiko gupai nga guhe re angbanga tiyo wa gu i aaberãpaha te na watadu pai kinaho duti ni. Sidu, i namanga diaberã singia ka dia gu kuraha kubaha watadu i karaga gayo marã.

² Wa vura duhe nga ani ima rengba ka karaga guhe ani nangbehe, si aidanga ani karaga watadu ani “bági” gu “inahe nga ga rengo” du rogo Ziazia Kekeapai yo nga gu ani ‘angbehe’ te. (Oni gedi Asanza 23:23; 1 Tim. 2:4) A wa ani abihe rogo gu kekeapai naadu mbata fu gere, ani agbia rengo ni dia ani bakere regbo ka wirikaha. Kurigure, tipa ka ngbe rengo, si rengbe kadu nga ani aima mbupa wene sunge marã, gaani pagume na aboro ki ima ariatihe, na ani ki ima manga aˈariapai rogo gaani aberã gbiati mangaapai watadu ki ima mbu gu sino mangaapai a adunga mburuhe rii Ziazia Kekeapai ya. Ono tie, agu ahe dunduko ani ambupaha ima  du na paha kusende kisusi agu amaku ani nagbiaha.

³ Ho daha ni tipa gu rengo nga ga Ziazia Kekeapai, ani nadu wakina gu kumba Yesu afura tipa ko rogo gako sanza yo. Tipa ka yugo wai nyakipa gu rengo nga ga ga Mbori Kindo fu agu aboro nagbiaha, Yesu afura tipa babagiahe nga guko nagbata wene ambia fongo na ki gbia kuraha sa. Ho ko agbiaha ni, ko abagi agu ahe dunduko ni ipo naadu beko tipa ka ngbe gu mbia fongo re. (Mt. 13:45, 46) Wakina gure a, gu rengo du tipa ga Mbori Kindo gbiati gu nyanyakipa arengo dunduko ani awirikihe rogo Fugo Mbori yo, paha aima nyaka ni kerehe furani si ki sa gupai nga ani mbupa kura ahe ni ipo tipa ka gbiaha. Ka ani aabi paha kindi na nyanyakipaha, ani “bági nga ha” te. Ono tie, si nafu kina gberãrago nga, kura ga Mbori aboro aima mbu bi rengo na nyanyakipaha na zavura ki ima bagaha. Ka gupai re ya mangingo tipa rani ya! Tipa ka yugo gupai nga ani nabi rengo na nyanyakipaha na ani aidanga ka bagaha te, si naida ani irisi gu rugute Ziazia Kekeapai afuhe nga kaa ‘ta rogo rengo’ yo. (Oni gedi 3 Yoane 2-4.) Ta rogo rengo yo nakoda raka kutini, kini moihe ni bambatapai rogo gaani raka yo na kini mangi apai ringbisihe kutini. Ani wisigingo agi asanahe re: Tipagine rengbe kura aboro ka ‘baga’ rengo ti ni, na wai du rengbe yo ka bagaha? Waigu rengbe ani ka bandatirani ti manga gu kere ingahe re? Waigu rengbe ani ka nyakasa gu diaberã ani namangihe kaa ‘ta rogo rengo’ yo?

4. Tipagine kura aboro ‘abagi’ rengo ti ni rogo bambata sa kama agarã?

⁴ Rogo bambata sa kama agarã, agu aboro naaima dia agu ayugopai nga ga Yesu kugume aima ye ki mbu ta rogo rengo yo. Ni kpiapai, ho Yesu ambiisi bakere rimbasa aboro ni ngba iiriwo gene, gu rimbasa aboro re apeke ko ku rogo kura papara Baime Gariraya. Ho i adu ni yo, Yesu apepai nga gu naaima iriwo tiyo, ko aya: “Ka oni ari nga pasio Wiri boro ki mbiri kureko ya, unga du nga kpotoroni yo te.” Kuba gupai nga i sana Yesu ko sakirogo gupai yo ko apehe re, gu ga Yesu afugo re akotosi yo na i ki ya: “Nyanyaki pai nga gere; da ka gi he?” Ni sangbana gipai re, “dungu gako abawiriki ki karaga tiyo fuo agu ahe i ambuhe ni giiyo ka i ata nga na ko berewe ya,” NW—Yo. 6:53-66.

5, 6. (a) Tipagine kura aboro naguari ti ni kusayo rogo rengo yo ti gi gaani regbo re? (b) Waigu rengbe boro kaa mbu rengo yeeye?

⁵ Si nafu kina gberãrago nga, kura aboro kinaho areme naima guari kusayo rogo rengo yo. Aguyo kinaho nakoto mbiko gupai nga ariapai rogo giarogo veresi yo amangi, watadu mbiko gupai nga gu wirina i naima ino ni gbe agumbapai watadu amangipai nga gu nafudi yo. Agu akurayo kinaho a nakoto mbiko gupai nga i agbia rugute nga ga Ziazia Kekeapai ka si angbanga tiyo ya, watadu pai amangi dagbayo na kura Kristano rogo dungurati. Berewe a, agu akurayo kinaho naatona ngbe na abasamungu kuti ndikidi pambori gbiati kura asogo rengo nga aguyo naˈaria gaani aida. Ni sangbana gipai re, aguyo kini diberã ka “gauri” kusayo ti Yekova gbiati dungurati. (Eb. 3:12-14) Ono ka i akakuti gayo idapase na kini kido kindi kuti Yesu wa gu gu mokedi nangia Petero amangihe, gure kaa ngba kisusi! Ho Yesu asana apefuoko ni singia i naida ka mbuko tigayo a, Petero akaragapai ni ipo ki ya: “Gbia, ani andú koyo du da ni? Wa du mo du agu apai be ro nga ga nyenye unga.”—Yo. 6:67-69.

⁶ Kura aboro kinaho natona mbu rengo yeeye, isoke zanga i ini he. Gu boro nambu rengo yeeye, ni wakina gu kurungba nabitikpa yeeye kusayo ti ngba ime. Ziazia Kekeapai nayamba gu ngbatunga ariapai namanga yeeye re nga, ‘bitikpa’ kusayo. (Eb. 2:1) Gu boro nabitikpa kusayo rogo rengo yo kia ti gu boro nadiaberã ka guari kusayo rogo rengo yo, bambiko ni nabitikpa kusayo rogoyo ka ni  ainongo aino ya. Ono tie, ngbatunga gu boro re nambu gani pagume na Yekova si da ni rurungburaha na ni ima rengba ka zangaha kusa. Waigu rengbe ani ka bandatirani ti ngbatunga gu ingahe re?

7. Ginipai nika undo rani tipa ani bandatirani ti baga rengo?

⁷ Tipa ka ta rogo rengo yo, si naida ani di afugo Yekova dunduko kugume na kini irisihe. Si naida ani moi pa rengo mbatayo rogo gaani raka yo na kini raki ringbisihe kuti agu abangua arengo nga ga Ziazia Kekeapai. Davide amangi kidohe fu Yekova rogo kparakpee yo ki ya: ‘Mi ata kina rogo ga rengo.’ (Tam. 86:11) Davide aima diaberã ka ta rogo rengo yo. Ani tigaani a, si naida ani diberã nyanyaki kaa ta rogo ga Mbori rengo yo. Ka ani aamanganga ha wo ya, ani ima rengba ka tona kaa berã tipa agu ahe ani ambupaha tipa rengo na zavura ani ima rengba kaa ida kadu na agu ahe re berewe. Ono tie, si naida ani kakuti rengo nabaha. Ani ima rugatirani na gupai nga ani arengbanga ka sia ka ida na kura arengo nga ga Ziazia Kekeapai ki mbu agu akuraha te. Si naida ani naata rogo ‘rengo dunduko.’ (Yo. 16:13) Ani bingo agu apai bisue si narengbe kadu nga ani aima mbupaha tipa rengo. Pa manga ani he wo nika nyakasa gaani diaberã ka zanga berãpa dia bete agu ahe berewe ani ambupaha tipa rengo.—Mt. 6:19.

8. Waigu rengbe gu gene Kristano amangasunge ngbaha na gani regbo ka sa ni ni bitikpa kusayo ti rengo? Oni funga kpiapai.

⁸ Regbo. Tipa ka bandatirani ti bitikpa kusayo ti rengo, si naida ani mangisunge ni tatamana na gaani regbo. Ka ani adunga na rubangirise ya, ani ima rengba kaa dia bakere regbo kuti agu apai nga ga zambuasitise, agu apai ani agbia ngbarago ti mangaha, gbata apai rogo Internet, watadu bi terevizioni. Wa vura duhe nga agi apai re agberãnga te, gu regbo ani adiaha kutini ima rengba ka tona koda gu regbo ani anaadiaha mbata kuti gaani wisigopai nisase gbiati agu apai nga ga toro. Oni bingo gupai namangi tipa kura Kristano sa du rimori nga Emma. * Mbu Emma kindi ni wiri paranga ri, ri aima kpinyemu afarasi. Ho ri anigbia momu ni, ri anaandu kaa ora rira. Tifuo bete regbo, rago atona kaa gberã tiri tipa gu bakio regbo ri anaadiaha kuti gipai nanaafu ngbarago furi re. Ri amangi aˈariapai na ni niyangaraha ri ki tona kaa maa zambuasitise rogo gaha ndikidi bangiriba. Ri aima gbia ngarasaro a ti gu pangbanga nga ga Cory Wells, nga guri naadu mbata ni naoro rii afarasi. * Emma nagbia ngbarago awere ti dia bakere regbo kuti agu apai nga ga toro gbiati dia bakere regbo na gari aborokporo nga aKristano gbiati abakureari. Ri nabi tiri nga ri mbembedi gbe na Yekova na kidu na zereda mbiko ino ri gupai nga ri namangasunge na gari regbo na tatamana.

9. Waigu pa gbata aũzegino narengbe ka sa kura aboro i moi agu apai nga ga toro kusayo?

⁹ Aũzegino. Ka ani aida kaa ta kindi rogo rengo yo, si naida ani moi aũzegino rogo gaha ndikidi bangiriba. Ho ani awiriki rengo ni, ani amoi gu nyemuahe nga ga zegino rogo ue bangiriba, agu apai nga ga toro kidu rogo bambata bangiriba. Ani adu na ngbarago ka mbupa agu ahe nga ga zegino tipa kaa ta rogo rengo yo. Ono tie, fuo regbo kusa, ani ima rengba kaa bi kura aboro i ningbeke vovo akompiuta na afõni gbiati gu kura ahe nga ga zegino. Gipai re ima rengba ka sarani ani naabi tirani nga ani nazanga wene apai. Si rengbe ka sarani ka ani rengbenga berewe be kina agu ahe du berani ya, si ki sa gupai nga ani moi pa gbata aũzegino mbatayo fu agu apai nga ga toro. Ngbatunga gu mangapai re natingida rani na gupai namangi tipa Dema. Padu ko na “nyemu gi zegino re” asako ko mbu gu sunge i aamangaha na gu mokedi nangia  Pauro. (2 Tim. 4:10) Tipagine Dema ambu Pauro ti ni? Singia ko akpinyemu aũzegino kisusi agu apai nga ga toro, watadu ko aadunga berewe na nyemu mbupa agu apai ko aamangaha tipa ka mangasunge na Pauro te, Ziazia Kekeapai agumbanga ha furani te. Gupai du ni rengo nga, si aidanga ani zingisi gaani nyemupai tipa aũzegino berewe na ki mbu gu nyemupai re si fu rii gaani nyemuse tipa rengo te.

10. Gini maapai kurii si aida ani nehe tipa kaa ta kindi rogo rengo yo?

¹⁰ Pagume na aboro. Tipa kaa ta rogo rengo yo kindi, si aidanga ani mbu gu maapai kurii nga ga kura aboro si du na maapai kurii rani te. Ho ani atona ta ni rogo rengo yo, gaani pagume na agu aboro airisongo Yekova ya gbiati agumerani aima ariatihe. Agu akurayo kinaho naairisa gaani vovo aida airisa; ono ka aguyo aidanga na ni ya. (1 Pet. 4:4) Wa vura duhe nga ani namanga nyanyaki asadatise amanga tipa kadu na wene pagume dagbarani na gaani aborokporo na kini mangipai na yo ngba wene gene, si naida ani du na rubangirise tipa ka zanga mbu mangapai kuti ga Yekova arugute tipa ka sa ngbarago tiyo. Rengo ngaha nga, ani nikaa manga asadatise kindi tipa kadu na wene pagume dagbarani na gaani aborokporo. Ono ringbisihe kuti gu ziazia zahe du rogo 1 AKorindo 15:33, si naida ani du na mbembedi pabakure na kina agu aboro sa nakpinyemu Yekova.

11. Waigu rengbe ani ka ne bibiriko aberã na mangaapai?

¹¹ Bibiriko aberã na mangaapai. Agu aboro dunduko nata rogo rengo yo, si naida i du ni gigiri yo. (Yes. 35:8; oni gedi 1 Petero 1:14-16.) Ho ani aye ni ku rogo rengo, ani dunduko namangi aˈariapai tipa kaa pekafuo agu arugute nga ga Ziazia Kekeapai. Gu kura aboro kinaho namangi bakere aˈariapai. Singia ginigu naadu, si aidanga ani mbupa gaani gigiri raka tipa gu wasiwasi raka nga ga gi zegino re te. Waigu rengbe ani ka ne manga gupai du ni wasiwasihe? Mo berẽkurii guhe Yekova afuhe tipa ka sarani ani du ni gigiri rani; ko afu nyanyakipa kure Wiriko nga Yesu Kristo. (1 Pet. 1:18, 19) Tipa ani nye ni gigiri rani barabangiri Yekova, si naida ani naatingida pa wai nyakipa ga Yesu motumo tumorii ti aregbo dunduko.

12, 13. (a) Tipagine duhe ti ni ni nyanyakipa pai ka maa ga Yekova bipai tipa apumbo ku berãrani yo? (b) Ginipai ani nika wisigoho awere?

¹² Agu asino mangaapai adunga mburuhe rii Ziazia Kekeapai ya. Gaani aborokporo, abadiasunge, gbiati akuarani sukuru yo ima rengba ka asada ka sarani ani koditirani na yo rogo gu gayo apumbo yo afunga ngbarago fu Mbori ya. Waigu rengbe ani ka ká gu sosodahe rengbe yo ka ye na ni kuti rani tipa ani rimisi tirani ku rogo agu asino mangaapai gbiati apumbo afunga irisa fu Yekova ya? Ani rengbe ka kaha ni maa ani gu bipai ku berãrani yo ziazia du Yekova na ni tipa gu ngbatunga mangaapai re. Gu kurapai rengbe ka undo rani nga weteka gu gaani awaraga nayugopa wai agu apumbo badungu aboro amangaha aenge. Ho ani atingida tirani ni na gu nduapai Ziazia Kekeapai azahe ti ni ti manga ngbatunga agu apumbo re, ani nadu na gu kido nga ani nata ngba gu gene “ngba ti Gbia.” (Ef. 5:10) Ka ani akido kuti Yekova gbiati Fugoko, ani ‘gundenga be aboro’ te.—Snz. 29:25.

¹³ Ta rogo rengo yo nga gupai si aida ani naamangaha amanga kindi, na si nga gupai ani amaa bangirani kaa mangaha nyeanye kindi. Waigu rengbe ani ka nyakasa gu diaberã ani namangihe kaa ta rogo rengo yo nyeanye kindi? Ani wisigingo agene biata nga gu rengbe ani ka manga gipai re ngbaha.

14. (a) Waigu pa ngbe ani rengo kindi nika nyakasa gaani diaberã ka zanga bagaha? (b) Tipagine du tatamana, rugute, gbiati rugatinapai ti ni na nyanyakipaha?

¹⁴ Bambatapai nga, mo naawisigo agu arengo nga ga Fugo Mbori kindi na kini  berẽkuriihe. Nirengo, mo ngbe rengo ni dia mo regbo dedede kaa wisigo agu arengo nga ga Fugo Mbori. Manga mo ho wo nika kiiso gu tambuahe du mo na ni tipa rengo na ki nyakasi gamo diaberã ka zanga bagaha. Kupati gupai nga ka ngbe rengo, Asanza 23:23 nape gupai nga si naida ani ngbe “tatamana, na rugute, na rugatinapai a.” Si aidanga gupai nga ani du na kina gu inohe nga ga rengo gbua te. Si naida ani naamangapai kutini rogo gaani raka yo. Ho du ani ni na rugatinapai, ani narugatirani na gu ngbanya du dagba agu apai dunduko Yekova agumbaha. Tatamana nafõngbaduraniyo ani mangipai kuti gupai ani nainihe. Ti kura aregbo, rengo naruga rani niyugo agu abangiriba furani si aida ani mangi aˈariapai rogoho. Ani naadianga gu ngbatunga rugapai re adia ti aregbo dunduko kugume. Si ima du na nyanyakipaha kisusi feda.—Snz. 8:10.

15. Waigu rengo aundo rani wakina giri dimose?

¹⁵ Uepai nga, si naida mo mangi nyanyaki diaberã kaa raka ringbisitihe kuti rengo na aˈuru dunduko. Mo vo giri rengo dimo ro. (Ef. 6:14) Ti agu aregbo i aakeka Ziazia Kekeapai ti ni, giri dimose anaabanda banzengere ba vura yo. Tipa gu giri dimose re banda ni, si anaaida ni voho nyanyaki. Ka ni anivoho dopodopo, ka si anaaundongo ni wenengai te. Waigu rengo aundo rani wakina giri dimose? Ka ani vo rengo nyanyaki dimorani wakina giri dimose, si nika banda rani be gbegberẽ aberã na si nika undo rani ani mangi agu adiaberã du ni wenehe. Ho i asada rani ni watadu ho du ani ni rogo kerepai, gu rengo nga ga Ziazia Kekeapai nanyakasa gaani diaberã ka manga gupai du ni ruruhe. A kina wai banzengere aarengbanga ka berãpa nduge ku ba vura yo zanga gani giri dimose ya, si naida ani diberã ka zanga vo gaani giri dimose nga ga rengo dopodopo watadu ka zanga uraha kusayo. Kuba gure, si naida ani mangi ai gupai rengbe ani ka mangaha tipa ka mbuhe nyanyaki dimoroni ni raka ani ringbisihe kuti rengo. Kura sunge giri dimose angia banzengere anaamaa gaani basape ti ni. Gere naye na ani kuti gu kura gene nga gu rengbe ani ka nyakasa gaani diaberã ngbaha kaa ta rogo rengo yo kindi.

16. Waigu pa yugo ani rengo fu aboro anyakasa gaani diaberã kaa ta kindi rogo rengo yo?

¹⁶ Biatapai nga, mo naayugo gu rengo nga ga Ziazia Kekeapai fu aboro bakere gbe wa rengbe omero na ni. Rogo gi gene re, mo nika kakuti gaani basape nga ga toro nyanyaki, nga “Sangba Mbori.” (Ef. 6:17) Ani dunduko rengbe ka manga asadatise nyanyaki tipa kada ni wene abayugupai, “niyugu ga rengo pai nzunzu.” (2 Tim. 2:15) Ho ani amangasunge ni na Ziazia Kekeapai tipa ka undo aboro i ngbe rengo na ki ne agu apai angianga rengo ya, ani nazio afugo Mbori ku berãrani yo na ku kpotorani yo. Rogo gi gene re, ani kini nyakasi gaani diaberã kaa ta kindi rogo rengo yo.

17. Tipagine du rengo ti ni foro na nyanyakipaha?

¹⁷ Rengo nga nyanyakipa gamahe be Yekova. Vurube gi gamahe re, ani na nyanyakipa he berani kisusi, nga mbembedi pagume na gu Barani du ngbangbaturũ yo. Ko ima yugo badungu apai furani gbe, ono gure nga tonatonaha gbua! Mbori ima kido rani na gupai nga ko nikaa yugo pai furani nyeanye kindi. Sidu, mo naabi rengo na nyanyakipaha wakina wene mbia fongo. Mo naandu kindi kumbatayo kaa ‘ngbe rengo, na ka mo bagingo ho ya.’ Ka mo amangaha wo, mo nika du wakina Davide ki kakuti gu kidohe fu Yekova nga: ‘Mi ata kina rogo ga rengo.’—Tam. 86:11.