MITTAN kinagi ni Jesus: “Mas dakal i pagayaya ta pangiyawa anne ta pangalawa.” (King. 20:35) Yatun nga importante nga kinakurug ay meyaplika ta relasiottam kani Jehova. Kunnasi? Niddan ittam ni Jehova tu aru nga regalu nga namagayayya nittam, ngem mas magayayya ittam paga gukaban na pangiyawa tu regalu kani Jehova. Anni i meregalu tam kani Jehova? Kunna Proverbio 3:9: “Dayawammu si Jehova gukaban na nabalor ira nga pakkukuam.” Nelagum ta ‘nabalor ira nga pakkukua tam’ i tiempo tam, i talento tam, i sikattam, anna i material ira nga pakkukua tam. Nu usattam danatun nga pakkukua tam tapenu suportan i kurug nga paddayaw, iddiddattam tu regalu si Jehova, anna mas makapagayayya ittam megafu tatun.

Nu meyannung ta material ira nga pakkukua tam, anni i makoffun nittam tapenu ari mapagurayan i pangiyawa tu regalu tam kani Jehova? Kinagi ni apostol Pablo ta taga-Corinto nga “mangisina” ira para ta kontribusion. (1 Cor. 16:2) Anni i makuam tapenu makala tu mas aru paga nga informasion meyannung ta metodo ira na paddona nga posible ta lugarnu? Innan i kahon ta gukag.

Ari nga posible ta ngamin nga nasion i online nga paddona. Ngem, i informasion ta tanakuan nga metodo na paddona ay malegan ta web page na donasion. Ta karuan nga nasion, egga i tadday nga dokumento tatun nga page nga manabbag ta gagangay ira nga pakkiavu meyannung ta donasion.