JESUS kwa tente asi: “Kugava kwa kara nerago, kwa pitakana kutambura.” (Yirug. 20:35) Nonkango odo kwa tamba kelikwatakano lyetu naJehova. Monkedi musinke? Jehova kwa tu pa mauhwi gomanzi aga aga tu hafesa, nye nsene tu mu pa uhwi kuvhura ngatu gwane ruhafo rorunene. Uhwi musinke natu vhura kugava kwaJehova? Yisewe 3:9 kutanta asi: “O fumadeke HOMPA pokumupa nzambo zeyi yoyiwa po.” Eyi kwa kwatera mo udivi wetu nononkondo detu ntani yiweka yetu. Apa atu ruganesa yininke oyo mokukwatesa ko ukareli wousili, ose kuna kugava uhwi kwaJehova ntani ngatu gwanena mo ruhafo rorunene.

Ngapi natu vhura kuruganesa yiweka yetu mokugava uhwi kwaJehova? Mupositoli Paurusa kwa tanterere Vakolinte va ‘pungure ko yuma’ yipo va ka yi gave ngoyigava. (1 Kol. 16:2) Yisinke no rugana nsene ono hara kudiva ko yoyinzi kuhamena nonkedi dimwe domomukunda gweni omu no gava? Tara kakende konhi.

Moyirongo yimwe kapi mwa kara ewapaiko lyokugava yigava kupitira koIntaneta. Nye koIntaneta kuvhura kugwana ko mauzera kuhamena nonkedi dimwe dokugava yigava. Moyirongo yimwe, koIntaneta zetu jw.org kwa kara ko mauzera kuhamena mapuro aga ava pura vantu kuhamena yigava.