GYISƐSE hanle kɛ: “Anyelielɛ dɔɔnwo wɔ ɛmaanlɛ nu tɛla ɛlielɛ.” (Gyi. 20:35) Nɔhalɛ edwɛkɛ zɔhane fale yɛ nee Gyihova agɔnwolɛvalɛ ne anwo. Duzu ati ɔ? Gyihova ɛmaa yɛ ahyɛlɛdeɛ dɔɔnwo mɔɔ maa yɛ nye die a, noko yɛ nye bahola alie kpole saa yɛfa ahyɛlɛdeɛ yɛmaa Gyihova a. Ahyɛlɛdeɛ boni a yɛbahola yɛava yɛamaa Gyihova a? Mrɛlɛbulɛ 3:9 NW ka kɛ: “Fa wɔ ninyɛne mɔɔ sonle bolɛ la di Gyihova eni.” Yɛ “ninyɛne mɔɔ sonle bolɛ” la bie a le yɛ mekɛ, mɔɔ yɛkola yɛyɛ, yɛ anwosesebɛ nee yɛ nwonane afoa nu ninyɛne. Saa yɛfa ninyɛne ɛhye mɔ yɛboa nɔhalɛ ɛzonlenlɛ a, ɛnee yɛlɛkyɛ Gyihova debie na ɛhye maa yɛ nye die kpole.

Saa ɔba ye wɔ nwonane afoa nu ninyɛne nwo a, duzu a baboa yɛ amaa yɛambu yɛ nye yɛangua ahyɛlɛdeɛ mɔɔ yɛfa yɛamaa Gyihova la azo ɛ? Ɛzoanvolɛ Pɔɔlo zele Kɔlentema kɛ, ‘bɛye mɔɔ bɛnyia ye la bie bɛdo ahane,’ kɛ ndoboa. (1 Kɔl. 16:2) Saa ɛkulo kɛ ɛnwu ndenle ngakyile mɔɔ bɛdua zo bɛye ndoboa la anwo edwɛkɛ dɔɔnwo a, duzu a ɛbayɛ a? Yɛsɛlɛ wɔ nea ɛlɛka ne mɔɔ wɔ ɔ bo ɛke la.

Tɛ maanle biala azo a ɛbahola wɔalua yintanɛte zo wɔaye ndoboa a. Noko, ndenle gyɛne mɔɔ ɛbahola wɔalua zo wɔaye ndoboa la anwo edwɛkɛ wɔ ndoboayelɛ ɛleka ne mɔɔ wɔ yintanɛte ne azo la. Wɔ maanle bie mɔ azo, bɛbua ndoboa ɛyelɛ nwo kpuya mɔɔ menli ta biza la wɔ ɛkɛ.