YESO akate mbala kɛmɔtshi ate: “Ɔngɛnɔngɛnɔ waya lo mbisha ndeka wa nongola.” (Ets. 20:35) Dui dia mɛtɛ di’ohomba sɔ mendanaka la diɔtɔnganelo diasaso la Jehowa. Lande na? Nɛ dia Jehowa toshaka weshasha efula watɔngɛnyangɛnya, koko sho koka ndeka monga l’ɔngɛnɔngɛnɔ w’efula lo mbisha Jehowa woshasha ɔmɔtshi. Woshasha akɔna wakokaso mbisha Jehowa? Tokedi 3:9 mbutaka ɔnɛ: “Ɔlɛmiya Jehowa la diangɔ diayɛ dia nɛmɔ.” ‘Diangɔ diaso dia nɛmɔ’ mendanaka la wenya aso, akoka aso, wolo aso ndo diangɔ diaso dia l’emunyi. Naka sho nkamba la diangɔ sɔ dia ntɔla ɔtɛmwɛlɔ wa mɛtɛ otsha la ntondo, kete tayosha Jehowa woshasha ɔmɔtshi ndo nsala ngasɔ ayotosha ɔngɛnɔngɛnɔ w’efula.

Lo kɛnɛ kendana la diangɔ diaso dia l’emunyi, kakɔna kayotokimanyiya diaha minya yimba dia mbisha Jehowa woshasha? Ɔpɔstɔlɔ Pɔɔlɔ akatɛ ase Kɔrɛtɔ ɔnɛ ‘kanyombake yangɔ mɔtshi’ dia nkimɔ woshasha. (1 Kɔr. 16:2) Akokayɛ nsala naka wɛ nangaka mbeya awui efula lo toho ta nkimɔ woshasha tatanema lo dihole dienyu? Lam’alangayɛ, enda kiombo yele lanɛ l’ɛse.

Aha wedja tshɛ mbakoka nkimɔ weshasha l’Ɛtɛrnɛtɛ. Koko, awui wendana la toho tokina ta nkimɔ weshasha koka tanema lo sitɛ kaso k’Ɛtɛrnɛtɛ lam’atɛkɛtawɔ dia weshasha. Lo wedja ɛmɔtshi, dɔkima dimɔtshi diele lo lɛkɛ lakɔ mbishaka ekadimwelo lo ambola waleka anto ndjaoka lo kɛnɛ kendana la weshasha.