YESU jwasasile kuti, “Kupeleka kukusamtendekasya mundu kuŵa jwakusangalala kulekangana ni kupocela.” (Mase. 20:35) Kamulicisya masengo ciwundo ca usyesyene celeci mpaka citukamucisye kuŵa paunasi wambone ni Yehofa. Ligongo cici? Yehofa akusatupa mituka jejinji jajikusatutendekasya kuŵa ŵakusangalala, nambo mpaka tuŵe ŵakusangalala mnope patukupeleka mituka kwa Yehofa. Ana ni mtuka wapi wampaka tumpe Yehofa? Lilemba lya Misyungu 3:9 likusati, “Amcimbicisyeje Yehofa ni yipanje yawo.” ‘Yipanje yetu’ yikupwatikapo ndaŵi jetu, lunda lwetu, macili getu, soni yindu yine yakucilu. Patukukamulicisya masengo yindu yeleyi pakulambila kusyesyene, tukusaŵa tuli mkumpa Yehofa mituka soni tukusaŵaga ŵakusangalala mnope.

Pakwamba ya cipanje cetu, ana cici campaka citukamucisye kuti tuŵeje ni lung’wanu lwakumpa Yehofa mtuka? Ndumetume Paulo jwasalile Aklistu ŵa ku Kolinto kuti ‘aŵiceje kane kakwe pambali kunyumba kwawo’ ni cakulinga cakuti akapelece ku mpingo. (1 Akoli. 16:2) Ana mpaka atende cici naga akusaka kumanyilila yejinji pakwamba ya matala gakupelecela mbiya gagakusimanikwa m’cilambo cawo? Alole libokosi pasipa.

Mu yilambo yine mwine ngaŵa mkupeleka yakupeleka yawo kupitila pa Intaneti. Nambope, ngani jakusala matala gakupelecela mpaka jisimanikwe pa peji jajikusala yampaka tujile pakupeleka. Mu yilambo yine, peji jeleji jikusajanga yiwusyo yakusawusya ŵandu pakwamba ya matala gakupelecela yakupeleka.