Saka 2 Korinto 12:2, 3, masowalay ni Pawlo ko cecay “macadaay tayra saka tolo tingloh a kakarayan” a tamdaw, o cima? Maedeng ci Pawlo koniya tamdaw. Salakat, sapatikami ni Pawlo to Korintoay a kasakopang mifanaˈay, minilnilan no Kawas cingra malo tarokos. (2 Korinto 11:5, 23) Dotocto milengo cingra to “o sapafeli no Tapang a mapolosi ato sapatemer”, tiya milengo toniya mapolosi i, cowa ka somowal cingra to roma a Krisciyang. O niyah ko pakaˈaraway toya mapolosi a tamdaw.​—2 Korinto 12:1, 5.

Mansa, ci Pawlo “macadaay tayra i saka tolo tingloh a kakarayan”, ato “Lakoing.” * (2 Korinto 12:2-4) Misaka dademakan ningra ko “patemeran” sanay a tilid, paihkal to paˈarawan no Kawas cingra to mamifekad a demak noikor.

O maanan ko maˈaraway ni Pawlo a “saka tolo tingloh a kakarayan”?

Itini Fangcalay Cudad, o “kakarayan” sanay a tilid, ngaˈayay o soˈlinay a kakarayan ko mitoroˈan. (Satapangan 11:4; 27:28; Matay 6:26) Saka dademakan no Kimad no Kawas ko “kakarayan”, mitoroˈ to pikowan no tamdaw. (Taniil 4:20-22) Ngaˈayay mitoroˈ to fadangalan no Kawas, tinakoen, pakaynian i Hongti Kitakit Ningra a mikowan.​—Paˈarawan 21:1.

Hano saka dademaken ni Pawlo ko “saka tolo tingloh” a tilid hani? Latekay, kina toloan no Fangcalay Cudad miliyaw a misaˈicel to kalimlaan a demak. Mihaenay, somowal cingra to “saka tolo tingloh a kakarayan” mitadtaday to, iraay ko cecay ikakaay ko kangaˈay to kihcod a mirikecay—oya mikowanan ni Yis Kristo ato 144,000 dama hongti a makakapotay. Oniya kitakit oyaan misowalan ni Pitiro a “faelohay kakarayan”, o ‘tatooren ita ko sakiˈok no Kawas’ a mitala to kairaan no Hongti Kitakit.​—2 Pitiro 3:13.

O misowalan ni Pawlo a “Lakoing”, o maanan hani?

O “Lakoing”, mitoroˈ to: (1) O “Lakoing” i cikiw noikoran, mahecad o isalakatay a Itin; (2) itini i faelohay hekal, o noˈadingoan a pakayraan no finawlan no Kawas; (3) i kakarayanay a “Lakoing no Kawas”. (Paˈarawan 2:7)—Nengnengen ko Mikecolay, 2015/7/15, saka 8 fiedac, saka 8 fatac.

Saka 2 Korinto 12:4, mitadtad ci Pawlo to maˈaraway a “Lakoing”, mahawpay ko toloay a tatodong.

O kalimlaan:

Saka 2 Korinto 12:2 a “saka tolo tingloh a kakarayan”, o Kitakit ni Misiya alatek. Oya misowalan ni Pitiro i saka 2 Pitiro 3:13 a “faelohay kakarayan”, oniya kitakit ci Yis Kristo ato 144,000 dama hongti ko makakapotay.

Somowal ci Pawlo to “saka tolo tingloh a kakarayan” i, tano “saka tolo tingloh” a tilid a misaˈicelay pasowal to, mikikakaay ko kangaˈay no Misiya Hongti Kitakit to kihcod a mirikecay.

Itini mapolosi ci Pawlo “macadaay tayra i Lakoing”, oniya “Lakoing” alatek o mitoroˈan i faelohay hekal a: (1) Lakoing i sera, (2) ikakaay a noˈadingoan a Lakoing, ato (3) i kakarayanay a ‘Lakoing no Kawas’.

O faelohay hekal o faelohay a limasmas koni, mahawpay ko kakarayan a Hongti Kitakit ato itiniay i sera a Lakoing, midokoay ci Yihofaan a tamdaw ko palaˈosiay.