E kalate 2 Becorinthien 12:2, 3, Paul a kobô ajô môt éziñ a “nga betebane yôpe lale.” Môt ate a mbe za? E kalate a nga tili akônda ya Corinthe, Paul a nga ngôné na Zambe a belane nye ane nlôman. (2 Bec. 11:5, 23) Mvuse ya valé, a nga kobô fe ajô “miñyenan a minlitan mi Tate.” Paul a tote ki mojañe mfe éyoñ a kobô bifuse bi. Ajô te, bi ne simesane na émien nnye a nga yen miñyenan a minlitan mite.​—2 Bec. 12:1, 5.

Ajô te, Paul nnye a “nga beteban a ke yôpe lale,” nnye fe “a nga beteban a ke paradis.” (2 Bec. 12:2-4) A nga belan éfia “minlitan” amu Yéhôva a nga liti nye mam ma ye bobane melu ma zu.

Jé é ne “yôpe lale” Paul a nga yen?

Bible a wô’ô belan éfia yôp éyoñ a kobô ajô yôp bia yen éyoñ bia bete mis. (Met. 11:4; 27:28; Mt. 6:26) Ve éfia éte é bili metinane mefe. Biyoñ biziñ Bible a belan éfia yôp na a kobô ajô bijôé bi bôt. (Dn. 4:20-22) A wô’ô fe belane je éyoñ a kobô ajô nta’ane mame Yéhôva, ane Éjôé Zambe.​—Nli. 21:1.

Paul a nga yene fe “yôpe lale.” Jé nalé a tinan? Bible a bo a ba’alan éfia biyoñ bila asu na a ngôné ngume jam, nge ke na a kôme yemete de. (És. 6:3; Éz. 21:27; Nli. 4:8) Ajô te, éyoñ a kobô ajô “yôpe lale,” éko éziñ Paul a kobô ajô Éjôé é ne mbetane yôp abui: Éjôé Messie ba be bôte 144 000 ba ye jôé a nye. (Lañe’e fe Étude perspicace des Écritures Vol. 1, afebe 473, 476) Avale Nlômane Pierre a nga tili, bi ngenan bi yange’ “mimfefé mi yôp” Zambe a nga ka’ale bia.​—2 P. 3:13.

Nde amu jé Paul a nga kobô fe ajô “paradis”?

Éfia paradis éte ja nambe abui mam: (1) Éyoñ bia simesan étaba’a ôsu Zambe a nga ve môt, bi ne jô na “paradis” Paul a kobô nye va, a ne bo Paradis bia yange si va melu ma zu. (2) A ne fe bo bibotane bia yange bebo bisaé be Yéhôva mfefé émo. (3) A ne fe bo bo bibotane bôte ba nyiñe yôp ba bu’ubane bie, amu Nlitan 2:7 a loone yôbe na, “paradis ya Zambe.”​—Lañe’e Nkume mmombô a bete ya Ngone zangbwale é too melu 15, mbu 2015, afebe 8. abeñ. 8.

Éko éziñ éfia paradis Paul a belane je 2 Becorinthien 12:4 ja tinane mam mete mese mela.

Nge bia tyi’ étun bi ne jô na:

“Yôpe lale” ya 2 Becorinthien 12:2 é ne Éjôé Messie ba be bôte 144 000 ba ye jôé a nye, nje éte ba loone fe na “mimfefé mi yôp.”​—2 P. 3:13.

Ba loon Éjôé éte na “yôpe lale” amu é ne mbetane yôp abui.

Wônaa “paradis” Paul a nga yen a ne mam mela ma: (1) Paradis bia yange si va, (2) bibotane bia yange bia mfefé émo, mbie bite bia ye bo abui a lôte bi bia bi paradis wongane ya nsisime den, a (3) “paradis ya Zambe” a nee yôp, nnye ate a ye fe tabe éyoñ bia ye nyiñe mfefé émo.

Bia wô’ô tyi’ibi éyoñ éte na, mimfefé mi yôp a mfefé si mmie mi ne mfefé émo. Mfefé émo ôte wo ye bo mfefé nta’ane mam: Éjôé Zambe ja ye jôé yôp, bebo bisaé be Yéhôva ki ba ye nyiñe paradis si va.