Katei meha san wügüri ligía? Tídanmeme gárada to labürüdüboun houn korintuna, ayanuhati Pábulu luagu layusuruñein lan meha Bungiu keisi apostolu (2 Ko. 11:5, 23). Lárigiñe, ayanuhati luagu “arufudúni burí lúmagiñeti Aburemei”. Lidan fánreinti ligía, mayanuhanti Pábulu hawagu amu íbirigu. Ligíati gébuna lubéi wafiñerun Pábulu lan wügüri le arihibalin arufudúni burí ligía (2 Ko. 12:1, 5, TNM).

Ligíati, Pábulu wügüri le anügǘbei “lidoun lǘrüwan sielu” luma lidoun “paraísu” (2 Ko. 12:2-4, TNM). Lau layusuruni dimurei “arufudúni”, lariñaguña meha ibiha lan ariñahani luagu somu katei le lunbei lasuseredun ámuñegü.

Katei san “lǘrüwan sielu” le larihubei Pábulu?

Tidan Bíbülia, gayaraati luagu lan ámuñegueinarügü katei layanuhóun dan le layusurún dimurei sielu. Kéiburi, gayaraati layanuhóuña lan luagu sielu le warihibei (Agu. 11:4; 27:28; Mat. 6:26, TNM). Anihein giñe dan layusurún dimurei le lun layanuhóun luagu arúeihani ubouaguna (Dan. 4:20-22). Gayaraati giñe layanuhaña lan luagu arúeihani le siélubei, kéiburi Larúeihan Bungiu (Aruf. 21:1).

Ligíati, ka meha uagu layanuha Pábulu lau dimurei “lǘrüwan sielu”? Anihein dan, tariñagun Bíbülia somu katei ǘrüwa wéiyaasu lun dǘgüda lan laganbún dimurei ligía (Isa. 6:3; Aruf. 4:8). Genegeti dan le lan layanuhanbei Pábulu luagu “lǘrüwan sielu”, layanuhaña meha luagu ligaburi arúeihani le íñutimabei: Larúeihan Mesíasi, ñein lubéi Hesukrístu lan urúeibei hama 144,000 kristiánugu anuadirúaaña ha lúnbaña harúeihan luma (ariha humoun líburu Perspicacia para comprender las Escrituras, bolumen 1, páhina 473, 476). Luagu Larúeihan Mesíasi layanuha apostolu Féduru dan le lariñagunbei wagurabahañein lan “iseri sielu” le füramase lubéi Bungiu (2 Fe. 3:13).

Ágiati “paraísu” le uágubei layanuha Pábulu?

Gayaraati giñe ámuñegueinarügü lan le mini lubéi paraísu. Furumiñe, kei lidan lubéi meha aban paraísu lawinwanda furumiñeti wügüri, ligía gébuna lubéi saminaü le, layanuhóuña luagu aban Paraísu ya ubouagu. Libiaman, gayaraati layanuhaña lan luagu lubuidun ibagari lidan darangilaü, le lúmagiñeti Bungiu, le lunbei hawinwanduni lubúeingu lidan iseri ubóu. Ani lǘrüwan, gayaraati giñe layanuhaña lan luagu lubuidun ibagari le siélubei, le ‘lufulasun Bungiu’, le iridúbei lidan Arufudúni 2:7 (ariha humoun Garüdia Awisahatu to lánina 15 lidan sedü-hati, irumu 2015, páhina 5, párafu 8).

Másiñati luagu lan ǘrüwagubei katei le layanuhan Pábulu dan le layanuhanbei luagu le asuseredubei lun lidan 2 Korintuna 12:4.

Lidan murusun dimurei:

Másiñati Larúeihan lan Mesíasi ‘lǘrüwanbei sielu’ le uágubei layanuhóua lidan 2 Korintuna 12:2, le ñein lubéi Hesukrístu lan urúeibei hama 144,000 kristiánugu anuadirúaaña ha lúnbaña harúeihan luma, lidan amu dimurei, “iseri sielu” (2 Fe. 3:13).

Wáwati lun arúeihani le “lǘrüwan sielu” lugundun ligía ligaburi arúeihani le íñutimabei.

Másiñati dan le lan layanuhanbei Pábulu luagu “paraísu” le ídanbei lanügǘwa lidan arufudúni le larihibei, layanuhaña lan luagu: 1) Paraísu le lunbei ya lan Ubouagu, 2) lubuidun ibagari lidan darangilaü, le lúmagiñeti Bungiu, le lunbei hawinwanduni lubúeingu lidan iseri ubóu ani buídutimabei sügǘ luéi le wawinwandubei guentó ani 3) lubuidun ibagari le siélubei, le ‘lufulasun Bungiu’; sun burí katei le lasusereduba lidan ligiaméme dan lidan iseri ubóu.

Ligíati, lídanme paraísu, úarabei “iseri sielu” luma “iseri ubóu”. Ábanbei iseri aransehani le ídanbei ñeinbei lan dandu Larúeihan Bungiu kei gürigia ha lúnbaña heseriwidun lun Heowá lidan Paraísu ubouagu.