Chpan ri 2 Corintios 12:2 chqä 3, ri apóstol Pablo xtzjon chrij jun achï ri xukʼwäx äl pa rox kaj. ¿Achkë achï riʼ? Chpan ri carta ri xutäq äl chkë ri cristianos aj Corinto, Pablo xuʼij chë ryä jun apóstol ri ukusan rma Dios (2 Corintios 11:5, 23). Chrij riʼ xuʼij chë ri achï riʼ xekʼutmär chwäch ri xkebʼanatäj apü. Taq xutzjoj riʼ, Pablo ma xernataj ta ri nikʼaj chik cristianos. Rma riʼ nqʼalajin chë kan yë Pablo ri achï ri kʼo xekʼutmär chwäch (2 Corintios 12:1, 5).

Reʼ nukʼüt chqawäch chë ri achï ri xukʼwäx pa «rox kaj» chqä pa paraíso kan yë Pablo (2 Corintios 12:2-4). Ri xekʼutmär chwäch Pablo achiʼel ta nukʼüt chë ryä xbʼix che rä achkë xtjeʼ chqawäch apü.

¿Achkë ntel chë tzij ri «rox kaj» ri xutzʼët Pablo?

Chpan le Biblia, ri tzij kaj kʼïy ntel wä chë tzij. Jojun tzʼetbʼäl. Kʼo mul ntzjon chrij ri kaj ri nqatzʼët röj (Génesis 11:4; 27:28; Mateo 6:26). Jojun chik mul ntzjon chkij ri qʼatöy taq tzij (Daniel 4:20-22). Y nikʼaj chik mul ntzjon chrij ri Ruqʼatbʼäl Tzij Dios (Apocalipsis 21:1).

Rma riʼ, ¿achoq chrij xtzjon wä Pablo taq xuksaj ri tzij «rox kaj»? Chpan le Biblia, kʼo mul nkamlüx oxiʼ mul jun tzij rchë nyaʼöx rejqalen (Isaías 6:3; Ezequiel 21:27; Apocalipsis 4:8). Rma riʼ, taq Pablo xtzjon chrij ri «rox kaj», rkʼë jubʼaʼ xchʼö chrij jun qʼatbʼäl tzij ri janina ruqʼij, ntel chë tzij, ri Ruqʼatbʼäl Tzij Dios pa ruqʼaʼ Jesús chqä ri 144,000 ri yechaʼon rchë yebʼeqʼatö tzij rkʼë ryä chlaʼ chkaj (tatzʼetaʼ ri wuj Perspicacia para comprender las Escrituras, volumen 1, ruxaq 473 chqä 476). Chrij chqä ri qʼatbʼäl tzij riʼ xtzjon wä ri apóstol Pedro taq xuʼij chë qayoʼen ri kʼakʼakʼ taq kaj ri rutzujun qa Dios (2 Pedro 3:13).

¿Y achkë ntel chë tzij ri paraíso xutzjoj Pablo?

Ri tzij paraíso kʼïy chqä ntel wä chë tzij. Naʼäy, rma chë ri naʼäy taq winäq chwäch jun kotzʼijaläj ulew xeyaʼöx wä, ri tzij xuksaj Pablo achiʼel ta nchʼö chrij ri kotzʼijaläj ulew ri xtjeʼ chqawäch apü. Rukaʼn, rkʼë jubʼaʼ nchʼö chrij ri uxlanen ri xtjeʼ chkikojöl rusamajelaʼ Dios chwäch ri kʼakʼakʼ Ruwachʼulew. Y rox, rkʼë jubʼaʼ nchʼö chrij ri ru-paraíso Dios ri nuʼij Apocalipsis 2:7, ntel chë tzij ri utziläj kʼaslemal rkʼë Dios chlaʼ chkaj (tatzʼetaʼ Ri Nyaʼon Rutzijol 1 de julio, 2015, ruxaq 13, peraj 8).

Taq Pablo xutzjoj ri xbʼanatäj rkʼë chpan ri 2 Corintios 12:4, rkʼë jubʼaʼ tajin wä ntzjon chrij ri oxiʼ rubʼanik ri ntel wä chë tzij ri tzij paraíso.

Rma riʼ:

Ri «rox kaj» ri nutzjoj 2 Corintios 12:2, rkʼë jubʼaʼ nchʼö chrij ri Ruqʼatbʼäl Tzij Dios pa ruqʼaʼ Jesús chqä ri 144,000 ri yechaʼon rchë yebʼä chkaj, ntel che tzij, ri kʼakʼakʼ taq kaj (2 Pedro 3:13).

Nbʼix «rox kaj» che rä rma ri Ruqʼatbʼäl Tzij Dios kan janina ruqʼij.

Rkʼë jubʼaʼ, ri paraíso ri xkʼutmär chwäch Pablo ri akuchï xukʼwäx wä, nchʼö chkij reʼ: Naʼäy, ri kotzʼijaläj ulew ri xtjeʼ chqawäch apü. Rukaʼn, ri uxlanen chqä ri ajowabʼäl xtjeʼ chkikojöl ri rusamajelaʼ Dios más ütz xtuʼän chwäch ri rubʼanon komä, rma xtmäj ruwäch jontir Ruwachʼulew. Y rox, ru-paraíso Dios ri kʼo chlaʼ chkaj. Jontir reʼ xkejeʼ chwäch ri kʼakʼakʼ Ruwachʼulew.

Chwäch ri kotzʼijaläj ulew, ri kʼakʼakʼ taq kaj chqä ri «kʼakʼakʼ Ruwachʼulew» junan xkesamäj. Ntel chë tzij, chë ri ye kʼo chlaʼ chkaj chqä ri winäq ri xkejeʼ qa chwäch le Ruwachʼulew xtkiyaʼ ruqʼij Jehová xtbʼä qʼij xtbʼä säq.