Ke 2 Corinth 12:2, 3 Paul etịn̄ aban̄a owo kiet emi “ẹkemende . . . ẹdọk ọyọhọ heaven ita.” Anie ke ekedi? Ke leta emi Paul ekewetde ọnọ esop ke Corinth, enye ama anam enen̄ede an̄wan̄a ke Abasi akada imọ anam utom nte apostle. (2 Cor. 11:5, 23) Ekem enye ama etịn̄ aban̄a “mme n̄kukụt . . . ye mme ediyarade Ọbọn̄.” Paul ikasiakke nditọete en̄wen ini enye ekenemede n̄kpọ emi. Ntre oro owụt ke enye ke idemesie okokụt mme n̄kukụt oro, enye ke ẹkenyụn̄ ẹyarade mme n̄kpọ ẹnọ.—2 Cor. 12:1, 5. 

Ntre etie nte Paul ke ẹkemen “ẹdọk ọyọhọ heaven ita,” ẹnyụn̄ ẹmen “ẹdụk paradise.” (2 Cor. 12:2-4) Enye ama etịn̄ aban̄a “mme ediyarade,” emi ọwọrọde ke ẹma ẹnam enye ọdiọn̄ọ se iditịbede ke ini iso.

Nso ke Paul akada nte “ọyọhọ heaven ita”?

Ke Bible, “heaven” ekeme ndida mban̄a ikpaenyọn̄. (Gen. 11:4; 27:28; Matt. 6:26) Edi “heaven” esida aban̄a n̄kpọ en̄wen n̄ko. Ndusụk ini esida aban̄a ukara owo. (Dan. 4:20-22) Mîdịghe ekeme ndida mban̄a ukara Abasi, utọ nte Obio Ubọn̄ Abasi.—Edi. 21:1.

Paul ọkọdọhọ ke ima ikụt “ọyọhọ heaven ita.” Nso ke oro ọkọwọrọ? Ndusụk ini Bible esitịn̄ n̄kpọ kiet ikata man odori nsọn̄uyo ke n̄kpọ oro, m̀mê man owụt ke n̄kpọ oro edi ata akpan n̄kpọ. (Isa. 6:3; Ezek. 21:27; Edi. 4:8) Etie nte ini Paul eketịn̄de n̄kpọ aban̄a “ọyọhọ heaven ita,” enye eketịn̄ aban̄a ukara emi akande ukara owo ekededi, oro edi, Ukara Obio Ubọn̄ Messiah emi Jesus Christ ye owo 144,000 ẹdikarade. (Se Enyọn̄-Ukpeme October 15, 2004, p. 8 ikp. 5.) Ukara emi ke Peter eketịn̄ aban̄a ini enye ọkọdọhọde ke nnyịn itie ibet “mbufa enyọn̄” emi Abasi ọkọn̄wọn̄ọde.—2 Pet. 3:13.

Nso kaban̄a “paradise” emi Paul eketịn̄de aban̄a?

Ikọ oro “paradise” ekeme ndiwọrọ nsio nsio n̄kpọ n̄ko: (1) Ke ini itide akpa ebiet emi Abasi okobotde owo esịn, “paradise” ekeme ndida mban̄a ata ata Paradise emi edidude ke isọn̄. (2) Ekeme n̄ko ndida mban̄a emem ye edidianakiet emi ikọt Abasi ẹdinyenede ke obufa ererimbot. (3) Onyụn̄ ekeme ndida mban̄a nte uwem enemde ke heaven, oro edi “paradise Abasi” emi ẹtịn̄de ẹban̄a ke Ediyarade 2:7.—Se Enyọn̄-Ukpeme July 15, 2015, p. 8, ikp. 8.

Etie nte Paul eketịn̄ aban̄a n̄kpọ mbita emi ke 2 Corinth 12:4 ini enye eketịn̄de se enye okokụtde ke n̄kukụt.

Ke nditịn̄ ibio ibio:

Etie nte “ọyọhọ heaven ita” emi ẹtịn̄de ẹban̄a ke 2 Corinth 12:2 edi Ukara Obio Ubọn̄ Messiah emi Jesus Christ ye owo 144,000 ẹdikarade. Ukara emi edi “mbufa enyọn̄.”—2 Pet. 3:13.

Enye edi “ọyọhọ heaven ita” sia Obio Ubọn̄ oro akan ukara owo ekededi.

Etie nte “paradise” emi ‘ẹkemende Paul ẹdụk’ ke n̄kukụt ada aban̄a (1) Paradise emi edidude ke isọn̄, (2) ndamban̄a paradise, oro edi, emem ye edidianakiet emi ikọt Abasi ẹdinyenede, emi edikande se inyenede idahaemi, ye (3) “paradise Abasi” ke heaven emi edisụk idude n̄ko ke obufa editịm n̄kpọ.

Ntem mbufa enyọn̄ ye obufa isọn̄ ẹdidiana kiet inam obufa editịm n̄kpọ. Emi edidi obufa ndutịm, esịnede ukara Abasi ke heaven ye mme owo emi ẹnamde n̄kpọ Jehovah ke isọn̄.