Yɛ 2 Korintobii 12:2, 3 lɛ, Paulo wie nuu ko ni “ashá lɛ kɛtee ŋwɛi ni ji etɛ lɛ” he. Namɔ ji nuu nɛɛ? Yɛ 2 Korintobii 11 lɛ mli lɛ, Paulo hã nyɛmimɛi ni yɔɔ Korinto asafo lɛ mli lɛ le faŋŋ akɛ Nyɔŋmɔ ehala lɛ akɛ bɔfo. (2 Kor. 11:5, 23) No sɛɛ lɛ, ewie “Nuŋtsɔ lɛ ninai kɛ kpojiemɔi ahe.” Be ni Paulo wieɔ nibii nɛɛ ahe lɛ, etsĩii nyɛmimɛi krokomɛi atã. No hewɔ lɛ, wɔbaanyɛ wɔmu sane naa akɛ lɛ diɛŋtsɛ ji nuu lɛ ni ajie ninai kɛ kpojiemɔi atsɔɔ lɛ.​—2 Kor. 12:1, 5.

No hewɔ lɛ, Paulo ji mɔ ni ‘ashá kɛtee ŋwɛi ni ji etɛ lɛ,’ mɔ ni ‘ashá kɛtee paradeiso’ lɛ. (2 Kor. 12:2-4) Paulo wie akɛ ajie “kpojiemɔi” atsɔɔ lɛ, ni ekã shi faŋŋ akɛ, nɔ ni enɛ tsɔɔ ji akɛ ahã ele wɔsɛɛ sane.

Mɛni ji “ŋwɛi ni ji etɛ lɛ” ni Paulo na lɛ?

Bei komɛi lɛ, kɛ́ akɛ wiemɔ ni ji “ŋwɛi” lɛ tsu nii yɛ Biblia lɛ mli lɛ, ekɔɔ ŋwɛi ni wɔnaa nɛɛ he. (1 Mo. 11:4; 27:28; Mat. 6:26) Shi bei komɛi hu lɛ, ekɔɔ nibii krokomɛi ahe. Akɛ nɔkwɛmɔnɔ lɛ, bei komɛi lɛ, ekɔɔ adesai anɔyelii ahe. (Dan. 4:20-22) Ni bei komɛi hu lɛ, ekɔɔ Nyɔŋmɔ Maŋtsɛyeli lɛ loo gbɛi krokomɛi ni Nyɔŋmɔ tsɔɔ nɔ eyeɔ nibii ni ebɔ lɛ anɔ lɛ ahe.​—Kpo. 21:1.

Ni “ŋwɛi ni ji etɛ lɛ” ni Paulo na lɛ hu? Mɛni etsɔɔ? Bei komɛi lɛ, atĩɔ nɔ ko mli shii etɛ yɛ Biblia lɛ mli koni akɛtsɔɔ akɛ nakai nii lɛ sa kadimɔ, enaa wa, loo eyeɔ emuu. (Yes. 6:3; Eze. 21:27; Kpo. 4:8) No hewɔ lɛ, etamɔ nɔ ni “ŋwɛi ni ji etɛ lɛ” ni Paulo na lɛ ji nɔyeli ko ni nɔ bɛ. Nɔyeli nɛɛ ji Mesia Maŋtsɛyeli lɛ. Yesu ji enɔ Maŋtsɛ, ni ekɛ mɛi 144,000 lɛ ni baaye nɔ. (Kwɛmɔ Insight on the Scriptures, Kpo 1, bf. 1059, 1062.) Be ni Petro wie akɛ yɛ Nyɔŋmɔ shiwoo lɛ naa lɛ, “wɔmiimɛ ŋwɛi hee” lɛ, no mli lɛ Mesia Maŋtsɛyeli lɛ nɔŋŋ he ewieɔ lɛ.​—2 Pet. 3:13.

Mɛɛ “paradeiso” mli ashá Paulo kɛtee lɛ?

Wiemɔ ni ji “paradeiso” lɛ hu baanyɛ akɔ nibii srɔtoi ahe. (1) Ebaanyɛ ekɔ bɔ ni shikpɔŋ lɛ baatsɔ Paradeiso wɔsɛɛ lɛ he, ejaakɛ be ni Nyɔŋmɔ bɔ Adam kɛ Hawa lɛ, ekɛ amɛ wo paradeiso mli. (2) Ebaanyɛ ekɔ toiŋjɔlɛ ni nɔ bɛ ni Nyɔŋmɔ webii baaná yɛ jeŋ hee ni baa lɛ mli lɛ hu he. (3) Ebaanyɛ ekɔ shihilɛ ni nɔ bɛ ni yɔɔ “Nyɔŋmɔ paradeiso lɛ mli” yɛ ŋwɛi lɛ hu he.​—Kpo. 2:7. Kwɛmɔ July 15, 2015 Buu-Mɔɔ lɛ, bf. 4, kk. 8 lɛ.

Eeenyɛ efee akɛ, paradeiso srɔtoi etɛ ni wɔwie he nɛɛ fɛɛ ahe Paulo wieɔ yɛ 2 Korintobii 12:4 lɛ.

Yɛ kukufoo mli lɛ:

Eeenyɛ efee akɛ, “ŋwɛi ni ji etɛ lɛ” ni atsĩ tã yɛ 2 Korintobii 12:2 lɛ ji “ŋwɛi hee” lɛ, ni ji Mesia Maŋtsɛyeli lɛ ni Yesu Kristo kɛ mɛi 144,000 lɛ baaye nɔ akɛ maŋtsɛmɛi yɛ mli lɛ.​—2 Pet. 3:13.

Atsɛɔ lɛ “ŋwɛi ni ji etɛ,” ejaakɛ nakai Maŋtsɛyeli lɛ loo nɔyeli lɛ nɔ bɛ.

Agbɛnɛ hu, eeenyɛ efee akɛ, paradeiso srɔtoi etɛ feɔ “paradeiso” lɛ ni Paulo kɛɛ ashá lɛ kɛtee lɛ. Nomɛi ji, (1) shikpɔŋ nɔ Paradeiso ni kã wɔhiɛ lɛ, (2) toiŋjɔlɛ ni nɔ bɛ ni Nyɔŋmɔ webii baaná yɛ jeŋ hee lɛ mli lɛ ni fe toiŋjɔlɛ ni wɔyɔɔ amrɔ nɛɛ lɛ kwraa lɛ, kɛ (3) “Nyɔŋmɔ paradeiso lɛ” ni yɔɔ ŋwɛi lɛ. Yɛ jeŋ hee lɛ mli lɛ, abaaná paradeiso srɔtoi etɛ nɛɛ fɛɛ.

No hewɔ lɛ, ŋwɛi hee lɛ kɛ shikpɔŋ hee lɛ ni feɔ jeŋ hee lɛ. Ebaafee nɔ ko hee kwraa; adesai baasɔmɔ Yehowa yɛ shikpɔŋ ni asaa nɔ fɛfɛo lɛ nɔ, ni Nyɔŋmɔ Maŋtsɛyeli lɛ baaye nɔ kɛjɛ ŋwɛi.