Ni iti “jänikani kä bämäkäre biti ta kä kwinbätä” ye Pablo mikani gare 2 Corintios 12:2, 3 yekänti. ¿Ye abokän nire? Tärä ne tikani kwe nitre Corinto ie ngwane, niebare kwe bati bobu Ngöbö nämäne niara mike sribire apóstol erere (2 Cor. 11:5, 23). Niebare kwe, “ni Dänkien Jesu käkwe kukwe mikani tuare bäre bäre köböre [...] tie”. Kukwe tikani kwe nekänti ñaka blitabare kwe ja mräkätre mada yebätä. Ye medenbätä, ni ie kukwe mikani tuare köböre nieta ye abokän niara ara (2 Cor. 12:1, 5).

Ni “jänikani” “kä bämäkäre biti ta kä kwinbätä” aune “kä bä nuäre” yete ye abokän Pablo ara (2 Cor. 12:2-4, NGT). “Kukwe mikani tuare [...] köböre” ie nieta, ye tä mike gare dre rabai bare ja känenkäre ye mikani tuare ie.

¿“Kä bämäkäre biti ta kä kwinbätä” jutuabare Pablo ie ye dre gärätä?

Bibliabätä kä kwinbiti nieta ye raba kukwe keta kabre mike gare. Ñodre, kä kwinta tuin nie (Gén. 11:4; 27:28; Mat. 6:26). Ruäre ngwane, kukwe ye nieta gobrantre kä nebätä yei (Dan. 4:20-22). Aune kukwe ye nie raba Gobran Ngöbökwe ie arato (Apoc. 21:1).

Ye erere ngwane, ¿“kä bämäkäre biti ta kä kwinbätä” niebare Pablokwe ye dre gäräbare kwe? Ruäre ngwane, Bibliabätä kukwe kädekateta bämä jire kukwe ye metre mikakäre gare (Is. 6:3; Ezeq. 21:27; Apoc. 4:8). Pablo blitabare “kä bämäkäre biti ta kä kwinbätä” yebätä ngwane, nämäne blite gobran tä ükaninte kä kwinbiti yebätä: ye abokän Jesukristo rabai gobrane nitre 144,000 tä dianinkä nänkäre kä kwinbiti yebe meden gärätä (Perspicacia para comprender las Escrituras, volumen 1, página 473, 476 ye mikadre ñärärä). Ngöbökwe monso kwe dianinkä Gobrankäre yebätä apóstol Pedro nämäne blite, ye abokän “kä kwinta mrä” käbämikani Ngöbökwe ye nita ngübare ngäbiti (2 Ped. 3:13, TNM).

¿Aune “kä bä nuäre” niebare Pablokwe ye abokän dre gärätä?

Kä bä nuäre nieta ye raba kukwe keta kabre mike gare. Kena, ni kä nebätä mikani nüne kä ye kwrere te, ye medenbätä ni raba niere Kä Bä Nuäre nieta ye rabai bare Kä tibienbätä. Ketebukäre, ye kä bä nuäre ja üaire rabai kä mrä yete ye käi rabai juto nibätä raba ruin nie. Aune ketamäkäre, kukwe kwin tä nemen bare kä kwinbiti ye abokän ‘kä kuin Ngöbökwe’ nieta Apocalipsis 2:7 yekänti, (Ni Mikaka Mokre 15 julio 2015, página 5, párrafo 8 mikadre ñärärä).

Kukwe kädrite ketamä yebätä Pablo nämäne töbike, yebätä kukwe ye niebare kwe 2 Corintios 12:4 yekänti raba ruin nie.

Nibira gare nie ye erere:

“Kä bämäkäre biti ta kä kwinbätä” nieta 2 Corintios 12:2 yebätä, ye abokän Jesukristo rabai gobrane nitre 144,000 ben, ye abokän “kä kwinta mrä” raba ruin nie (2 Ped. 3:13, TNM).

“Kä bämäkäre biti ta kä kwinbätä” nieta ñobätä ñan aune ye abokän gobran bäri kwin tä ükaninte kä kwinbiti meden gärätä.

“Kä bä nuäre” känti Pablo “jänikani” nieta ye abokän: 1) ye Kä Bä Nuäre rabai bare metre Kä tibienbätä, 2) ye kä bä nuäre ja üaire rabai kä mrä yete käkwe nuai bäri raire aune 3) ‘kä kuin Ngöbökwe’ nieta ye jökrä rabai bare kä mrä ja känenkäre yete.

Ye medenbätä, “kä kwinta mrä” aune “kä tibien mrä” ye abokän kä bä nuäre rabai ja känenkäre. Gobran Ngöbökwe tä ükaninte kä kwinbiti aune ni kä tibienbätä ye rabai Jehová mike täte gwairebe Kä Bä Nuäre yete.