Korinto Iharuana 12:2, 3 ai, Paulo ia gwau tau ta be “guba ihatoina dekenai ia abia lao.” Unai tauna be daika? Paulo be Korinto kongrigeisen ia tore henia neganai, ia gwau Dirava be ia ia gaukaralaia aposetolo tauna ai ia lao totona. (2 Kor. 11:5, 23) Bena ia sibona ese Lohiabada amo “matahanai bona hadibaia herevadia ia gwauraia.” Unai siri lalonai Paulo be ma tadikaka haida ia herevalaia lasi. To, matahanai bona hadibaia herevadia ia abia tauna be ia sibona.​—2 Kor. 12:1, 5.

Ita gwau diba Lohiabada ese “guba ihatoina dekenai ia abia lao” bona “paradaiso dekenai ia abia lao” tauna be Paulo. (2 Kor. 12:2-4) Inai hereva, “hadibaia herevadia” ese ia hahedinaraia Lohiabada ese vaira negai do ia vara gauna be Paulo dekenai ia hahedinaraia.

Paulo ese ia itaia “guba ihatoina” ena anina be dahaka?

Baibel ai, “guba” be tanobada ena ataiai ia noho guba ia herevalaia. (Gen. 11:4; 27:28; Mat. 6:26) To “guba” ena anina be momo. Nega haida taunimanima edia lohia dalana ia laulaulaia. (Dan. 4:20-22) Eiava Dirava ese do ia lohiaia Basileiana ia herevalaia.​—Apok. 21:1.

Paulo be “guba ihatoina” ia itaia. Ena hereva ena anina be dahaka? Nega haida Baibel be nega toi gau ta ia herevalaia neganai, ia hahedinaraia ia be mai anina bada. (Isa. 6:3; Ese. 21:27; Apok. 4:8) Paulo be “guba ihatoina” ia herevalaia neganai, ia be lohia dalana hereadaena ta​—Iesu Keriso bona 144,000 ese do idia lohiaia Mesia Basileiana ia herevalaia. (Insight on the Scriptures, Volium 1, rau 1059, 1062 itaia.) Unai Mesia Basileiana be aposetolo Petero ese ia herevalaia “guba matamata” bona ita be unai ita naria noho.​—2 Pet. 3:13.

Paulo ese ia herevalaia “paradaiso” ena anina be dahaka?

Danu inai hereva “paradaiso” ena anina be momo: (1) Tanobada paradaisona, gabeai do ia vara gauna. (2) Dirava ena taunimanima edia noho dalana, unai be nega matamata ai do ia guguru momokani gauna. Bona (3) Apokalupo 2:7 ai “Dirava ena paradaiso,” guba ai do ia vara hahenamo ia herevalaia.​—Gima Kohorona, July 15, 2015, rau 8. par. 8 itaia.

Toana be Paulo ese 2 Korinto 12:4 ai ia itaia gaudia ia herevalaia neganai, ia be unai gaudia toi ia herevalaia.

Point badadia:

Korinto Iharuana 12:2 ese ia gwauraia “guba ihatoina” be “guba matamata,” Iesu Keriso bona 144,000 ese do idia lohiaia Mesia Basileiana ia herevalaia.​—2 Pet. 3:13.

Ia be “guba ihatoina” badina unai Basileia ena lohia dalana be atai momokani bona hereadae.

Paulo ena matahanai ai ia herevalaia “paradaiso” be (1) tanobada paradaisona, gabeai do ia vara gauna, (2) hari Iehova ena taunimanima ese idia moalelaia maino be unai nega ese do ia hereaia bona (3) “Dirava ena paradaiso,” guba ai do ia noho gauna ena hahenamo be tanobada matamata ai do ia vara danu.

Unai dainai, nega matamata be guba matamata bona tanobada matamata ai do idia vara gaudia ia herevalaia. Oibe, gau ibounai do idia matamata, guba gavamani bona tanobada paradaisona ai Iehova idia hesiai henia taudia totona.