Mo 2 Ovakorinte 12:2, 3, Paulus wa hungira ohunga nomundu kaaṋi ngwa “yererwe nga keyuru oritjatatu.” Omundu ngo wa ri uṋe? Indu tja tjanga kombongo yOvakorinte, Paulus wa ṋunisa kutja Mukuru ongwe mu ungurisa otjomuapostele. (2 Kor. 11:5, 23) Nu okuzambo wa tamuna ‘ovirimunikise nomavandururiro nga pewa i Muhona.’ Mehungi re ndo Paulus kena pa tamuna ovakambure varwe. Kunao, eye aa hungirire ku ye omuini otja omurumendu ngwa muna ovirimunikise nomavandururiro.—2 Kor. 12:1, 5.

Pu mape hee kutja Paulus ongwa ri omurumendu ngwa “yererwe nga keyuru oritjatatu” nu ngwa “yererwe moparadisa.” (2 Kor. 12:2-4) Eye wa ungurisa embo ndi ‘omavandururiro,’ ndi ma ri raisa kutja eye wa raerwa ohunga noviṋa mbi mavi ka tjitwa moruyaveze.

Ovikwaye Paulus mbya muna ‘otjeyuru oritjatatu’?

MOmbeibela, ‘eyuru’ ri yenena okukuramena po eyuru ndi tu muna. (Gen. 11:4; 27:28; Mat. 6:26) Nungwari ‘eyuru’ wina ri yenena okuheya oviṋa vyarwe. Povikando tjiva ri kuramena po ouhonapare wovandu. (Dan. 4:20-22) Poo ri yenena okuheya omananeno womeyuru, tjimuna omananeno wOuhona wa Mukuru.—Omavan. 21:1.

Paulus wa muna ‘Eyuru oritjatatu.’ Eye aa hee tjike? Povikando Ombeibela i yenena okutamuna otjiṋa povikando vitatu okuṋunisa epu ndo poo okuyandja omasa. (Jes. 6:3; Esek. 21:27; Omavan. 4:8) Pe munika tjimuna omambo Paulus nga hungira nga ‘Eyuru oritjatatu,’ aa hungire ohunga nomananeno omanamasa, owo nge ri ouhonapare wa Messias mbu honaparerwa i Jesus na imba 144 000 mbu mave ka nana puna ye. (Lesa Insight on the Scriptures, Vol. 1, omuk. 1059, 1062.) Otja omuapostele Petrus tja tjanga, eṱe tu undja “Eyuru epe” Ndjambi nde tu kwizikira.​—2 Petr. 3:13.

Nambano tjike ‘noparadisa’ Paulus ndja tamuna?

Embo ndi ‘oparadisa’ wina ri yenena okukara nomaheero pekepeke: (1) Mokuripurira komaturiro wovandu omatengatenga, “oparadisa” ri yenena okuheya Oparadisa ndji mai kakara ko kombanda yehi moruyaveze. (2) Oro ri heya omaturiro wohange ovandu va Mukuru ngu mave ka yorokera mouye oupe. (3) Nu wina, ri heya ongaro ombwa yomeyuru, ‘otjikunino tja Ndjambi’ tji tja tamunwa mOmavandururiro 2:7.—Lesa The Watchtower, 15 ku Juli, 2015, omuk. 8. opar. 8.

Mape ya kutja tjiri Paulus aa hungirire koviṋenge aviyetatu metjangwa 2 Ovakorinte 12:4 indu tjaa hungirire ku imbi mbya tjitwa ku ye.

Okurizemburukisa:

‘Eyuru oritjatatu’ nda tamunwa 2 Ovakorinte 12:2 mape ya kutja ri heya Ouhonapare wa Messias mbu uri momake wa Jesus Kristus novahonapare va puna ye 144 000, ndi ri ri “Eyuru epe.”—2 Petr. 3:13.

Oro ‘eyuru oritjatatu’ orondu Ouhona mbo ounamasa, nu ounane mbu uri pondongamo.

‘Oparadisa’ Paulus ndja “yererwe” ko motjirimunikise mape ya ai hee (1) Oparadisa ndji mai kakara ko kombanda yehi moruyaveze, (2) omaturiro wohange ovandu va Mukuru ngu mave ka yorokera mouye oupe, owo ngu maye karira omaturiro wohange tjinene okukapita inga ngu tu yorokera nai, nu wina ma ri hee (3) ‘otjikunino tja Ndjambi’ tjomeyuru tji matji kakara ko pu nouye oupe.

Okutja kunao, ouye oupe mau ka kamburira mo eyuru epe nehi epe. Ma rire omananeno omape, ngu maye kamburire mo ohoromende yOuhona womeyuru novandu mbe karera Jehova moparadisa kombanda yehi