Ta 2 Corinto 12:2, egga i tinukoy ni Pablo nga tolay nga “gavva nga neyangay ta utun ta mekatallu nga langi.” Sinni yayya? Ta tura ni Pablo ta kongregasion ta Corinto, nipatalattona nga usu-usan yayya na Dios bilang apostol. (2 Cor. 11:5, 23) Tapus kinagina i “nipasingan anna nipakannammu na Yafu.” Ta konteksto natun, awan tu kinagi ni Pablo tu tanakuan nga lalaki. Yatutta, rasonable gafu nga tukuyanna mismu i baggina bilang i tadday nga nakalawa tu sirmata anna ta nipakannammu naggafu ta Yafu.​—2 Cor. 12:1, 5.

Yayya nga, si Pablo gafu i tadday nga “gavva nga neyangay ta utun ta mekatallu nga langi” anna “neyangay ta Paraiso.” (2 Cor. 12:2-4) Inusana i uvovug nga “nipakannammu,” nga mangipasingan nga nekagi sa i meyannung ta tadday nga gannug nga mesimmu ta mappange.

Anni i nasingan ni Pablo ta “mekatallu nga langi”?

Ta Biblia, i “langi” ay awayyana nga tumukoy ta pisikal nga langa-langi. (Gen. 11:4; 27:28; Mat. 6:26, NW) Ngem meyusa gapa i “langi” ta tanakuan nga gannug. Mittan tumukoy yatun ta pammaguray na tolay. (Dan. 4:20-22) Onu tumukoy gapa yatun ta pammaguray na Dios, gukaban na Pappatulan na Dios.​—Nep. 21:1.

Nasingan ni Pablo i “mekatallu nga langi.” Anni i punto? Maruddu nga mamittallu nga tukuyan na Biblia i tadday nga gannug tapenu mangipasigo, onu mangipasingan tu mas dakal nga importansia. (Isa. 6:3; Eze. 21:27; Nep. 4:8) Ta pakkagi ni Pablo “ta mekatallu nga langi,” ipatalattona i kapianan anna i neyatannang nga klase na pammaguray​—i Mesianiko nga Pappatulan nga pammagurayan ni Jesu-Cristo tuange ta 144,000 nga kakavvuluna. (Innan i Kaunawaan sa Kasulatan, Tomo. 2, p. 175-176, 182.) Gitta na nitura ni apostol Pedro, iinnaggattam i “bagu nga langi” segun ta promesa na Dios.​—2 Ped. 3:13.

Kunnasi gapa i kinagi ni Pablo nga “Paraiso”?

I uvovug nga “Paraiso” ay puede gapa nga tumukoy ta nadduruma nga gannug: (1) Segun ta orihinal nga naddianan na totolay, lohikal nga tumukoy i “Paraiso” ta mappange nga literal nga Paraiso ta davvun. (2) Awayyana nga tumukoy ta espiritual nga kondision na totolay na Dios nga maekspiriensada noka ta napabagu nga mundo. (3) Kunne na paga, puede gapa nga tumukoy ta kakkasta nga paddia-paddian ta langi, “ta Paraiso na Dios” nga nakagi ta Nepakannammu 2:7.​—Innan i Ang Bantayan, Hulio 15, 2015, p. 8. par. 8.

Posible gafu nga danatun nga tallu nga aspeto i tukuyan ni Pablo ta 2 Corinto 12:3 ta pangistoriana ta ekspiriensana.

Tapenu isumario:

Posible nga i “mekatallu nga langi” nga nakagi ta 2 Corinto 12:2 ay tumukoy ta Mesianiko nga Pappatulan nga pammagurayan ni Jesu-Cristo anna na 144,000, i “bagu nga langi.”​—2 Ped. 3:13.

“Mekatallu nga langi” yatun megafu ta i Pappatulan ay i kapianan anna i neyatannang nga klase na pammaguray.

I sirmata nga “Paraiso” nu sitaw “gavva nga neyangay” si Pablo ay puede nga tumukoy ta (1) pisikal nga Paraiso nga duttal ta davvun, (2) espiritual nga paraiso nga mesimmu noka, nga mas alawa i sakupna anne ta espiritual nga paraiso ta maddaggun, anna (3) i “Paraiso na Dios” ta langi nga maggiddang nga mesimmu ta napabagu nga mundo.

Kayàna gafu kagian nga i paraiso ay kombinasion na bagu nga langa-langi anna i bagu nga davvun. Bagu yatun noka nga unnug, nga parehu nga lagumanna i nelangitan nga Pappatulan nga gobiernu anna i totolay nga masserbi kani Jehova ta paraiso nga davvun.