Bhi 2 Corinthians 12:2, 3, Paul da tẹmhọn okpea ọkpa na mun ha khian okhun nọnzi ea. Họla enan tẹmhọnlẹn? Ẹghe nin Paul rẹ gbẹn ilẹta ji agbotu nọn ribhi Corinth, ọle da manman sounun ọbhọ ghe, Osẹnobulua noo ọle rẹ lu iwẹnna odibo. (2 Cor. 11:5, 23) Ọle da yẹ tẹmhọn imianlo kẹkẹ nin ọle miẹn. Ẹghe nin Paul rẹ gbẹn ọne ilẹta nin, ọle bha sounun bhi ọria ọbhebhe. Ọnan rẹman ghe, egbe ọle, ọle ha tẹmhọnlẹn ghe, ọle ọne okpea nọn miẹn imianlo.—2 Cor. 12:1, 5.

Bhiriọ, Paul hi ọne okpea nan mun a khian okhun nọnzi ea na yẹ mun a khian ẹkẹ agbọn ọfubhegbe. (2 Cor. 12:2-4) Paul da tale ghe ọle miẹn ‘imianlo,’ ranmhude emhin ne ha sunu bhi ẹghe odalo ọle miẹn.

Be okhun nọnzi ea nin Paul miẹn mundia nan?

Bhi Baibo, ‘okhun’ sabọ rẹ mundia nin ọne okhun nan nin mhan daghe. (Gen. 11:4; 27:28; Matt. 6:26) Ọkpakinọn, a dẹ yẹ sabọ re ‘okhun’ khọkhọ emhin ọbhebhe. Ẹghe eso, ọ sabọ mundia nin ugbẹloghe ọsi eria. (Dan. 4:20-22) Ọ sabọ yẹ mundia nin ugbẹloghe nọn khiale, bọsi Agbejele nọnsi Osẹnobulua.—Rev. 21:1.

Paul daghe ‘okhun nọnzi ea.’ Be ọle rẹ ọnan ta? Ẹghe eso, Baibo ki sounun bhi emhin igba ea, nọn rẹ rẹman ghe ebi a tẹmhọnlẹn manman kaka. (Isa. 6:3; Ezek. 21:27; Rev. 4:8) Ọdiabe ẹghe nin Paul rẹ sounun bhi ẹmhọn ‘okhun nọnzi ea,’ ugbẹloghe nọn ke okhun nẹ ọle ha tẹmhọnlẹn—Agbejele nọnsi Osẹnobulua nin Jesu Kristi bi itue 144,000 ne ha deba iJesu ha gbẹloghe. (Fẹ Insight on the Scriptures ghe, Vol. 1, apapale 1059 bi 1062.) Peter nin odibo bhọ yẹ gbẹn yọle ghe, “Okhun ọsọgbọn ribhọ nin mhan khẹ,” beji Osẹnobulua vele.—2 Pet. 3:13.

Be ‘agbọn ọfubhegbe’ nin Paul miẹn yẹ mundia nan?

Agbọn ọfubhegbe sabọ rẹ mundia nin emhin kẹkẹ: (1) ‘Agbọn ọfubhegbe’ sabọ rẹ ha yi agbọn ọsọgbọn nin Osẹnobulua mun vade bhi ọne otọ nan. (2) Ọ sabọ yẹ mundia nin ọfure nin Osẹnobulua ha re nin ẹbho nesọle bhi agbọn ọsọgbọn. (3) Sẹyẹ, ọ sabọ yẹ mundia nin ọfure nọn ribhi okhun, ‘ọne agbọn ọfubhegbe nọnsi Osẹnobulua’ nan tẹmhọnlẹn bhi Revelation 2:7.—Fẹ Watchtower ọsi July 15, 2015 ghe, apapale 8. Uduọle nọnzi 8.

Asabọ miẹn ene okhun ea nan, ele Paul ha tẹmhọnlẹn bhi 2 Corinthians 12:4 ẹghe nin ọle rẹ ha tẹmhọn imianlo nin ọle miẹn.

Nan kie re unun na bhọ khere:

‘Okhun nọnzi ea’ nan tẹmhọnlẹn bhi 2 Corinthians 12:2 sabọ ha yi ugbẹloghe nan mun ọbhi obọ nọnsi Jesu bi ene itue 144,000 ne ha deba ọle gbeloghe bhi okhun. Ọnan hi ọne “okhun ọsọgbọn.”—2 Pet. 3:13.

Okhun nọnzi ea nọn ranmhude ọle hi ugbẹloghe nọn ke okhun nẹ.

Ọne agbọn ọfubhegbe nan mun iPaul ha khian bhi ọne imianlo sabọ rẹ mundia nin (1) agbọn ọfubhegbe nọn ha vae bhi ọne otọ nan, (2) ọfure nin ene ga Osẹnobulua ha miẹn bhi agbọn ọsọgbọn nọn vade. Ọne ọfure dẹ tuẹn okhun gbera ọne mhan ka mhọn nian, bi (3) agbọn ọfubhegbe nọn ribhi okhun. Ọne agbọn ọfubhegbe nọn ribhi okhun bi otọ ọfubhegbe, ele da ko ha ribhọ bhi ọne agbọn ọsọgbọn.

Bhiriọ, ọne otọ ọsọgbọn bi okhun ọsọgbọn, ele hi ọne agbọn ọsọgbọn nin mhan khẹ. Ọne okhun ọsọgbọn mundia nin ugbẹloghe nọn ha na bhi okhun ha gbẹloghe. Otọ ọsọgbọn mundia nin ene da ha ga Osẹnobulua bhi otọ ọfubhegbe.