Mo 2 Ovakorinto 12:2, 3, Paulus okwa li ta popi omulumenhu wonhumba oo a li “a vakulilwa meulu etitatu.” Omulumenhu oo okwa li lyelye? Eshi Paulus a li ta shangele eongalo lokuKorinto, okwa popya kutya Kalunga okwa li te mu longifa e li omuyapostoli. (2 Kor. 11:5, 23) Okwa li a popya “omamoniko nomahololo Omwene.” Moshitukulwa osho Paulus ka li a popya mo ovamwatate. Onghee hano, okwa li te lipopi ye mwene e li omulumenhu oo a li a mona omamoniko nomahololo. — 2 Kor. 12:1, 5.

Onghee Paulus oye a li “a vakulilwa meulu etitatu” nosho yo a “vakulwa a twalwa moParadisa.” (2 Kor. 12:2-4) Okwa li a longifa outumbulilo ‘omahololo,’ oo tau ulike kutya okwa li a lombwelwa kombinga yaasho tashi ka ningwa monakwiiwa.

Oshike osho Paulus a li a mona shi li ‘eulu etitatu’?

PaMbiibeli, “eulu” otali dulu okuyukifwa keulu lo venevene. (Gen. 11:4; 27:28; Mat. 6:26) Ashike oshitya “eulu” ohashi longifwa yo okuulika koinima i lili noku lili. Omafimbo amwe ohashi yukifwa komapangelo opanhu. (Dan. 4:20-22) Ile otashi dulu okuyukifwa kepangelo laKalunga, ngaashi Ouhamba waKalunga. — Eh. 21:1.

Paulus okwa li a mona ‘eulu etitatu.’ Okwa li a hala okutya shike? Peemhito dimwe Ombiibeli oya endulula oshinima oikando itatu nelalakano lokudivilika. (Jes. 6:3; Hes. 21:27; Eh. 4:8) Osha fa shi li ngaha kutya eshi Paulus a li ta popi ‘eulu etitatu,’ okwa li ta ulike kepangelo ile “eulu” la tumbala, Ouhamba wopaMessias oo tau ka kala mewiliko laJesus Kristus nosho yo ovapangeli pamwe naye 144 000. (Tala embo Insight on the Scriptures, Vol. 1, ep. 1059, 1062.) Ngaashi omuyapostoli Petrus a shanga, otwa teelela “eulu lipe” ngaashi Kalunga a udaneka. — 2 Pet. 3:13.

Paulus okwa popya shike kombinga ‘yoparadisa’?

Oshitya “oparadisa” otashi dulu okuyukifwa koinima i lili noku lili ngaashi: (1) Otashi dulu okuyukifwa kOparadisa oyo ya li ko pehovelo; “oparadisa” otai dulu okuyukifwa kOparadisa oyo tai ke uya kombada yedu. (2) Otashi dulu yo okuyukifwa koparadisa yopamhepo oyo oshiwana shaKalunga tashi ka hafela mounyuni mupe. (3) Shikwao vali, otashi dulu yo okuyukifwa keenghalo diwa meulu, ‘oparadisa yaKalunga’ oyo ya tumbulwa meEhololo 2:7. — Tala Oshungonangelo yo 15 Juli 2015, ep. 8. okat. 8.

Otashi dulika Paulus a li ta popi oinima itatu aishe oyo i li mo 2 Ovakorinto 12:4 eshi a li ta popi oshimoniwa shaye.

Oku shi ngonga:

‘Eulu etitatu’ olo la tumbulwa mo 2 Ovakorinto 12:2 otashi dulika olo Ouhamba wopaMessias oo u li mewiliko laJesus Kristus nosho yo ovapangeli pamwe naye 144 000, ‘meulu lipe.’ — 2 Pet. 3:13.

Ouhamba wopaMessias oo ‘eulu etitatu,’ molwaashi Ouhamba ou li epangelo ile “eulu” la tumbala.

“Oparadisa” omo Paulus a li a “twalwa” memoniko otashi dulika ya yukifwa (1) kOparadisa yo venevene oyo tai ke uya kombada yedu, (2) koparadisa yopamhepo oyo tai ka kala ko, oyo tai ka kala i dulife oyo i li ko paife, nosho yo (3) ‘koparadisa yaKalunga’ yomeulu oyo tai ka kala ko mounyuni mupe.

Ounyuni mupe otau ka kala wa kwatela mo eulu lipe nosho yo edu lipe. Otapa ka kala elongekido lipe, mwa kwatelwa epangelo lomeulu nosho yo ovanhu tava longele Jehova moparadisa kombada yedu.