Pa 2 Kolinda 12:2, 3, Paulo waambile pa mwanamulume ye ‘batwajile mu jiulu ja busatu.’ Uno mwanamulume wajinga ñanyi? Paulo byo anembejilenga kipwilo kyajinga mu Kolinda, wibambijile kipasu amba wajingatu mutumwa wa Lesa. (2 Ko. 11:5, 23) Kabiji waambile ne pa “bimwesho ne byambo bya lumwekesho byafuma kwi Nkambo.” Mu bino byambo byaambile Paulo, kechi watongwelemo balongo bakwabo ne. Onkao mambo, kino kibena kumwesha’mba waambilenga pe aye mwine byo amwene bimwesho ne byambo bya lumwekesho.—2 Ko. 12:1, 5.

Onkao mambo, Paulo ye ye ‘batwajile mu jiulu ja busatu’ ne ku ‘kumutwala mu paladisa.’ (2 Ko. 12:2-4) Waingijishe kyambo kya “lumwekesho” kumwesha bintu byo bikekala kulutwe.

“Jiulu ja busatu” jamwene Paulo jilumbulula ka?

Mu Baibolo, kyambo kya “jiulu” kilumbulula jiulu jonka jo tumona. (Nte. 11:4; 27:28; Mat. 6:26) Bino kyambo kya “jiulu” kilumbulula ne bintu bikwabo. Kimye kimo kilumbulula bukalama bwa bantu. (Da. 4:20-22) Kabiji kilumbulula ne bukalama bwa Lesa, ko kuba’mba Bufumu bwa Lesa.—Lum. 21:1.

Paulo waambile’mba wamwene “jiulu ja busatu.” Ñanyi kintu kyo aambilengapo? Bimye bimo Baibolo ubwezhapo kintutu kimo bimye bisatu kumwesha’mba akyo kintu kyanema bingi. (Isa. 6:3; Ezi. 21:27; Lum. 4:8) Kyamweka Paulo byo aambile pa “jiulu ja busatu,” waambilengatu pa bukalama bwakila bukalama bonse, ko kuba’mba Bufumu bwa Bumesiasa buji mu maboko a kwa Yesu Kilishitu ne ba 144,000. (Monai buku wa Kizungu wa Insight on the Scriptures, Vol. 1, ma. 1059, 1062.) Byonka byanembele mutumwa Petelo, tubena kutengela “meulu apya” monka mwayila mulaye wa Lesa.—2 Pe. 3:13.

Nga “paladisa” waambilepo Paulo ulumbulula ka?

Kyambo kya kuba’mba “paladisa” nakyo kyakonsha kulumbulula bintu byavula, nabiji: (1) “Paladisa” ukeya pano pa ntanda. (2) Mutende ukeyowanga bantu ba Lesa mu ntanda ipya. (3) Bwikalo bwawama buji mwiulu, ko kuba’mba “paladisa wa Lesa” ye batongola mu Lumwekesho 2:7.—Monai Kyamba kya Usopa kya July 15, 2015, ji. 8. jifu. 8.

Kyamweshatu patoka’mba pa 2 Kolinda 12:4 Paulo waambilenga pa bino bintu byonse bisatu byo aambilenga pa bintu byo amwene.

Mu kwipipisha:

“Jiulu ja busatu” jo batongola pa 2 Kolinda 12:2 ke Bufumu bwa Bumesiasa buji mu maboko a kwa Yesu Kilishitu ne ba 144,000, kabiji o “meulu apya.”—2 Pe. 3:13.

Ke “jiulu ja busatu” mambo Bufumu bwa Lesa bwawama bingi, kabiji bwakila bukalama bwa bantu.

“Paladisa” mo “bamutwajile” Paulo mu kimwesho wimenako (1) paladisa ukekala pano pa ntanda, (2) paladisa wa ku mupashi ukekalako kulutwe ukakila paladisa wa ku mupashi ye tubena kwiyowa luno, ne (3) “paladisa wa Lesa” wa mwiulu ukekalako pa kimye kimotu na wa pano pa ntanda.

Onkao mambo, paladisa wamwene Paulo ke kukwatankana pamo kwa meulu apya ne ntanda ipya. Luno lukekala lunengezho lwa katataka lukavwangamo kafulumende wa mwiulu ne bantu ba Yehoba bakamwingijilanga mu paladisa pano pa ntanda.