Mo-2 Vakolinte 12:2, 3, Paurusa kwa uyungire kuhamena mugara gumwe ogu va “vakwilire meguru lyautatu.” Yige yilye? Apa Paurusa ga tjangerere mbungakriste zomoKolinte, age kwa yi zeresere asi Karunga kwa mu ruganesere ngomupositoli. (2 Kol. 11:5, 23) Age kwa uyungire hena kuhamena ‘mamonekero nomamoneko gaKarunga.’ Nye age kapi ga uyungire kuhamena vapuli vakwawo. Yipo nye, Paurusa kwa litembe mwene apa ga uyungire kuhamena mugara ogu ga mwene mamoneko gokutunda kwaKarunga.—2 Kol. 12:1, 5.

Eyi kulikida asi Paurusa yige ‘va vakwilire meguru lyautatu’ ntani “moparadisa.” (2 Kol. 12:2-4) Age kwa ruganesere nkango ‘mamoneko’ ezi azi likida asi age kwa mu tanterere yuma eyi ngayi ka kara po komeho.

Kosinke lya tamba ‘eguru lyautatu’ eli ga mwene Paurusa?

MoBibeli, ‘eguru’ kuvhura kutamba keguru eli atu mono. (Gen. 11:4; 27:28; Mat. 6:26) Nye ‘eguru’ kuvhura kutamba hena koyininke yapeke. Alyo pamwe kutamba komapangero govantu. (Ndan. 4:20-22) Ndi kuvhura hena kutamba kepangero lyaKarunga lyemeguru eli ava tumbura asi Uhompa waKarunga.—Ehor. 21:1.

Paurusa kwa mwene ‘eguru lyautatu.’ Yisinke ga tembe? Bibeli pamwe kunkondopeka nkango ndi kulikida mulyo gwazo pokuzirugurura yikando yitatu. (Jes. 6:3; Hes. 21:27; Ehor. 4:8) Ayo kumoneka asi pokuuyunga kuhamena ‘eguru lyautatu,’ Paurusa kwa demenene kepangero lyononkondo eli lya zeruka. Alyokuna kara Uhompa wouMesiyasa omu mwa hamena Kristusa kumwe nava nga ka pangera nawo, 144 000. (Tara buke Insight on the Scriptures, Vol. 1, epe. 1059, 1062.) Ngomu ga yi tjenge Mupositoli Peturusa, ose kuna kundindira “eguru lyepe” moomu ga yi tumbwidira Karunga.—2 Pet. 3:13.

Ngapi kuhamena ‘paradisa’ ezi ga tumbwire Paurusa?

Nkango ‘paradisa’ nazo kuvhura kutamba koyininke yoyinzi: (1) Azo kuvhura kutamba koparadisa zepevhu omu ngava ka tunga vantu komeho. (2) Azo kuvhura hena kutamba konkarapamwe zombili ezi ngava ka hafera vantu vaKarunga mouzuni woupe. (3) Ntani hena, azo kuvhura kutamba koukaro wouwa meguru, “mosikunino saKarunga” esi va tumbura mEhororo 2:7.—Tara Ruhungu 15 Pembankuru 2015, epe. 8. para. 8.

Kuvhura yi kare asi yitwa oyo yitatu nampo yiyo ga tembe Paurusa mo-2 Vakolinte 12:4 apa ga singonwene sihorokwa sendi.

Mokuyikwatakanesa:

‘Eguru lyautatu’ eli va tumbura mo-2 Vakolinte 12:2 nampo kwa tamba koUhompa wouMesiyasa omu mwa hamena Jesus kumwe nava ngava ka pangera nendi, 144 000 ‘meguru lyepe.’—2 Pet. 3:13.

Uhompa ou kuna kara ‘eguru lyautatu’ morwa awo kwa sikilira mo ntani kwa zeruka.

Emoneko eli ga mwene Paurusa omu va mu “vakwilire moparadisa” nampo kwa tamba (1) koParadisa ezi ngazi ka kara pevhu, (2) uumwe ou ngau ka kara pokatji kovantu vaKarunga ngau ka nenepa kupitakana ou vana ku hafera ngesi, ntani (3) ‘kosikunino saKarunga’ semeguru esi ngasi ka kara po mouzuni woupe.

Yipo nye, mouzuni woupe ngamu ka kara eguru lyepe nevhu lyepe. Alyo ngali ka kara ewapaiko lyepe omu ngamu ka hamena Uhompa wemeguru ntani vantu ava ngava ka karera Jehova moparadisa pevhu.