Toj 2 Corintios 12:2, 3 yolin Pablo tiʼj jun xjal «jaw jubʼchaʼn» ex xi qʼiʼn toj «toxin kol kyaʼj». ¿Alqiʼj in yolintoq? Xi ttzʼibʼin jlu kye kʼloj okslal te Corinto ex tqʼama qa in najbʼentoq tuʼn Dios te apóstol (2 Cor. 11:5, 23). Yajxitl yolin kyiʼj junjun «witzikʼ ex aju tzaj tyekʼun Qajaw». Kyoj junjuntl taqikʼ Tyol Dios tok kyiʼj versículo lu, mintiʼ yolin Pablo kyiʼj junjuntl erman. Tuʼntzunju, jaku txi qqʼamaʼn qa aju xjal ok tkeʼyin witzikʼ, atz in yolin tiʼj apóstol Pablo (2 Cor. 12:1, 5).

Kyjuʼtzun, a Pablo aju xjal «jaw jubʼchaʼn» ex xi qʼiʼn toj «toxin kol kyaʼj», ex toj «tbʼanel najbʼil» (2 Cor. 12:2-4, TNM). Tej tajbʼen yol «tzaj tyekʼun Qajaw» tuʼn Pablo, tzaj tqʼamaʼn qa tzaj qʼoʼn tqanil te tiʼjju kbʼajel toj ambʼil tzul.

¿Tiʼtzun aju «toxin kol kyaʼj» ok tkeʼyin Pablo?

Aj tajbʼen yol kyaʼj tuʼn Tyol Dios, jaku yolin kyiʼj nim tiʼchaq. Jun techel, jaku yolin kyiʼj qeju kyaʼj in nok qqʼoʼn qwitz kyiʼj (Gén. 11:4; 27:28; Mat. 6:26). Ax ikx jaku yolin tiʼj kykawbʼil xjal (Dan. 4:20-22). Ex jaku yolin tiʼj Tkawbʼil Dios (Apoc. 21:1).

Qa ikju, ¿alqiʼj yolin Pablo tej tajbʼen yol «toxin kol kyaʼj» tuʼn? At maj in tzaj tqʼamaʼn Tyol Dios oxe maj jun tiʼ tuʼntzun tzaj tqʼamaʼn qa nim toklen (Is. 6:3; Ezeq. 21:27; Apoc. 4:8). Tuʼn jlu in nel qnikʼ tiʼj qa tej tyolin Pablo tiʼjju «toxin kol kyaʼj», atz yolin tiʼj jun kawbʼil mas nim toklen: aju Tkawbʼil Mesías, aju kxel qʼoʼn toj tkwent Jesucristo ex qeju 144,000 o che jaw skʼoʼn tuʼn kykawin tukʼil. (Qʼonka twitza tiʼj Perspicacia para comprender las Escrituras, volumen 1, toj t-xaq 473 ex 476). Tej tkubʼ ttzʼibʼin apóstol Pedro qa in qo ayon tiʼj jun «akʼaj kyaʼj» o tzaj ttziyen Dios, atz yolin tiʼj Tkawbʼil Mesías (2 Ped. 3:13).

¿Yajtzun aju «tbʼanel najbʼil» yolin Pablo tiʼj? ¿Tiʼ jlu?

Ax ikx jaku yolin tiʼj nim tiʼchaq aj ttzaj qʼamaʼn yol tbʼanel najbʼil. Tnejel, jaku txi qqʼamaʼn qa in yolin jlu tiʼj Tbʼanel Najbʼil ktel tzalu twitz Txʼotxʼ, tuʼnju atzun najbʼil xi tqʼoʼn Dios kye tnejel xjal. Tkabʼin, jaku yolin tiʼj tbʼanel mujbʼabʼil ktel kyxol tmajen Dios toj akʼaj twitz Txʼotxʼ. Ex toxin, ax ikx jaku yolin tiʼj tbʼanel mujbʼabʼil at toj «tnajbʼil Dyos» toj kyaʼj, aju in tzaj tqʼamaʼn Apocalipsis 2:7, XT, (qʼonka twitza tiʼj Aju Xqʼuqil te 1 te julio te 2015, t-xaq 13, taqikʼ 8).

Tej tyolin Pablo tiʼjju ok tqʼoʼn twitz tiʼj, atzlo yolin kyiʼj oxe tiʼ lu tej ttzaj tqʼamaʼn aju tkuʼx toj 2 Corintios 12:4.

Toj chʼin yol.

Aju «toxin kol kyaʼj» in tzaj qʼamaʼn toj 2 Corintios 12:2, atzlo in yolin tiʼj Tkawbʼil Mesías aj t-xi qʼoʼn toj tqʼabʼ Jesucristo ex qeju 144,000 toj «akʼaj kyaʼj» (2 Ped. 3:13).

In nok qʼoʼn tbʼi te «toxin kol kyaʼj» tuʼnju atzun kawbʼil mas nim toklen kywitz txqantl.

Ex aju «tbʼanel najbʼil» jatumel «jaw jubʼchaʼn» Pablo toj tej tok tqʼoʼn twitz tiʼj toj jun witzikʼ, jakulo yolin tiʼj 1) Tbʼanel Najbʼil ktel tzalu twitz Txʼotxʼ, 2) tiʼj tbʼanel mujbʼabʼil ktel toj akʼaj twitz Txʼotxʼ ex mas nim ktel ik tzeʼn at jaʼlo, ex 3) tiʼjju «tnajbʼil Dyos» at tok kyaʼj ex che tel kykyaqil jlu toj junx ambʼil toj akʼaj twitz Txʼotxʼ.

Tuʼntzunju, ktel aju «akʼaj kyaʼj» ex aju «akʼaj txʼotxʼ» toj Tbʼanel Najbʼil. Toj ambʼil lu kkawil Tkawbʼil Dios ex ktel mujbʼabʼil kyxol xjal aj kyajbʼen te Jehová toj Tbʼanel Najbʼil.