Apostëlë Pablo myaytyak tuˈugë yetyëjk diˈib ojts “yajmëpaˈtëkën ma ja myëtëkëëkpë tsajpën” (2 Cor. 12:2, 3, TY). ¿Pënë tyäˈädë yetyëjk? Mä ja neky diˈibë Pablo tyuknijäˈäyë ja tuˈukmujkënë diˈib Corinto, jap jyënany ko yëˈë netyë Dios yajtuunëp extëmë apostëlë (2 Kor. 11:5, 23). Ta net tmaytyaky tijaty ja nWintsënˈäjtëm tukˈijx tukmëdoowë. Ko Pablo duˈun jyënany, kyaj tmaytyaky ja wiinkpë Dios mëduumbëty, pääty njënäˈänëm ko yëˈë diˈib tijaty yajtukˈijx yajtuknijäˈäwë (2 Kor. 12:1, 5).

Pääty ja jäˈäy diˈib ojts “yajmëpaˈtëkën ma ja myëtëkëëkpë tsajpën” ets mä ja itë “oypyë tsujpë”, yëˈë ja apostëlë Pablo (2 Cor. 12:2-4, TY). Ets ko jyënany yajtukˈijx yajtuknijäˈäwë tijaty, yëˈë yˈandijpy ko nyijäˈäwë tijatyë nety miin këdakp.

Ets ¿tidën yˈandijpy “ja myëtëkëëkpë tsajpën” diˈibë Pablo yˈijx?

Ko Biiblyë dyajtunyë tyäˈädë ayuk tsäjp, mbäät nyikejy kanäk pëky. Extëm nˈokpëjtakëm, mbäät yëˈë tˈandijy ja tsäjp diˈib yaˈijxp (Gén. 11:4; 27:28; Mat. 6:26). Näˈäty, nan mbäät yëˈë tˈandijˈyë gobiernë diˈib yä naxwiiny (Dan. 4:20-22). Nan mbäät yëˈë tˈandijy tuˈugë gobiernë diˈib tsäjpotm, extëm nˈokpëjtakëm, ja Diosë yˈAnaˈam Kyutujkën (Diˈibʉ Jat. 21:1).

Pääty, ¿ti Pablo myaytyäˈägan ko jyënany “ja myëtëkëëkpë tsajpën”? Mä Biiblyë tëgëkˈok näˈäty tnikäjpxëmbity parë wyëˈëmët winmäˈänyoty ti myaytyäˈägaampy (Is. 6:3; Ezeq. 21:27; Diˈibʉ Jat. 4:8). Ko Pablo tmaytyaky “ja myëtëkëëkpë tsajpën”, yëˈë nety yˈandijaampy tuˈugë gobiernë diˈib mas wäˈkpëtsëëmp, ja Kristë yˈanaˈam kyutujkën mët ja 144,000 diˈib mëët yˈanaˈamäˈändë (ixë Perspicacia para comprender las Escrituras, volumen 1, pajina 473, 476). Ja Kristë yˈanaˈam kyutujkën, yëˈë “ja jembyë tsäjp” diˈibë apostëlë Pedro myaytyak, ets yëˈë diˈib nˈawijx njëjpˈijxëm (2 Peed. 3:13).

¿Ets ti net yˈandijpy ja itë “oypyë tsujpë” diˈibë Pablo myaytyak?

Tadë ayuk tsujpë it lugäär, mbäät kanäk pëky tijaty tˈandijy. Myëduˈuk, waˈan yëˈëjëty ja it lugäär mä yajpëjtaky ja tim jawyiimbë naxwinyëdë jäˈäy, pääty mbäät njënäˈänëm ko yëˈë yˈandijpy ja it lugäärë tsujpë diˈib itäämp yä Naxwiiny. Myëmajtsk, waˈan yëˈë tˈandijy ko ja Diosë kyäjpn yajpäädäˈäny tuˈugyë ets agujk jotkujk mä ja jembyë jukyˈäjtën. Ets myëdëgëëk, waˈan yëˈë tˈandijy wiˈix jantsy oy jantsy tsuj yˈixëty ja jukyˈäjtën jam tsäjpotm o “ja lugäärë tsujpë diˈibë Dios jyaˈäjtypy” extëm jyënaˈanyë Biiblyë (Rev. 2:7, TNM). (Ix mä Diˈib Xytyukˈawäˈänëm 15 äämbë julië 2015, pajina 5, parrafo 8).

Waˈanë Pablo yëˈë tmaytyäˈägäˈänyë tyäˈädë tëgëk pëkypyë diˈib yä të yajnigajpxy ko tkujäˈäyë wiˈixë nety të jyaty (2 Cor. 12:4, TY).

Mbäädë net njënäˈänëm ko:

“Ja mëtëkëëkpë ja tsajpën” diˈib apostëlë Pablo myaytyak, waˈan yëˈë tmaytyäˈägäˈäny tuˈugë gobiernë diˈib mas wäˈkpëtsëëmp, ja Kristë yˈanaˈam kyutujkën mët ja 144,000 diˈib mëët yˈanaˈamäˈändë, tyäˈädë yëˈë yˈandijpy “ja jembyë tsäjp” (2 Cor. 12:2, TY; 2 Peed. 3:13).

“Ja mëtëkëëkpë ja tsajpën”, nan pääty duˈun yajtijy mët ko Diosë yˈAnaˈam Kyutujkën, yëˈë tuˈugë gobiernë diˈib mas wäˈkpëtsëëmp.

Ja itë “oypyë tsujpë” mä Pablo “yajmëpaˈtëkën”, waˈan yëˈë tˈandijy, 1) ja it lugäärë tsujpë diˈib itäämp yä Naxwiiny. 2) Ko Diosë kyäjpn yajpäädäˈäny tuˈugyë ets agujk jotkujk, per mas niˈigyë ets kyaj dyuˈunëty tyam, ets 3) yëˈë “ja lugäärë tsujpë diˈibë Dios jyaˈäjtypy” jam tsäjpotm. Tukëˈëyë tyäˈädë jyamˈatäˈäny mä ja jembyë jukyˈäjtën.

Mä jembyë jukyˈäjtën, jyamˈatäˈäny “ja jembyë tsäjp” etsë “jembyë naxwinyëdë”. Nyaxkëdäˈägäˈäny tuˈugë Anaˈam Kutujkën jam tsäjpotm, ets mä ja it lugäärë tsujpë jyukyˈatäˈändë naxwinyëdë jäˈäy diˈib myëdunandëbë Jyobaa.