Pali 2 Kolinto 12:2, 3, Paulo walanzile pa monsi umwi wino “wasenzilwe kupela kwi yulu lyalenga yatatu.” Uzye umonsi wiyo wali a weni? Lino Paulo walembiile kalata uku cilongano ca ina Kolinto, walanzile ukuti wali u mutumwa wakwe Leza. (2 Kol. 11:5, 23) Lyene walanzile pa ‘vilolwa vino Umwene waumbwile.’ Paulo atalanzile pa ina yauze umwi lembelo lii. Fwandi walozyanga kuli aliwe kwene.—2 Kol. 12:1, 5.

Fwandi Paulo ali wino “wasenzilwe kupela kwi yulu lyalenga yatatu” na muli paladaise. (2 Kol. 12:2-4) Waomvizye izwi lyakuti ‘kuumbula’ ukulozya uku vintu ivyali nu kucitika uku nkoleelo.

Uzye ‘iyulu lyalenga yatatu’ lino Paulo waweni ali cani?

Muli Baibo, ‘iyulu’ lingalozya ukwi yulu kwene ilya cumi cumi. (Utan. 11:4; 27:28; Mate. 6:26) Nomba ‘iyulu’ nupya likaomviwa nu mu nzila yuze. Insita zimwi likalozya uku uteeko wa untunze. (Dan. 4:20-22) Nanti lingalozya kuli ukateeka wakwe Leza, ukaimililwako nu Wene Wakwe Leza.—Umbw. 21:1.

Paulo walanzile ukuti waweni ‘iyulu lyalenga yatatu.’ Uzye walozizye mwi? Insita zimwi Baibo ikalumbula icintu imiku itatu ukulanga vino cicindime, nanti ukulanga ukukoma kwa cintu cico. (Eza. 6:3; Ezek. 21:27; Umbw. 4:8) Cikaloleka kwati lino Paulo walanzile api “yulu lyalenga yatatu” walandanga pa ucindami wa uteeko, kulikuti Uteeko Wakwe Mesiya uulateekwa na Yesu Klistu pamwi na ya kateeka yauze 144,000. (Lolini Insight on the Scriptures, Vol. 1, mafwa 1059, 1062.) Wakwe vino umutumwa Petulo walemvile, tukaloleela “mayulu apya” wakwe vino Leza watulaya.—2 Pet. 3:13.

Nga vino Paulo walanzile pali “paladaise,” walozizye mwi?

“Paladaise” nawe angalozya uku vintu ivipusanepusane: (1) Wakwe vino cali uku wikalo wa yantu ya kutandikilako, “paladaise” wii angalozya kuli Paladaise wa cumi cumi alayako pano nsi uku nkoleelo. (2) Angalozya nu ku mutende uiyele uno antu yakwe Leza yalaipakizya umu nsi ipya. (3) Nupya, angalozya nu ku vintu ivisuma ivya kwi yulu, kuli kuti ‘paladaise wakwe Leza’ uwalumbulwa pa Umbwilo 2:7.—Lolini Lupungu Lwa Mulinzi lwakwe Julai 15, 2015, ifwa 8, pala. 8.

Cikaloleka ukuti Paulo walozyanga ku vintu vyonsi vii vitatu pali 2 Kolinto 12:4 lino walondololanga ivyamucitikiile.

Ukupitulukamo panono:

‘Iyulu ilyalenga yatatu’ ilyalumbulwa pali 2 Kolinto 12:2 lifwile likalozya uku Uteeko Wakwe Mesiya uulateekwa na Yesu Klistu pamwi na ya kateeka yauze 144,000, ali “mayulu apya.”—2 Pet. 3:13.

Likaamwa ukuti ‘iyulu lyalenga yatatu’ pano Uwene uwo wacindama sana.

Lyene “paladaise” wino Paulo ‘wasenzilweko’ umu cilolwa afwile akalozya (1) kuli Paladaise wa cumi cumi aalayako pano nsi uku nkoleelo, (2) ku mutende uiyele uno antu yakwe Leza yalakwata pa nsita iiya, uulavula sana ukucila vino caya ndakai, na (3) kuli ‘paladaise wakwe Leza’ uwa kwi yulu aalayako pa nsita iliimwi kwene ni insi ipya.

Fwandi paladaise ilayamo mayulu apya ni insi ipya. Yalaya amapekanyo apya, mulaya Uteeko wa mwi yulu alino na antu aalaombela Yeova pano nsi muli paladaise.