Nu̱ú 2 Corintios 12:2, 3, ta̱ Pablo ni̱ka̱ʼa̱nra xa̱ʼa iin ta̱a ta̱ ni̱xa̱ʼa̱n chí ndiví ña̱ u̱ni̱. ¿Ndáa ta̱ káʼa̱nña xa̱ʼa? Nu̱ú carta, ña̱ chi̱ndaʼára ndaʼa̱ na̱ ñuu Corinto, káxiní ni̱ka̱ʼa̱nra ña̱ Ndióxi̱ xíniñúʼu-ñaʼá ña̱ kúúra apóstol (2 Cor. 11:5, 23). Saáví ni̱ka̱ʼa̱nra xa̱ʼa ña̱ʼa ña̱ ta̱xi Ndióxi̱ kuni na̱ ndásakáʼnu-ñaʼá. Nu̱ú versículo yóʼo va̱ása níka̱ʼa̱nra xa̱ʼa inka na̱ ñanira. Ña̱kán kivi ka̱ʼa̱nyó ña̱ miívara kúú ta̱ xi̱ni ña̱ ni̱na̱ʼa̱ Ndióxi̱ nu̱úra (2 Cor. 12:1, 5).

Ña̱kán, ta̱ “ni̱xa̱ʼa̱n” chí “ndiví ña̱ u̱ni̱” saátu chí “ñuʼú livi” xi̱kuu ta̱ apóstol Pablo (2 Cor. 12:2-4). Kivi ka̱ʼa̱nyó ña̱ íyova ña̱ ni̱na̱ʼa̱ Ndióxi̱ nu̱úra xa̱ʼa ña̱ koo chí nu̱únínu.

¿Ndáaña kúú “ndiví ña̱ u̱ni̱” ña̱ xi̱ni ta̱ Pablo?

Nu̱ú Biblia, tu̱ʼun ndiví kúni̱ kachiña ku̱a̱ʼá nu̱ú ña̱ʼa. Káʼa̱nña xa̱ʼa ndiví ña̱ xítoyó (Gén. 11:4; 27:28; Mat. 6:26). Inka yichi̱ káʼa̱nña xa̱ʼa na̱ chíñu ñuyǐví yóʼo (Dan. 4:20-22). Inkatu yichi̱ káʼa̱nña xa̱ʼa ña̱ xáʼndachíñu Ndióxi̱ ti̱xin reinora (Rev. 21:1).

Ña̱kán, ¿ndáaña kúú “ndiví ña̱ u̱ni̱” ña̱ ni̱ka̱ʼa̱n ta̱ Pablo xa̱ʼa? Sava yichi̱ nu̱ú Biblia káʼa̱nña xa̱ʼa iin ña̱ʼa nda̱a̱ u̱ni̱ yichi̱, ña̱kán kúnda̱a̱-iniyó ña̱ ndáyáʼviníña (Is. 6:3; Ezeq. 21:27; Rev. 4:8). Ña̱kán tá ni̱ka̱ʼa̱n ta̱ Pablo xa̱ʼa ndiví ña̱ u̱ni̱, ni̱ka̱ʼa̱nra xa̱ʼa iin gobierno ña̱ káʼnuka: ña̱ kaʼndachíñu ta̱ Jesús xíʼin na̱ 144,000. Xa̱ʼa gobierno yóʼo ni̱ka̱ʼa̱n ta̱ apóstol Pedro, tá ni̱ka̱ʼa̱nra ña̱ ndátuyó “ndiví ña̱ xa̱á” ña̱ ni̱ka̱ʼa̱n Ndióxi̱ xa̱ʼa (2 Ped. 3:13).

Ta, ¿ndáaña kúú “ñuʼú livi” ña̱ xi̱ni ta̱ Pablo?

Saátu tu̱ʼun ñuʼú livi káʼa̱nña xa̱ʼa ku̱a̱ʼá nu̱ú ña̱ʼa. Ña̱ nu̱ú ña̱ káʼa̱nña xa̱ʼa kúúña: ñuʼú livi ña̱ koo nu̱ú ñuʼú yóʼo, saáchi saá ni̱xi̱yo ñuʼú ña̱ ta̱xi Ndióxi̱ ndaʼa̱ na̱ yiví ki̱vi̱ nu̱ú. Ña̱ u̱vi̱ ña̱ káʼa̱nña xa̱ʼa kúúña: ña̱ táxinní koo na̱ kutaku nu̱ú ñuyǐví xa̱á xa̱ʼa ña̱ ndásakáʼnuna Ndióxi̱. Ña̱ u̱ni̱ ña̱ káʼa̱nña xa̱ʼa kúúña: ña̱ va̱ʼaní íyo chí ndiví, “ñuʼú livi ña̱ kúúmií Ndióxi̱” ña̱ káʼa̱n Revelación 2:7 xa̱ʼa (koto Tutu Ña̱ Nátúʼun xíʼinyó ña̱ 15 tí julio ña̱ ku̱i̱ya̱ 2015, página 8, párrafo 8).

Sana xa̱ʼa u̱ni̱ ña̱yóʼo kúú ña̱ ni̱ka̱ʼa̱n ta̱ Pablo nu̱ú 2 Corintios 12:4.

Ná ndakaʼányó ña̱ kúni̱ kachiña:

“Ndiví ña̱ u̱ni̱”, ña̱ káʼa̱n 2 Corintios 12:2 xa̱ʼa, sana kúúña: ña̱ kaʼndachíñu ta Jesucristo xíʼin na̱ 144,000, nanítuña “ndiví ña̱ xa̱á” (2 Ped. 3:13).

Naníña “ndiví ña̱ u̱ni̱”, saáchi reino Ndióxi̱ kúú iin gobierno ña̱ káʼnuka.

Sana “ñuʼú livi” nu̱ú ña̱ ni̱xa̱ʼa̱n ta̱ Pablo ti̱xin iin ña̱ ni̱na̱ʼa̱ Ndióxi̱ nu̱úra kúúña: 1) ñuʼú livi ña̱ koo nu̱ú ñuʼú yóʼo, 2) ña̱ táxinní koo na̱ kutaku nu̱ú ñuyǐví xa̱á xa̱ʼa ña̱ ndásakáʼnuna Ndióxi̱, 3) “ñuʼú livi ña̱ kúúmií Ndióxi̱” nu̱ú ndiví; u̱ni̱ saá ña̱yóʼo iin kooña nu̱ú ñuyǐví xa̱á.

Ña̱kán nu̱ú ñuyǐví xa̱á, koo “ndiví xa̱á” á reino Ndióxi̱, xíʼin “ñuʼú xa̱á” á na̱ yiví na̱ ndasakáʼnu-ñaʼá nu̱ú ñuʼú livi ña̱ koo nu̱ú ñuʼú yóʼo.