Pilemba lya 2 Bakorinti 12:2, 3, Pauli ikufwanikisiwa nu mundu uyu “anyakiwe kumwanya kwa butatu.” Ngimba ali yonani? Bo akilembile ikipanga kya ku Korinti, Pauli alingenie ukuti Kyala ambombelagha umwene ukuya Ntumiwa. (2 Kor. 11:5, 23) Umwene ayobile isya “fisetuka nu busetuli bwa Mwalafyale.” Mu nkhani iyi Pauli akayobagha isya bakamu abangi. Loli umwene iyobagha ukuya mundu uyu alyambilile ifisetuka kangi nu busetuli.—2 Kor. 12:1, 5.

Yonongwa yake Pauli ali yo mundu uyu ‘anyakiwe kumwanya kwa butatu’ kangi ‘anyakiwe mu paladaiso.’ (2 Kor. 12:2-4) Umwene abombile amasyu aghakuti “ubusetuli,” agha ghikunangisya isi sisakubombiwagha nkyeni.

Ngimba Pauli aketile findu fiki ifi fyafwanagha bo “kumwanya kwa butatu”?

Amasyu aghakuti “kumwanya” mu Baibolo ghikuyoba isya kumwanya kuno amaso ghitu ghikughomokela ukuketa. (Bwa. 11:4; 27:28; Mat. 6:26) Loli amasyu ghaghagha ghikubombeliwa kangi mu njila isingi. Utubalilo tumo ghikuyoba isya bulaghili bwa bandu. (Dan. 4:20-22) Lumo ghabaghile ukuyoba isya bulaghili bwapamwanya, bo Ubunyafyale bwa Kyala.—Ubuset. 21:1.

Pauli aketile “kumwanya kwa butatu.” Ngimba ifundo yali yakuti fiki? Ibaibolo utubalilo tumo likwandisania ukuyoba ifindu fimo katatu ukuti fipilikiwe kanunu, pamo ukuti abandu bakasiwe. (Yes. 6:3; Eze. 21:27; Ubuset. 4:8) Sikunangisya ukuti bo Pauli ikuyoba amasyu ghakuti “kumwanya kwa butatu,” Umwene ayobagha isya bulaghili ubwapamwanya fiyo ubwa Bunyafyale bwa Mesiya ukwendela mwa Yesu kangi na ba 144,000 aba bisakulaghilagha nawe. (Keta Insight on the Scriptures, Vol. 1, peji 1059, 1062.) Ukufwana na isi untumiwa Peteri alembile, tukukighulila “ikya kumwanya ikipya” ukufwana nulufingo lwa Kyala.—2 Pet. 3:13.

Ngimba findu fiki ifi Pauli ayobile ukufwana ni sya “paladaiso”?

Ilisyu lyakuti “paladaiso” libaghile ukusanusiwa munjila nyingi: (1) Linga tukuketa amalo amanunu agha abandu bakwanda bikalagha, amasyu ghakuti “paladaiso” ghikunangisya ukuti nkyeni mwisakuya paladaiso pa kisu kyapasi. (2) Ghabaghile ukusanusya kangi isya paladaiso wamwambepo uyu abandu ba Kyala bisakuhobokagha nawe nkisu ikipya. (3) Mwakongelelapo, amasyu agha ghikusanusya kangi isya findu ifinunu ifi fili mu “paladaiso wa Kyala kumwanya” ifi fiyobiwe pilemba lya Ubusetuli 2:7.—Keta Gongwe la Mulinda, la Julayi 15, 2015, peji. 8. pala. 8.

Tukulondiwa ukumanya ukuti Pauli alingenie kanunu ifundo sitatu isi sikwaghiwa pilemba lya 2 Bakorinti 12:4 pakabalilo aka ayobagha isi syalimbonekile.

Ukughomokelamo:

Amasyu aghakuti “kumwanya kwa butatu” agha ghayobiwe pilemba lya 2 Bakorinti 12:2 ghikuyoba isya Bunyafyale bwa Mesiya ubu buli m’maboko gha Yesu na ba 144,000, ni ‘kya kumwanya ikipya.’—2 Pet. 3:13, NWT.

Ghikuyobiwa ukuti “kumwanya kwa butatu” panongwa yakuti ubulaghili bwa Bunyafyale bwapamwanya fiyo ukukinda kilikyosa.

“Paladaiso” uyu Pauli “anyakiwe” nkisetuka, ikufwanisiwa na (1) Paladaiso uyu isakuyako pa kisu kyapasi, (2) paladaiso wa mwambepo uyu isakuyako kangi isakuya nnunu fiyo ukukinda paladaiso wa mwambepo uyu aliko lino kangi (3) “paladaiso wa Kyala” wa kumwanya, uyu isakuyako pakabalilo ka kufwana itolo na paladaiso wa pakisu kya pasi.

Mwakufwana itolo, ikisu ikipya kikwisa kukolelanagha fiyo nikipya ikyakumwanya kangi ni kisu ikipya ikyapasi. Pisakuya imbatiko imbya, iya boma lya Bunyafyale bwakumwanya ni ya bandu bosa aba bisakumbombelagha Yehova mu paladaiso pakisu kyapasi.