Uvuẹn 2 Corinthians 12:2, 3, ọnyikọ Paul ọ tẹmro kpahen ọhworhare owu ra “kpare riẹ odjuwu ọresa na.” Ọrọmo yẹ ọhworhare ọrana? Ọke i Paul ọ ya ileta vwe Ilele Kristi ri ha i Corinth, nọ karunumwuie taghene ọhworhare ọrana ọnyikọ rẹn Osolobrugwẹ. (2 Cor. 11:5, 23) Nọ ji tẹmro kpahen “emena arudo ọrhẹ oghwolophia sansan ri sekpahen Ọrovwori na.” Uvuẹn ileta ọrana, Paul ọ hunute imizu erọrọ-ọ. Omarana, Paul nọ ha izede ẹghwanren djephia taghene ọye yẹ ọhworhare rọ menemena arudo jeghwai mẹrẹn oghwolophia sansan na.—2 Cor. 12:1, 5.

Omarana, Paul yẹ ọhworhare ra “kpare riẹ odjuwu ọresa na,” ra ji “kpare riẹ i paradais.” (2 Cor. 12:2-4) Ọ ha ẹmro na, “oghwolophia” ruiruo no dje kpahen ekwakwa ri na phia obaro na.

Me yi Paul ọ mẹrẹnren uvuẹn “odjuwu ọresa na”?

Uvuẹn i Baibol na, odjuwu ọnọ sabu mevirhọ ivwrevwrede ra mẹrẹn na. (Gen. 11:4; 27:28; Matt. 6:26) Ọrẹn, a ji ha “odjuwu” ruiruo izede erọrọ. Ọkezẹko, o ji mevirhọ isuensun ituakpọ. (Dan. 4:20-22) Yanghene ọnọ sabu mevirhọ Uvie Osolobrugwẹ.—Rev. 21:1.

Paul ọ mẹrẹn “odjuwu ọresa na.” Me yẹ ọnana o mevirhọ? Ọkezẹko, Baibol na ọ sabu vwanriẹn emru ọgbesa neneyo ọ karunumwuie, jeghwai dje oborẹ o vwo omẹgbanhon te. (Isa. 6:3; Ezek. 21:27; Rev. 4:8) Ọ họhọre taghene ọke i Paul ọ ta kpahen “odjuwu ọresa na,” ọ ta kpahen usun ro rierun omamọ nọyẹ Uvie i Messiah na ri Jesu ọrhẹ awan 144,000 ine suon na. (Se Insight on the Scriptures, Vol. 1, pp. 1059, 1062.) Jerẹ oborẹ ọnyikọ Peter ọ yare, o vwo “idjuwu ekpokpọ” rẹ ọwan a hẹrhẹ sekpahen ive Osolobrugwẹ.—2 Pet. 3:13.

Me yi Paul o mevirhọ ọke rọ tẹmro kpahen i “paradais”?

Ẹmro na, “paradais” ọnọ ji sabu mevirhọ ekwakwa sansan: (1) Sekpahen ekete rẹ Osolobrugwẹ o fi onyakpọ ọrukaro na rhọ, “paradais” ọnọ sabu mevirhọ otọrakpọ na ri Jehova ọnọ dẹriẹrhiẹ i Paradais obaro na. (2) Ọnọ sabu mevirhọ erhirhiẹ obọdẹn ufuoma rẹ ihworho Osolobrugwẹ ine vwo uvuẹn akpọ ọkpokpọ na. (3) Ọnọ ji sabu rhiẹ omamọ akpọ obẹ odjuwu, ro rhiẹ “paradais ọrẹ Osolobrugwẹ” ra hunute uvuẹn Revelation 2:7.—Se Watchtower, July 15, 2015, p. 8. par. 8.

Ọnọ sabu rhirhiẹ taghene erhirhiẹ esa enana yi Paul ọ rionbọrhọ ọke rọ ta obororhiẹromẹrẹn uvuẹn 2 Corinthians 12:4.

Na zẹ ọsoso ẹmro na koko:

Ọnọ sabu rhirhiẹ taghene “odjuwu ọresa” ra hunute uvuẹn 2 Corinthians 12:2, o mevirhọ Uvie ọrẹ i Messiah na, ri Jesu Kristi ọrhẹ awan 144,000 ine suon, nọyẹ “idjuwu ekpokpọ” na.—2 Pet. 3:13.

E serie “odjuwu ọresa” nime Uvie na, o rhomu ghwẹ eri hẹrhẹre jeghwai rierun omamọ ghwẹ aye.

“Paradais” ra kpare i Paul nya na uvuẹn emena arudo ọnọ sabu mevirhọ (1) Paradais uvuẹn otọrakpọ na obaro na, (2) erhirhiẹ obọdẹn ufuoma ra na mẹrẹn ọke ọrana, ro no kerabọ ghwẹ ufuoma ra mẹrẹn uvuẹn ukoko i Jehova ọvo vwana, ọrhẹ (3) “paradais ọrẹ Osolobrugwẹ” obẹ odjuwu ro no suẹn akpọ ọkpokpọ na.

Omarana, idjuwu ekpokpọ ọrhẹ akpọ ọkpokpọ na i ha usuẹn enyerakpọ ọkpokpọ rọ sa obaro na. Ọnana ẹkwaphiẹrhotọre ọkpokpọ ro sekpahen igọmẹti Uvie ọrẹ odjuwu na ọrhẹ ituakpọ ra ga i Jehova uvuẹn paradais rọ ha otọrakpọ na.