Pa 2 Akorinto 12:2, 3, Paulo wangukamba za munthu munyaki yo “wangukwamphulikiya kuchanya kwachitatu.” Kumbi wenga yani? Pa nyengu yo Paulo walembiyanga mpingu wa ku Korinto, wangukamba kuti munthu uyu Chiuta wamugwiriskiyanga ntchitu nge wakutumika. (2 Akori. 11:5, 23) Pavuli paki, wangukamba za “vakuziziswa ndipuso vinthu vakuvumbulika ndi Ambuya.” Mu nkhani iyi Paulo wanguzumbuwapu cha mazina nga abali anyaki. Mwaviyo, tingakamba kuti munthu yo wanguwona vinthu ivi wenga iyu mweneku.—2 Akori. 12:1, 5.

Paulo ndiyu “wangukwamphulikiya kuchanya kwachitatu” ndi “kuparadayisu.” (2 Akori. 12:2-4) Iyu wangugwiriskiya ntchitu mazu ngakuti “vakuvumbulika” ngo ngalongo kuti Chiuta wangumuvumbuliya vinthu vo vichitikengi kunthazi.

Kumbi Paulo wanguwonanji wati wakwamphulikiya “kuchanya kwachitatu”?

Mu Bayibolu mazu ngakuti “kuchanya,” ngang’anamuwa kuchanya ko tiwona ndi masu ngidu. (Chiya. 11:4; 27:28; Mate. 6:26) Kweni nyengu zinyaki mazu ngakuti “kuchanya,” ngangang’anamuwa so vinthu vinyaki. Nyengu zinyaki ngamiya ulamuliru wa ŵanthu. (Danye. 4:20-22) Ngamiya so Ufumu waku Chiuta wo Yesu wazamulamuliya.—Chivu. 21:1.

Paulo wangukamba kuti wanguwona “kuchanya kwachitatu.” Kumbi wang’anamuwanganji? Nyengu zinyaki Bayibolu liwerezapu katatu mazu ngamoza kuti lisimikiziyi pamwenga kudidimizga fundu. (Yesa. 6:3; Ezeki. 21:27; Chivu. 4:8) Pakukamba kuti “kuchanya kwachitatu,” Paulo watenere kuti wakonkhoskanga va ulamuliru wapachanya ukongwa. Ulamuliru uwu ndi Ufumu waku Chiuta wo wazamulamuliya Yesu Khristu ndi a 144,000. (Wonani buku lakwamba la Insight on the Scriptures, peji 1059, 1062.) Nge mo wakutumika Peturo wangulembe, tilindizga “kuchanya kufya” mwakukoliyana ndi vo Chiuta wakulayizga.—2 Petu. 3:13.

Kumbi “paradayisu” yo Paulo wanguwona wang’anamuwanji?

Mazu ngakuti “paradayisu” ngangang’anamuwa vinthu vinandi: (1) Ngangang’anamuwa “paradayisu” yo tilindizga kunthazi. (2) Vitumbiku vauzimu vo tazamulonde mu charu chifya. (3) Kweniso vitumbiku vo vamukuŵa kuchanya mu “paradayisu waku Chiuta,” nge mo lemba la Chivumbuzi 2:7 likambiya.—Wonani Chigongwi cha Alinda cha July 15, 2015, peji 8 ndimi 8.

Vingachitika kuti pa 2 Akorinto 12:4, Paulo wang’anamuwanga vinthu vosi vitatu pa nyengu yo wakonkhoskanga vo wanguwona.

Mwakudumuwa tingakamba kuti:

“Kuchanya kwachitatu” ko kukambika pa 2 Akorinto 12:2, kutenere kuti ndi Ufumu waku Chiuta wo Yesu Khristu wazamulamuliya ndi a 144,000 wo apanga “kuchanya kufya.”—2 Petu. 3:13.

Kudanika kuti “kuchanya kwachitatu” chifukwa chakuti Ufumu uwu ngwapachanya ukongwa.

“Paradayisu” yo Paulo ‘wangukwamphulikiyaku’ muchiwona, watenere kuti wang’anamuwa (1) paradayisu yo tilindizga panu pasi kunthazi, (2) paradayisu wauzimu yo wazamuŵaku mu charu chifya yo wazamuphara yo walipu sonu ndipuso (3) “paradayisu waku Chiuta” kuchanya yo wazamujaliyaku limoza ndi wa panu pasi.

Mwaviyo, paradayisu wazamupangika ndi kuchanya kufya ndi charu chapasi chifya.Iyi yazamukuŵa ndondomeku yifya. Boma lakuchanya lazamulamuliyanga ŵanthu wo azamuteŵetiyanga Yehova panu pasi.