Li ta 2 Korintios 12:2 xchiʼuk 3, li jtakbol Pabloe laj yalbe skʼoplal jun vinik ti laj yichʼ ikʼel «batel kʼalal to ta yoxkojal vinajele». ¿Buchʼu van skʼoplal li vinik taje? Li ta karta la stsʼibabe batel li jkorintoetike, te jamal laj yal ti chtun ta jtakbol li buchʼu laj yichʼ ikʼel batel ta yoxkojal vinajele (2 Kor. 11:5, 23). Kʼalal laj yalbe skʼoplal Pablo «li kʼusi ilbil ta skʼelobil juʼelale xchiʼuk li aʼyejetik yuʼun Kajvaltike», muʼyuk laj yalbe skʼoplal yan ermanoetik. Jech oxal, xuʼ jchʼuntik ti jaʼ skʼoplal stuk Pablo li buchʼu laj yil li skʼelobil juʼelale xchiʼuk li aʼyejetik yuʼun Kajvaltike (2 Kor. 12:1, 5).

Li vinik ti laj yichʼ ikʼel «batel kʼalal to ta yoxkojal vinajele» xchiʼuk li ta ‹paraisoe› jaʼ li Pabloe (2 Kor. 12:2-4). Kʼalal laj yalbe skʼoplal «li aʼyejetik yuʼun Kajvaltike», chakʼ ta aʼiel ti oy kʼusi laj yichʼ albel ti jaʼ to chkʼot ta pasel ta jelavele.

¿Kʼusi skʼan xal li ‹yoxkojal vinajel› laj yal Pabloe?

Kʼalal chalbe skʼoplal vinajel li Vivliae, xuʼ oy jayibuk smelolal. Jech kʼuchaʼal liʼe, xuʼ van jaʼ chalbe skʼoplal li batsʼi vinajele (Gén. 11:4; 27:28; Mat. 6:26). Bateltik xtoke jaʼ chalbe skʼoplal li ajvaliletik ta balumile (Dan. 4:20-22). Xchiʼuk xuʼ van jaʼ chalbe skʼoplal junuk ajvalilal ta vinajel, jech kʼuchaʼal li Ajvalilal yuʼun Diose (Apok. 21:1).

Jaʼ yuʼun chaʼa, ¿kʼusi skʼan xal kʼalal laj yalbe skʼoplal Pablo li «yoxkojal vinajele»? Bakʼintike, li Vivliae oxib to velta chchaʼal li kʼusi tsots skʼoplal chakʼ ta aʼiele (Is. 6:3; Ezeq. 21:27; Apok. 4:8). Kʼalal laj yalbe skʼoplal Pablo li «yoxkojal vinajele», jaʼ yakal chalbe skʼoplal jun ajvalilal ti toj tsots skʼoplale: li Ajvalilal yuʼun Mesias ti jaʼ oy ta skʼob li Jesukristo xchiʼuk li 144 mil ti tʼujbil chbatik ta vinajel sventa jmoj x-ajvalilajike. Jech kʼuchaʼal laj yal li jtakbol Pedroe, yakal ta jmalatik li «achʼ vinajel» ti yaloj chakʼ Diose, jaʼ xkaltik, li Ajvalilal yuʼun Mesiase (2 Ped. 3:13).

¿Kʼusi skʼan xal xtok li «paraiso» laj yalbe skʼoplal Pabloe?

Li jpʼel kʼop paraiso xie xuʼ ep kʼusi skʼan xal ek. Baʼyel, ta skoj ti jaʼ onoʼox jnatik li balumile, xuʼ van jaʼ skʼoplal li batsʼi Paraiso ti poʼot xa xkʼot ta pasel liʼ ta balumile. Xchibal, xuʼ van jaʼ skʼoplal ti batsʼi jun xa noʼox koʼontontik xchiʼuk ti jmoj tsobolutik li ta achʼ balumile. Xchiʼuk yoxibal, jaʼ van skʼoplal li ‹sparaiso Dios› ti chal ta Apokalipsis 2:7, jaʼ xkaltik, ti toj kʼupil sba oy li vinajele (kʼelo li revista Li Jkʼel osil ta toyol ta 15 yuʼun julio ta 2015 ta pajina 8, parafo 8).

Li kʼusi laj yal Pablo ta 2 Korintios 12:4 xuʼ van jaʼ skʼoplal li oxtos kʼusi laj xa kalbetik skʼoplale.

Kaltik ta jpʼel chaʼpʼel noʼox li kʼusi la jchantike:

Li ‹yoxkojal vinajel› ti chal ta 2 Korintios 12:2 jaʼ van skʼoplal li Ajvalilal yuʼun Mesias ti jaʼ oy ta skʼob li Jesukristo xchiʼuk li 144 mil, jaʼ xkaltik, li ‹achʼ vinajele› (2 Ped. 3:13).

Li Ajvalilal taje «yoxkojal vinajel» chichʼ albel skʼoplal yuʼun toj echʼem tsots skʼoplal.

Kʼalal laj yil Pablo ‹ti laj yichʼ ikʼel batel ta paraisoe›, jaʼ van skʼoplal li oxtos liʼe: 1) li batsʼi Paraiso ti poʼot xa xkʼot ta pasel liʼ ta balumile, 2) li jun paraiso ta mantal ti jutuk xa skʼan jkʼupintike xchiʼuk ti mas to lek kʼuchaʼal li paraiso ta mantal oy avie, 3) jaʼ van li ‹sparaiso Dios› te ta vinajele. Skotol taje koʼol chkʼot ta pasel li ta achʼ balumile.

Jaʼ yuʼun, li Paraiso ti jmalaojtik chtale jaʼ kʼalal chlik sventain balumil li Ajvalilal ta vinajele, jaʼ xkaltik, li ‹achʼ vinajele› xchiʼuk kʼalal jmoj xa chichʼik ta mukʼ Jeova li krixchanoetike, jaʼ xkaltik, li ‹achʼ balumile›.