Vwẹ 2 Kọrẹnt 12:2, 3, Pọl djisẹ rẹ ọshare ọvo re mu “kpo odjuvwu rerha.” Ọyen ono? Vwẹ ọbe ro si vwo rhe ukoko rọhẹ Kọrẹnt, Pọl nabọ kanrunumuo nẹ Ọghẹnẹ vwẹ ọyen vwọ wian kerẹ ọyinkọn. (2 Kọr. 11:5, 23) O de ji djunute “emramrẹ kugbe ẹvwọphia rẹ Ọrovwohwo na.” Jẹ, o djunute iniọvo efa ọke rọ vwọ ta ota yena-a. Ọtiọyena, Pọl ghwe djephia nẹ ọyen komobọ yen ọshare ra vwẹ emramrẹ vẹ ẹvwọphia na kẹ.—2 Kọr. 12:1, 5.

Eriyina, Pọl yen ọshare na re mu “kpo odjuvwu rerha” na kugbe “paradais.” (2 Kọr. 12:2-4) Ọ reyọ ota na “ẹvwọphia” vwo ruiruo, ro djephia nẹ a vuẹrẹ kpahen obo re cha phia vwẹ obaro na.

Die yen “odjuvwu rerha” rẹ Pọl mrẹre na?

Vwevunrẹ Baibol na, “odjuvwu” se mudiaphiyọ irharheghe na. (Jẹn. 11:4; 27:28; Mat. 6:26) Ẹkẹvuọvo, a je reyọ ubiota na “odjuvwu” vwo ruiruo vwẹ idjerhe efa. Ọkiọvo o se mudiaphiyọ usuon rẹ ihworakpọ. (Dan. 4:20-22) Yẹrẹ usuon ro nẹ odjuvwu rhe, kerẹ Uvie rẹ Ọghẹnẹ.—Ẹvwọ. 21:1.

Pọl mrẹ “odjuvwu rerha.” Die yen ọyena mudiaphiyọ? Ọkiọvo Baibol na sa vwanriẹn ota ọvo abọ erha, vwẹ idjerhe rọ vwọ kanrunumuo yẹrẹ dje oborẹ ota na ghanre te. (Aiz. 6:3; Izi. 21:27; Ẹvwọ. 4:8) Ọ họhọre nẹ ọke rẹ Pọl vwọ ta ota kpahen “odjuvwu rerha,” ọ kanrunumu usuon ro me kpenu kparobọ, ro ji me vwo ẹgba. Usuon yena yehẹ Uvie rẹ Mesaya na rẹ Jesu vẹ ihwo 144,000 che sun. (Ni ọbe re se Insight on the Scriptures, Ukori 1, aruẹbe 1059, 1062.) Vwo nene oborẹ ọyinkọn Pọl siri, avwanre hẹrhẹ “idjuvwu ekpokpọ” kirobo rẹ Ọghẹnẹ veri.—2 Pita 3:13.

Kẹ “paradais” rẹ Pọl djunute vwo?

Ubiota na “paradais” se mudiaphiyọ erọnvwọn sansan: (1) A da vwẹ ẹro rẹ asan rẹsosuọ rẹ ohworakpọ diare vwo no, “paradais” se mudiaphiyọ akpọ kpokpọ rọ cha vwẹ obaro na. (2) O ji se mudiaphiyọ oyerinkugbe rẹ ufuoma oghẹresan rẹ idibo rẹ Jihova cha riavwerhen rọyen vọnvọn vwẹ akpọ kpokpọ na. (3) Vwọba, o se mudiaphiyọ ẹdia omavwerhovwẹn rọhẹ obo odjuvwu, rọ dia “paradais rẹ Ọghẹnẹ” kirobo rẹ Ẹvwọphia 2:7 tare.—Ni Uwevwin Orhẹrẹ rẹ July 15, 2015, aruọbe 8. ẹko 8.

Ọ sa dianẹ ẹdia erha nana yen Pọl ta ota kpahan ọke ro vwo djisẹ rẹ obo ro rhiẹromrẹ vwẹ 2 Kọrẹnt 12:4.

Ọdjẹkoko:

“Odjuvwu rerha” re djunute vwẹ 2 Kọrẹnt 12:2 na sa dia Uvie rẹ Mesaya na rọhẹ obọ rẹ Jesu kugbe ihwo 144,000, re vwo dje “idjuvwu ekpokpọ.”—2 Pita 3:13.

E sere “odjuvwu rerha” kidie Uvie yena yen me kpenu.

Paradais” re ‘mu’ Pọl ra vwẹ emramrẹ na se mudiaphiyọ (1) akpọ kpokpọ rọ cha vwẹ obaro na (2) oyerinkugbe rẹ ufuoma oghẹresan rẹ idibo rẹ Jihova cha riavwerhen rọyen ọke yena, rọ cha hẹre vrẹ ọ rẹ ayen riavwerhen rọyen enẹna, kugbe (3) “paradais rẹ Ọghẹnẹ” rọhẹ obo odjuvwu rọ vẹ akpọ kpokpọ na cha dia vwẹ ọke vuọvo yena.

Ọtiọyena, akpọ kpokpọ na cha dia okugbe rẹ odjuvwu kpokpọ vẹ akpọ kpokpọ. Ọnana ọrhuẹrẹphiyotọ kpokpọ ro che churobọ si usuon rọhẹ obo odjuvwu vẹ ihworakpọ re ga Jihova vwẹ iparadaisi rọhẹ otọrakpọ na.