For 2 Corinthians 12:2, 3, Paul talk about one man wey “they carry go the third heaven.” Who be that man? When apostle Paul de write to the congregation for Corinth, e talk say God de use him as apostle. (2 Cor. 11:5, 23) Then e talk about the “visions and revelations of the Lord.” Paul no mention other brothers when e de talk about this things. So apostle Paul de use sense talk say the man wey e talk say e see visions and revelations na himself.—2 Cor. 12:1, 5.

So Paul na the man wey “they carry go the third heaven” and “they carry go paradise.” (2 Cor. 12:2-4) Paul use the word “revelations,” this one mean say they tell Paul wetin go happen for future.

“The third heaven” wey Paul see, wetin e mean?

For Bible, “heaven” fit mean the heaven wey we fit see. (Gen. 11:4; 27:28; Matt. 6:26) But “heaven” fit still mean other things. Sometimes e fit mean human government. (Dan. 4:20-22) Or e fit mean government wey God de control like the Kingdom of God.​—Rev. 21:1.

Paul say e see “the third heaven.” Wetin e mean? Sometimes Bible fit repeat something three times to make the point clear, to show say e really dey important, or e dey serious. (Isa. 6:3; Ezek. 21:27; Rev. 4:8) So, e fit be say when Paul talk about “the third heaven,” e de talk about the kind of government wey e high pass—the Kingdom of God wey Jesus Christ and the 144,000 go rule. (See Insight on the Scriptures, Vol. 1, pp. 1059, 1062.) As apostle Peter write, we de wait the “new heaven” just as God don promise.​—2 Pet. 3:13.

Wetin be the “paradise” wey Paul talk about?

The word “paradise” fit mean plenty things: (1) If we de think about the place where man be first live, “paradise” fit be the one wey e go come for this earth. (2) E fit be the spiritual condition wey servants of Jehovah go enjoy for the new world. (3) E fit still be the fine conditions for heaven, “the paradise of God” wey Revelation 2:7 talk about.​—See The Watchtower, July 15, 2015, p. 8. par. 8.

So e dey possible say the paradise wey Paul talk about for 2 Corinthians 12:4 na all this three things wey paradise fit mean.

So wetin we don talk:

“The third heaven” wey 2 Corinthians 12:2 talk about fit be the Kingdom of God wey Jesus Christ and the 144,000 go rule, and na the “new heavens.”​—2 Pet. 3:13.

Bible call-am “the third heaven” because the Kingdom na the kind of government wey e high pass.

The “paradise” wey “they carry” Paul go for the vision fit be (1) the Paradise wey e de come for this earth, (2) the spiritual paradise wey e go dey for new world, this one go big pass the spiritual paradise wey we get now, and (3) “the paradise of God” for heaven wey e go dey together for the same time with the other two paradise for new world.

So the new world go be the new heavens and the new earth join together. E go be new arrangement, wey e go get the Kingdom of God for heaven and people wey them de serve Jehovah for paradise for this earth.