Tiʼ Kaʼapʼéel tiʼ Corintoiloʼob 12:2, 3, Pabloeʼ tʼaanaj tiʼ juntúul máak «téek bisaʼab tak tu yóoxpʼéel kaʼan». ¿Máax le máak tu yaʼaloʼ? Teʼ carta tu tsʼíibtaj tiʼ le múuchʼulil yaan Corintooʼ, letiʼeʼ tu yaʼaleʼ Dioseʼ u tsʼaamaj ka u beet u apostolil (2 Cor. 11:5, 23). Tsʼoʼoleʼ tʼaanaj tiʼ «náayoʼob yéetel tiʼ baʼaloʼob tsʼoʼok u tsʼaʼabal kʼaj óoltbil tumen Yuumtsil». Ka tu yaʼalaj leloʼ maʼ tu chʼaʼchiʼitaj mix uláakʼ juntúul sukuʼuniʼ. Le oʼolaleʼ jeʼel u páajtal k-aʼalikeʼ le máax tsʼaʼab u yil le náayoʼob yéetel le baʼaloʼob tsʼoʼok u tsʼaʼabal kʼaj óoltbiloʼ, apóstol Pablo (2 Cor. 12:1, 5).

Jeʼex túun k-ilkoʼ le máak «téek bisaʼab» tak tu «yóoxpʼéel kaʼan» yéetel teʼ «paraísooʼ» apóstol Pablo (2 Cor. 12:2-4). Úuchik u tʼaan tiʼ le «baʼaloʼob tsʼoʼok u tsʼaʼabal kʼaj óoltbil[oʼ]» ku yeʼesikeʼ tsʼaʼab u yojéelt baʼaloʼob ku taal u kʼiin u yúuchul.

¿Baʼax le u «yóoxpʼéel kaʼan» tu yilaj Pablooʼ?

Teʼ Bibliaoʼ, le tʼaan kaʼanoʼ jejeláas baʼax u kʼáat u yaʼale. Yaan kʼiineʼ ku meyaj utiaʼal u yúuchul tʼaan tiʼ le kaʼan ku páajtal k-ilkoʼ (Gén. 11:4; 27:28; Mat. 6:26). Yaan hora xaneʼ ku meyaj utiaʼal u tʼaan tiʼ le gobiernoʼoboʼ (Dan. 4:20-22). Tsʼoʼoleʼ ku meyaj utiaʼal u yúuchul tʼaan tiʼ le gobierno yaan teʼ kaʼanoʼ wa u Reino Dios (Apo. 21:1).

¿Baʼax túun tu yóotaj u yaʼal Pablo ka tʼaanaj tiʼ u «yóoxpʼéel kaʼan[oʼ]»? Yaan kʼiineʼ teʼ Bibliaoʼ ku yaʼalaʼal óoxtéen junpʼéel baʼal utiaʼal u yeʼesaʼal jach kʼaʼanaʼan (Isa. 6:3; Eze. 21:27; Apo. 4:8). Le oʼolal ka tʼaanaj apóstol Pablo tiʼ u «yóoxpʼéel kaʼan[oʼ]», táan kaʼach u tʼaan tiʼ junpʼéel gobierno maas kʼaʼanaʼan: le Reino yaan tu kʼab Jesusoʼ yéetel le 144,000 yéeyaʼanoʼob kun gobernaroʼob tu yéeteloʼ (ilawil u yáax libroil Perspicacia para comprender las Escrituras, táan juʼun 473 yéetel 476). Ka tu yaʼalaj apóstol Pedro táan k-páaʼtik le «túumben kaʼan» u yaʼalmaj Dios u tsʼáaikoʼ táan u tʼaan tiʼ u Reino le Mesíasoʼ (2 Ped. 3:13).

¿Baʼax túun le «paraíso» tu yaʼalaj Pablooʼ?

Le tʼaan paraíso xanoʼ jejeláas baʼax u kʼáat u yaʼale. Yáaxeʼ maʼ xaaneʼ táan u tʼaan tiʼ le Paraíso kun antal way Luʼumoʼ. U kaʼapʼéeleʼ ku meyaj utiaʼal u yúuchul tʼaan tiʼ le jeetsʼelil kun antal ichil le máaxoʼob meyajtik Dios teʼ túumben Luʼumoʼ. Yéetel u yóoxpʼéeleʼ jeʼel u meyaj xan utiaʼal u yúuchul tʼaan tiʼ le kiʼimak óolal yaan teʼ kaʼanoʼ wa tu «paraíso Dios» ku chʼaʼchiʼitaʼal tiʼ Apocalipsis 2:7 (ilawil U Pʼíich Tulumil Kanan 15 tiʼ julio tiʼ 2015, táan juʼun 8, xóotʼol 8).

Bey túunoʼ, ka tu yaʼalaj Pablo le baʼax ku yaʼalik Kaʼapʼéel tiʼ Corintoiloʼob 12:4, maʼ xaaneʼ táan kaʼach u tʼaan tiʼ le óoxpʼéel baʼaloʼobaʼ.

Baʼax tsʼoʼok k-kanik:

Le u «yóoxpʼéel kaʼan» ku yaʼalaʼal tiʼ Kaʼapʼéel tiʼ Corintoiloʼob 12:2, maʼ xaaneʼ letiʼe u Reino Dios yaan tu kʼab Jesucristo yéetel le 144,000 yéeyaʼanoʼoboʼ, wa le «túumben kaʼan[oʼ]» (2 Ped. 3:13).

Ku yaʼalaʼaltiʼ u «yóoxpʼéel kaʼan», tumen le Reinooʼ letiʼe gobierno maas kʼaʼanaʼanoʼ.

Maʼ xaaneʼ le «paraíso» tuʼux «téek bisaʼab» Pablo ichil junpʼéel náayoʼ u kʼáat u yaʼal: 1) le Paraíso kun antal way Luʼumoʼ, 2) le jeetsʼelil kun antal ichil le máaxoʼob meyajtik Dios teʼ túumben Luʼumoʼ, yéetel 3) u «paraíso Dios» yaan teʼ kaʼanoʼ. Tuláakal lelaʼ teʼ túumben luʼum kun antaloʼ.

Bey túunoʼ le «túumben kaʼan» yéetel le «túumben Luʼum[oʼ]» junmúuchʼ kun antaloʼob. Lelaʼ u kʼáat u yaʼaleʼ u Reino Dios yéetel le máakoʼoboʼ yaan u múul meyajtikoʼob Jéeoba teʼ Paraíso kun antal way Luʼumoʼ.