Tawlikay ko ponoˈ ni Taniayer, samadahay pasowal takowanan: “Hamaan patingwa, iraayto cangra!” Itiya, tomerepay ko paliding i fawahan no liwkang. Ikor no pina ehon macepetayto kami tatosa. Kao ngaˈayay salakatay ci Taniayer pasowal takowanan, mansa ira ko toki ako patorod to lalakaw i roma salikaka.

Tayra kami i dimeng i, mahemekay kako iraay ko timoloay ato maolahay ci Yihofaan a fafahi. Cowa ko kinacecay aca malacafay misiˈayaw toha tiniay a pakayraan. Nohatini, tadtaden ako to, hano tayra kami milisoˈ to macongeday ko mitosilay a kitakit.

1930 miheca, itini i kaˈamis no Frans Koruwa a niyaroˈ a hofocen kako, o Tingsokiw ko pihakelongan, to lipalipay tayraay kami i kiyokay, ˈifowaay ko wama ako to kiyokay a demak. Kawra tangasa i 14 mihecaan mafekaday ko cecay a demak, itiyaay mahapinang ako to mangah no kiyokay.

Saka Tosa Lalood no Hekal, malowiday no Towic ko Frans. O fokosi niyam misaaliay tamiyanan a padama to fadangalan no Frans, matalaway kami toha tiniay a sasowalen. ˈAlomanay Frans a tamdaw mitakaway a mitengil to laciyo no Ikok, sapitengilaw to lalood a sinfon, mahecaday kami. Isaka 1944 miheca 9 folad, mafalicayto ko teloc no lalood, oya fokosi fahal sa a mafalic, milimasmasay cingra to miakoˈiday a saˈopo, tada fahkaˈay kako toniya demak. Cowato pakasoˈlin kako to fokosi.

Ikor no lalood, mapatayay ko wama ako. Itiya o kaka ako mararamodayto, malinah tayra i Pilis a kitakit cingra, mansa iraay ko ˈinorong ako midipot to wina. Ikor, mahelaay ko ngaˈayay a katayalan. Ano padotoc kako matayal itira, wa ira ko ngaˈayay a saaroˈan, kawra malifaay ako ko cecay sapalifet.

1953 miheca, milisoˈay tamiyanan ko kaka ci Simongna, saka dademakan ningra ko Fangcalay Cudad no niyah malalengo tamiyanan, mitoroˈ to mararaway ko miowingan no Tingsokiw cinamalay cikok, Toloay cecayay ko tireng, cowa ka patay ko saloˈafang sanay a kimad. Satapang pacoliaan ako cingra, somowal to cowa kono Tingsokiw a Fangcalay Cudad ko misaka dademakan ningra, kawra  kahnayay mahapinang ako to matatodongay ko sowal ningra. Pafeliay ko kaka takowanan to matelangay a Mikecolay, to dadayadaya itiniay kako i kafotiˈan, misarocod miasip toniya casi. Caka halafin, mahapinangay ako to soˈlinay kimad konini, kawra matalaway kako malo Misawacayay Tamdaw ni Yihofa, mihaen wa awato ko katayalan ako.

Ikor pina folad, micekiway kako to Fangcalay Cudad ato Mikecolay, misaˈosiayto kako tayra i Hongti Kitakit Kasaˈopoan a mirienang to saˈopo. Manengnengay ako to kasasiolah no Krisciyang, tada matemeray ko falocoˈ ako. Satapang no 1954 miheca, cecay matenesay a salikaka, padamaay takowanan micekiw to Fangcalay Cudad, ikor no 6 folad, micadaay to inoˈ kako i saka 9 folad. Caka halafin, o wina ato safa ako malo Misawacayay Tamdaw ni Yihofa, tada kahemekanto.

1958 miheca, mirienang kako to koksay taykay i Niwyok, kawra ˈayaw no taykay pina lipay, mapatayay ko wina, tada masomaday kako. Ikor no taykay, awaayto ko ˈinorong no paro no lomaˈ, misawaday kako to tayal, mirienang to misakafahay. Ikor, pakotiyaay kako to cecay fanekfekay a misakafahay ci Taniayer. 1959 miheca 5 folad, malo kaolahanto ako a fafahi cingra.

Isatapang misakafah ci Taniayer itiraay i Pritani, maraayay ko nalacolan ningra. Cowa i tingsokiw kilac mitosil aca, citinsiyaho cingra tayra i inaka a milisoˈ to tamdaw, tada timoloayto cingra. Soˈlin cowa ka fanaˈ to hacowa ira ko harerekan, kawra mafanaˈto cowato ka hakowa ko toki, mansa misaˈicelay kami a mitosil. (Matay 25:13) O kinafalahay harateng ni Taniayer pakalalokay tamiyanan misarocod to falocoˈ a misakafah.

Caka halafin mararamod, manilnilay kami milisoˈ to kasakopang. Minanamay kami to madoloay a kaˈorip. O saka cecay milisoˈan niyam a kasakopang edengan 14 ko mitosilay, awaay ko pakayraan nangra misaday to pilafinan niyam, mansa sikal hananay ko cawfan, itini i pikimadan no kasaˈopoan a mafotiˈ. Soˈlin cowa ka samaan, kawra ngaˈayay ko tatelecan!

ˈIfowaay ko milisoˈay a demak, kahnayay mananam ci Taniayer. Marariday kako masaˈopo to malohemay malitengay, itira sanay i paliding cingra a mitala takowanan, kawra cowa ka ngaliwngiw cingra. Tosaay miheca kami to milisoˈay a demak, toniya tatokian mananamay niyam i kalalaˈed no raramod kalimlaan ko soˈlinay a kasasowal, madadama tatosa.—Patnakay 4:9.

1962 miheca, matahidangay kami tayra i Niwyok Prokelin mirienang to 37 kapot a Kiliyat Picudadan to, 10 folad. Lalomaˈ no 100 micudaday edengan 13 ko mararamoday, tada malikoay kami malacafay mapahatatanam i Kiliyat. Itiya, mafanaˈay kako ci Fransan, Kelase, Maykemilon ato romaroma tanektekay ko pakasoˈlin a salikaka, tahanini cowa ka pawan kako toya fangcalay a nalifetan.

I pihatatanaman, pakalalokay ko singsi tamiyanan palahad to sapihapinang a inaneng. Mihaenay,  maharek ko picudad to papacem no Pieneman, tayraay kami i maci no Niwyok misalama, masa lalomaˈay no pihatatanam konini, samanen micudad to Picecayan i, wa tiliden ko manengnengay a demak i Pieneman. O mikayatay tamiyanan o matayalay i Pitil, maharek misalama malotayay kami, kawra milicayayho koya mikayatay to salicay, padama tamiyanan papiharateng to kalimlaan, hongaˈ mataˈlif ko pisiking i Picecayan. Kinacecayay, saromiˈaday kami i Pieneman misalama i maci, itiniay i pinengnengan to foˈis mananamay niyam ko o maanan ko maeferay a foˈis ato matefaday a foˈis; itini i serayan a poukuwan no Padaka mananamay niyam ko kasasiloma no kamotoˈay ko ngoyos ato wani. Itini pinokayan to Pitil a lalan, milicayay ko mikayatay tamiyanan: “O maanan ko kasasiroma no maeferay ato matefaday a foˈis?” Malotayayto ci Taniayer, pacaˈof cingra: “Koˈdaway ko wadis no matefaday foˈis!”

Cowa ka harateng to, o tatayra kami i Fenpo no Frans mataˈlifay ko 53 miheca. 1976 miheca, manilnilay kako malo misatenokay tamdaw no iing no Fenpo, ato manilnil tayra i kaˈamis no Afrika ato tenokay no Asia, milisoˈ to macongeday ko mitosilay a kitakit. Hatoya masowalay ako isatapang a demak tayra i Ciyapong. Soˈlinayto, o inaneng ako iraay ko tolas. Kawra o kaolahan ako a fafahi ci Taniayer, padamaay takowanan, mansa ngaˈay pakafilo kako toniya tayal.

Maolahay kami to kaˈorip i Pitil. Na mafokilay ci Taniayer tono Padaka sowal, ˈayaw no tayra Kiliyat micudad to lima folad, satapang sanayho minanam tono Padaka sowal, kawra ikorto malo idahiyay a mihongyakay. Masaloay kami matayal i Pitil, malacafay to salikaka no kasakopang a matayal, matongalay ko lipahak niyam. Maharatengay ako maharek kako aci Taniayer pacekiw, o lafiito, mikalicay kami to pakaseraay a ciˈacfelay a minokay, malotayay ko tireng, kawra maˈaraw ko kacakat no pacekiwan, tada lipahakay kami. Nikawrira, fahal sanay tatiih ko tireng ni Taniayer, makalimay cingra padotoc a matayal, kawra cowato ka hecad to saˈayaway.

1993 miheca makinsaay ci Taniayer, iraay ko ekang no coco, misaaliay to tatokaden ato howaliyaw, marorayayto ko piadah ni Taniayer. Ikor no 15 miheca, malaliyaw ko adada ningra, miresapay a ekang. Mihaenay i, misalimlaay ci Taniayer to mihongyak a tayal, ano ngaˈayho ko tireng ningra i, patikolay a matayal cingra.

Soˈlin pakidemay ko adada ni Taniayer, cowa ka ciharateng kami sapiliyasaw to Pitil, kawra mamisiˈayaw to adihayay sapalifet, mangalef ano eca ka fanaˈ ko tao to pakidemay ko adada iso. (Taneng 14:13) Soˈlin mangatato 80 ko mihecaan ni Taniayer, kamayan makapah ko pising, fangcal ko capeling. Cowa ka ciharateng to kasiniˈadaan ko niyah, misaˈicelay a padama to tao, mitengil to sowal nangra. (Taneng 17:17) Cowa ka ciharateng ci Taniayer to mamalo miadaay to falocoˈ no tao, misaka dademakan ningra ko nalifetan no niyah a padama ko ciekangay a salikaka.

Nolatekay misiˈayaway kami to roma a sapalifet.  Ikorto cowato ka ngaˈay ci Taniayer padotoc a miemin to toki a matayal, kamayan cingra a midama takowanan. Adihayay ko sadama ningra takowanan, hato ngaˈayay kako tano misatenokay no iing a ˈinorong a matayal to 37 miheca. Tinakoen, salakatay misaday cingra to saka lahok, ngaˈayto kami i kafotiˈan pahanhan to miming a toki.—Taneng 18:22.

Tawlikay ci Taniayer misiˈayaw to kaˈorip. Ikor sakina tolo a malaliyaw ko ekang ningra, cowato ka fanaˈ kami to sasamaan. O howaliyaw ato roma sapiadah a pakayraan mieminay to ˈicel ningra, cowato ka ngaˈay a romakat. Na tawlikay ko ponoˈ ningra a mihongyak, nohatini sato caayto ka ngaˈay somowal, maˈaraw ko kaolahan a fafahi sahatini sato, hato mikeritan ko falocoˈ ako.

Soˈlin maoratay kami, kamayan a fanekfek a mitolon, pakasoˈlin to cowa ko papataˈlifen ni Yihofa ko masiˈayaway niyam a pasangaray. (1 Korinto 10:13) Miakoˈiday kami ci Yihofa tano cowa ka hecad a pakayraan a padama tamiyanan, tinakoen, o Kimad Ningra Fangcalay Cudad, Miadahay i Pitil ato sadama no salikaka.

Miceriday kami mitolon ci Yihofaan, micangacang Cingranan pakahapinang to mamicada to masamanay sapiadah. Kinacecayay, cowa picada cingra to sapiadah, samanen ano maharek mihowaliyaw, mapehelay cingra, cowa ka fanaˈ ko ising to hano mahaen, mafokilay to sasamanen miadah. Tada matoˈolay kami itiya, cowa ka fanaˈ to sasamaan. Ikor, o roma ising makahiay miadah cingranan. Mahapinangay niyam patadoay ci Yihofa tamiyanan mifohak to lalan, padama tamiyanan misiˈayaw to rawraw.

Mananamay niyam to sasamaan miremo to rawraw, o anini a demak aniniho miharateng, hato sowal ni Yis: “O nika roray to cecay a romiˈad i, paedeng han toya romiˈad.” (Matay 6:34) Pairaen ko tawlikay a harateng ato mamenacay, o masakalimlaanto. Itiya cowa pihowaliyaw a tosa folad, tatawa sanay ci Taniayer pasowal takowanan: “O adada ako hato awaayto!” (Taneng 17:22) Soˈlin misemsem to adada cingra, kawra kamayanay a tawlik cingra mahemekay a romadiw to faelohay a radiw, maˈesolay ko ngiha ningra a romadiw.

Tawlikay cingra a padama takowanan misiˈayaw to adihayay sapalifet. Soˈlin kararamod niyam to 57 miheca, midimokosay cingra to saali ako. Ano miciyan to fitaˈol, mafokilayho kako! Pakidem ko adada ningra i, minanamay kako misawsaw to kaysing, mifacaˈ to rikoˈ, ato misaday to kantangay kakaenen. Itini pinanam dademak pinaay ko katotong to maˈariay ako, kawra, ano papakahemek cingraanan i, makahiay kako a midemak. *

Milomal to ˈayaway a demak, misiˈayaw to katoˈas, ato adada no tireng, mananamay ko masakalimlaan a demak. Saka cecay, ano samaanto ko ˈifowa no kaˈorip, hamaan matawal to kalimlaen ko kaolahan a raramod, itini i kaemanganho, songilaˈen a midimokos ko kaolahan a tamdaw. (Patnakay 9:9) Saka tosa, aka a pakidem marawraw, hoeca ka misakahemaw to malifokay a raheker no romiˈamiˈad.—Taneng 15:15.

Ano tikolen miharateng ko mieminay to toki a katayal, mataˈlifay ko maharatengay to sapafeli ni Yihofa a sakaraheker. Mihaiay kako to sowal no mitiliday to ˈOlic, maharekayto palemed ci Yihofa takowanan.—ˈOlic 116:7.