Danièle nämä töbike drekebe ngwarbe yebätä nieba kwe tiebe ti olote: “Mä ñaka nuain, nüratre nete”. Ye bätäräbe, karo kwetre rükaba nünenkä hotelte. Minuto rikaba braibe ta ye bitikäre nun jän rikaba ngite kwetre. Akwa ti muko kukwe mikaba gare jötrö ngwarbe tie ye köböire, täräkwata ütiäte ngwan nämä tikwe ye tikwe bianba ja mräkä iti ie.

Nun jänrikaba oficina guardiakwe kokwäre ngwane, tikwe nütüba: “¡Ti muko tä ja ngwen dite aune ünä kukwe ja üairebiti ye kwin krubäte!”. Danièle aune ti nunkwe ja tuaba gwairebe kukwe yebe aune kukwe mada keta kabre ben. Akwa ñokänti nun rükaba juta känti nun tuanmetre ñaka nämä sribi Ngöbökwe nuainne ye tibike mike gare muen.

Ti därebare kä 1930 yete, kä Croix tä Francia ngwitärikri yete. Ti mräkätre nämä kukwe católico yebätä. Bämän kratire kratire te nun nämä niken iglesiate aune ti rün nämä sribi keta kabre nuainne yete. Akwa kä rababa 14 näre tibiti ye ngwane, kukwe keteiti nakaninkä abokän mikaba gare tie nitre iglesiate nämäne ja bämike jerekäbe.

Rübare Kri Bobukäre ye näire, nitre rükä Alemania nükani juta Francia den jai. Ye bitikäre, sacerdote iglesiate ye jataba nun töi mike ja mike gobran Vichy yekri abokän nämäne nitre nazi yekri arato. Kukwe kädrie nämä kwe ye nämä mate käme nunbätä. Nitre Inglaterra nämäne kukwe mike gare radiote nitre ja mikaka gobran nazi rüere yebätä. Ti mräkätre aune nitre kwati nünanka Francia nämäne ye kukwe nuin käbube. Akwa sö septiembre kä 1944 yete, sacerdote ja mikaba nitre nämäne gobran nazi rüere yekri. Aune kukwe ükateba kwe debe biankäre Ngöböi kukwe nuain nämäne kwetre yebätä. ¡Ti töi rababa niä! Ti ñan jatabara tö ngwen nitre ji ngwanka iglesiate yei.

Rüba ye bitikäre, ti rün krütaba aune ye näire ti ngwai umbre Simone nämäna ja mäkäninte aune nämä nüne Bélgica. Aisete ti meye rababa ngübadre tie. Ti jataba sribire dän sribe nämäne yekänti. Ni sribi bökänkä aune monsotre kwe nämäne kukwe católico yebätä. Sribi ye nuainbätä kukwe kwin rabai tikwe ja känenkäre tikwe nütüba, akwa ye bätäräbe tikwe ja tuaba kukwe kri ben.

Kä 1953 yete, Simone abokän ja mikani testiko Jehovakwe ye rükaba basare nuen. Bibliabiti mikaba gare kwe nuen, ni nire tä krüte ye üai ñaka tä nemente  nire, nita krüte ngwane ni ñaka tä ja tare nike kä ñukwäre te aune Ni Nimä Ngöböre Itibe ye ñaka jire. Biblia kwe ye ñaka católico ti nieba ie, akwa kä rikaba braibe ta ye bitikäre rükaba gare tie niara nämä kukwe metre niere. Biti, täräkwata La Atalaya kirakira ye bianba kabre kwe tie aune ti nämä ñäke tätebätä deu. Kä rikaba braibe ta yete, kukwe ye metre rükaba gare tie. Akwa ti kitadrekä sribibätä ja mikabätä Testiko ye jürä nämä tibätä.

Sö ruäre yete ti ja tötikaba akwle Biblia bätä La Atalaya yebätä aune mrä mada tikwe ja töi mikaba niken Ju Ja Ükarakrö yete. Ja mräkätre nämä ja tarere ye mataba kwin ti brukwäte. Ja mräkä ie kukwe nämä gare krubäte yekwe ti tötikaba sö krä ti te aune biti ti ja ngökaba ñöte sö septiembre kä 1954 yete. Kä rikaba braibe ta ngwane, ti meye aune ti ngwai köre ja mikaba Testiko arato ye käi rababa juto tibätä.

Gätä kri känti nitre juta madate nübaita ye köböi jatabara nüke ngwane, ti meye krütaba tikän. Gätä ye nuainba kä 1958 yete juta Nueva York yekänti abokänbätä ti janama. Ti rükabata gwi ngwane, ti mräkätre ye ñaka rababara ngübadre tie aisete tikwe sribi tuanmetreba aune tikwe ja mikaba prekursor. Kä ye näire Danièle Delie rababa gare tie aune ti törbaba ja mäkäite ben tikwe nieba ie. Sö mayo kä 1959 yete, nunkwe ja mäkäteba.

Danièle sribi köbö täte Ngöbökwe kömikani ye ngwane nikani mente juta Gran Bretaña ye bäre mento. Kä ye nämäne mente krubäte ju kwe yebätä. Niara nämäne ja ngwen dite kukwe driekäre nitre católico kwati yei aune nänkäre bicicletabiti kä yete ta. Sribi ye nuaindre jötrö ngwarbe ye nämäne gare ie. Ñongwane kä krütai ye ñaka nämä gare nuen (Mat. 25:13). Ti muko töi nämä kwatibe sribibätä köbö täte Ngöbö kräke ye köböire nunkwe sribi ye nuainba jankunu.

Nunkwe ja mäkäteba ye köböi rikaba ruäre ta ngwane, nun juanba circuito tuinbiti. Nunkwe ja töi mikaba nüne jondron braibebiti. Konkrekasion tuabitiba kena nunkwe yekänti nitre kukwe driekä nämäne 14. Kä ñan rababa kwetre nun kräke yebätä nunkwe kübiaba plataforma Ju Ja Ükarakrö yete. Kä ye ñaka nämä bä därebe akwa rababa kwin ja trö jäkära nunye.

Sribi nämä krubäte nun kisete akwa rababa nuäre nuaindre Danièle kräke. Ti nämä ja ükökrö nitre umbre ji ngwanka mada yebe ngwane, niara nämä ti ngübare karo chi nunkwe yete aune ñaka nämä nemen rubun. Kä kubu aibe yete nunkwe circuito tuabitiba, akwa nitre gure käkwe blitadre kwin jabe aune sribidre gwairebe ye rükaba gare nuen (Ecl. 4:9).

Kä 1962 yete, nun nübaiba Brooklyn (Nueva York) nänkäre kwela 37 Galaad yebätä abokän nuain nämäne sö kräjätä yete. Nun ja tötikaka nämä 100 jire, akwa nitre gure nämä 13 aibe aune ye ngätäite nun nämä arato. ¡Ye käi rababa juto nunbätä! Nun nämä ja mräkätre ünä kukwe ja üairebiti yebe ye törö kwin tie, ñodre ja mräkätre Frederick Franz, Ulysses Glass aune Alexander Macmillan.

Nikwe nikradre jondron tä ni bäre yebätä ye ütiäte krubäte mikaba gare nuen kwela yete. Sábado ruäre derekri kwela ye täbiti, nun ngwan nämä kä keta kabre kwin Nueva York yekänti. Lunes mada yete,  nunkwe dre dre tuaba ye nun mika nämä tike täräbätä. Nun nämä niken basare yebätä nun nämä nemen nainte. Akwa ja mräkä sribikä Betelte kädekani nun jie ngwankäre ye nämä kukwe ngwentari nuen, ne kwe kukwe bäri ütiäte rükadreta törö nuen tikakäre täräbätä. Bati nun dikakaba gürere jutate. Nun rikaba jondron mikata tuare yekänti aune yete rababa gare nuen meteoros aune meteoritos * ye ñaka ja erebe. Aune museo de historia natural yete nunkwe ja kitaba jalaka bätäkä ngwarbe yebätä. Nun rükabata Betel ngwane, ni nun jie ngwanka ngwantariba nuen: “¿Meteoros aune meteoritos ye ñobätä ñaka ja erebe törö munye?”. Danièle nämä nainte krubäte yebätä nieba kwe: “Jän, meteoritos ye tu bäri krikri”.

Nun graduaba ye bitikäre, nun juanba sukursal Francia yete, känti nunkwe sribiba kä 53 biti bäri yete. Kä 1976 yete, ti kädekaba ni Sukursal Jie Ngwanka erere. Ne madakäre nun juan nämä juta keta kabre tuinbiti kä África aune Oriente Medio yekänti. Juta yekänti nun tuanmetre ñaka nämä sribi Ngöbökwe nuainne. Ye näire, nun rükaba Gabón abokän känti kukwe kädrite tikwe kena ye rababa bare. Ti raba mike gare metre, ja ñaka nämä nüke törö tie ja tuakäre kukwe keta kabre yebe. Akwa Danièle käre ti dimikaba sribi nämä ti kisete ye nuainne.

Sribidre Betelte ye bengwairebe rababa tuin kwin nuen. Nun jämi niken kwela Galaad yete ngwane, Danièle ie blita rababa gare inglere sö krärike aibe te. Ye bitikäre rababa tärä aune täräkwata nikwe ye kwitaka. Nun nämä sribire Betelte ye käi nämä juto krubäte nunbätä aune sribidre ja mräkätre konkrekasionte ben ye nämä kä mike bäri juto nunbätä. Tren betekä nguseta París yete ti aune Danièle nämä niken nitre tötike Bibliabätä. Nun nämä nüketa deu aune nainte gwi, akwa nun nämä nitre dimike Jehová mike gare jai ye käi nämä nemen juto nunbätä. Akwa biti bren tare rababa Danièlebätä ye köböite, ñaka rababara sribire krubäte niara tö nämä nuainbätä ye erere.

Kä 1993 yete, cáncer de mama nämäbätä ye mikaba gare ie. Niara operaba aune quimioterapia nuain nämä ie aisete kräkäi mika nämä tare. Kä rikaba 15 ta ye bitikäre, cáncer rababata Danièlebätä, akwa cáncer bäri käme rababatabätä. Niara nämä sribire kukwe kwitakäre ye mike tuin ütiäte jai, aisete niara nämä nemen okwäbiti ngwane, nämä ja di ngwen sribi ye nuainkäre jankunu.

Bren cáncer ye nämä Danièle ngwen ja tare nike krubäte, akwa nun ñaka ja töi mikaba sribi Betel ye tuenmetre. Erametre, ni tädre bren Betelte ye ñaka nuäre aune bren tare tä mäbätä ye ñaka gare ni madai ye ngwane bäri tare (Prov. 14:13). Cáncer nämä Danièlebätä aune kä rababara bäsi 80 biti, akwa niara bä nuäre aune nämä kä mike kötare ja ngwärebätä ye köböire niara nämä bren ye bä ñaka nämä krubätebätä. Ja ñaka nämä nemen ruin bobre ie, ñakare aune nämä ja töi mike ni mada dimikabätä. Ni mada tä ni kukwe nuin aune ni töi mike nüke gare jai ngwane, ni töita nemen jäme ye nämä gare kwin ie (Prov. 17:17). Niara ñaka tö nämä jerekäbe mäträi ni madabätä, akwa kukwe nakaninkäbätä yebiti nämä ja ngwaitre mada dimike ja tuin bren cáncer yebe.

 Arato nun ja tuaba kukwe mada ñaka nuäre yebe. Danièle ñaka rababara sribire ora täte ngwane, ja di ngwanba kwe ti dimikakäre kukwe keta kabrebiti. Niara nämä jondron bäsi jökrä nuainne ye köböire, tikwe sribiba ni Sukursal Jie Ngwanka erere kä 37 näre te. Ñodre, niara nämä jondron jökrä ükete ne kwe nun rabadre mröre cuartote ñänä ruäre aune nunkwe ja dükadre chi (Prov. 18:22).

Käre Danièle nämä ja töi mike kukwe kwin yebätä aune tö nämä nünain jankunu. Aisete cáncer rababata bämäkärebätä ye ngwane, ja rababa ruin ulire krubäte nunye. Quimioterapia aune radioterapia ye nämä Danièle di gainkä jökrä. Bäsi ñan rababara dikekä. Niara nämä kukwe kwite kwin krubäte akwa ye ngwane kukwe meden niedre kwe ye ñaka nämä ngitiekä kadate. Niara nämä kore ye nämä ti brukwä ötöte.

Ruäre ngwane, nun di ñaka nämä ja tuakäre kukwe kri yebe nämä nemen ruin nunye, akwa nun nämä orare käre. Jehová ñaka nun tuainmetre ja tuin kukwe tare ben abokän köböite nun ñaka kä ngwandre nüke jai ye nämä gare metre nuen (1 Cor. 10:13). Jehová nämä nun ngübare Kukwe kwe yebiti, kräkä bian nämä Betelte aune ja mräkätre yebiti ye käre nun nämä mike ütiäte jai.

Kräkä meden bäri kwin ye ñaka nämä gare nuen ngwane, nun nämä ja jie ngwamana Jehovai. Ñodre, quimioterapia nuain nämä Danièle ie ye ngwane, kä nämä nekäbiti, ye köböite nunkwe dre nuaindre mada ye ñaka nämä nemen gare nuen. Ñobätä ye nämä nakainkäbätä aune dre nuaindre ye ñaka nämä gare doctor yei abokän nämä niara kräkäi mike kä 23 näre te. Ja nämä nemen ruin kaibe nuen. Ye ngwane, doctor mada ja tötikaka cáncer yebätä ye rababa juto biare Danièle dimikakäre. Jehová ara nämä nun dimike ye rababa gare nuen.

Nun nämä nüne köbö kwatire kwatire kräke ja tuakäre kukwe nämä nun kisete yebe. Jesukwe niebare: “Kukwe kri tä nemen bare ye tärä debe köbö kwatire kwatire kräke” (Mat. 6:34, TNM). Nikwe ja töi mikadre kukwe kwin yebätä aune ni tädre kä jutobiti ye raba ni dimike arato. Ñodre, quimioterapia ñaka nuainbare sö krobu yete Danièle ie ngwane, niara nämä kä mike kötare ja ngwärebätä ne niekäre tie: “¡Ja kitera ruin bäri kwin tie!” (Prov. 17:22). Aune niara nämä ja tare nike krubäte, akwa yebiti ta tö nämä kantai krubäte kantiko mrä yebätä.

Danièle nämä ja töi mike kukwe kwinbätä yekwe ti dimikaba ja tuin kukwe mada yebe. Kä 57 te nun nünanba jabe ye ngwane, niara nämä käre ti ngübare. ¡Tikwe kwi mrüke jiandre ño o kukwadre ño aceitete ye niara ñaka drieba jire chi tie! Aisete niara rababa bren ye ngwane, blato aune dän bätädrete bätä mrö nuäre sribedre ye nuain rababa gare tie. Kä ye näire, vaso ruäre getrateba tikän, akwa ti nämä niara dimike ye käi nämä nemen juto krubäte tibätä. *

Ti aune Danièle nun jataba bren bätä umbre ye köböite nun ñaka jatabara jondron jökrä nuainne. Aisete, kukwe keta kabre niena gare ja töi kräke tie. Ñodre, sribi tä krubäte ni kisete ye ñan aibätä kä ñaka rabadrete nie ni muko tare nikwe ye bämikakäre ie. Ye medenbätä, nita kwin ye ngwane nikwe kä diandrekä jai rabakäre keteitibe nitre tare nikwe yebe (Ecl. 9:9). Ne madakäre, nikwe töbikai krubäte kukwe tä nemen ni kisete yebätä ngwane, kukwe kwin namanina nikwe ye ñaka jatai tuin ütiäte nie (Prov. 15:15).

Nunkwe sribiba köbö täte Ngöbö kräke yebätä tita töbike ngwane, tä nemen gare metre tie Jehovakwe jondron keta kabre kwin abokän nun ñaka nämä ngübare ye biani nuen. Ni Salmo 116 tikaka niebare ye erere, käre Jehovakwe ja töi mikani kwin krubäte ti kräke (Sal. 116:7).