Danièle ena laloa-haraga karana dainai, egu taina dekenai ia hereva maragi bona ia gwau, “Pulisi oi rini henidia lasi, badina idia ginidae vadaeni!” Emai murina ai, motuka ta be hotel ena vairana kahana ai ia mai bona ia stopu. Miniti haida murinai, soldia taudia ese ai idia dogoatao. To Danièle ese lau ia hadibaia guna dainai, mai anina bada pepa haida be tadikaka ta dekenai lau henia.

Pulisi steiseni dekenai ai idia hakaua lao noho lalonai, egu adavana ese ia karaia karana dainai lau moale, ia boga-auka bona Iehova ena orea ia laloa bada. Unai nega bona nega ma haida ai lau bona Danièle be ai gaukara hebou. Mani iseda gaukara idia taravatua tanodia ai vadivadi ena sivarai lau gwauraia.

Lau be lagani 1930 ai lau vara bona egu ruma bese be Katolik taudia. Ai be France ena taoni maragina ta ladana, Croix dekenai ai noho. Pura ta ta emai ruma bese be dubu dekenai ai lao, bona egu tamana be dubu ena gaukara momo lalonai ia vareai. To egu mauri lagani be kahirakahira 14 neganai, dubu dekenai ia vara koikoi karadia lau itaia.

Tanobada tuarina iharuana ai German ena tuari oreana ese France idia biagua. Emai dubu ena pris tauna be ena haroro hereva momo dekenai ai ia hagoadaia Vichy ena Nazi gavamani ai durua totona. Ena hereva ai moalelaia lasi. France dekenai idia noho taudia momo bamona, hunia dalanai BBC ena reidio steiseni ai France idia durua tanodia amo sivarai ai kamonai. September 1944 ai, France idia durua tanodia idia kwalimu dainai, dubu ena pris be ena lalona ia haidaua bona dala ia karaia ena haroro herevana ai tanikiu herevana ia gwauraia totona. Unai koikoi karana dekenai lau hoa bada. Unai kara dainai dubu gunalaia taudia dekenai egu hemataurai karana ia maragi.

Tuari ia ore bona daudau lasi murinai, egu tamana ia mase. Egu taihuna badana ia headava bona Belgium dekenai ia noho dainai, lau mamia egu sinana lau naria be namo. Bena gaukara ta lau davaria. Egu bosi bona ena natudia memero rua be Katolik tomadiho idia laloa bada taudia. Ena be edia kampani dekenai gaukara namodia lau karaia, to gau ta ese lau ia tohoa.

Egu taihuna badana Simone be Witnes hahinena ai ia lao, bona lagani 1953 ai ia mai bona ai ia vadivadi henia. Ia ese Baibel ia gaukaralaia namonamo dainai ia hahedinaraia Katolik dubu ena hadibaia herevadia hegeregere, hel lahina, toi tamona, bona ia  mase diba lasi lauma be koikoi. Matamanai ena hereva lau hamomokania lasi badina Katolik Baibel ia gaukaralaia lasi, to gabeai lau abia dae ia be hereva momokani ia gwauraia. Ia ese Gima Kohorona magasin gunadia ia henia lau dekenai, bona idia ibounai lau duahia haorea. Karaharaga lau laloparara unai be hereva momokani; to lau gari badina bema lau hahedinaraia lau be Iehova ena Witnes tauna ta, egu moni gaukara do lau haboioa.

Hua haida lalonai, lau sibona ese Baibel bona Gima Kohorona haida lau stadilaia. Bena Kingdom Hall dekenai lau lao. Kongrigeisen taudia ese idia hahedinaraia lalokau karana ese egu kudouna ia hamarerea. Orea ai ia noho daudau tadikakana ta ida hua siks lalonai Baibel lau stadilaia murinai, September 1954 ai bapatiso lau abia. Danu, lau moale badina daudau lasi murinai egu sinana bona tadina kekeni be Witnes taudia ai idia lao.

Lagani 1985 New York ai, intanesinol hebouhebouna ta idia abia. To lau lalohisihisi bada badina wiki haida gunanai egu sinana ia mase. Hebouhebou amo lau giroa lou murinai, ruma bese ena maduna be lasi dainai, egu moni gaukara lau rakatania bona painia gaukara lau hamatamaia. Unai murinai painia gaukara ia goadalaia taihuna ta ladana, Danièle Delie ida ai maoheni, bena May 1959 ai ai headava.

Danièle be Brittany ena hanua kahana dekenai ena ful-taim hesiai gaukara ia hamatamaia, unai be iena noho gabuna amo ia daudau. Unuseniai idia noho taudia momo be Katolik taudia dainai, ia haroro bona basikele amo ena teritori ia lao totona ia boga-auka be namo. Ai mamia namona be ai gima, badina ai laloa dokona be ia kahirakahira. (Mat. 25:13) Danièle be sibona henia karana ia hahedinaraia dainai, emai ful-taim hesiai gaukara lalonai ai haheauka.

Ai headava bona dina haida murinai ai idia hadibaia sekit naria gaukarana ai karaia totona. Ai gaukara goada kohu momo lasi maurina ai manadalaia totona. Ai vadivadi henia kongrigeisen ginigunana ta ena pablisa ibounai be 14 bona unuseniai tadikaka taihu edia noho dalana ia auka dainai, ia auka edia ruma dekenai ai noho totona. Unai dainai Kingdom Hall ena platfom dekenai ai mahuta. Ena be ai mahuta namonamo lasi, to emai doruna ia durua!

Ena be ai bisi bada, to Danièle be senisi haida ia karaia unai amo sekit gaukara ai karaia diba. Nega momo ai palanilaia lasi elda heboudia lau lao neganai, ia be emai motuka maragina dekenai lau do ia naria, bona ia maumau lasi. Ena be lagani rua sibona sekit gaukara ai karaia, to unai negai ai diba headava tau bona hahine be mai momokani ida idia herevahereva bona idia gaukara hebou be mai anina bada.​—Had. 4:9.

Lagani 1962 ai, ai ruaosi idia boiria Brooklyn, New York dekenai Gilead Sikuli ena klas namba 37 dekenai ai lao bona hua 10 Baibel ai stadilaia totona. Stiuden ibounai 100 amo, headava taudia be 13 sibona. Unai dainai ai moale ai ruaosi be unai sikuli ai lao diba. Ai bamoa abidadama goada taudia haida lau laloatao noho hegeregere, tadikaka Frederick Franz, Ulysses Glass, bona Alexander H. Macmillan.

Emai treinini lalonai, ai idia hadibaia gau ibounai ai itaia bona laloa namonamo. Saturday adorahi haida  ai emai klas ena leseni ia ore murinai, emai treinini ta be New York City dekenai ai loaloa bona gabu ai itaia. Ai diba Monday ai, unai loaloa ai ai itaia gaudia amo ai dibaia gaudia do ai riviulaia. Nega momo Saturday hanuaboi ai giroa lou neganai ai hesiku bada, to ai ia abia loaloa Betele tadikaka be ai dekenai riviu henanadai haida do henia unai amo point badadia do ai laloatao. Saturday ta ai siti dekenai unai adorahi ibounai ai raka loaloa. Bena saiens taudia ese planeti bona gau ma haida idia stadilaia gabuna ta ai vadivadi, bona unuseniai meteors bona meteorites edia idau ai dibaia. * Bena American Museum of Natural History ai lao neganai, huala ta ta edia idau ai dibaia. Betele dekenai ai ia abia loaloa tadikaka ese ai ia nanadaia, “So, meteors bona meteorites edia idau be dahaka?” Danièle ena tauanina ia hesiku dainai ia gwau: “Meteorites edia isena be lata!”

Ai hoa badina ai idia siaia France ena brens ofesi dekenai ai lao bona unuseniai lagani 53 mai kahana ai gaukara. Lagani 1976 ai, lau idia abia hidi Brens Komiti ena kodineita ai lau lao bona lau idia siaia Africa bona Middle East edia tano haida lau vadivadi totona, bona unuseniai iseda gaukara be gavamani ese idia taravatua. Unai dainai sivarai ena matamana ai lau sivarailaia bamona, ai be Gabon dekenai ai lao. Nega momo lau mamia lau hegeregere lasi unai maduna idauidau lau huaia totona. To Danièle ena heduru dainai, unai maduna idauidau lau huaia diba.

Emai Betele gaukara be ai hamatamaia negana amo, ai moalelaia bada. Danièle be Gilead ia do lao lasi neganai, hua faiv lalonai English gado ia dibaia, unai ese ia durua iseda pablikeisen hahanaia gaukarana ia diba namonamo totona. Emai Betele gaukara ai moalelaia sibona lasi, to kongrigeisen taudia danu ai gaukara hebou karana ese emai moale ia habadaia. Lau laloatao hanuaboi ta lau bona Danièle be Paris ena trein ta dekenai ai guia, bona ena be ai hesiku bada to ai moale badina unai dina ai Baibel stadi namodia momo ai karaia. To Danièle ia gorere dainai ia auka ena hesiai gaukara ia karaia totona, guna bamona lasi.

Lagani 1993 ai doketa idia davaria Danièle be breast kensa gorere ia abia. Unai gorere hanamoa totona opereisen momo bona chemotherapy ia abia. Lagani 15 murinai, doketa idia davaria ena kensa gorere ia bada lou. To, ena asainmen ia laloa bada dainai, ena hemami ia namo neganai, hahanaia gaukarana ia karaia lou.

Ena be Danièle ena gorere ia bada, to Betele do ai rakatania ena lalohadai ai abia lasi. To, mai gorere ida Betele dekenai oi noho be mai ena hekwarahi, badina momo ese emu gorere ena bada idia diba namonamo lasi. (Aon. 14:13) Ena be Danièle ena mauri lagani be kahirakahira 80, to ena moale toana dainai ia mamia hisihisi ia hahedinaraia lasi. Sibona ena gorere ia laloa bada lasi. To ma haida durua dalana ia laloa bada dainai, edia hisihisi idia herevalaia neganai ia kamonai namonamo. (Aon. 17:17) Danièle ia gwau lasi ia be sisiba henia hahinena ta;  to ena ekspiriens ese taihu momo ia durua kensa gorerena dekenai idia gari lasi totona.

Danu ai hekwarahi hekwakwanai ma haida ai haheaukalaidia totona. Danièle be ena ful-taim asainmen ia karaia diba lasi neganai, lau do ia durua daladia ia tahua. Lau ia durua totona gau momo ia karaia, unai amo lagani 37 lalonai Brens Komiti ena kodineita gaukarana lau karaia diba. Hegeregere, ia ese emai room dekenai aniani do ia hegaegaelaia unai amo nega ia noho ai aniani bona laga-ani diba.​—Aon. 18:22.

Danièle be hanaihanai vaira neganai totona lalohadai maorona ia abia. To nega ihatoina kensa gorere ia abia neganai, ia mamia gau ta ai karaia diba lasi. Chemotherapy bona radiotherapy ia abia dainai, nega haida ia hegeregere lasi ia raka totona. Lau lalohisihisi bada badina egu adavana lalokauna, ena be gado hahanaia gaukarana ia diba namonamo, to ena gorere dainai ia hekwarahi hereva maorodia amo ena hemami ia gwauraia hedinarai totona.

Ena be ai mamia gau ta ai karaia diba lasi, to guriguri karana ai hadokoa lasi, bona ai abia dae Iehova ese ese dala do ia kehoa, unai hekwakwanai ai haheaukalaia totona. (1 Kor. 10:13) Hanaihanai ai be Iehova ena Hereva, Betele ena medikol taudia, bona tadikaka taihu ibounai amo ai abia heduru bona edia lalokau karana ai laloa bada.

Nega momo Iehova ena heduru ai tahua edena medikol heduru daladia ai abia dae totona. Nega ta muramura ia ore. Lagani 23 lalonai Danièle ia durua doketa be ia diba lasi dahaka dainai Danièle be chemotherapy ia abia murinai ia noga haraga lasi. Heduru daladia ma haida ia henia diba lasi. Ai laloa momo badina ai diba lasi dahaka do ia vara. Bena kensa gorere ia diba doketa ta (oncologist) be ia ura Danièle ia durua. Toana be Iehova ese dala ia kehoa ai ia durua unai amo ai lalohekwarahilaia gauna ai haheaukalaia totona.

Ai dibaia gauna be inai, dina ta ta ena lalohekwarahi ai haheaukalaia be namo. Badina Iesu ia gwau, “Dina ta ena metau be unai dina sibona ena.” (Mat. 6:34) Nega momo lalohadai maorona bona moale ese ai ia durua danu. Hegeregere, Danièle be hua rua lalonai chemotherapy ia abia lasi neganai, mai kiri ida lau do ia hamaoroa, “Oi diba dahaka, egu hemami ia namo vadaeni!” (Aon. 17:22) Ena be hisihisi ia mamia, to nega ia atoa Basileia ane matamatadia ia laloatao bona mai moale ida ia ane.

Danièle ese ia abia lalohadai maorona ese lau ia durua lau karaia diba lasi gaudia haida lau karaia totona. Ai be lagani 57 ai headava vadaeni, bona ia ese lau ia naria namo herea. Nega ibounai ia sibona ese gatoi do ia frai bona lau ia hadibaia lasi! Unai dainai ena gorere ia bada neganai, mereki, bona dabua huria, bona aniani nadua dalana lau diba be namo. Ena be unai gaudia lau karaia lalonai galasi haida lau hamakohia vadaeni, to ia lau durua dainai lau moale. *

Ita buruka ita lao bona ita gorere karana ese idia havaraia gaudia amo mai anina bada gaudia haida lau dibaia. Ginigunana be, emu lalokau tauna o hahinena totona emu nega bona goada oi henia ia oi naria namonamo totona. (Had. 9:9) Iharuana be, bema hekwakwanai maragidia momo ita laloa momo, dina ta ta ai ita abia hahenamo momo do ita laloa bada lasi.​—Aon. 15:15.

Emai ful-taim hesiai gaukara ai ai karaia gaudia lau laloa neganai, lau abia dae momokani Iehova ese ai ruaosi ia hanamoa. Salamo torea tauna ena hemami lau laloa, ia gwau: “[Iehova] ese iena durua, be lau dekenai ia henia.”​—Sal. 116:7.