Danièle na haraḡa herea e laloparara dainai, metairametaira taiagu ai eto: “Pulisi na asio rini henidia, idia na vada ema!” Motuka ta na hotele vairana ai e hetu. Se daudau soldia ese e dogomai tao. To Danièle ese e hadibagu guna dainai, maoromaoro pepa haida na tadikaka ta na henia.

Pulis steisen e hakaumai laova lalonai, adavagu ese e karaia karana dainai na moale, ia na se gari bona Iehova bona ena orea e lalodia bada. Nega momo lau bona Danièle na a ḡaukara hebou namonamova. Eda haroro ḡaukara e taravatua tanodia haida a vadivadidia badidia mani aina herevalai.

Lau na 1930 ai Katolik besena ta ai na vara, France mirigini kahana hanuana ta, Croix ai. Emai ruma bese na pura iboudiai Mass a laova, bona tamagu na dubu ḡaukaradia momo ai e heduruva. To, laḡanigu na kahirakahira 14 neganai, e vara karana ta amo dubu ena koikoi karadia na ita.

Tanobada tuarina iharuana lalonai, German ese France e hadarerea. Emai pris na ena haroro ai, hanaihanai e gwauva namona na Vichy ena Nazi gavamani baia durua. Ena haroro herevadia daidiai a hoa dikadika. France taudia momo heḡereḡeredia, ai na hehuni ai BBC reidio a kamonai heniava, tuari sivaraidia baia diba totona. France bae durua tuari oreadia na September 1944 France ai e vareai neganai, pris ese ena hereva e haidaua bena idia daidiai ena tenkiu herevana e harorolaia. Ena koikoi karana dainai na hoa. Una nega amo pris edia hereva na asina urava baina abi dae.

Tuari e ore bena se daudau tamagu e mase. Taihugu badana vada e headava bona Belgium ai e nohova dainai, nato sinagu baina naria. Ḡaukara namona ta na davaria. Egu bosi bona natuna memerodia rarua na Katolik taudia goadadia. Ena be edia kampani ai ḡaukara namodia e henigu, to se daudau hahetoho ta egu ai e vara.

Taihugu Simone na Witnes ta ai ela, bona laḡani 1953 ai e vadivadimai. Ia ese ena Baibul amo e hahedinaraia Katolik Dubu ena hahediba herevadia, heḡereḡere hel lahina, Toi Tamona, bona souli se masemu na koikoi. Matamanai na asina  moale badina ia ese Katolik Baibul se ḡaukaralaia, to gabeai na diba ia na hereva momokani e gwauraia. Gabeai Gima Kohorona gunadia e henigu, bona hanuaboi ai iboudiai na duahidia ore. Haraḡa herea na laloparara ina na hereva momokani; to na gari badina bema Iehova ena kaha ai ba ginimu reana egu ḡaukara amo be hadokogumu.

Hua haida lalodiai, Baibul bona Gima Kohorona atikol idauidau na sibogu ese na stadilai. Gabeai lalogu na hadaia Kingdom Hall ta bainala. Kongrigeisen ena lalokau na mamia momokani. Tadikaka goadana ta ese hua siks lalodiai e stadi henigu, bena September 1954 ai na bapatiso. Se daudau sinagu bona taihugu maraḡina na Witnes taudia ai ela dainai na moale.

Laḡani 1958 New York ena intanesinol hebouhebou e kahikahiva neganai, sinagu madi e mase. Una dainai, hebouhebou amo na lou neganai, egu ḡaukara amo na doko bona painia ḡaukara na hamatamaia. Bena painia taihu goadana ta, Danièle Delie, ida a hemaoheni. May 1959 ai a headava.

Danièle na Brittany ena gunika gabunai ena painia ḡaukara e hamatamaia; ena hanua amo na daudau. Asi garina ida una Katolik gabunai e harorova, bona baskele amo uda bona uma gabudia e laova. Lau heḡereḡeregu, e diba nega na dia bada dainai ena haroro ḡaukara e goadalaiava; dibamai dokona na vada kahirakahira. (Mat. 25:13) Sibona ena ura na se laloa dainai una ese e durumai emai ful-taim hesiai ḡaukara ai baia haheauka.

A headava bena dina haida muridiai, e abimai hidi seket ḡaukara baia karaia. Ai ese taunimanima edia noho daladia na a abi dae. A vadivadia kongrigeisen ginigunana ai pablisa na 14, bona tadikaka momo edia mauri na auka dainai edia ruma ai baia noho na dia heḡereḡere. Una dainai, Kingdom Hall ena pletfom ai a mahutava. Ena be asia mahuta namonamova, to ma namo dorumai iduruna!

Ena be emai ḡaukara na bada, to Danièle ese seket ḡaukarana e moalelaia. Elda taudia ida na hebouva negadiai, nega momo ia na emai motuka ai lau e nariguva, to nega ta se maumau. Ai na laḡani rua seket ḡaukara a karaia; una negai a diba headava taudia na mai momokanidia ida bae herevahereva bona bae ḡaukara hebou na mai anina bada.​—Koh. 4:9.

Laḡani 1962 lalonai e boirimai, Brooklyn, New York ai, Gilead Sikuli ena Klas Namba 37 ai baia vareai bena hua 10 baia sikuli. Stiuden 100 amo 13 na headava taudia, una dainai raruosi una sikuli ala na hahenamo ta. Abidadama taudia heḡereḡere Frederick Franz, Ulysses Glass, bona Alexander H. Macmillan a bamodiava negadia na doini na lalotaomu.

Emai sikuli lalonai, e hadibamaiva ḡau idauidau baia itadia bona baia lalohadailaidia namonamo. Saturday adorahi haida ai, sikuli e oreva muridiai New York City ena gabu haida a vadivadidiava. Dibamai Monday ai idia ese be nanadaimaimu ai  be dahaka a ita. Saturday adorahi a louva negadiai, ena be tauanimai na e hesikuva, to e loalaimai Betele tadikakana ese e nanadaimaiva, unu amo poin badadia baia lalotao Monday ai baia haerelai totona. Saturday adorahi ta ai na siti a loaia. Ai na guba hisiudia e stadilaimu gabuna ta ala, meteor bona meteorite edia idau baia diba totona. American Museum of Natural History gabunai, alligator bona huala edia idau a diba. Betele ai a kau neganai, tadikaka ese e nanadaimai, “meteor bona meteorite edia idau be dahaka?” Danièle na tauanina e hesiku bada dainai ena haere ai eto, “meteroite isedia na lalata!”

A hoa badina sikuli e ore murinai, e siaimai France brens ai baia ḡaukara, unuseniai laḡani 53 mai kahana a noho. Laḡani 1976 ai, lau na Brens Komiti kodineita ai e halaogu, bona e hamaorogu Africa bona Middle East tanodia baina vadivadidia; unu tano ai gavamani ese eda ḡaukara e koua eiava e taravatua. Unu amo Gabon ala, pulisi ese e abimai tanona bunai, matamanai na herevalaia gabuna. Baina gwau momokani, na hemamiva lau na dia heḡereḡere ḡaukara unuhetomadia baina kara. To Danièle ena heduru dainai, unu ḡaukara idauidau na haḡuḡuru.

Betele a vareai negana amo, emai mauri na a moalelaia. Gilead do asiala neganai Danièle na hua 5 lalodiai English e dibaia; gabeai eda pablikeisen ihahanaidia taihuna ai ela. Emai ḡaukara Betele ai bona kongrigeisen ai na a moalelaidia bada. Hanuaboi ai Danièle ida Paris trein ai a guiva negadia na lalo loumu; ena be tauanimai e hesikuva to Baibul stadi namodia haida a durudiava dainai a moaleva. To Danièle na ena gorere e bada e laova dainai, guna e goadalaiva ḡaukaradia na vada se karava.

Laḡani 1993 ai, dokta ese e davaria ratana na mai kensana. Una dainai, ratana e utudia bona chemotherapy goadana e henia. Laḡani 15 muridiai, kensa ma e abia lou. To, gado hahanai ḡaukarana na e ura henia badava dainai, tauanina e goadava negadiai una ḡaukara e karaiava.

Herevana Danièle ena gorere na e bada herea, to asia ura Betele baia rakatania. Momokani, Betele ai ta e gorereamu neganai, una na mai hekwarahina, heḡereḡere bema haida na gorere ena metau asi dibadia. (Her. 14:13) Ena be Danièle laḡanina na kahirakahira 80 e abia, to ena moale toana bona ena hereva namonamo karana dainai, reana haida na e laloava ia na dia gorere. Sibona se hebogahisiva. To haida idurudia daladia e tahuva. E diba haida edia hereva baine hakala karana ese idia baine durudia diba. (Her. 17:17) Danièle na nega ta se gwa ia na sisiba ihenina hahinena; to sibona ena sivarai amo taihu momo e durudia kensa dainai basie gari.

Emai hekwakwanai ta na emai goada na dia guna heḡereḡerena. Danièle na fultaim hesiai ḡaukara e rakatania neganai, eto dala ma haida ai baine durugu. Ia ese dala idauidau ai e durugu dainai egu ḡaukara e haharaḡaia, unu amo Brens Komiti kodineita ḡaukarana na laḡani 37 lalonai na karaia. Haheitalai ta na, ia ese adorahi  anianidia e heḡaeḡaelaiva unu amo emai daiutu ai a anianiva, bena raruosi taidia a laḡa-aniva.​—Her. 18:22.

Danièle na moale hahinena bona e urava baine mauri noho. Bena nega ihatoina kensa ma e abi lou. A mamia ai na asi goadamai. Chemotherapy bona radiothereapy ese ena goada e haoreava dainai nega haida asi goadana baine raka. Na hebogahisi badina adavagu lalokauna, gado ihahanaina taihu namona, na ena gorere dainai e hekwarahiva baine hereva.

Ena be lalomai e manokava, to a ḡuriḡuri goadagoadava, badina a abia dae momokani Iehova ese baine narimai, emai goada e hereaiamu hedibaḡanina ese baine butumai tao garina. (1 Kor. 10:13) Ai na nega iboudiai Iehova a tenkiu heniava badina ena Hereva, Betele ai gorere inaridia taudia, bona tadikaka taihu amo e durumaiva.

Nega momo Iehova a noiava baine durumai unu amo gorere ihanamona dalana ta baia abia hidi. Nega ta, muramura na e ore. Laḡani 23 lalodiai Danièle e duruava doktana ese ai na se hadibamai dahaka dainai Danièle na chemotherapy negadia ta ta muridiai e mase reava. Bona heduru dalana ma ta se gwauraia. A mamia ai na asi idurumai bona asi dibamai dahaka baia kara. Bena dokta idauna ta eto ia ese Danièle baine durua toho. Toana na Iehova ese dala e kehoa emai lalohekwarahi baia haheaukalaia.

Ai na dina ta ta ena lalohisihisi ihaheaukalaina dalana a diba. Iesu ena hereva heḡereḡerena, “dina ta ena dika vada davana iena.” (Mat. 6:34) E durumai ḡaudia haida na lalohadai maorona a abia bona a hevasehava. Haheitalai ta binai: Danièle na hua rua chemotherapy se abi neganai, ia na hevaseha dalanai e hamaorogu, “Oi dibamu dahaka, lau na namo, dia guna heḡereḡerena!” (Her. 17:22) Ena be tauanina e hisihisiva, to ia ese Basileia anedia matamatadia e abi badabadava, baine moale helaoreana.

Ena lalogoada karana ese lau na e durugu egu manoka negadiai baina haheauka. Momokani, emai headava laḡanidia 57 lalodiai, ia ese lau na dala idauidau ai e narigu. Bona se ura gatoi inadudia dalana baine hadibagu! Una dainai, e gorere dikadika neganai, mereki bona dabua ihuridia daladia bona aniani inadudia daladia na diba. Hurihuri ai inuinu galasidia haida na hamakohidia, to na moale badina na urava ia baina hamoalea. *

Emai mauri na laloa loumu neganai, na itamu, gorere bona buruka ese e havaramu metaudia amo ḡau haida na dibadia. Ginigunana na, dia namo ta ḡaukara momomu dainai adavada lalokaudia basita naridia namonamo. Namona na tauanida do goadadiai, eda lalokau taudia baita naridia namonamo. (Koh. 9:9) Iharuana na, ḡau maraḡidia daidiai basita lalohekwarahi momo; badina bema baita lalohekwarahi momomu, reana dina ta ta ai ta abimu hahenamodia basita lalomu.​—Her. 15:15.

Emai mauri lalonai a kara hesiai ḡaukaradia na lalo loumu neganai, asina daradaramu, Iehova na ai e hanamomai, guna asina lalo hahenamodia momo e henimai. Egu hemami na Salamo e torea tauna heḡereḡerena, eto: “Iehova ese vada e harihari henimu.”​—Sal. 116:7.