Danièle kwiktaem whisper long mi and sei: “No wari for ringim police, olketa long hia finis nao!” Wanfala car stop front long datfala hotel. Olketa soldia kam insaed and arrestim mitufala. Bat from Danièle kwiktaem talem mi firstaem, mi garem chance for givim samfala important pepa long nara brata wea stap long there.

Taem olketa tekem mitufala go long police station, mi tingim hao mi barava lucky tumas for garem waef wea garem spiritual tingting and no fraet. Diswan hem wanfala long olketa taem wea mitufala Danièle waka gud tugeta olsem wanfala team. Distaem bae mi storyim samting wea mekem mitufala visitim olketa kantri wea olketa banim preaching waka.

Mi born long 1930, long Croix, wanfala smol taon long northern France. Famili bilong mi Catholic and olketa attendim Mass evri week, and dadi bilong mi savve duim olketa waka for church. Bat taem mi klosap 14 year, wanfala samting happen wea mekem mi luksavve long wei wea church barava laea tumas.

Long World War II, army bilong Germany tekovarem France. Priest evritaem encouragem mifala for saedem datfala Vichy gavman, wea sapotim olketa Nazi. Mifala barava feel nogud long wanem hem talem bikos staka long mifala long France savve lisin haed long BBC radio, wea storyim nius from Allied army. Then bihaen, datfala priest changem tingting bilong hem abaotem olketa wea hem sapotim, and hem mekem arrangement for thanksgiving service for celebratem wei wea olketa Allied army start for win long September 1944. Mi barava sapraes and mi feel nogud tumas and datwan mekem mi no trustim olketa bigman bilong church.

No longtaem bihaen datfala war, dadi bilong mi dae. Big sista bilong mi marit finis and hem stap long Belgium, so mi feel olsem mi nao mas lukaftarem mami bilong mi. Mi waka long wanfala factory for wakem kaleko. Boss bilong mi and olketa son bilong hem olketa strong Catholic. Nomata mi garem chance for gohed garem gud waka insaed datfala company, mi feisim wanfala test.

Big sista bilong mi Simone, kamap wanfala Witness, and hem kam visitim mifala long 1953. Hem savve tumas hao for iusim Bible bilong hem for showimaot klia olketa laea teaching bilong Catholic Church, olsem hellfire, Trinity, and soul wea no savve dae.  Firstaem mi no agree long samting wea hem talem bikos hem no iusim Catholic Bible, bat gogo mi barava sure samting wea hem talem hem tru. Bihaen hem tekem kam olketa old Wastaoa magasin. Mi barava interest for readim long naet taem mi stap long rum. Mi kwiktaem luksavve datwan nao truth, bat mi fraet for showimaot mi wanfala Jehovah’s Witness nogud mi lusim waka bilong mi.

For tu-thri month, mi gohed studyim seleva Bible and olketa Wastaoa magasin. Gogo, mi disaed for go long wanfala Kingdom Hall. Wei wea olketa brata and sista showimaot love barava kasem heart bilong mi. Mi studyim Bible for sixfala month witim wanfala brata wea savve gud long truth, then mi baptaes long September 1954. No longtaem bihaen, mi barava hapi for lukim mami and smol sista bilong mi kamap Witness tu.

Sorre samting nao, mami bilong mi dae tu-thri week bifor international convention long New York long 1958. Mi garem privilege for attendim datfala convention. Taem mi kam bak, mi no garem eni responsibility for lukaftarem eniwan nao, so mi finis from waka bilong mi and start pioneer. Long datfala taem tu, mi engage for maritim wanfala strong pioneer sista, Danièle Delie, wea kamap waef bilong mi long May 1959.

Danièle start for pioneer long Brittany, wea hem farawe from hom bilong hem. Hem needim wei for no fraet for preach, from datfala ples staka Catholic stap long hem and hem mas iusim baesikol for go long olketa territory wea stap long bakwei. Mitufala Danièle luksavve hem barava important for duim datfala waka, bikos mitufala luksavve maet end hem barava klosap tumas. (Matt. 25:13) Wei wea hem willing for duim eni samting helpem mitufala for gohed duim full-taem service.

Tu-thri day bihaen mitufala marit, mitufala kasem assignment for duim circuit waka. Mitufala willing for stap long eni ples nomoa. First kongregeson wea mitufala visitim hem garem 14-fala pablisa nomoa, and no eni spes long haos bilong olketa brata for mitufala stap. So mitufala sleep long olketa matres long stage bilong Kingdom Hall. Hem no mas gud, bat hem mekem baksaed for barava stret!

Nomata mitufala garem busy schedule, Danièle change for fitim traveling waka. Staka taem hem mas weitim mi insaed smol car bilong mitufala taem wanfala meeting bilong olketa elder seknomoa kamap. Bat no enitaem hem komplen. Mitufala duim circuit waka for tufala year nomoa, and mitufala lanem hao hem barava important for olketa wea marit mas story gud tugeta and waka tugeta olsem wanfala team.—Eklesiastes 4:9.

Long 1962, mitufala kasem invitation for attendim mek-37 class bilong Gilead Skul long Brooklyn, New York, wea gohed for tenfala month. Insaed class, 100-fala student nao attend, bat 13-fala couple nomoa insaed. So hem wanfala privilege for mitufala attendim datfala skul tugeta. Mi garem olketa naes memory abaotem datfala taem wea mi associate witim olketa wea garem strongfala faith, olsem Frederick Franz, Ulysses Glass, and Alexander Macmillan.

 Part long training bilong mifala hem for lane hao for luksavve long olketa samting wea happen raonem mifala. Long samfala Saturday aftanun, bihaen mifala finis skul, olketa savve mekem arrangement for mifala go lukluk long samfala ples long New York City. Long Monday bihaen datfala tour, mifala mas raet abaotem olketa samting wea mifala lukim. Staka taem mifala barava taed tumas taem mifala kam bak long Saturday evening, bat tour guide bilong mifala, wea hem wanfala volunteer long Bethel, savve askem olketa review kwestin for helpem mifala tingim olketa main point for test wea bae kamap. Wanfala Saturday aftanun, mifala go raon for lukluk long staka ples long datfala taon. Mifala visitim wanfala observatory, long there mifala lane abaotem olketa meteor and meteorite. Then mifala visitim American Museum of Natural History and mifala lane abaotem hao alligator difren from crocodile. Taem mifala kam bak long Bethel, tour guide bilong mifala askem mifala, “Hao nao meteor hem difren from meteorite?” Danièle barava taed and hem sei: “Olketa meteorite garem long teeth!”

Mitufala barava sapraes for kasem assignment for waka long branch office long France. Mitufala serve long there for winim 53 year. Long 1976, mi kasem appointment for kamap coordinator bilong Branch Komiti, and tu, mitufala kasem assignment for go visitim olketa kantri long Africa and Middle East wea gavman banim preaching waka or strict tumas long waka bilong iumi. Diswan mekem mitufala for go long Gabon, ples wea mi storyim long start bilong disfala article. Staka taem mi feel olsem mi no fit for duim olketa responsibility hia. Bat Danièle hem evritaem stap for sapotim mi for duim eni assignment.

Start long taem mitufala go long Bethel, mitufala barava enjoyim laef long there. From Danièle lanem English insaed faevfala month bifor mitufala attendim Gilead Skul, hem kamap wanfala gudfala transleita for transleitim olketa pablikeson bilong iumi. Mitufala barava hapi and satisfae for duim waka bilong mitufala long Bethel, bat samting wea mekem mitufala barava hapi tumas hem nao wei for waka witim olketa long kongregeson. Mi savve tingim yet olketa naet wea mitufala Danièle savve go long train long Paris, nomata mitufala taed mitufala barava hapi from mitufala conductim olketa Bible study wea gohed gud. Bat sorre samting nao, wanfala sik kasem Danièle wea mekem hem no strong for duim staka samting long ministry.

Long 1993 olketa doctor faendemaot Danièle hem garem breast cancer. Hem operate and kasem treatment wea olketa kolem chemotherapy, wea barava affectim body bilong hem. Then fiftin year bihaen, hem garem moa cancer, wea worse winim firstaem. Nomata olsem, from hem barava tinghae long assignment bilong hem olsem wanfala transleita, taem sik bilong hem kamap gud lelebet, hem savve go bak waka.

Danièle barava sik big, bat no enitaem mitufala ting for lusim Bethel. Nomata olsem, taem man sik and stap long Bethel hem wanfala challenge, especially sapos olketa narawan no luksavve hem sik big. (Provebs 14:13) Nomata Danièle hem winim 70 year finis, feis bilong hem luk hapi olowe and luk naes nomata hem sik. Hem no savve tingim hemseleva tumas, bat hem traem best for helpem olketa narawan thru long wei for lisin long olketa. (Provebs 17:17) From Danièle mas deal witim datfala sik, hem savve hao for helpem staka sista for no fraetem cancer.

 Mitufala mas feisim tu olketa nara challenge. Taem Danièle hem no fit nao for waka full taem, hem sapotim mi long olketa nara difren wei. Hem duim staka samting for mekem laef bilong mi isi and datwan mekem mi fit for serve olsem coordinator bilong Branch Komiti for 37 year. Olsem example, hem savve redyim kaikai for mitufala long lunch insaed rum and for relax lelebet tugeta evriday.—Provebs 18:22.

Danièle evritaem tingim gud saed long olketa samting and hem barava laek for laef. Bat gogo, hem garem cancer mek-thri taem moa. Mitufala barava feel olsem mitufala no wei nao. Olketa taem wea hem savve go for tekem chemotherapy and duim radiotherapy, body bilong hem savve wiki tumas and samfala taem hem no savve wakabaot. Mi barava feel sorre tumas taem mi lukim waef bilong mi wea mi lovem tumas, and wea savve tumas hao for transleit, hem stragol for toktok.

Nomata mitufala feel olsem mitufala no wei nao, mitufala gohed prea and trustim hao Jehovah bae no letem datfala wei for safa for winim mitufala. (1 Cor. 10:13) Mitufala evritaem tinghae long help wea Jehovah provaedem thru long Bible, medical staff long Bethel, and olketa brata and sista.

Staka taem mitufala savve askem Jehovah which treatment nao mitufala shud acceptim. Gogo wanfala taem Danièle no garem eni treatment nao. Doctor wea helpem Danièle for 23 year no savve why nao Danièle savve faint bihaen hem tekem chemotherapy treatment. Hem no savve eni nara treatment wea bae fitim. Mitufala feel olsem mitufala mas deal witim datwan seleva nao and mitufala no savve wanem nao bae happen. Then nara doctor bilong cancer agree for helpem Danièle. Mitufala feel olsem Jehovah nao helpem mitufala for deal witim olketa wari wea mitufala kasem.

Mitufala lane for deal witim wari bilong each day nomoa. Olsem Jesus talem: “Tingim nomoa olketa problem wea iufala kasem tuday.” (Matt. 6:34) And tu, wei for mekfani and evritaem tingim gud saed long olketa samting savve helpem man. Olsem example, taem Danièle no tekem chemotherapy for tufala month, hem smile long mi and sei: “Iu savve, no enitaem mi feel gud olsem!” (Provebs 17:22) Nomata hem sik tumas, hem hapi taem hem singim olketa niu Kingdom song witim strong and klia voice.

Wei wea hem evritaem tingim gud saed long olketa samting hem helpem mi for deal witim olketa samting wea mi no fit for duim. For tok stret, insaed 57 year wea mitufala marit hem nao duim staka samting for helpem mi. Hem no laek showim mi hao for fraenem egg tu! So taem hem barava sik big, mi mas lane hao for wasim pleit, wasim kaleko, and for kukim kaikai for mitufala. Samfala taem mi brekem samfala glass kap. Bat mi barava hapi taem mi duim samting wea mekem hem hapi. *

Taem mi ting go bak, mi lanem staka nambawan leson long wei wea iumi no fit for duim staka samting taem iumi sik and olo. First samting, iumi shud no busy tumas gogo iumi no tinghae nao long marit partner. Long olketa year wea iumi strong yet, iumi laek for iusim datfala taem for lukaftarem olketa wea iumi lovem. (Eklesiastes 9:9) Mek-tu samting, iumi shud no wari tumas abaotem olketa sismol samting, nogud nao iumi no tingim staka blessing wea iumi kasem evriday.—Provebs 15:15.

Taem mi tingim bak olketa taem wea mitufala insaed full-taem service mi barava sure Jehovah blessim mitufala winim wanem mitufala savve tingim. Mi garem sem feeling olsem man wea raetem psalm wea sei Jehovah barava kaen tumas long hem.—Sams 116:7.