Danièle nindxu̱u̱ mbáa xa̱bu̱ bi̱ nandxa̱ʼóo nacha̱ edxu̱u̱ rí maʼni, ikhú niʼthúunʼ: “Xaxmiéjuanʼ, kuwa má gi̱i̱”. Ikhú, ni̱ʼkha̱ gáwi̱ji̱ mbá carro ndrígu̱ún policía náa hotel. Ikhú má mbiʼi rúʼko̱ nigún kudáanʼxu náa guʼwá e̱jua̱nʼ. Mú, núma̱aʼ rí niʼthúnʼ guapháá a̱ʼgiu̱ʼ, nindoo nixnúʼ mbáa ndxájulú tikhu i̱yi̱i̱ʼ.

Índo̱ inu maʼgánú náa kuwa policía, nindxa̱ʼwáminaʼ: “¡Ra̱ʼkhá tháán májánʼ nindxu̱u̱ rí gúʼdaa mbáa a̱ʼgiu̱ʼ bi̱ tsímiñuu ga̱jma̱a̱ naʼni ñajunʼ Jeobá!”. Rígi̱ nindxu̱u̱ mbá tikhu xkujndu rí niraʼnííxu ikhúúnʼ ga̱jmu̱ʼ Danièle. Mú guniʼñúʼ matala, xú káʼnii niguáʼnuxu náa xuajen rí tsíñún miʼtáraʼa

Nigumún nákha tsiguʼ 1930 náa Croix, mbá xuajen chíʼgíʼ rí naguanúu xígií náa norte ndrígóo Francia. Bi̱ kuwa náa goʼwóoʼ ni̱ndxu̱ún Católico. Na̱jkuáxu misa xúgíʼ xmáná, ga̱jma̱a̱ anu̱ʼ nayambáá náa guʼwá ndxajkun. Mú, índo̱ nigúʼdoo 14 tsiguʼ, nirígá mbá rí niʼni mbaʼyoo rí guʼwá ndxajkun naʼsngáa nduwaʼ.

Nda̱wa̱á rí soldado alemán nini gámbáa Francia índo̱ nirígá raga̱jma̱ Guerra náa xúgi̱ numbaaʼ, ndxajkun nigíʼdu̱u̱ nimbáñun nazis. Índo̱ naxná discurso ndrígóo naʼni rí mamiñúxu. Xó má eʼwíínʼ franceses, bi̱ kuwa náa goʼwóoʼ nudxawíín nguʼwáá rí naʼthí náa radio ndrígóo BBC, ga̱jma̱a̱ numún Soldados bi̱ nuxnamijná gajmiún nazis. Mú, índo̱ niʼni septiembre tsiguʼ 1944, ikhú ndxajkun nigíʼdu̱u̱ nimbáyúu imba̱a̱ ga̱jma̱a̱ nigimbíin xa̱bu̱ mu maxnáa núma̱aʼ Dios ga̱jma̱a̱ numuu rí naʼni mbaʼin itháan bi̱ magún náa guerra. ¡Tándoo gánimboʼ! Fe ndrígóʼ nikágua̱ba̱ʼ ga̱jma̱a̱ numuu rí ndi̱yo̱o̱ náa ndxajkun.

Anu̱ʼ nikháñu nguáthá mbiʼi nda̱wa̱á índo̱ niguámbáa guerra, ga̱jma̱a̱ ikhú ndxájuʼ aʼguʼ, bi̱ mbiʼyuu Simone, ninújunʼ má ga̱jma̱a̱ nixtáa náa xuajen Bélgica. Ikhú ndiyóoʼ mañewu̱u̱n ru̱dúʼ. Nixkamaa mbá ñajunʼ náa guʼwá rí nuni xtíin ga̱jma̱a̱ nikumuʼ rí maxtáá májánʼ. Mú, jefe ndrígóʼ gajmíi̱n e̱ji̱i̱n ni̱ndxu̱ún católico, ga̱jma̱a̱ maraʼnuu mbá gamiéjunʼ gakhi̱i̱.

Nákha tsiguʼ 1953, Simone ni̱ʼkha̱ gáʼyuxu. Ikhaa ni̱jkha̱nú ninindxu̱u̱ xa̱bi̱i̱ Jeobá. Nijmuu Biblia ndrígóo, mu masngámuxu kaʼwu dí ragájkhun  nindxu̱u̱ infierno, Trinidad ga̱jma̱a̱ á mu xóó nduya xa̱bu̱ índo̱ nakháñun. Ni̱thu̱u̱n, Biblia rí kayá raʼkháa ndrígu̱ún católico, mú tájyúuʼ ndi̱yo̱o̱ rí gajkhun nindxu̱u̱ rí niʼthúnʼ. Nguáthá mbiʼi nda̱wa̱á, ni̱ʼkha̱ kagu̱u̱ mbaʼa i̱yi̱i̱ʼ ndrígóo Bi̱ Nayejngoo rí nigájnuu nákha ginii, ga̱jma̱a̱ rí ikhúún naguxnuu mbruʼun. Táni má mba̱yu̱ʼ, dí nitha rí nixkamaa rí gajkhun. Mú, nimíñuʼ mandáti̱go̱ʼ ñajunʼ ndrígóʼ á mú nanindxu̱ʼ xa̱bi̱i̱ Jeobá.

Ninigajmaa má xúʼko̱ Biblia ga̱jma̱a̱ Bi̱ Nayejngoo mbáwun mbá nguáthá igu̱nʼ, asndu índo̱ nitha maʼga̱ náa Guʼwá nagimbáanʼ. Rí nindúún kuyoʼ a̱ngiu̱lú ni̱jkha̱nú asndu náa a̱jkiu̱nʼ. Mbáa ndxájulú bi̱ mba̱yu̱ʼ má tsiguʼ xtáa raʼni ñajunʼ Jeobá niʼsngóʼ ga̱jma̱a̱ numuu Biblia mbá majun igu̱nʼ, ga̱jma̱a̱ nijngúnʼ iyááʼ nákha septiembre tsiguʼ 1954. Nguáthá mbiʼi nda̱wa̱á, ndiʼyoo xóo ru̱dúʼ ga̱jma̱a̱ giʼtioʼ ndxáʼgú niguánu ninindxu̱ún xa̱bi̱i̱ Jeobá.

Phú gíná ninindxu̱u̱, dí ru̱dúʼ nikháñu, nguáthá xmáná ginii dí nirígá asamblea internacional nákha tsiguʼ 1958 náa xuajen Nueva York, náa rí nindoo nixtáa. Índo̱ nitangaán náa goʼwóoʼ, nánguá xtáa mbáa bi̱ maxmiéjunʼ ka̱yo̱o̱, ikha jngó niniʼñúʼ ñajunʼ ndrígóʼ ga̱jma̱a̱ nindxu̱u̱ precursor. Ikhú, niniʼnííʼ Danièle Delie, mbáa precursora bi̱ nadxuu a̱jkiu̱u̱n, ga̱jma̱a̱ nguáthá tsiguʼ nda̱wa̱á ni̱thu̱u̱n rí mba̱ya̱a̱. Ikhú ni̱jkha̱nú ninindxu̱u̱ a̱ʼgiu̱ʼ nákha gu̱nʼ mayo tsiguʼ 1959.

Danièle nigíʼdu̱u̱ niʼni káxi̱ ñajunʼ Jeobá náa mbá xuajen chíʼgíʼ ndrígóo Bretaña, mitsínguánʼ náa xuajñu. Ndiyóoʼ rí xámiñuʼ mú mataráʼa náa xuajen rúʼko̱, numuu rí xúgínʼ xa̱bu̱ ni̱ndxu̱ún católico ga̱jma̱a̱ mbaʼyóoʼ maʼga̱ ga̱jma̱a̱ bicicleta náa xuajen rúʼko̱. Xó má ikhúúnʼ ga̱jmu̱ʼ a̱ʼgiu̱ʼ naxkaxáanʼxu munixu nacha̱ ñajunʼ rígi̱. Nájmáanʼ niku̱mu̱xu rí fin ma̱ʼkha̱nú asndu náa má mbi̱ʼi̱i̱ (Mat. 25:13). Rí niniguʼ wéñuʼ rúʼko̱ nini rí xúniʼñáʼxu runi káxi̱ ñajunʼ Jeobá.

Nguáthá mbiʼi nda̱wa̱á índo̱ nidamíjnáxu, nituxu muyambáá xóo circuito. Ndiyóoʼ maguʼwunxu rí xaguaʼdáá wéñuʼ. Náa timbá congregación rí ni̱jkuáxu kuwa mbá 14 publicadores, ga̱jma̱a̱ numuu rí a̱ngiu̱lú na̱nguá guáʼdáá guʼwá náa maguanúxu, nixnuxu náa mbá colchón rí niti̱ga̱ náa plataforma ndrígóo Guʼwá nagimbáanʼ. Maski ajndu migujkhuʼ ninindxu̱u̱ xiyoo, mú ninúnʼxu májánʼ.

Maski ajndu tsiguapáanʼxu, Danièle táʼniuu mingíjyúuʼ maguʼun. Mámbá mbiʼi rí narígá reunión ndrígu̱ún bi̱ kuya̱ edxu̱ún náa Guʼwá nagimbáanʼ, nguáná ndayóoʼ maguanúʼ, ikhaa nagíʼthu̱u̱n náa carro ga̱jma̱a̱ na̱nguá xieʼkha. I̱ndó a̱jma̱ tsiguʼ nikúwáanʼxu xóo circuito, nijmañuxu rí náa xa̱bu̱ bi̱ nidamijná, ndayóoʼ rí mutamijná ga̱jma̱a̱ rí muñajunʼ mbóó (Ecl. 4:9).

Nákha tsiguʼ 1962, nithu̱xu mu̱ʼguáxu clase 37 náa Escuela ndrígóo Galaad, mu makuwáanʼxu náa Brooklyn (Nueva York), rí ndajyúuʼ mbá gu̱wa̱ʼ igu̱nʼ. Ninindxu̱xuʼ mbáa 100 bi̱ nunigajmaaxu, mú raʼkháa xúgínʼ xa̱bu̱ gajmii nikuwa náa Escuela rúʼko̱. I̱ndó nikuwa mbá 13 xa̱bu̱ gajmii, asndu mangáanʼxu. ¡Ninindxu̱u̱ mbá ñajunʼ kiejunʼ! Xóó narmáʼáan a̱jkiu̱nʼ xú káʼnii nimbáxuʼ gajmíi̱nʼ a̱ngiu̱lú bi̱ guáʼdáá fe xóo, Frederick Franz, Ulysses Glass ga̱jma̱a̱ Alexander Macmillan.

 Náa nijuiʼsngúxu, nijuiʼthá rí gíʼdoo wéñuʼ numuu rí marmáʼáan a̱jkiu̱xuʼ rí ndi̱ya̱a̱. Tikhu sábado rí wakhííʼ, índo̱ naguámbuxu runigajmaa, nagún kudáanʼxu mu mbu̱ya̱a̱xu tikhu rí gíʼdoo wéñuʼ numuu náa xuajen Nueva York. Rí mbiʼi lunes nuni marmáʼáan a̱jkiu̱xuʼ rí nijmañuxu. Índo̱ natangáanʼ néʼnguxuʼ wéñuʼ, mbáa ndxájulú Betelita bi̱ ni̱ʼkha̱ kaguáanʼxu naʼniuxu graxe̱ mu marmáʼáan a̱jkiu̱xuʼ rí gíʼdoo wéñuʼ numuu rí ndiya̱a̱xu. Imbo̱o̱ sábado wakhííʼ, ni̱jkuá gúya̱a̱xu xú káʼnii mixtiʼkhu nindxu̱u̱ meteoros ga̱jma̱a̱ meteoritos, nda̱wa̱á ni̱jkuáxu náa mbá guʼwá náa naxtagixi̱i̱ dí nirígá nákha wajyúúʼ, Ikhú nithuxu xú káʼnii gúya̱a̱xu rí mixtiʼkhu nindxu̱u̱ mbáa caimán ga̱jma̱a̱ mbáa cocodrilo. Índo̱ natangáanʼxu náa Betel, bi̱ ni̱jkha̱ kaguáanʼ niraxuxu: “Lá narmáʼáan a̱jkia̱la xú káʼnii mixtiʼkhu nindxu̱u̱ mbáa meteoro ga̱jma̱a̱ mbáa meteorito ráʼ”. Néʼngo̱o̱ wéñuʼ Danièle rí asndu niriʼña: “Xúʼko̱, meteorito gíʼdoo iñuʼ itháan mba̱ʼu̱”.

Índo̱ nirámuxu, ikhú nithuxu mu̱ʼguáxu náa sucursal ndrígóo Francia, náa niyambááxu itháan rí mbá a̱jma̱ skíñúʼ gu̱wa̱ʼ i̱jtsu̱ tsiguʼ. Nákha tsiguʼ 1976, niʼgiúnʼ mu mani̱ndxu̱ʼ mbá bi̱ maríyaaʼ awan náa Comité ndrígóo Sucursal. Ma̱ngaa, nguáná nuxnuʼ ñajunʼ rí maʼga̱ gáñu̱u̱n a̱ngiu̱lú náa i̱ʼwáʼ xuajen xóo África ga̱jma̱a̱ Oriente Medio náa xa̱bu̱ tsíñún miʼtáraʼa. Xúʼko̱ niʼni rí niguáʼnuxu náa xuajen Gabón, náa nirígá rí niʼthá nákha ginii. Gajkhun rí nathala, nguáná naʼniuʼ mingíjyúuʼ mani ñajunʼ rígi̱. Mú a̱ʼgiu̱ʼ Danièle bi̱ nandoʼ ka̱yo̱o̱, nimbáyuʼ má xúʼko̱ mu manimbánuu ñajunʼ rí nigúʼdoo.

Asndu nákha ginii ra̱ʼkhá tháán nidxuxu rí makuwáanʼxu náa Betel. Nákha xóó tséjkua̱xu náa Galaad, Danièle nijmañuu ajngáa inglés káaʼ mbá witsu igu̱nʼ ga̱jma̱a̱ nda̱wa̱á ni̱jkha̱nú ninindxu̱u̱ mbáa bi̱ najmañuu naʼtájuíi májánʼ i̱yu̱lú. Ñajunʼ rí nunixu náa Betel naʼni makúwáanʼxu gagi, ga̱jma̱a̱ rí mumbáñuun a̱ngiu̱xu náa Guʼwá nagimbáanʼ rúʼko̱ naʼni makuwáanʼxu itháan gagi. Ikhúúnʼ ga̱jmu̱ʼ Danièle nurajtúu̱nxu metro ndrígóo París mu muʼguá gúsngúúnxu xa̱bu̱ ga̱jma̱a̱ Biblia. Narmáʼáan a̱jkiu̱u̱n rí natangáanʼxu mikríná náa kúwáanʼxu ga̱jma̱a̱ néʼnguxuʼ rí ni̱jkuáxu gumbáñuun xa̱bu̱ mu muniʼniiʼ Jeobá. Phú gíná ninindxu̱u̱ rí mbá nacha̱ nixkamaa nandii Danièle rúʼko̱ niʼni rí xáʼni itháan ñajunʼ Jeobá xó má rí nindoo nákha ginii.

Nákha tsiguʼ 1993, nitháán rí gíʼdoo cáncer de mama. Thana ninindxu̱u̱ gakhi̱i̱ wéñuʼ, rí asndu ndiyóoʼ muthii ga̱jma̱a̱ muxuda̱ʼ náa quimioterapia. Gu̱wa̱ʼ nítsu tsiguʼ nda̱wa̱á, Danièle nitanga̱a̱ niʼniuu mbu̱júu̱ʼ nandii cáncer, mú rí xúgi̱ niʼniuu itháan gakhi̱i̱. Ikhaa ndaʼyamajkuu wéñuʼ ñajunʼ rí gíʼdoo xóo maʼtájuíi i̱yi̱i̱ʼ, naʼni asndu xú káʼnii má mú xániñuʼ ñajunʼ ndrígóo índo̱ tséʼniuu nandii.

Maski ajndu Danièle nigiʼdoo cáncer, nditháan tutaxu rí muniʼñáaʼxu Betel. Gajkhun má rí maraxtaa Betel gakhi̱i̱ nindxu̱u̱ índo̱ xtaʼdáá nandii, mu itháan índo̱ nimbáa tseʼyoo rí gakhi̱i̱ nindxu̱u̱ nandii rí xtaʼdáá (Prov. 14:13). Naʼni mbá 80 tsiguuʼ, Danièle xóo nasngájma rí xtáa gagi maski ajndu gíʼdoo nandii. Ga̱jma̱a̱, tsixmiéjunʼ ga̱jma̱a̱ numuu nandii, rí phú naʼni nambáñun eʼwíínʼ. Ndaʼyoo májánʼ rí naʼni̱i̱ a̱jkia̱nʼ índo̱ mbáa nadxawaanʼ ga̱jma̱a̱ nakro̱ʼo̱o̱ rí nagíʼnaʼ, naʼni̱i̱ a̱jkia̱nʼ (Prov. 17:17). Naʼni rígi̱ numuu  rí nandoo mambáñun eʼwíínʼ a̱ngiu̱lú mu xámiñuun gáʼni nandii.

Ma̱ngaa niraʼnííxu i̱ʼwáʼ gamiéjunʼ. Índo̱ Danièle nánguá eʼngo̱o̱ gáñajunʼ kañiʼ mbiʼi, niraʼwíí maʼni xúgíʼ xó má eʼngo̱o̱ mu mambáyuʼ ga̱jma̱a̱ rí mariʼkhuu xóo xtáá. Rúʼko̱ nimbáyúu mu mañajunʼ xóo mbáa bi̱ naríyaʼ awan náa Comité ndrígóo Sucursal rí mbá skíñúʼ gu̱wa̱ʼ ijuwan tsiguʼ. Mbáa xkri̱da, índo̱ naʼni guajkhaʼ, nuphiʼtsuxu náa kuwáanʼxu ga̱jma̱a̱ nuda̱a̱xuxu mbá xngaa (Prov. 18:22).

Danièle nisngájma má xúʼko̱ rí tséʼnii néʼngo̱o̱ ga̱jma̱a̱ nandoo maxtáa. Índo̱ niʼniuu cáncer rí maʼni ajtsú nuthu, phú gíná nikúwáanʼxu. Náa quimioterapia ga̱jma̱a̱ náa radioterapia Danièle, rúʼko̱ eʼniúu rí matígo̱o̱ tsiakii. Na̱nguá eʼngo̱o̱ gáʼga̱. Asndu naʼniu gakhi̱i̱ maʼthí. ¡Maski ajndu ninindxu̱u̱ mbáa bi̱ najmañuu naʼtájuíi májánʼ i̱yi̱i̱ʼ! Rí mba̱yo̱o̱ xúʼko̱ kaʼnii nagawúnʼ a̱jkiu̱nʼ.

Nguáná, naku̱mu̱xu rí gamiéjunʼ rí kuaʼdááxu naʼni rí madáanʼxu, mú nimbá miʼtsú tséniʼñáʼxu rutakáñiixu Jeobá. Naku̱mu̱xu ku̱ya̱a̱ Jeobá rí nditháan xániñuxu muraʼníí itháan rí xáʼnguxuʼ gúní gajmiúxu̱ (1 Cor. 10:13). Ga̱jma̱a̱ nunimíjna̱xu rí mbuyamajkuííxu má xúʼko̱ Ajngá rawúnʼ ikhaa, náa guʼwá thana dí rígá náa Betel ga̱jma̱a̱ a̱ngiu̱xu bi̱ nuni ñajunʼ Jeobá.

Índo̱ tséya̱a̱xu ndiéjunʼ thana guraʼwíí majmuxu, nunda̱ʼa̱a̱xu rí Jeobá maxnúxu ikha ndrígóo. Nirígá mbo̱o̱ mbiʼi rí nikujmaa rí nándáa rí munixu, ikhú Danièle ni̱jkha̱ randáti̱go̱o̱ ku̱ma̱ ndrígóo nda̱wa̱á rí nigájnáa náa quimioterapia. Bi̱ nixtáa raʼni thanuu mbá skíñúʼ i̱jtsu̱ tsiguʼ, na̱nguá eʼyoo náa numuu rí nagíʼnuu xúʼko̱ kaʼnii ga̱jma̱a̱ na̱nguá eʼyoo rí maʼni. Naku̱mu̱xu rí kúwáanʼxu ndajkuáanʼ. Ikhú, nixkamaa mbáa oncólogo bi̱ nandoo maʼni thanuu Danièle. Niku̱mu̱xu rí Jeobá xtáa rambáyuxu.

Mú ma̱ndoo munimíjna̱ gajmiúxu̱ rí naʼni maxmiéjunʼxu, ndiyóoʼ mbu̱ya̱a̱xu xú káʼnii guni mámbá mbiʼi. Xó má niʼthí Jesús: ‹Mbájndi má gamiéjunʼ rí xtaʼdáá mámbá mbiʼi› (Mat. 6:34). Rí ma̱ta̱ya̱a̱ rí matani ga̱jma̱a̱ rí maraxtaa gagi rúʼko̱ nayambáá mu xaxmiéjuanʼ. Mbá xkri̱da, índo̱ Danièle ndiyóoʼ rí xagruigú a̱jma̱ igu̱nʼ quimioterapia, niʼthún: “¡Nimbáa miʼtsú táxtáá májánʼ ki xóo xúgi̱!” (Prov. 17:22). Ga̱jma̱a̱, maski ajndu gíʼdoo nandii, ikhaa naniguuʼ wéñuʼ maʼnii ajmúú náa Jeobá.

Rí maxtáa gagi Danièle niguguambáyuʼ rí xaxmiéjunʼ wéñuʼ. Naʼni itháan rí ajtsú skíñúʼ tsiguʼ kuwáanʼxu mbóó, ikhaa ninindxu̱u̱ bi̱ niñewu̱nʼ má xúʼko̱. ¡Asndu nditháan táʼndoo gáʼsngóʼ xú káʼnii maruwaʼ mbá xndú! Ikha jngó, índo̱ niʼniuu nandii, ndiyóoʼ rí majmañuʼ majña̱a̱ xúbá, xtíin ga̱jma̱a̱ mani mújúnʼ ganitsu. Asndu ni̱jkhánú nikuíʼta tikhu traste, mú nadxuʼ wéñuʼ numuu rí naguguambayuʼ xúgi̱. *

Náa mbiʼi rí nixtáá nijmañuʼ wéñuʼ ga̱jma̱a̱ numuu nandii ga̱jma̱a̱ rí mani̱ndxu̱xuʼ xa̱bu̱ guaniáanʼ. Ragíʼmaa maxmiéjuanʼ xtayáá wéñuʼ ñajunʼ rí xtaʼdáá rí asndu xatríyaʼ mbiʼi mu maraxtaa ga̱jma̱ʼ a̱ʼgia̱ʼ. Xúʼko̱, ndayóoʼ rí muríyaʼ mbiʼi índo̱ kuwáanʼ májánʼ, mú makuwaanʼ gajmiúlú bi̱ kuʼñúún (Ecl. 9:9). Ma̱ngaa, á mu naxmiéjuanʼ wéñuʼ ga̱jma̱a̱ numuu xkujndu rí natraʼníí mámbá mbiʼi, maʼni rí xátayamajkuíí xúgi̱ rí májánʼ rí nixnáʼ Jeobá (Prov. 15:15).

Índo̱ nandxa̱ʼwa̱mínáʼ rí xú káʼnii ninixu káxi̱ ñajunʼ Jeobá, nda̱yo̱o̱ kaʼwu rí Jeobá niʼni tsajkurámáanʼxu itháan ki xóo rí nindxa̱ʼwa̱míjna̱xu. Ikhaa kayuʼ xóo bi̱ niʼnirámáʼ Salmo 116, ndaʼyoo rí Jeobá ra̱ʼkhá tháán májánʼ a̱jkiu̱u̱n ga̱jma̱á ni̱ndxu̱ʼ (Sal. 116:7).