Xlakata lu skgalala xwanit Danièle tsekg kiwanilh: «Nialh kalilakgaputsa, antiya unu wilakgolh». Akxni chuna kiwanilh, kxkilhtin hotel tawilachi xputlawkan policías. Alistalh kinkalinkan. Pero kpaxtikatsini pi kimpuskat kiwanilh, chuna tlan kmaxkilh makgapitsi kapsnat chatum tala.

Akxni xakamaw niku xwilakgo policías, klakpuwa: «¡Akgtum tasikulunalin kgalhikan chatum puskat tiku ni pekuan chu tliwakga xtakanajla!». Uma kaj pulaktum la xlilhuwa taʼakglhuwit ktitaxtuw. Pero nakkawaniyan tuku ktlawaw xlakata kkilaw lhuwa países anta niku ni xmastakan talakaskin nalichuwinankan Dios.

Klakachilh kkata 1930 anta kCroix, aktsu kachikin knorte xla Francia. Kifamilia lu x’ankgo ksikulan. Akgatunu semana xakanaw kmisa chu kintlat anta xmakgtayanan. Pero akxni kmakgatsilh akgkutati kata, kakxilhli tuku nitlan xtlawakan ksikulan.

Soldados xalak Alemania akgchipakgolh Francia akxni xlama xliʼAkgtiy Guerra xLikalanka Katiyatni, cura tiku xwi ksikulan niku xakanaw tsukulh tataya limapakgsin nema xkgalhi Vichy, tiku xtatayakgo nazis, kxtaʼakgchuwinkan. Ama taʼakgchuwin lu xkinkamakgapekwanan. Chuna la amakgapitsin franceses, kifamilia tsekg xkgaxmata radio xalak BBC, anta niku xkalichuwinankan soldados. Pero septiembre kata 1944, cura nialh katatayalh tiku xkamakgtaya chu mastalh akgtum taʼakgchuwin xlakata namaxki paxtikatsinit Dios pi soldados tiku xkamakgtayama xtlajanamakgolh. ¡Akit nila xakkanajla! Kintakanajla taxlajwanilh.

Kintlat nilh akxni sputli guerra chu kintala tiku xapuxku, Simone, xtamakgaxtokgnita chu xlama kBélgica. Wa xlakata xaklakpuwan pi xkilakgchan nakkuentajtlawa kintse. Ktekgsli taskujut kʼakgtum empresa niku xliskujkan lhakgat chu xtasiya pi tlan xʼama kinkitaxtuni. Pero kimalana chu xkamanan lu xkanajlakgo tuku xalak sikulan, kaj ni makgas wi tuku tuwa ktsukulh titaxtu.

Kata 1953, Simone milh kinkalakgapaxialhnanan. Xla xtatayana Jehová xlitaxtunit. Liwana kinkalimasiyanin Biblia pi nixaxlikana xlakata pupatin, Trinidad chu xlakata pi wi tuku ni niy akxni wi tiku niy. Kwanilh pi xBiblia ni xalak sikulan, pero kaj ni makgas kkatsilh pi xlikana tuku xkiwanima. Alistalh kiliminilh lhuwa revistas La Atalaya xala makgasa, nema akit lakapala klikgalhtawakgalh katsisni.  Kaj ni makgas titaxtulh kkatsilh pi xaktekgsnit tuku xaxlikana. Pero xakpekuan nakmakgatsankga kintaskujut komo xtatayana Jehová xaklitaxtulh.

Chuntiya kiʼakstu ktsukulh likgalhtawakga Biblia chu revista La Atalaya makgapitsi papaʼ, asta akxni klakpuwa nakan kPukgalhtawakga. Tapaxkit nema kilimasiyanikgolh natalan lakgchalh kinaku. Chatum tala tiku lhuwata kata kskujnanima Jehová kimakgalhtawakgelh akgchaxan papaʼ chu ktamunulh septiembre kata 1954. Chu ni makgas kintse chu kintala nachuna xtatayananin Jehová litaxtukgolh.

Kintse nilh akxni nialh lhuwa semanas xtsankga asamblea internacional nema tlawaka kata 1958 kNueva York, anta niku tlan kkilalh. Akxni ktaspitli kkinchik, nialhtu xaklakgaya taskujut kkifamilia, kmakgxtakgli kintaskujut chu precursor klitaxtulh. Ama kilhtamaku, klakgapasli Danièle Delie, chatum precursora tiku lu xpaxuwa chu alistalh kwanilh pi komo tlan xaktatamakgaxtokgli. Ktamakgaxtokgwi mayo kata 1959.

Danièle xtsukunit skujnani Dios putum kilhtamaku kʼakgtum aktsu kachikin xalak Bretaña, lakgamakgat niku xlakachinit. Xtalakaskin pi ni xpekualh xlakata na lichuwinan Dios kʼama kachikin niku putum católicos xlitaxtukan chu xlakata napulatama xbicicleta. Chuna la akit, nachuna xlakpuwan pi xlakaskinka natalichuwinan tamakatsinin. Kinchatiykan xakkatsiyaw pi xlisputni kakilhtamaku lakapala xʼama chin (Mat. 25:13). Xlakata lu xlakgati kskujnani Jehová, uma kinkamakgtayan nakskujnaniyaw putum kilhtamaku.

Titaxtulh kilhtamaku lata xaktamakgaxtokgnitaw, kinkawanikan pi tlan xakliskujwi la superintendente de circuito. Talakaskilh naklismaniyaw xataktujun naklinaw kilatamatkan. Xapulana congregación nema klakgapaxialhnaw xwi kgalhkutati tiku xlichuwinankgo Dios chu komo natalan ni xkgalhikgo niku tlan xaktamakgxtakgwi, klhtataw kʼakgtum colchón nema wilikgolh kplataforma anta kSalón. Putama tsinu palha xwanit, pero tlan xakjaxaw.

Maski lhuwa tuku xaktlawayaw, Danièle lakapala lismanilh la nalatama. Akxni xakkatatamakxtumi lakgkgolotsin, xla xkinkgalhkgalhi kʼaktsu putlaw nema xakkgalhiyaw chu nitu xwan xlakata anta xtawila. Kaj akgtiy kata kliskujwi xla circuito, pero ama kilhtamaku kkatsiniw pi ktamakgaxtokgat, lu xlakaskinka nalatachuwinankan chu makxtum naskujkan (Ecl. 4:9).

Kkata 1962, kinkamaxkikan akgtum invitación xlakata nakanaw kBrooklyn (Nueva York) xlakata nakanaw kʼEscuela de Galaad clase 37, nema xmakgapala akgkaw papaʼ. Xakwilaw 100 natalan, pero ni putum natalan tlan lakxtum xtanukgo tiku xtamakgaxtokgkgonit. Kaj akgkututu tamakgaxtokgat, tlan lakxtum ktanuw. ¡Akgtum lanka talakgalhaman! Chuntiya kkalakapastaka tiku tliwakga xkgalhikgo xtakanajlakan la komo Frederick Franz, Ulysses Glass chu Alexander Macmillan.

Anta kcurso, lichuwinanka pi lu xlakaskinka kuenta naktlawayaw tuku naʼakxilhaw. Makgapitsi sábados kakgotanun, akxni ksputa curso, xkinkalinkanan  anta niku wi tuku tlan xʼanan kkachikin xla Nueva York. Chu alistalh lunes, xkinkakgalhskinkanan tuku xakakxilhnitaw chu xaktsokgwiliyaw. Lu xaktlakgwanaw akxni xakkitaspitaw, pero tiku xkinkapulalinan xkinkatlawaniyan takgalhskinin xlakata naklakapastakaw tuku tlakg xlakaskinka. Akgtum kilhtamaku sábado, ktlawaw putum kakgotanun kʼuma kachikin. Kkilaw kʼakgtum observatorio, niku kkatsiniw xlakata meteoros chu meteoritos. Chu anta kmuseo niku kinkawanikan la tlan nalakgapasa tantum caimán chu tantum cocodrilo. Akxni xaktaspitmaw kBetel, tiku xkinkapulaliman kinkakgalhskin: «¿Lakapastakatit tuku akgtum meteoro chu akgtum meteorito?». Danièle lu xtlakgwanit chu kgalhtinalh: «Chuna, meteoritos tlakg laklanka kgalhikgo xtatsankan».

Alistalh lu tlan kinkakitaxtunin, akxni sputli curso kinkamalakgachakan ksucursal xla Francia, niku liwakaya 53 kata klakskujmaw. Kkata 1976, kilimapakuwika coordinador xla Comité de Sucursal. Nachuna, lakgachunin xakanaw lakgapaxialhnanaw países xalak África chu Oriente Medio niku ni xmastakan talakaskin nalichuwinankan Dios. Chuna kchaw kGabón, niku ktitaxtuw tuku xapulana kkalitachuwinan. Xlikana pi lakgachunin xakmakgkatsi pi nila xakama tayani. Pero Danièle, ankgalhin kimakgtayalh nakmakgantaxti tuku taskujut xkilakgayawakan.

Lata xapulana, lu klakgatiw la xakwilaw kBetel. Akxni nina xakanaw kGalaad, Danièle kaj akgkitsis papaʼ likatsinilh inglés, chu alistalh, traductora litaxtulh. Lu xaklipaxuwayaw kintaskujutkan kBetel nachuna la xakkataskujaw natalan xalak congregación. Danièle chu akit xaktawakayaw kmetro kParís xlakata xakanaw mastayaw takgalhtawakga xalak Biblia. Klakapastaka pi lu katsisnita xaktaspitaw, xaktlakgwanitaw pero xakpaxuwayaw xlakata xakkamakgtayanitaw latamanin nalakgapaskgo Jehová. Lu nitlan pero Danièle kgalhilh akgtum tajatat nema nialh maxkilh talakaskin tlakg nalichuwinan Dios chuna la xla xlakaskin.

Kkata 1993, wanika pi xkgalhi cáncer de mama. Lu tuwa kitaxtunilh, xlakata chukuka chu tlawanika quimioterapia. Akgkukitsis kata alistalh, Danièle amakgtum kgalhipa cáncer, pero tlakg tliwakga xwanit. Xla lu lanka xtapalh xliʼakxilha taskujut nema xlakgaya la komo traductora, xla lu xliskuja xlakata ankgalhin natlawa xtaskujut akxni tlan tsinu xmakgkatsi xlakata xtajatat.

Lu makgapatinan uma tajatat, pero ni klakpuwaw nakmakgxtakgaw Betel. Xlikana pi komo nakgalhiya tajatat kBetel tuwa kitaxtu, pulaktum xlakata amakgapitsin ni katsikgo komo lu snun tatatlaya (Prov. 14:13). Akxni atsinu ni xmakgatsi 80 kata, Danièle chuntiya lu paxuwa chu uma tlawa pi ni lu namasiya xtajatat. Chu ni kaj xʼakstu lilakgaputsakan, wata lilakgaputsa xlakata nakamakgtaya amakgapitsin. Liwana katsi pi lu tlan tamakgkatsi akxni wi tiku liwana nakgaxmatniyan chu naʼakgatekgsniyan (Prov. 17:17). Ni wamputun pi chatum lu tlan stakyawana litaxtuputun. Wata xla xmakgkatsi pi nakamakgtaya amakgapitsin tuku xtitaxtunit, tiku nakgalhikgo cáncer.

 Nachuna wi atanu tuku nialhla liwana ktlawaw. Akxni Danièle nialhla skujli putum kilhtamaku, putum tuku tlanku xtlawa kilimakgtayalh. Uma kimakgtayalh nakskuja la coordinador xla Comité de Sucursal, 37 kata. Akgtum liʼakxilhtit, liwana xlakkaxwili pi tlan xakwayaw tastunut anta kcuarto chu xakjaxwi tsinu (Prov. 18:22).

Danièle ankgalhin limasiyalh xtapaxuwan chu limasiyalh pi xlatamaputun. Wa xlakata, akxni xlimakgtutu chipalh cáncer, lu nitlan klimakgkatsiw. Akxni tlawanika quimioterapia chu radioterapia lu maxlajwanilh. Nialh lu la xtlawan. Asta nialh lu la xchuwinan. ¡Chu lu tlan traductora litaxtulh! Akxni xakakxilha lu nitlan xaklimakgkatsi.

Lakgachunin xakmakgkatsiyaw pi tajatat xkinkatlajaputunan, pero ankgalhin xaktlawayaw oración. Liwana xakkatsiyaw pi Jehová ni xʼama masta talakaskin pi tlakg xakpatinaw tuku ni xaktayaniw (1 Cor. 10:13). Kliskujwi xlakata ankgalhin lanka xtapalh xakliʼakxilhaw la xkinkakuentajtlawayan xlakata limaklakaskin xTachuwin, makuchinanin xalak Betel chu kifamiliajkan xaʼespiritual.

Akxni ni xakkatsiyaw tuku likuchun xakmakgalhtinaw, xakwaniyaw Jehová pi xkinkamakgtayan. Milh kilhtamaku akxni klakpuwaw pi nialhla tuku naktlawayaw, xlakata Danièle tsukulh makgatsankga xtalakapastakni xlakata quimioterapia. Xmakuchina, tiku puxamatutu kata lata xkuentajtlawama, ni xkatsi tuku xlakata chuna xʼakgspulama chu nialh xkatsi tuku natlawa. Xakmakgkatsiyaw pi niti xkinkatawilan. Wa xlakata ktekgswi chatum oncólogo, tiku xliskuja xlakata nalakputsanani cáncer, chu lu xmakgtayaputun Danièle. Kmakgkatsiw pi Jehová xkinkatawilan.

Xlakata tlan naktayaniyaw taʼakglhuwit, kkatsiniw pi kaj xman xala ama kilhtamaku xaklilakgaputsaw. Chuna la lichuwinalh Jesús: «Akgatunu kilhtamaku kgalhi xta’akglhuwit» (Mat. 6:34). Xlakata ni lu nalilakgaputsaya chu xapaxuwa nawana, nachuna namakgtayayan. Akgtum liʼakxilhtit, akxni Danièle ni makglhtinalh quimioterapia akgtuy papaʼ, xkiwani akxni xlitsin: «¡Lu tlan kmakgkatsi!» (Prov. 17:22). Chu maski lu xkatsani, lu xlakgati xlikilhtli xalaksasti takilhtlin.

Xlakata Danièle lu xpaxuwa kimakgtayanit naktayani tuku tuwa kmakgkatsi. Uma 57 kata lata akxtum xakwilaw, wa ankgalhin kinkuentajtlawalh. ¡Ni xkimasiyaniputun la tsilikan akgtum kgalhwat! Wa xlakata akxni tatatlalh, kkatsinilh la chakgekan pulatu, lhakgat chu la tlawakan liwat nema ni xalaktuwa. Kpakglhi makgapitsi vaso, pero lu kpaxuwa xlakata wi tuku tlan ktlawalh xpalakata. *

Lhuwa tuku kkatsinit xlakata tuku nialhla ktlawa xpalakata tajatat chu linkana kata chuna la Danièle chu akit. Klakpuwan pi ni talakaskin ankgalhin wi tuku natlawaya chu ni nalimaxtuya kilhtamaku xlakata natatawilaya tiku tamakgaxtokga chu nakuentajtlawaya. Xlikana, ankgalhin kalimaxtuw kilhtamaku akxni ni kgalhiyaw tajatat xlakata tlan nakatatawilayaw tiku xalak kifamiliajkan (Ecl. 9:9). Nachuna, komo lu lilakgaputsaya tajatat xala chali chali, max nialh lanka xtapalh katiliʼakxilhti tasikulunalin nema makglhtinanita (Prov. 15:15).

Akxni klilakpuwan tuku ktitaxtuw Danièle chu akit la kskujnaniw Jehová, liwana kakxilhnit putum tasikulunalin nema kinkamaxkinitan Jehová nixawa la xlakpuwanaw. Chuna la tiku tsokgli Salmo 116, kliʼakxilha pi Jehová lu kimasiyaninit xtalakgalhaman (Sal. 116:7).