人物生平
耶和华真系厚待我哋
我同太太丹妮尔啱啱喺酒店登记完,接待员就同我讲:“先生,麻烦你打个电话俾边防警察啦。”几个钟之前,我哋到达西非一个叫加蓬嘅国家。当时系20世纪70年代,耶和华见证人嘅工作喺呢个国家受到禁制。
丹妮尔一向都好机智,佢即刻细细声同我讲:“唔使打电话俾边防警察,佢哋已经到咗嘞。”就喺嗰阵时,有部警车驶埋嚟停喺酒店门口。几分钟之后,我同太太就被拘捕嘞。多得丹妮尔提醒我,等我有机会将啲重要嘅文件交俾另一个弟兄。
警察押送我哋去差馆嘅途中,我谂到自己有个咁勇敢、咁爱上帝嘅太太,真系好大嘅福分。丹妮尔同我经常彼此帮助,互相扶持,今次亦都唔例外。等我话俾你知,点解我哋会去探访嗰啲传道工作受到限制嘅国家。
仁爱嘅耶和华帮助我认识真理
1930年,我喺法国北部一个叫克鲁瓦嘅小镇出世,家人都系好虔诚嘅天主教徒。全家人每个星期都会去做弥撒,爸爸仲好积极参与教会嘅活动。但系,我就快14岁嗰时,有件事令我睇出教会原来好虚伪。
第二次世界大战期间,德军占领咗法国。神父喺教堂讲道嗰时,经常鼓励人支持亲纳粹嘅维希政府,令我哋好反感。同好多法国人一样,我哋偷偷地听BBC电台播放盟军嘅新闻。后来,神父突然改变立场,安排弥撒感谢天主,庆祝对抗纳粹嘅盟军喺1944年9月嘅胜利。睇到神父咁虚伪,我觉得好震惊。呢件事削弱咗我对神职人员嘅信心。
大战结束之后冇几耐,我爸爸就去世嘞。嗰时,我家姐已经结咗婚,住喺比利时,所以我要照顾妈妈。我揾到份唔错嘅工作。老板同佢啲仔都系虔诚嘅天主教徒。喺佢哋间公司打工,虽然睇嚟前程无限,但好快我就要面对一个考验。
我家姐茜薇成为耶和华见证人之后,喺1953年嚟探我哋。佢好熟练噉运用圣经帮我睇出天主教有好多教义都系唔正确嘅,例如地狱永火、三位一体、灵魂不死。起初,我反驳佢,话佢用
嘅唔系天主教圣经。不过,好快我就睇出佢讲嘅系真理。后来,佢拎啲旧嘅《守望台》杂志俾我睇,嗰晚返到睡房我就睇晒啲杂志。我好快睇出耶和华见证人所讲嘅系真理。不过,如果我企喺耶和华嗰边,恐怕就会冇咗份工。有几个月,我继续自己研读圣经同《守望台》嘅文章。最后我决定去王国聚会所参加聚会。会众充满爱心,令我好感动。我同一位好有经验嘅弟兄学习圣经6个月之后,就喺1954年9月受浸。冇几耐之后,我妈妈同细妹都成为耶和华见证人,我真系好开心。
参与全时服务,全心依赖耶和华
1958年,我有机会参加纽约嘅国际大会。但系喺大会之前几个星期,我妈妈就去世。由纽约返嚟之后,我唔使再照顾家人,于是辞职,开始做先驱。后来,我同一位好热心嘅先驱姊妹丹妮尔·德利订婚,之后喺1959年5月结婚。
丹妮尔一开始全时服务,就搬去离屋企好远嘅布列塔尼。嗰度系乡村地方,啲人都虔信天主教,所以佢要有好大勇气先可以喺嗰度传道。佢要踩单车去探访地区嘅人。佢同我一样,深信时势紧急,末日可能好快就会嚟到。(马太福音25:13)我哋能够坚守全时服务嘅岗位,系因为丹妮尔好有自我牺牲嘅精神。
我哋结咗婚几日就收到委派,去做分区探访工作。我哋要适应过简单嘅生活。我哋探访嘅第一群会众有14位传道员。啲弟兄好穷,唔可以请我同太太去佢哋屋企住。于是,佢哋将床褥放喺王国聚会所嘅讲台度,我哋就喺嗰度瞓觉。虽然张床唔系咁舒服,不过对条腰好好!
我哋探访会众嗰时用嘅车
我哋嘅生活好忙碌,但系丹妮尔好快就适应咗探访会众嘅工作。好多时,我突然要同长老开会,噉佢就坐喺架车里面等我,而佢从来都冇埋怨过。我哋只系做咗两年嘅分区探访工作,但系从中学到,夫妻之间要坦诚沟通,彼此帮助,互相扶持。噉样做非常重要。(传道书4:9)
喜获新委派
1962年,我哋受邀请到纽约布鲁克林,参加第37届基列学校,呢一届嘅课程为期10个月。喺接受培训嘅100位学生当中,只有13对夫妇,所以我能够同太太一齐参加,真系好大嘅殊荣。我哋有机会同一啲弟兄交往,佢哋都系信心嘅典范,例如弗德烈克·法兰兹弟兄、尤利塞斯·格拉斯弟兄同埋亚历山大·麦克米伦弟兄。到而家我仲记得呢啲美好嘅回忆。
好开心可以一齐参加基列学校培训
接受培训嗰时,导师鼓励大家要培养善于观察嘅能力。所以,有时星期六下昼上完堂之
后,我哋会去纽约市观光。到咗星期一,导师就会考吓我哋,睇大家记唔记得自己观察到嘅嘢。我哋嘅导游系一位伯特利成员。好多时,星期六傍晚,我哋返到宿舍嘅时候已经攰到不得了。但导游仲会问一啲问题,等我哋记得要点,可以应付测验。有个星期六,我哋喺纽约市行咗成个晏昼,参观咗天文台,了解吓流星同陨石。之后就去美国自然历史博物馆,知道咗短吻鳄同其他鳄鱼有咩分别。返到伯特利之后,导游就问:“流星同陨石有乜嘢分别呀?”丹妮尔好攰,将陨石当成鳄鱼,就答佢话:“哦,陨石啲牙长啲!”去非洲探访忠心嘅弟兄姊妹,我哋真系好高兴
毕业之后,我哋被派去法国分部,真系觉得好意外。我哋喺分部服务咗超过53年。喺1976年,我被委任做分部委员会协调人,同时要去非洲同中东探访嗰啲传道工作受到限制或者禁止嘅国家。有一次,我哋去加蓬,遇到文章开头提到嘅经历。我冇谂过会得到呢啲委派,老实讲,有时我觉得自己能力不足。但系有丹妮尔喺身边支持我,所以我能够完成各种各样嘅委派。
1988年,巴黎举行“上帝的公平”区域大会,我为西奥多·杰拉斯弟兄嘅演讲做传译
一齐面对严峻嘅考验
我哋一入伯特利,就已经好钟意嗰度嘅生活。喺参加基列之前,丹妮尔只系用咗5个月就学识英文。后来,佢帮组织翻译书刊,而且系一位优秀嘅翻译员。喺伯特利工作,令我哋感到心满意足,而参与会众嘅活动,就令我哋喜乐倍增。我仲好记得,有一晚同丹妮尔搭巴黎嘅地铁返伯特利嗰时已经好夜,虽然好攰但系好开心,因为啱啱同一啲进步良好嘅学生讨论完圣经。不过后来,丹妮尔嘅身体突然差咗,虽然佢好想做多啲,但系就力不从心。
喺1993年,医生诊断丹妮尔患咗乳癌。结果佢要接受手术同化疗。喺治疗过程中佢挨咗好多苦。15年之后,医生再次诊断佢患咗癌症,呢次癌细胞扩散得好快。不过佢好钟意做翻译工作,当病情一稳定落嚟,就继续尽力做翻译。
即使丹妮尔要同病魔搏斗,但系我哋从来都冇谂过要离开伯特利。不过继续喺伯特利生活都会有一啲挑战,尤其系有啲弟兄姊妹唔知道丹妮尔嘅病情。(箴言14:13)甚至喺佢七十几岁嘅时候,人哋都睇唔出佢有癌症,因为丹妮尔气质优雅,又有甜美嘅笑容。佢冇觉得自己好可怜,反而仲尽力去帮其他人。佢知道,愿意听人哋嘅心声,会帮助佢哋减轻内心嘅苦楚。(箴言17:17)丹妮尔冇话自己可以俾人专业嘅心理辅导,佢只系同人分享自己嘅经历,帮咗唔少姊妹积极面对癌症。
我哋仲要面对新嘅挑战。后来,丹妮尔唔可以继续全职做翻译工作,于是佢就尽力揾多箴言18:22)
啲方法嚟帮轻吓我。我做咗分部委员会协调人37年,真系多得佢嘅支持。佢的确为我做咗好多嘢。举个例,佢有时会煮好啲午餐,或者去饭堂攞定食物,等我哋可以喺自己间房食,噉就可以每日都一齐放松吓。(应付每日嘅忧虑
丹妮尔一直都系一个非常乐观同热爱生命嘅人。后来佢第三次患上癌症。我哋觉得好无奈。佢接受咗一连串嘅化疗同埋放射治疗,身体变得好虚弱,有时连行路都冇力。我太太曾经系一位优秀嘅翻译员,而家就连讲句话都好辛苦。见到佢噉样,我真系好心痛。
虽然我哋觉得好迷惘,但仲系不断祷告,深信耶和华一定唔会俾我哋受苦超过我哋能够忍受嘅。(哥林多前书10:13)耶和华通过佢嘅话语鼓励我哋,伯特利嘅医护人员悉心照顾我哋,弟兄姊妹满怀爱心噉支持我哋。我同太太真系感激不尽。
我哋经常向耶和华祷告,求佢指引我哋揾到适当嘅治疗方法。有一次,我哋揾唔到任何疗法。每次丹妮尔化疗之后都失去知觉,连治疗咗佢23年嘅医生都解释唔到原因,亦都提供唔到其他治疗方案。所以我哋要自己揾办法,结果会系点真系唔知道。后来,有另一位癌症专科医生同意治疗丹妮尔。我同太太觉得系耶和华打开出路,等我哋可以应付忧虑。
我哋学会每日只系尽力应付当日嘅挑战,噉就能够应付忧虑。耶稣都讲过:“一日嘅烦恼已经够一日担当嘞。”(马太福音6:34)保持积极,培养幽默,都好重要。记得有一次,丹妮尔有两个月唔使做化疗,佢笑笑口噉同我讲:“你睇,我从来都未试过好似而家咁精神呀!”(箴言17:22)虽然佢有病痛,但仲系好钟意满怀信心噉高声练习新嘅王国诗歌。
由于丹妮尔为人乐观,佢鼓励到我积极面对各种挑战。我哋结咗婚57年嘞,坦白讲,我生活上嘅好多方面都系由佢悉心照顾㗎。佢甚至连炒蛋都唔想教我!后来佢嘅病情越来越严重,噉我就要学识洗碗、洗衫同埋煮简单嘅食物。初初,我都打烂咗几只杯㗎。不过,我好高兴可以为佢做翻啲嘢,令佢开心 *。
对耶和华嘅忠贞之爱深怀感激
回顾翻以往,虽然要面对健康同衰老嘅难题,能够做嘅真系好有限,但系我从中学到好多嘢。第一,无论几忙都好,记得要珍惜自己心爱嘅配偶。趁仲有精力,就要把握机会,善用时间去照顾深爱嘅人。(传道书9:9)第二,唔好因为嗰啲唔系咁重要嘅事而过度忧虑。其实我哋每日都享有好多福分,过度忧虑可能就会身在福中不知福。(箴言15:15)
谂翻起同太太一齐从事全时服务嗰段时光,我深知耶和华赐咗好多福分俾我哋,仲超过我哋嘅想象添。同诗篇执笔者一样,我的确感受到“耶和华已经厚待”我嘞。(诗篇116:7)
^ 32段 丹妮尔·博克埃特姊妹喺呢篇文章定稿之前去世,享年78岁。