1, 2. Tano nalifetan no cecay kapah a mitadtad to hakowaay ko taˈangay noka falic no tamdaw.

O CECAY kawcong a kapah ci Toni, mimingho awaayto ko wama. Cowa ka olah a micudad, ciharatengay paseraˈ micudad. Pilipayan i, marariday ci Toni ato widang minengneng to ika. Cowa ko mariˈangay a tamdaw cingra, cowa piselip to etok, edeng awaay ko epoc no tamdaw maˈorip sanay miharateng, cisasaay to iraay ko Kawas materek hokira. Ikor malitemohay ningra ko cecay mararamoday, o Misawacayay Tamdaw ni Yihofa cangra, mihadakan ni Toni ko sasa no falocoˈ i cangraanan. Pafelian noniya mararamoday cingra to tosa kihpicay a cudad—Pipowalan no ˈOrip—Sasimsimen a Lima Salicay ato Namisangaˈan ko ˈorip han?

² Patikol koniya mararamoday mikilim ci Tonian i, masongilaˈay a mafalic ko harateng ningra. Kinapinaay ci Toni a miˈosi toniya tosa cudad, lotlot sanayto koniya cudad. Sowal ningra: “Pakasoˈlinay kako iraay ko Kawas.” Misatapangay cingra minanam to Fangcalay Cudad, palidlid sanay mafalic ko harateng ningra, nao tatiihay a micudaday  malo idahiyayto a micudaday cingra. Mahapinangay no siyawcang ko pifiyor no pihakelongan ci Tonian, fahkaˈay to taˈangay noka falic ningra, sanay ko sowal no siyawcang: “O waywayan ato tingso iso adihayay ko kacakat, o pakayniay i Misawacayay Tamdaw ni Yihofa ko saka haen han?” Hai hananay ningra, misawacayay cingra to siyawcang. Malaˈosiay ko picudad ni Toni to kawcong, anini o misakafahay ato dama a sikawdan cingra. Soˈlin mimingho ci Toni awaayto ko wama, kawra mahemekay cingra nohatini, ira ko tadamaanay a Wama ci Yihofa.—ˈOlic 68:5.

3. Palimoˈotan ni Yihofa ko kapah tamdaw misamaan to demak?

³ Mikitini tinakoan ni Toni mahapinangay ita, tada ciharatengay ci Yihofa to kapah tamdaw. Tokel Ningra to kapah nanay masaloen ko falocoˈ, malaˈosi ko kaˈorip, mansa palimoˈot Cingra tisowanan “haratengen ko misangaˈay tisowanan a Tapang.” (Patnakay 12:1) Itini toniya hekal cowa ko madoloay midofdof toniya limoˈot, kawra oha ngangaˈay a mademak nangra. Kapah tamdaw, ira ko sadama no Kawas tisowanan, oha mamalaˈosi, hanaca cowa ko kakaemangan aca a malaˈosi, oha mamalaˈosi ko hakelong no ˈorip. Dotocto, nengnengen ita ko tosa a tinakoan, o cecay o pilowid no Israil tamdaw to Mikiˈokan a Pala, o roma o noka sasiˈayaw ni Tafiti aci Koliyat.

4, 5. Mikitini pilowid no Israil tamdaw to Mikiˈokan a Pala ato kalalood ni Tafiti aci Koliyat, o mananam ita ko maanan? (Nengnengen ko satapangan coka.)

⁴ Ya mangata tono Israil tamdaw ko Mikiˈokan a Pala i, cowa pisaali ko Kawas cangraanan pacakat to sapilood a ˈicel anca minanam a milood, pasowalay cangraanan midofdof to limoˈot Ningra, mitadiˈec Cingraanan. (Limoˈot 28:1, 2; Yosuwa 1:7-9) Matengil no kalo a tamdaw ko mahaenay limoˈot, cowa ka tatodong wasa miharateng. Kawra misawacayay ko demak to o sangaˈayay a limoˈot konini, samanen padotocan ni Yihofa a pakalowid ko finawlan Ningra to Kanan a tamdaw. (Yosuwa 24:11-13) Tolasen ko sowal, sapidofdofaw to Kawas ira ko pakasoˈlinay falocoˈ wa ngaˈ, o hatiniay a pakasoˈlin cowa ka eca ko papalaˈosi to tamdaw. O cowa ka falic a soˈlinay kimad konini, ngaˈayay saka dademaken anini.

⁵ Nengnengen ita ko tinakoan ni Tafiti. O ˈakawang no ˈada ningra ci Koliyat maedeng 3 a kongce, marocekay ko lafa, adihayay ko milifetan a milood. (1 Samuil 17:4-7) Kawra tosaay aca koni Tafiti a dafong, o sapitekol to fakeloh a rafir ato pakasoˈlinay a falocoˈ to Kawas. Pakaynien i cangoˈotay ko pakasoˈlin a tamdaw, maapaay ci Tafiti, hai saan a malalood ci Koliyatan, kawra tada mararaway ko harateng nangra, samanen mikitini minaroˈan mahapinangay ita, o ci Koliyat ko maapaay.—1 Samuil 17:48-51.

6. Wa milengoho kita to maanan?

⁶ O ˈayaway a lalakaw mitadtaday to sepat papalipahak to kaˈorip iso a pakayraan, misalo to saali noˈadingoan, misawidang to maolahay to Kawas a tamdaw, patireng to ciepocay a patosokan, misalimla to sapafeli no Kawas a pasalat. Milengo kita no hatini toniya sepat a demak, halo misinanot to safalod i ˈOlic saka 16 fedengan.

7. (1) Iraay ko noˈadingoan a harateng a tamdaw, o masamaanay hani? (2) O ‘hafay’ ni Tafiti mahawpay ko maanan? Oniya ‘hafay’ milingatay cingraanan to maanan?

⁷ Pakasoˈlinay to Kawas ko noˈadingoan a tamdaw, hanaca tano harateng no Kawas a minengneng to demak. O mahaenay a tamdaw makahiay micada to sakayat no Kawas, misetek to falocoˈ midofdof Cingraanan. (1 Korinto 2:12, 13) Toniya demak patirengay ci Tafiti to taˈarawan, sanay romadiw cingra: ‘O mililaman ako a hafay ci Yihofa, o makapahay epah i takid ako.’ (ˈOlic 16:5) O misowalan ni Tafiti a ‘hafay’ mahawpay ko tanektekay kalalaˈed ningra ato Kawas, hanaca miceriday cingra pasayra i Kawas milongoc to sadipot. (ˈOlic 16:1) Mihaen to demak ‘palipahakay to fangcalay falocoˈ’ ni Tafiti. Pakayni cingraanan awaay ko mikikakaay ko hemek i piingid to Kawas.—ˈOsien ko ˈOlic 16:9, 11.

8. Misamaan ko demak ngaˈ mamalifok ko soˈlinay a sakaraheker hani?

 ⁸ O misaaretengay to lawla ato hafay a tamdaw, cowa ka tahatanam to lipahak ni Tafiti. (1 Timoti 6:9, 10) O cecay Kanataay a faˈinayan salikaka sanay ko sowal: “O soˈlinay a kasalo, cowa ko malifokay ko maanan, pakayniay pipatafang to dafong no niyah toya pafeliay to makapahay sidaˈit a Kawas.” (Yakop 1:17) Tada matatodongay koniya sowal. Palahad kiso to pakasoˈlin ci Yihofaan ato midoko Cingraanan, wa ciepoc ko kaˈorip, masalo ko falocoˈ. Samaan kiso paˈicel to pakasoˈlinay falocoˈ hani? Palaken ko toki kalacafay to Kawas, miˈosi to Kimad Ningra, mihapinang to misangaˈan Ningra a kihcod, misimsim to makapahay capeling Ningra, mahawpay ko olah Ningra tisowanan.—Loma 1:20; 5:8.

9. Samaan ko demak iso, ngaˈ mahecad ci Tafitian makayat no Kimad no Kawas?

⁹ Latekay mahecaday o wama ko Kawas a misalof kitaanan, pakayni ko paihkal to olah kitaanan. Makahiay ci Tafiti micada to limoˈot no Kawas, sanay ko sowal: “Mipahemek kako to Tapang, nawhani mipasifanaˈ Cingra i takowanan, o dadaya i, mipalal ko ngaˈayay a falocoˈ ako i takowanan a papinaˈon.” (ˈOlic 16:7) Tangongolay ko pisimsim ni Tafiti to harateng no Kawas, micada to sakayat no Kawas, tano harateng Ningra ko pinengneng to demak. Minanam kiso to pidemak ni Tafiti, mamatongal ko kaolah ci Yihofaan, a makalim midofdof to Kawas, matongalho ko katenes i noˈadingoan. Sanay ko sowal ni Keliseting: “Ano micekiw ato midotim to maˈosiay a lalakaw, o pakayniay takowanan ko pitilid ni Yihofa, sanay ko harateng ako!”

10. Pakayni Isaya 26:3 ano ira ko noˈadingoan a harateng wa paira to maanan a haepoc?

¹⁰ Ano pairaan iso ko noˈadingoan a harateng, wa madolo tano harateng no Kawas ko pinengneng toniya hekal atoha noikor no hekal. Patongalen ni Yihofa kiso to sifanaˈ a micalep cipinang to demak, ciharatengay Cingra tisowanan cipinang to, o maanan ko masakalimlaan a demak i nokaˈorip iso, misaˈosi to matatodongay a saˈosi, ato paira to pakasoˈlinay a harateng a mitala toha noikor. (ˈOsien ko Isaya 26:3.) Cecay itiniay Padaka a salikaka ci Yasuwa, o sowal ningra, kedecen mikotod ci Yihofaan, padamaay cingraanan mihapinang to, o maanan ko kalimlaan, o maanan ko cowa ka caloh a demak. O matatodongay ko sowal ningra, o soˈlinay a saka raheker konini!

11. Samaanay ci Tafiti mikilim to ciepocay a widang?

¹¹ ˈOsien ko ˈOlic 16:3. Mafanaˈay ci Tafiti to samaanen mikilim to soˈlinay a widang, ‘mahemekay’ cingra malacafay toya maolahay ci Yihofaan a tamdaw, macacawmaˈ to mahaenay a widang tada mahemekayto ci Tafiti. “O soˈlinay a finawlan no Tapang” sanay ci Tafiti cangraanan, samanen o moecelay ko waywayan nangra. Pakayni mipiliˈ to widang, o roma mitiliday to ˈOlic a tamdaw, mahecaday to harateng ni Tafiti, sowal ningra: “O mangodoay Tisowanan, o midoedoay to rikec Iso a tamdaw i, o widang ako cangra a maemin.” (ˈOlic 119:63) ˈAyaway a lalakaw milengoay to ngaˈay kiso nai mikangodoay ato midoedoay ci Yihofaan a tamdaw a mikilim to sangaˈayay a widang, o hatiniay a widang mahawpay ko cowa ka hecad ko mihecaan a tamdaw.

12. Misamaanay hano tangongolay ko kalawidang ni Tafiti aci Yonatan?

¹² O widang ni Tafiti cowa ko kapah aca. Maharatengayho iso, o cima ko “tadamaan” a tamdaw malo widang ni Tafiti hani? Ci Yonatan. O kalawidang nangra maˈoningay i Fangcalay Cudad, tada fangcalayto. Kawra, mafanaˈay kiso to, o mihecaan ni Yonatan mikikakaay ci Tafitian to 30 miheca han! O kalawidang nangra hano tangongol hani? Samanen, mitiˈeray cangra to Kawas, makakangodo cangra, paihkal to timolo a milood to ˈada no Kawas.—1 Samuil 13:3; 14:13; 17:48-50; 18:1.

13. Sasamaan kita misakakahad to cacawmaˈen a widang hani? Patinakoen.

¹³ Mahecad kita ci Tafitian aci Yonatanan, mararid a micawmaˈ to maolahay ato mitadiˈecay ci Yihofaan a tamdaw, wa milifok to saka raheker. O cecay fafahiyan salikaka ci Cira, halafinayto mihodop  to Kawas cingra, sanay, “Malawidangay kako to icowacowaay pala a salikaka, cowa ka hahecad ko sarengawan ato kalomahadan.” Mahecaday kiso ci Ciraan mifohat to falocoˈ a micawmaˈ to cowa ka lecad a widang, wa maˈaraw ko ˈicel no Kimad ato fangcalay saocor no Kawas, padama to Krisciyang makelec a malacecay.

14. (1) Samaanen iso patireng ko ciepocay a patosokan hani? (2) Pakayni patireng to noˈadingoan patosokan, samaanay ko harateng no roma kapah hani?

¹⁴ ˈOsien ko ˈOlic 16:8. Hakelong no kaˈorip ni Tafiti misarocoday midoko to Kawas. Ano misaaretengan iso ko pidoko ci Yihofaan a demak, ano patireng to patosokan i miharateng to pinengneng ni Yihofa, mihaen o mamasalo ko falocoˈ. O cecay faˈinayan salikaka ci Stifen, sanay ko sowal: “Misaˈicelay kako miliˈay to patosokan, ikor miharateng to hakowaay ko kacakat no niyah, tada masaloay ko harateng.” O cecay kapah a salikaka naitiniay i Towic, ikor malinahay tayra i roma kitakit a matayal, sanay cingra: “Cowa ka kahi kako, matoˈasto mitikol miharateng, ˈarawhan, sahtoay o sakiniyah ko midemakan ako.” Ano mihaenay ko piharateng iso, saka dademaken ko ˈicel ato inaneng iso a paˈdil to Kawas, ato patado to tao a dademak. (Kalatiya 6:10) Kapah tamdaw, patirengen ko noˈadingoan a patosokan, cangacangen ci Yihofa padama tisowanan a miliˈay to patosokan, makahiay Cingra mitengil to hatiniay a satolon.—1 Yohani 3:22; 5:14, 15.

15. Wa ngaˈay kiso patireng to maanan a patosokan hani? (Nengnengen ko sapatongal lalakaw “ Ciepocay a Patosokan.”)

¹⁵ Wa ngaˈay kiso patireng to maanan a patosokan hani? Ngaˈay kiso tano niyah a sowal pacaˈof to salicay i kasaˈopoan, misakafah, tayra i Pitil matayal, anca minanam to roma kitakit a sowal mitosil to ˈalomanay tamdaw. Ci Palake o mieminay to toki a misakafahay a kapah, sanay ko sowal: “Mafanaˈ kako misarocoday to ˈicel dademak ci Yihofaan to romiˈamiˈad tada masaloay, o hatiniay a harateng cowa ko mamalifok i romaroma a tayal.”

16. Samaanay ko pinengneng ni Tafiti to moecelay a palinian ni Yihofa hani? Misamaanay?

¹⁶ ˈOsien ko ˈOlic 16:2, 4. ˈAyaway a lalakaw milengoay to, o moecelay a sarikec ato safalod no Kawas, padama kitaanan maolah to ngaˈayay, miˈinteh to tatiihay, mihaen kita wa milifok to pasalat.  (Amos 5:15) Itini i ˈOlic saka 16 fedengan, misaˈicelay ci Tafiti pasowal to, o kihced a ngaˈayay sahtoay naitiniay ci Yihofaan. O ngaˈayay a waywayan tada o fangcalay a capeling. Misaˈicelay ci Tafiti mitodong a minanam to ngaˈayay no Kawas. ˈIntehay cingra to kaˈintehan no Kawas a demak, mahawpay ko mitaˈongay to samiyay a demak. Ano mitaˈong ko tamdaw to samiyay hato miripaˈay to pising no niyah, ato miˈafasay toha ni Yihofa a ˈodingar.—Isaya 2:8, 9; Taˈarawan 4:11.

17, 18. (1) Maˈaraw ni Tafiti koya mirienangay to mararaway pidoyongan a tamdaw, iraay ko samaanay a teloc nangra hani? (2) Misamaanay hano ‘adihayay ko roray’ no roma tamdaw anini hani?

¹⁷ Itini i lintad no Fangcalay Cudad, o mararaway pihakelongan mahawpay ko kaackan a madadiˈi. (Hosiya 4:13, 14) O hatiniay a pidoko tada mioratay to cowa ka lefot a tamdaw. Kawra, o mararaway pihakelongan cowa pafeli to tamdaw to midaˈocay a lipahak. Sanay ci Tafiti: “Oya mihakelongay a tamdaw to romaroma a kawakawas i, o sakararid nangra a mapades.” O mihakelongay to mararaway pidoyongan a tamdaw sapatoˈaya hananay ko wawa a mipatafang to makaniway kawas. (Isaya 57:5) Tada kaˈintehan ni Yihofa koniya awaay ko siniˈadaay a waywayan! (Yirimiya 7:31) Ano maˈorip kiso toya lintad i, wa tada miakoˈid kiso to wama wina, samanen midokoay a midofdof to sarikec no Kawas cangra.

¹⁸ O aniniay a mararaway pidoyongan pakiyadiay to malafoay madadiˈiay a waywayan, mahawpay ko tongsinlien. Harateng no roma tamdaw o pasalatay a waywayan konini sanay, kawra o kaadayayan a teloc no hatiniay a demak, mikitini lintad no Fangcalay Cudad cowa ka falic tahanini. (1 Korinto 6:18, 19) Mahaen o maˈaraway ita, ‘adihayay ko roray’ no hatiniay a tamdaw. Mihaenay, kapah a tamdaw, tengilen ko sowal no kakarayan a Wama. Pakasoˈlin, midofdof to Kawas pakayni tisowanan, o sangaˈayay. Haratengen, o pidokaˈ no tatiihay demak mataˈlifay ko caay halafin a hemek. (Kalatiya 6:8) Masowalay noniya lalakaw ci Yasuwa, sanay ko sowal: “Ngaˈayay tooren ita ko kaolahan no niyah a misaka dademak to pasalat, kawra ano mikasimaan misaka dademak to pasalat, cowa ko papaira to saka salo no mita.”

19, 20. Ano mitadiˈec ato midoedo to Kawas ko kapah, wa milifok to maanan a saka raheker hani?

¹⁹ Pasowalan ni Yis ko nisawawaan: ‘Ano micerid kamo midofdof to sowal ako, o soˈlinayto a nisawawaan ako. Wa mafanaˈ kamo to soˈlinay kimad, wa pasalaten no soˈlinay kimad kamo.’ (Yohani 8:31, 32) O hatiniay pasalat paliyasay to pipalit no mararaway pidoyongan, mafolaay, paysinay, saikor wa malifok no tamdaw ko ‘ˈodingaray a pasalat no wawa no Kawas.’ (Loma 8:21) Ano aninito, ‘micerid midofdof’ kiso to sowal ni Kristo, wa matanam ko hatiniay a pasalat. Mihaen wa ‘mafanaˈ to soˈlinay kimad’ kiso, cowa ko cipinang aca to soˈlinay kimad, wa saka dademakenho ko soˈlinay kimad.

²⁰ Kapah tamdaw, salimlaen ko sapafeli no Kawas kisowanan a pasalat. Ngaˈay ko pisaka dademak iso toniya pasalat, patireng to ngaˈayay taˈenengan toha noikor. O cecay kapah salikaka sanay ko sowal: “Ngaˈay ko pisaka dademak to pasalat i kaemangan, ano maraod ko pisaˈosian to kalimlaan a demak i, wa ira ko sapadama to niyah, tinakoen mikilim to matatodongay hatayal, anca misaˈosi to caciraramod anca padotoc a caka ciraramod to cecay liyad.”

21. Samaan kiso midemak ngaˈ, mamalifok ko “soˈlinay a ˈorip” hani?

²¹ Toniya hekal anini, o ngaˈayay a romiˈad hananay no tamdaw, ono cecayay aca liyad. Awaay ko pinang ita to sasamaan no cira. (Yakop 4:13, 14) Mihaenay, materek i “soˈlinay a ˈorip” a lalan, pasayra i tahadaˈocay ˈorip a talaˈayaw, o sangaˈayay a mipiliˈan. (1 Timoti 6:19) Cowa ka pacieci ko Kawas to tamdaw a romakat toniya lalan, paiken sanay kitaanan o niyah ko misaˈosi to sasamaan ko demak. Sasamaan ko hademak ita hani? Malo ‘hafay’ no miso ci Yihofa, misalimla to sapafeli Ningra tisowanan adihayay ‘makapahay dafong’. (ˈOlic 103:5) Pakasoˈlinen, o papafelien Ningra kiso to ‘masaloay a lipahak’, padama tisowanan ‘ira ko midaˈocay a saka raheker.’—ˈOlic 16:11.