1, 2. Paano ginapakita sang eksperiensia ni Tony nga puede makahimo sang mga pagbag-o sa kabuhi?

ANG estudyante nga si Tony wala na gana mag-eskwela kag indi niya gusto pagtapuson ang hayskul. Nagdaku sia nga wala sing amay nga nagaatipan sa iya. Kon Sabado kag Domingo nagatan-aw sia sang sine ukon nagaupod sa iya mga abyan. Indi sia bayolente, kag indi man sia adik. Pero wala sia sing plano sa iya kabuhi. Kag nagaduhaduha sia kon bala matuod nga may Dios. Dayon may naistorya sia nga mag-asawa nga Saksi kag ginsabat nila ang iya mga ginaduhaduhaan kag mga pamangkot. Ginhatagan nila si Tony sang duha ka brosyur nga The Origin of Life—Five Questions Worth Asking kag Gintuga Bala ang Kabuhi?

² Pagbalik sang mag-asawa, nagbag-o na ang panimuot ni Tony. Gintun-an niya sing maayo ang mga brosyur amo nga ukot na ini kag nagapililo ang punta. “Indi puede nga wala sing Dios,” siling niya. Nagtuon sia sa Biblia, kag amat-amat nga nagbag-o ang iya pagtamod sa kabuhi. Indi sia sadto maayo nga estudyante sa eskwelahan, pero subong isa na sia sa pinakamaayo nga estudyante. Nabal-an ini sang prinsipal kag nagdayaw gid sia. Nagsiling ang prinsipal kay Tony: “Daku gid ang pagbag-o sa imo batasan kag nagtaas ang imo mga grado. Bangod bala ini sa imo pagpakig-upod sa mga Saksi ni  Jehova?” Nagsabat si Tony nga huo kag dayon ginpanaksihan niya sia. Natapos niya ang hayskul kag subong isa na sia ka regular payunir kag ministeryal nga alagad. Nalipay man sia nga may mapinalanggaon na sia nga Amay, si Jehova.—Sal. 68:5.

3. Ano ang ginalaygay ni Jehova sa mga pamatan-on?

³ Ang eksperiensia ni Tony nagapakita nga interesado gid si Jehova sa inyo nga mga pamatan-on. Gusto niya nga mangin madinalag-on kamo kag mangin malipayon ang inyo kabuhi. Naglaygay sia: “Dumduma ang imo Daku nga Manunuga sa mga adlaw sang imo pagkapamatan-on.” (Man. 12:1) Indi ini pirme mahapos himuon. Pero, indi ini imposible. Sa bulig sang Dios, mangin madinalag-on kamo, indi lang sa inyo pagkapamatan-on kundi sa inyo bug-os nga kabuhi. Para mahangpan naton ini sing maayo, binagbinagon naton kon ano ang matun-an naton sa pagsakop sang mga Israelinhon sa Ginsaad nga Duta kag sa pagpakig-away ni David kay Goliat.

4, 5. Ano ang matun-an naton sa pagsakop sang mga Israelinhon sa Canaan kag sa pagpakig-away ni David kay Goliat? (Tan-awa ang mga piktyur sa umpisa sini nga artikulo.)

⁴ Sang malapit na ang mga Israelinhon sa Ginsaad nga Duta, wala magsugo ang Dios nga maghanas sila sa pagpakig-away. (Deut. 28:1, 2) Sa baylo, nagsiling sia nga dapat nila tumanon ang iya mga sugo kag magsalig sa iya. (Jos. 1:7-9) Kon sa tawo lang, daw indi nagakaigo ini nga laygay! Pero amo ini ang pinakamaayo nga laygay, bangod sunodsunod nga ginpadaug ni Jehova ang iya katawhan batok sa mga Canaanhon. (Jos. 24:11-13) Kinahanglan gid ang pagtuo para tumanon ang Dios, pero ini nga pagtuo amo pirme ang nagahatag sang kadalag-an. Matuod ini sang una kag amo man sa aton subong.

⁵ Ang maisog nga soldado nga si Goliat nagataas sing mga tatlo ka metro kag kompleto sa hinganib. (1 Sam. 17:4-7) Labyog lang ang dala ni David pero may pagtuo sia sa iya Dios, si Jehova. Para sa mga tawo nga wala sing pagtuo, daw indi maalamon si David. Pero nagsala gid sila! Si Goliat ang indi maalamon.—1 Sam. 17:48-51.

6. Ano ang binagbinagon naton sa sini nga artikulo?

⁶ Sa nagligad nga artikulo ginbinagbinag naton ang apat ka butang nga makapahalipay sa aton kag makahatag sang kadalag-an sa aton kabuhi. Amo ini ang paghunahuna sa aton espirituwal nga kinahanglanon, pagpili sang mga abyan nga nagahigugma sa Dios, paghimo sang mapuslanon nga mga tulumuron, kag pagpabalor sa ginhatag sang Dios nga kahilwayan. Sa sini nga artikulo, binagbinagon naton ini sing maayo. Para mahimo ini, usisaon naton ang pila ka prinsipio nga makita sa Salmo 16.

7. (a) Paano mo ilaragway ang mahunahunaon sa espirituwal nga tawo? (b) Ano ang “bahin” ni David, kag paano ini nakaapekto sa iya?

⁷ Ang espirituwal nga tawo nagatuo sa Dios kag nagailog sa pagtamod sang Dios. Nagapatuytoy sia sa Dios kag nagatuman sa iya. (1 Cor. 2:12, 13) Si David ang isa ka maayo nga halimbawa. Sia nag-amba: “Si Jehova amo ang akon bahin, ang akon palanublion, kag ang akon kopa.” (Sal. 16:5) Ini nga “bahin” nagalakip sang iya maayo nga kaangtanan sa Dios, nga iya ginadangpan. (Sal. 16:1) Ano ang resulta? “Malipayon ako,” sulat niya. Wala na sing makapahalipay kay David sangsa iya suod nga pagpakig-abyan sa Dios.—Basaha ang Salmo 16:9, 11.

8. Ano ang pila ka butang nga makapahalipay sa imo?

⁸ Ang mga tawo nga nagapokus sa kuarta ukon sa kinasadya indi makabatyag sang kalipay nga ginbatyag ni David. (1 Tim. 6:9, 10) Ang utod nga lalaki sa Canada nagsiling: “Ang matuod nga kalipay wala nagadepende sa aton  ginabaton, kundi sa aton ginahatag sa Manughatag sang maayo nga regalo, si Jehova nga Dios.” (Sant. 1:17) Kon pabakuron mo ang imo pagtuo kay Jehova kag mag-alagad sa iya, mangin malipayon gid ang imo kabuhi. Paano mo mapabakod ang imo pagtuo? Dapat nga may tion ka para kay Jehova paagi sa pagbasa sang iya Pulong, pagtuon sa iya mga tinuga, kag pagpamalandong sa iya mga kinaiya, lakip ang iya gugma sa imo.—Roma 1:20; 5:8.

9. Pareho kay David, paano ka makapadihon sa Pulong sang Dios?

⁹ Kon kaisa ginapakita sang Dios ang iya gugma paagi sa pagtadlong sa aton pareho sang ginahimo sang isa ka amay. Ginpabaloran ni David ini nga pagtadlong. Sia nagsiling: “Dayawon ko si Jehova, nga naghatag sa akon sing laygay. Bisan sa tion sang kagab-ihon, ginatadlong sini ang akon pinakamadalom nga panghunahuna.” (Sal. 16:7) Ginpamalandungan niya ang panghunahuna sang Dios, gin-aplikar ini kag gintugutan niya nga dihunon sia sini. Kon himuon mo man ini, magabakod ang imo gugma sa Dios kag ang imo handum nga tumanon sia, kag mangin hamtong ka sa espirituwal. Ang utod nga babayi nga si Christin nagsiling, “Kon naga-research ako kag nagapamalandong sa akon ginabasa, pamatyag ko ginpasulat ini ni Jehova para sa akon!”

10. Suno sa Isaias 26:3, ano ang mga benepisyo kon mahunahunaon ka sa espirituwal?

¹⁰ Kon mahunahunaon ka sa espirituwal, mabuligan ka sini nga tamdon ang kalibutan kag ang madangatan sini suno sa pagtamod sang Dios. Ginhatagan ka ni Jehova sining tumalagsahon nga kaalam kag paghangop. Ngaa? Gusto niya nga maghimo ka sing mga prioridad sa imo kabuhi, maghimo sang maalamon nga desisyon, kag atubangon ang palaabuton nga may kaisog! (Basaha ang Isaias 26:3.) Ang utod nga lalaki nga si Joshua nga nagaistar sa Estados Unidos, nagsiling nga kon nagapakigsuod ka kay Jehova, mahibaluan mo kon ano ang importante kag indi importante. Matuod gid ini kag makahatag sing kalipay!

11. Paano ginpili ni David ang iya nga mga abyan?

¹¹ Basaha ang Salmo 16:3. Nahibaluan ni David kon paano makakita sang matuod nga mga abyan. “Daku nga kalipay” ang iya nabatyagan bangod kaupod niya ang mga nagapalangga kay Jehova. Ginlaragway sila nga “mga balaan,” bangod matarong sila kag matinlo sa moral. Amo man sini ang ginbatyag sang isa pa ka salmista parte sa pagpili sang mga abyan. Sia nagsulat: “Abyan ako sang tanan nga nagakahadlok sa imo kag sang mga nagatuman sang imo mga mando.” (Sal. 119:63) Ginbinagbinag sa nagligad nga artikulo nga makakita ka man sang madamo nga maayo nga abyan sa mga nagapalangga kag nagatuman kay Jehova. Indi kinahanglan nga pareho sa imo edad ang imo abyan.

12. Ngaa nangin suod gid nga mag-abyan sanday David kag Jonatan?

¹² Wala lang nagpili si David sang mga abyan sa pareho niya sing edad. Nadumduman mo bala ang isa nga “halangdon” nga nangin suod nga abyan ni David? Sia si Jonatan. Ang matuod, ang ila pag-abyanay isa sa pinakadalayawon nga pag-abyanay sa Kasulatan. Pero, nahibaluan mo bala nga mas magulang si Jonatan sing mga 30 ka tuig kay David? Gani, ngaa nangin suod gid sila nga mag-abyan? Bangod nagatuo sila sa Dios, ginarespeto nila ang kada isa, kag ginapabaloran nila ang maayo nga mga kinaiya sang kada isa pareho sang kaisog nga ginpakita nila sang nagpakig-away sila sa mga kaaway sang Dios.—1 Sam. 13:3; 14:13; 17:48-50; 18:1.

13. Paano mo madugangan ang imo mga abyan? Maghatag sing halimbawa.

¹³ Pareho kanday David kag Jonatan, “daku nga kalipay” ang aton mabatyagan kon abyan naton ang mga nagapalangga kag nagatuo kay Jehova. Si Kiera nga tinuig na nga nagaalagad sa Dios, nagsiling, “Nakig-abyan ako sa mga tawo nga naghalin sa iban nga pungsod, kag lainlain ang gindak-an kag kultura.” Kon  himuon mo man ini, makita mo nga ang Biblia kag ang balaan nga espiritu nagapahiusa sa aton.

14. (a) Ano ang makabulig sa imo para makahimo sang mapuslanon nga mga tulumuron? (b) Ano ang ginsiling sang iban nga mga pamatan-on parte sa paghimo sang espirituwal nga mga tulumuron?

¹⁴ Basaha ang Salmo 16:8. Nagpokus si David sa pag-alagad sa Dios. Mangin malipayon ka man kon magpokus ka sa pag-alagad kay Jehova kag kon ilakip mo sia sa imo mga tulumuron. Ang utod nga lalaki nga si Steven nagsiling, “Nalipay gid ako kon ginapamensar ko kon paano ko nalab-ot ang akon mga tulumuron.” Ang pamatan-on nga utod nga lalaki sa Germany nga nagaalagad subong sa iban nga pungsod nagsiling, “Kon magtigulang na ako, indi ko gusto pamensaron nga ang tanan ko nga ginhimo para lang sa akon.” Amo man bala sini ang imo ginabatyag? Kon huo, gamita ang imo mga ikasarang kag talento para padunggan ang Dios kag para buligan ang iban. (Gal. 6:10) Maghimo sang espirituwal nga mga tulumuron, kag mangamuyo nga buligan ka ni Jehova nga lab-uton ini. Nalipay sia nga sabton ang imo pangamuyo.—1 Juan 3:22; 5:14, 15.

15. Ano nga mga tulumuron ang puede mo himuon? (Tan-awa ang kahon nga “ Mga Tulumuron nga Puede Mo Himuon.”)

¹⁵ Ano nga mga tulumuron ang puede mo himuon? Halimbawa, ang pagkomento sa mga miting sa imo kaugalingon nga mga tinaga, pagregular payunir, ukon pag-alagad sa Bethel. Puede man ang pagtuon sang iban nga lenguahe para makaalagad sa kongregasyon nga lain ang lenguahe. Ang pamatan-on nga si Barak nga nagaalagad sing bug-os tion, nagsiling, “Kanami sang akon pamatyag kon magbugtaw ako kada adlaw kay ginahimo ko ang akon bug-os nga masarangan para kay Jehova. Indi ko ini mabatyagan sa iban nga hilikuton.”

16. Ano ang ginbatyag ni David sa matarong nga mga kasuguan kag mga prinsipio ni Jehova, kag ngaa?

¹⁶ Basaha ang Salmo 16:2, 4. Natun-an naton sa nagligad nga artikulo nga ang matarong nga mga kasuguan kag mga prinsipio sang Dios nagahilway sa aton kag nagabulig sa aton nga higugmaon ang maayo kag dumtan ang  malain. (Amos 5:15) Nagsiling si David nga si Jehova amo ang “Tuburan sang kaayo.” Ang kaayo nagapatuhoy sa dalayawon nga pamatasan kag paggawi. Ginpanikasugan gid ni David nga ilugon ang Dios kag higugmaon ang ginahigugma ni Jehova. Gindumtan man ni David ang malain sa panulok sang Dios. Nalakip sa sini ang idolatriya, isa ka buhat nga nagapakanubo sa mga tawo kag ginakuha sini ang himaya nga para lang kay Jehova.—Isa. 2:8, 9; Bug. 4:11.

17, 18. (a) Ano ang ginsiling ni David nga resulta sang butig nga pagsimba? (b) Ngaa ‘nagdamo ang kasubo’ sang mga tawo subong?

¹⁷ Sang panahon sang Biblia, ang butig nga pagsimba masami nga nagalakip sang seksuwal nga imoralidad. (Os. 4:13, 14) Gusto sang madamo nga tawo ini nga pagsimba kay nanamian sila sang imoral nga mga buhat. Pero nangin malipayon bala sila? Wala gid! ‘Ginpadamo sang mga nagaalagad sa iban nga mga dios ang ila kasubo,’ siling ni David. Ginhalad pa gani nila ang ila mga anak sa butig nga mga dios! (Isa. 57:5) Ginakangil-aran gid ni Jehova ini nga kapintas. (Jer. 7:31) Kon nagakabuhi ka sadto, sigurado nga malipay ka gid kon ang imo mga ginikanan nagaalagad kag nagatuman kay Jehova.

¹⁸ Subong, ang butig nga pagsimba masami nga nagakunsinti sang seksuwal nga imoralidad, lakip ang homoseksuwalidad. Para sa mga tawo, nagahatag ini sang kahilwayan. Pero ang resulta sini nga mga buhat wala magbag-o halin sang panahon sang Biblia. (1 Cor. 6:18, 19) Pareho sa imo makita, ‘ginapadamo nila ang ila kasubo.’ Gani mga pamatan-on, pamatii ang inyo Amay sa langit. Mangin kumbinsido nga para sa imo kaayuhan ang pagtuman sa Dios. Hunahunaa ang malain nga resulta sang imoralidad. Mas daku ang halit sini sangsa temporaryo nga kalipay. (Gal. 6:8) Si Joshua, nga ginsambit kaina, nagsiling, “May kahilwayan kita nga himuon ang gusto naton, pero kon gamiton naton ini sa indi nagakaigo, indi gid kita mangin malipayon.”

19, 20. Ano nga mga pagpakamaayo ang mabaton sang mga pamatan-on nga nagatuo kag nagatuman kay Jehova?

¹⁹ Nagsiling si Jesus sa iya mga sumulunod: “Kon ginatuman ninyo pirme ang akon ginatudlo, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.” (Juan 8:31, 32) Nalakip sa sini ang kahilwayan sa butig nga relihion, kakulang sing kaalam, kag disparatis. Sa palaabuton, malakip sa sini ang “mahimayaon nga kahilwayan sang mga anak sang Dios.” (Roma 8:21) Bisan subong pa lang maeksperiensiahan naton ini nga kahilwayan paagi sa ‘pagtuman pirme sa ginatudlo sang Cristo.’ Paagi sini, “mahibaluan [naton] ang kamatuoran” indi lang paagi sa pagtuon kundi pati man sa pag-aplikar sini.

²⁰ Mga pamatan-on, pabalori ang kahilwayan nga ginhatag sang Dios sa inyo. Gamita ini sing maayo, kag makabulig ini sa inyo sa paghimo sang mga desisyon nga makahatag sa inyo sang maayo nga palaabuton. Ang pamatan-on nga utod nga lalaki nagsiling: “Bilang pamatan-on, ang paggamit sing maayo sa kahilwayan makabulig sa paghimo sang mga desisyon sa ulihi, pareho sa pagpangita sang obra ukon sa pagdesisyon nga magminyo ukon indi lang anay.”

21. Paano ka makapabilin sa dalan nga nagapadulong sa “matuod nga kabuhi”?

²¹ Sa sining daan nga sistema, bisan pa ang ginasiling sang mga tawo nga maayo nga kabuhi malip-ot lang. Wala kita kabalo kon ano ang matabo buas. (Sant. 4:13, 14) Gani, ang pinakamaayo nga himuon amo ang pagpabilin sa dalan nga nagapadulong sa “matuod nga kabuhi” nga amo ang kabuhi nga wala sing katapusan. (1 Tim. 6:19) Siempre, wala kita ginapilit sang Dios nga himuon ini. Nagadepende ini sa aton. Himua si Jehova nga imo “bahin.” Pabalori ang madamo nga “maayo nga mga butang” nga ginhatag niya sa imo. (Sal. 103:5) Kag magtuo nga mahatag niya ang “tuman nga kasadya” kag ‘wala sing katapusan nga kalipay.’—Sal. 16:11.