1, 2. Kunnasi ipasingan na ekspiriensa ni Tony nga posible i manguli ta pattolay?

ZIMINAKAL si Tony nga awan tu yamana. Estudiante yayya ta hayskul, ngem ari kuruga interesadu nga magiskuela. Kakuruganna, nononopanna i magimmang ta eskuela. Ari yayya nga vayolente anna ari gapa nga drug addict. Awan laman talaga tu direksion na pattolena. Ari gapa yayya siguradu nu egga i Dios. Tapus nakasimmu yayya tu dua nga Saksi anna kinagina nira nga duda yayya nga egga i Dios. Nipalimada sa i dua nga brosiur​—i The Origin of Life—​Five Questions Worth Asking anna i Was Life Created?

² Ta panoli na magatawa, talaga nanguli ngana si Tony. Ginigiammuna tu mapia i dua nga brosiur, yari tu nakupu-kupil anna nakumu-kumal danatun. “Egga talaga i Dios,” kunna. Inalawana i paggigiammu tu Biblia, anna sisinu nga nanguli i pagimammana ta pattolay. Nige ni Tony nga nab-Bible study, talakag yayya nga estudiante, ngem nabbalin yayya tu tadday ta pinaka-bright ta eskuela. Maski i prinsipal ay nakaddag. “Talaga daka-dakal i nangulian na ugali anna gradum ira,” kunna. “Megafu kari yatun ta pakikavulu mu ta Saksi ira ni Jehova?” Minanugu si Tony anna nilayyagayyanna i prinsipal. Naggradua yayya ta hayskul anna regular  payunir anna ministerial nga aripan ngana ta maddaggun. Magayayya ngana gapa yayya megafu ta napeggan yayya tu meddu nga Yama, si Jehova.​—Sal. 68:5.

3. Anni i nitabarang ni Jehova ta kabataan ira?

³ Iperaddam nittam na ekspiriensa ni Tony nga talaga ikavurungan ni Jehova sikamu nga kabataan. Kayàna nga mapeggakkamu tu makapagayayya anna makakontentu nga pattolay. Yari tu nitabaranna nikamu: “Daddammammu . . . i Kadakallan nga Namaratu nikaw ta aggaw ira na kabataammu.” (Ecl. 12:1) Ta maddaggun, ari alistu nga kuan yatun. Ngem, ari gapa tu imposible. Gukaban na uffun ni Jehova, makapavviktoria ka, ari laman ta tiempo na kabataammu, nu ari, ta interu pattolem. Tapenu mas malippawa yatun, ikonsidera tam i leksion nga mala ta passakup na Israelita ira ta Nepromesa nga Davvun anna ta pinangarubang ni David kani Goliat.

4, 5. Anni nga leksion i mala tam ta passakup na Israelita ira ta Canaan anna ta pinangarubang ni David kani Goliat? (Innan i letratu ira ta gafu na artikulo.)

⁴ Tagga ta aranni ngana i Israelita ira ta Nepromesa nga Davvun, anni i instruksion nira ni Jehova? Kinagina kari nira nga mabbalin tu mas malalaki nga suddalu anna magensayu para ta gerra? Ari! (Deut. 28:1, 2) Kinagina lallagu nira nga mawag tu tuttuladda i bili-bilinna anna mattalo nisa. (Jos. 1:7-9) Ta pagimamma na tolay, awan tu serbi natun nga tabarang! Ngem yatun i kapianan nga tabarang, megafu ta namippiga nga pinavviktoria ni Jehova i ilina kontra ta Canaanita ira. (Jos. 24:11-13) Wan, mawag i pangurug tapenu matuttul i Dios, ngem yatun nga pangurug ay kanayun nga marresulta tu viktoria. Ari nanguli yaw nga kinakurug ta pappasa na tiempo. Kurug lagapa yaw adde ta maddaggun.

⁵ Si Goliat ay malalaki nga suddalu. Maggi tres metros i katannanna anna konsu armas. (1 Sam. 17:4-7) Ngem dua i egga kani David: palsi anna pangurug ta Diosna nga si Jehova. Para ta awan tu pangurugda, gittana maguyung si David. Ngem mali ira! Si Goliat i kurug nga maguyung.​—1 Sam. 17:48-51.

6. Anni i ikonsidera tam?

⁶ Nikonsidera na nappasa nga artikulo i appa nga gannug nga mamagayayya anna mamavviktoria ta pattolay. Kasali tatun i pamannu ta espiritual nga pakawagan, pangappresia ta kokkofun nga niyawa na Dios, kapeggan tu kakastan ira nga addetan, anna pattagibalor ta kapalubbattam bilang ili na Dios. Mas nga gigiammuattam danaw nga topiko, ikonsidera tam sangawe i karuan nga prinsipio nga malegan ta Salmo 16.

7. (a) Anni i espiritual nga tolay? (b) Anni i ‘parte’ ni David, anna anni efekto natun nisa?

⁷ I espiritual nga tolay ay mangurug ta Dios anna imammatanna i ganna-gannug nga kunna Dios. Mappegiya yayya ta Dios anna determinadu nga tuttulan yayya. (1 Cor. 2:12, 13) Makasta nga ehemplo tatun si David. Nikansionna: “Si Jehova i partè, i nesina nga billè, anna i kopà.” (Sal. 16:5, NW) Nelagum tatun nga ‘parte’ i madukko nga relasion ni David ta Dios, nga nakiyegutanna. (Sal. 16:1) Anni i efektona nisa? Niturana: “Yatun tu mabbala-balo ngà anna mammula-mugang” onu magayayya. Wan, awan ngana tu mas namagayayya kani David anne ta madukko nga relasionna kani Jehova.​—Bibbigan i Salmo 16:9, 11.

8. Anni i gannug ira nga kurug nga mamagayayya ta pattolay?

⁸ I pagayayya nga naekspiriensa ni David ay ari megafu ta nakasentro i pattolena ta pappaga-pagayayya anna ta kuartu. (1 Tim. 6:9, 10) “I kurug nga pagayayya,” kunna brother nga taga-Canada, “ay maggafu, ari tu ta mala tam nga pammakapian ta pattolay,  nu ari, ta pangiyawa tam ta Minangngiyawa ta kada mapia nga regalu, kani Jehova nga Dios.” (Sant. 1:17) Wan, i pangultiba ta pangurug kani Jehova anna passerbi sa i mangiyawa tu gakkag anna pakkakontentu ta pattolem. Kunnasim mapadakal i pangurug mu? Mawag nga egga i tiempom kani Jehova gukaban na pabbibbig tu Uvovugna, pangobserba ta makkarasta nga pinaratuna, pannono ta kualidadna ira, nelagum ngana i ayana nikaw.​—Roma 1:20; 5:8.

9. Gitta ni David, kunnasim ipamavulun nga moldeyan naka na Uvovug na Dios?

⁹ Nu mittan ipasingan na Dios i ayana nittam gukaban na panunung nittam nu kawagan, gittana meddu nga yama. Tinagibalor ni David i kunnatun nga tabarang. Kunna: “Daya-rayawak-ku i YAFU gafu ta irolluan nà, nu ta gabi i nono ku ay tabarangngan nà.” (Sal. 16:7) Wan, pinannonopanna tu mapia i appanono na Dios, pinabbalinna tu kunnatun gapa i appanonona. Nipamavulunna nga moldeyan yayya na Dios, nga pinagurayanna nga ulian yayya na Dios tapenu mabbalin yayya tu mas mapia nga tolay. Nu kunna i kuammu, dumakal i aya mu ta Dios anna i pakkaraga mu nga tuttulan yayya. Mammanakam anna maponag i espiritualidad mu. Kunna sister nga si Christin, “Nu marresearch ngà anna monag nga pannonopakku i nabibbig ku, matageno ku nga gittana nipetura talaga ni Jehova yaw para niò!”

10. Gitta na mabibbig ta Isaias 26:3, anni i bentaha ira nu sigga-nono ka ta espiritual?

¹⁰ Nu sigga-nono ka ta espiritual, masifutammu i mundo anna i pappangetanna segun ta paningan na Dios. Iddan naka ni Jehova tu kappabbaw nga pakannammu anna pakalippawa. Ngatta? Kayàna nga mapeggakka tu manawag ira nga prayoridad ta pattolem, makapaddesision tu masirib, anna sigga-komfiansa nga magiddanama ta mappange! (Bibbigan i Isaias 26:3.) Kinagi na brother nga taga-United States nga si Joshua, “Nu kanayukka nga madukko kani Jehova, maayus ngamin nga gannug.” Talaga kurug anna makapagayayya yatun!

11. Anni i kinagi ni David nga sekreto ta pagaleg tu kurug nga kokkofun?

¹¹ Bibbigan i Salmo 16:3. Ammu ni David i sekreto ta pagaleg tu kurug nga kokkofun. Kinofunna danuri mangaya kani Jehova, anna yatun ay ‘kuruga namagayayya’ sa. Tinukoyna ira bilang “mekatalo ira,” [“masanto,” NW] megafu ta marenu ira ta moral anna matunung. Kunnatun gapa i natageno na tadday paga nga salmista meyannung ta kokkofunna. Niturana: “Ngamin i masserbi nikaw ay kofuk-ku, ngamin danuri i mamarulo ta dorob mu.” (Sal. 119:63) Gitta na nagigiammu tam ta nappasa nga artikulo, makaleg ka gapa tu aru nga mapia nga kokkofun turi ira ta maganassing anna mamarulo kani Jehova. Siempre, ari tu limitadu laman ta ka-edad mu i kokkofummu.

12. Anni i fundasion na pakkofun da David anna Jonatan?

¹² Ari laman nilimitan ni David i kokkofun ta kasiddagunanna. Kilalam kari i tadday ta madukko nga kofun ni David? I ngaganna ay Jonatan. Kakuruganna, i pakkofudda i tadday ta kakastan nga nerekord ta Katurakan. Ngem, ammum kari, nga mas kaka tu mattrenta dagun si Jonatan kani David? Anni gafu i fundasion na pakkofudda? Pangurug ta Dios, respeto ta kataggi-tadday anna paningan ta gutuda turi ta nilabanadda i kalaban ira na Dios.​—1 Sam. 13:3; 14:13; 17:48-50; 18:1.

13. Kunnasi ka mapeggan tu mas aru nga kokkofun? Mangistoria tu ekspiriensa.

¹³ Kagitta ni David anni Jonatan, ‘kuruga magayayya’ ittam gapa nga ayatan danuri mangiddu kani Jehova anna mangipasingan tu pangurugda sa. Kinagi ni sister Kiera nga piga dagun ngana nga massesserbi ta Dios, “Aru i nalegakku nga kofun ta interu mundo anna nadduruma i naggafuan anna kulturada.”  Nu kunnatun i kuammu, mapakurug mu nu kunnasi ittam pattaraddayan na Biblia anna na masanto nga espiritu bilang interu-mundo nga familia nga maddayarayaw.

14. (a) Kunnasi ka mapeggan tu makapagayayya ira nga addetan? (b) Anni i natageno na karuan nga kabataan ta kapeggan tu espiritual ira nga addetan?

¹⁴ Bibbigan i Salmo 16:8. Nakafokus i pattolay ni David ta passerbi ta Dios. Makapagayayya ka gapa ta kurug nga makakontentu nga pattolay nu pagolluammu i passerbi kani Jehova anna mapeggan tu addetan mekunnay sa. Kunna brother nga si Steven, “I pappursigi ta tadday nga addetan, panuppal tatun, anna paningan ta napprogresowakku ira i mamagayayya niakan.” Kunna kabataan nga brother ta Germany nga massesserbi ngana ta tanakuan nga nasion, “Sonu mallakay ngà, kakku kayà lipayan i pattolè nga i masingakku laman nga kingnguà ay para ta baggì.” Iddanamammi nga kunnatun gapa i matageno mu. Nu kayà mu nga matageno yatun, usammu i abilidad mu ira tapenu dayawan i Dios anna uffunan i tanakuan. (Gal. 6:10) Magangngua ka tu espiritual ira nga addetan anna ipakimallo nga uffunan naka ni Jehova nga gawatan danatun. Makasiguradu ka nga tabbagan ni Jehova i pakimallo mu!​—1 Juan 3:22; 5:14, 15.

15. Anni ira nga addetan i puedem nga gawatan? (Innan i kahon nga “ Praktikal ira nga Addetan.”)

¹⁵ Anni ira nga addetan i puedem nga gawatan? Awayyana nga pakkomento ta mismu nga uvovug mu ta study ira, pappayunir, onu passerbi ta Bethel. Puedem gapa maggigiammu tu bagu nga lengguahe tapenu iyusam yatun ta pallayyagayya ta mas aru nga totolay. Kunna kabataan nga massesserbi ta ngamin-tiempo nga si Barak, “Awan ngana tu tanakuan nga trabahu nga mamagayayya niakan, nu ari, i pakannammù nga malukag ngà kada aggaw tapenu usan i ngamin nga siki-sikakku para kani Jehova.”

16. Anni i narekunnisi ni David ta matunung ira nga estandarte ni Jehova, anna ngatta?

¹⁶ Bibbigan i Salmo 16:2, 4. Gitta na nagigiammu tam ta nappasa nga artikulo, palubbangan ittam na matunung nga dorob anna prinsipio na Dios gukaban na panguffun nittam nga kultiban i aya ta mapia anna pangikalussaw ta marake. (Amos 5:15)  Narekunnisi na salmista nga si David nga ‘naggafu i ngamin nga mapia’ kani Jehova. Ta orihinal nga Hebreo nga netransIeyt tu “kinapia,” nelagum tatun i kapeggan tu atannang nga moralidad. Nappursigi si David nga parigan i Dios anna ayatan i gannug ira nga ayatan ni Jehova. Nagigiammu gapa ni David nga ikalussaw i gannug ira nga ikalussaw ni Jehova. Kasali tatun i idolatria, tadday nga annangngua nga mangipasiran ta totolay anna mangari ta gloria nga mepangngo kani Jehova.​—Isa. 2:8, 9; Nep. 4:11.

17, 18. (a) Anni i naobserba ni David meyannung ta resulta na falsu nga paddayaw? (b) Kunnasi nga pinakaru na totolay ‘i vuru-vurudda’?

¹⁷ Ta tiempo na Biblia, maruddu nga nelagum ta falsu nga paddayaw i seksual nga imoralidad. (Os. 4:13, 14) Aru nga totolay i nakkagustu ta falsu nga paddayaw megafu ta kakayàda i imoral nga pattolay, ngem nabbayag kari i pagayayyada ta kunnatun nga klase na paddayaw? Ari vuluvuga! “I tumuttul ta tanakuan nga dios ira ay irattal da i vuru-vurung ta baggi da laggapa,” kunni David. Nisakrifisioda paga i ánada ta falsu nga Dios! (Isa. 57:5) Talaga kalussaw ni Jehova i kunnatun nga kinavayolente! (Jer. 7:31) Nu natolay ka tatun nga tiempo, siguradu nga dakal i appabalo mu nu mangurug anna tumuttul kani Jehova i magana mu.

¹⁸ Ta maddaggun gapa, maruddu nga kunsintian na falsu nga relihion i seksual nga imoralidad, maski paga i homoseksualidad. Megafu tatun, matageno na totolay nga napalubbangan ira, ngem ta kakuruganna pinakaruda ‘i vuru-vurudda.’ (1 Cor. 6:18, 19) Napansinnu kari yatun? Yayya nga sikamu nga kabataan, ginnannu i nelangitan nga Yamanu. Buu nakuan i pattiwalanu nga kapianan para nikamu i pamarulo sa. Ipatalatto ta futunu nga ari tu sulit i marake nga resulta na temporario nga pappaga-pagayayya. (Gal. 6:8) Kunni Joshua nga nakagi ta gafu, “Puede tam usan i kapalubbattam segun ta kayà tam, ngem ari makapagayayya i mali nga pangiyusa tatun.”

19, 20. Anni i magigginnag nga bendision ta kabataan ira nga mangurug anna mattuppal kani Jehova?

¹⁹ Kinagi ni Jesus ta disipulosna: “Nu parulattan nu i tuttuddù, kurug tu disipulo takamu; ay kannammuan nu i kurug anna yaw i mamalubbang nikamu.” (Juan 8:31, 32) Nelavu tatun i kapalubbang ta falsu nga relihion, pakka-ignorante, anna rehiya. Egga paga i kasali tatun. Ta mappange, egga noka i “makapabbaw nga kapalubbang na ána na Dios.” (Roma 8:21) Maekspiriensa i kapalubbang sangawe ‘nu parulattan nu i tuttuddu’ ni Cristo. Nu kunnatun, “kannammuan nu i kurug,” ari laman ta paggigiammu tatun, nu ari, pati ta pattolay segun tatun.

²⁰ Sikamu nga kabataan, tagibalorannu i niyawa na Dios nga kapalubbang nikamu. Masirib nga usan yatun, tapenu makapadday kamu tu matuyag nga fundasion ta mappange. Kunna tadday nga kabataan nga brother: “I masirib nga pangiyusa ta kapalubbang durante ta kabataan i talaga makoffun nga mangarubang ta mas dakal ira nga desision, gitta na pagaleg tu trabahu onu pangatawa onu pattalupaddian labbi nga awan tu atawana.”

21. Kunnasi ka makapattalupaddian ta dalan na “kurug nga pattolay”?

²¹ Taw nga dana nga sistema, maski yari kagian na aru nga makasta nga pattolay ay ababba laman. Kattam ammu nu anni i mesimmu ta mappange. (Sant. 4:13, 14) Masirib gafu nu mattalupaddian ta dalan nga mattuppal ta “kurug nga pattolay”​—i mannanayun nga inango. (1 Tim. 6:19) Siempre, ari ittam fuersan na Dios nga lumakag tatun nga dalan. Sittam lagapa i mappili. Kuammu nga ‘partem’ si Jehova. Tagibalorammu i aru nga “gannug ira nga mapia” nga niyawana nikaw. (Sal. 103:5) Mattalo ka nga ‘pannuan naka ta pagayaya’ anna meyawana i “awan tu panuppalan na nga palupagia.”​—Sal. 16:11.