1, 2. ¿Wiˈixë Tony yˈijxpajtënë xytyukˈijxëm ko mbäät nyajtëgäjtsëmë jukyˈäjtën?

TONY, yëˈë nety tuˈugë mixy diˈib yaˈkpëtsëëmp, yeˈky pyejty ets kyaj pënë tyeety. Kyaj nety oy yˈëxpëky mä yˈeskuelë, ets axtë jënan ko kyaj yˈokˈëxpëkanë. Sääbëdë domingë yëˈë ijty mëët yajpääty ja myëtnaymyaayëbëty o nyijkxy sinë. Kyaj ijty tsyipjäˈäyëty ets nan kyaj tjëˈxyë droogë, per kyaj nety tnijawë ti tyunëp mä jyukyˈäjtën ets kyaj yˈity seguurë pën jamë Dios. Ta tˈixyˈajty tuˈugë kasäädë jäˈäy diˈib Testiigë, ets ta ttukmëtmaytyaky ko kyaj yˈity seguurë pën jamë Dios, ta myooyëdë foyetë El origen de la vida mëdë ¿Es la vida obra de un Creador?

² Ko ja kasäädë jäˈäy tnijëmbijttë Tony, të nety kajaa tyëgatsy, nan të nety tkäjpxtäˈäy ja majtskpë foyetë ets këxëˈkp mët ko të dyajpäˈˈäjxtäˈäy. Tony ta yˈanmääyëdë: “Seguurë ko tamˈäjtpë Dios”. Ta jyënany ko yˈëxpëkaambyë Biiblyë, ets ta wanaty wanaty dyajtëgäjtsy ja wyinmäˈäny mä wiˈixë nety tˈixyë jukyˈäjtën. Nan jyotmooy ja yˈëxpëjkën mä yˈeskuelë, ets axtë ja direktoor monyˈijx monyjyäˈäwë. Ta yˈanmääyë: “Të kajaa xyyaˈoyë mjäˈäyˈäjtën ets mas oy tyam mˈëxpëjknë. ¿Waˈan yëˈëjëty ko mˈëxpëky mëdë Jyobaa tyestiigëty?”. Tony, ta tˈatsooy ko duˈun, ets ta  ttukmëtmaytyaky ti nety yˈëxpëjkypy. Ok, ta Tony ojts dyajkaˈpxy ja yˈëxpëjkën, ets tyam, tyuny prekursoor regulaar ets pyudëjkëbë mëjjäˈäy. Nan jotkujk nyayjyawëty ko tjawë Jyobaa extëm tuˈugë tyeety diˈib mëk tsojkëp (Sal. 68:5).

3. ¿Ti käjpxwijënë Jyobaa myoobyë ënäˈktëjk?

³ Extëm jyajtyë Tony, yëˈë xytyukˈijxëm ko Jyobaa mëjwiin kajaa nyaytyukjotmaytyunyëtyë ënäˈktëjk. Yëˈë tsyojkypy ets mjukyˈatët agujk jotkujk, kyaj ttsoky ets mnayjyawëdët awäˈäts tukwäˈäts. Pääty mmoˈoyëtyë tyäˈädë käjpxwijën: “Jamyats pën të myajkojˈyëty mä mˈënäˈkˈaty” (Ecl. 12:1). Mtsiptäˈäganxëp, per mbäät duˈun xytyuny. Mëdë Jyobaa nyaybyudëkë, mbäät oy wyimbëtsëmy tijaty mduumpy mä tyam mˈënäˈkˈaty ets nanduˈun ko nety mëjjäˈäy mëˈˈënäˈkënë. Parë mas niˈigyë xyjaygyukët, min nˈokˈijxëm ti pudëjkëdë ja israelitëty parë tjaˈˈabëjktë ja Nax diˈib Yajtukwandaktë, ets ti David mëjääwmooyë parë tmëmadakyë Goliat.

4, 5. ¿Tijaty xytyukniˈˈijxëm ko ja israelitëty tjaˈabëjktë ja Nax diˈib Yajtukwandaktë ets ko David tmëmadakyë Goliat? (Ixë dibujë mä tsyondaˈaky).

⁴ Ko nety ja israelitëty tyim tëkëyanëdë mä ja Nax diˈib Yajtukwandaktë, Dios kyaj ojts tyukˈanaˈamëdë parë nëjkx tsyiptundë o tniˈëxpëkëdët (Deut. 28:1, 2). Diˈibë Jyobaa tukˈanaˈamëdë, yëˈë ets myëmëdowëdët ets tyukˈixpatëdët (Jos. 1:7-9). Tuˈugë naxwinyëdë jäˈäy mbäät tmëdoyë tyäˈädë käjpxwijënë ko kyaj yˈoyëty. Per yëˈë ja mas oybyë käjpxwijën diˈib yajmooytyë ja israelitëty, pes mëdë Jyobaa nyaybyudëkë myëmadaktääytyë ja nax käjpn diˈib Canaán (Jos. 24:11-13). Per parë nmëmëdoˈowëmë Dios, tsojkëbë mëbëjkën. Pën nmëdäjtëm, ta xëmë yˈoybyëtsëmäˈäny tijaty nduˈunëm. Ets duˈun extëm tëëyëp tmëdäjttë mëbëjkën, nanduˈun tyam tsyokyëty nmëdäjtëmë nmëbëjkën.

⁵ Goliat yëˈë nety tuˈugë tsiptuumbë diˈib jantsy kumëjääw ets ja yenyëty naa 3 metrën. Nan kaˈpxyë nety tmënëjkxy ti mëët nyaygyuwäˈänäˈänyëty (1 Sam. 17:4-7). Perë David yëˈëyë nety myënëjkxypy ja tyiˈpxn ets nmëdaty ja mëbëjkën mä Jyobaa. Pënaty kyaj tmëdäjttë mëbëjkën, duˈun tˈijxtë David extëm tuˈugë kunëbap, per ja diˈibë nety kunëbap, yëˈë Goliat (1 Sam. 17:48-51).

6. ¿Ti akˈyajnimaytyäˈägäämp mä tyäˈädë artikulo?

⁶ Mä jatuˈukpë artikulo ojts nˈijxëm tijaty mbäät xyyaˈijtëm agujk jotkujk: ko nˈaxäjëm ja käˈäy ukën diˈibë Dios yajkypy, ko nmëdäjtëm ja mas oybyë mëtnaymyaayëbë, ko nbëjtakëmë mwinmäˈäny parë nyajmëjwindëjkëmë Diosë tyuunk ets ko nyajtsobatëm ja awäˈätstumˈäjtën diˈibë Dios xymyoˈoyëm. Ets mä tyäˈädë artikulo, yëˈë akˈyajnimaytyäˈägäämbë tyäˈädë taxk pëkypyë, jeˈeyë ko yëˈë nˈixäˈänëmë käjpxwijën diˈib miimp mä Salmo 16.

7. 1) ¿Wiˈix jyaˈayˈaty tuˈugë jäˈäy diˈib ijtp oy mëdë Dios? 2) ¿Ti netyë David kyumäˈäyënˈajtypy, ets wiˈixë nety ttukˈoyˈaty?

⁷ Tuˈugë jäˈäy diˈib ijtp oy mëdë Dios, myëbëjkypy ko tamë Dios ets yˈijxypy tijaty extëm yëˈë tˈixy. Naygyëyäjkëp parë Jyobaa tyuˈumoˈoyëdët ets të tpëjtaˈagyë wyinmäˈäny ko tmëmëdowäˈäny (1 Kor. 2:12, 13). Duˈunë David ttuuny, mä tuˈugë ëy jyënany: “Jyobaa yëˈëts ngumäˈäyënˈäjtypy”. Ko duˈun jyënany, yëˈë nety myaytyäˈägaampy ko oy mëët yˈity (Sal. 16:5). Myëjjäˈäwëbë nety ko nyaymyayëty mëdë Dios ets jamë nety myëjˈoˈkpety (Sal. 16:1). Ets pääty duˈun tkujäˈäyë mët ko jantsy jotkujkë nety nyayjyawëty. Nitii nety duˈunë jotkujkˈäjtën kyamoˈoyëty extëm ko oy yˈity mëdë Jyobaa (käjpxë Salmo 16:9, 11, TY). *

8. ¿Tijaty mbäät mbudëkëty parë kyaj mnayjyawëdët awäˈäts tukwäˈäts?

⁸ Pënatyë jyot wyinmäˈäny pyëjtaktëp mä xondakën o mä meeny sentääbë, kyaj mbäät nyayjyawëdë agujk jotkujk extëmë David (1 Tim. 6:9, 10). Tuˈugë nmëguˈukˈäjtëm diˈib Canadá, jyënaˈany: “Ja diˈibën jyantsy xyëwˈäjtypy agujkˈäjt  jotkujkˈäjtën, ja myiny ko nmoˈoyëm tijatyë Jyobaa Dios, diˈib të xymyoˈoyëm tukëˈëyë oyˈäjtën, kyaj jyaajëty ko nˈijx nbatëm tijaty yä naxwiiny” (Sant. 1:17). Extëm yä xyˈixy, pën mmëdäjtypy mëkë mëbëjkënë mä Jyobaa ets mmëduumpy, ta nëjkx xynyijawë ti mdunëp mä mjukyˈäjtën ets kyaj mnayjyawëdët awäˈäts tukwäˈäts. Per parë mas niˈigyë xymyëdatëdë mëbëjkën, tsojkëp xyyajnaxëdë tiempë mëdë Jyobaa. ¿Wiˈix? Ko xykyäjpxëdë yˈAyuk, ko xyˈix xytyunët tijaty të dyajkojy ets ko xypyawinmayët wiˈix jyaˈayˈaty, extëm ko mëk mtsokyëty (Rom. 1:20; 5:8).

9. ¿Ti mbäät xytyuny parë Diosë yˈAyuk myaˈoyëdët, duˈun extëmë David?

⁹ Komë Jyobaa yëˈë tuˈugë Uˈunkteety diˈib oyjyaˈay ets xytsyojkëm, ta näˈäty xyjyëjwijtsëmbijtëm. David myëjjäˈäwë ko yajjëjwijtsëmbijty, pääty jyënany: “Nmëjkumayaambyëtsë Jyobaa, diˈibëts të xyˈëwijy të xykyäjpxwijy. Axtë tsuˈum koots jyëjwijtsëmbijtypyëtsë njot nwinmäˈänyë këkpäätpë” (Sal. 16:7). David pyawinmääyë Diosë kyäjpxwijën ets tyuunë mëjääw parë wyinmayët extëm yëˈë. Nyasˈijxë parë yaˈoyëdët, yajtëgatsëdët ets yˈitët mas oyjyaˈay. Pën mijts mduumpy nanduˈun, ta niˈigyë xytsyokäˈänyë Jyobaa ets xymyëmëdowäˈäny ets niˈigyë tyëkëyaˈanyë mjot mwinmäˈäny extëmë oybyë Dios mëduumbë. Christin, jyënaˈany: “Kots nˈëxpëky ets nbawinmayëts diˈibëts jam ngajpxypy, duˈunëts njawë ko yëˈëtsë Jyobaa të xytyuknijayë”.

10. Extëm jyënanyë Isaías 26:3, ¿wiˈix ttukˈoyˈaty tuˈugë jäˈäy diˈib oy ijtp mëdë Dios?

¹⁰ Pën mˈijtp oy mëdë Dios, ta xyˈixäˈänyë tyäˈädë jukyˈäjtën ets ti miimp këdakp extëm yëˈë tˈixy. Jyobaa kajaa tijaty mduknijawëty ets mdukjaygyukëty. ¿Tiko? Yëˈko tsyojkypy ets xynyijawët ti diˈib mas jëjpˈam mbäät xytyuny mä mjukyˈäjtën, xywyinˈixët diˈib oybyëtsëmëp ets kyaj xyjëjptsëˈëk xyjëjpjawët ti miin këdakp (käjpxë Isaías 26:3, TY). * Joshua, diˈib tsënaapy Estados Unidos, jyënaˈany: “Pën myajpatp wingon mä Jyobaa, ta xyˈixäˈäny yajxon tidën jëjpˈam ets tidën kyaj”.

11. ¿Wiˈixë David twinˈijxy ja myëtnaymyaayëbë?

¹¹ (Käjpxë Salmo 16:3). * David nyijäˈäwëbë nety ko parë nbatëmë oybyë mëtnaymyaayëbë, yëˈë mbäät nwinˈijxëm diˈib tsyojktëbë Jyobaa. Yëˈë ja ojts ttijy ja myëtnaymyaayëbëty “wäˈäts”. ¿Tiko? Yëˈko tyuundëbë nety mëjääw parë jyukyˈattë extëmë Dios tniˈanaˈamë. Ets jyënany ko mëjwiin kajaa nety yajxondaˈagyëty ko mëët yajpäättë. Nanduˈun jyënany niduˈuk diˈib jyaayë Salmo ko yëˈë myëtnaymyaayëbëˈäjtypy niˈamukë pënaty tsyëˈkëdëbë Dios ets myëmëdoowdëp (Sal. 119:63). Extëm ojts nˈijxëm mä jatuˈukpë artikulo, mijts nan mbäät xypyaaty nimayë mëtnaymyaayëbë diˈib oyjyaˈay, diˈib tsyojktëp ets myëmëdoowdëbë Jyobaa. Ets kyaj tiko yëˈë tyim mëtnaymyaayëbëˈatëdë mëduknax.

12. ¿Tiko David jantsy oy nyaymyaayë mëdë Jonatán?

¹² David kyaj yëˈëyë tmëtnaymyaayëbëˈäjty ja myëduknax. ¿Mjamyejtsypy ti txëwˈäjty niduˈuk ja mas oybyë myëtnaymyaayëbë? Jonatán. Tyäˈädë naymyayë diˈib myëdäjttë, yëˈë diˈib mas oy yajmaytyakp mä Biiblyë ¿Mnijäˈäwëp ko Jonatán ja nety myëjjëty naa 30 jëmëjt? Per ¿tiko jantsy oy nyaymyaayëdë? Yëˈko nimajtsk myëbëjktë Dios, naywyingutsëˈkëdë nixim niyam ets yajtsobatë wiˈix jyaˈayˈäjttë niduˈuk niduˈuk, extëm ko tmëdäjttë jotmëkˈäjtën mä tsyiptuundë mëdë Diosë myëtsip (1 Sam. 13:3; 14:13; 17:48-50; 18:1).

13. ¿Wiˈix mbäät xymyëdaty kexy kaˈpxyë mëtnaymyaayëbë? Nimaytyäˈäk tuˈugë ijxpajtën.

¹³ Duˈun extëmë David mëdë Jonatán, ëtsäjtëm nan mbäät agujk jotkujk nnayjyäˈäwëm, pën nnaymyaˈayëm mëdë nmëguˈukˈäjtëm diˈib tsyojktëbë Jyobaa ets myëbëjktëp. Kiera, diˈib kanäk jëmëjt kujk Diosmëduny, jyënaˈany: “Abëtsemy nyaxwinyëdëts nmëdatyë nmëtnaymyaayëbë, diˈib wiˈixëm të jyukyˈattë ets wiˈixëm ja kyostumbrë”. Pën mduumpy extëmë Kiera, ta xyˈixäˈäny yajxon wiˈix xyyajtuˈugyëmë Diosë yˈAyuk etsë myëjääw.

14. 1) ¿Ti mbudëkëyanëp parë xypyëjtäˈägëdë mwinmäˈäny ets xyyajmëjwindëkëdë Diosë tyuunk? 2) ¿Wiˈix näägë ënäˈktëjk jyënäˈändë ko duˈun të tpëjtäˈäktë wyinmäˈäny?

¹⁴ (Käjpxë Salmo 16:8). * Diˈibë David mas jëjpˈam pyëjtak mä jyukyˈäjtën, yëˈë tmëdunëdë Dios. Mijts nan mbäät mjukyˈaty agujk jotkujk ets kyaj mnayjyawëdët awäˈäts tukwäˈäts pën mbanëjkxëbë yˈijxpajtën. Pëjtäˈäk jëjpˈamë Diosë tyuunk ets tukniwinmayë tijaty mdunaampy, per xëmë yaˈit mwinmäˈänyoty ti Dios mduktunanëp. Steven, jyënaˈany: “Kots nbëjtaˈagyë nwinmäˈäny parëts jam wiˈixtsoo nyajmëjwindëkëyaˈanyë Diosë tyuunk, ets kotsë net duˈun nduny etsëts nˈixy wiˈixëts të xypyudëkë, agujk jotkujkëts nnayjyawëty”. Tuˈugë mixy diˈib tsoˈomp Alemania ets Diosmëduny wiink paˈis, jyënaˈany: “Kotsë nety të nmëjjäˈäyënë, kyajts jam nbëkäˈäny kuentë ko tukëˈëyë tijatyëts të nduny mätsë njukyˈäjtën, yëˈë diˈibëts këˈëm ndukˈoyˈajtypy”. ¿Nanduˈun mijts mwinmay extëm yëˈëjëty? Pën duˈun, yajtunë mwijyˈäjtën parë xyyajmëjpëtsëmëdë Dios ets xytyukmëdunëdë oyˈäjtënë wiink jäˈäy (Gal. 6:10). Pëjtäˈägë mwinmäˈäny parë xyyajmëjwindëkëdë Jyobaa tyuunk ets amdowë nyaybyudëkë parë duˈun xytyunët. Mbäät mˈity seguurë ko Jyobaa yˈatsowëmbitaambyë mnuˈkxtakën (1 Fwank 3:22; 5:14, 15).

15. ¿Wixaty mbäät xyyajmëjwindëkë Diosë tyuunk? (Ixë rekuäädrë “ Wixaty mbäät xyyajmëjwindëkë Diosë tyuunk”).

¹⁵ ¿Wixaty mbäät xyyajmëjwindëkë Diosë tyuunk? ¿Tiko xykyatunyë mëjääw parë mgomentaratët mgëˈëm mˈääw mgëˈëm ayuk mä reunyonk, mdunët prekursoor o mdunët Betel? Nan mbäät xypyëjtaˈagyë mwinmäˈäny parë xyjatëdë wiink ayuk ets mˈëwäˈkx mgäjpxwäˈkxët mä duˈumbë ayuk yajkajpxy. Barak, tuˈugë mixy diˈib kajaa xyëëw tiempë yajtuumpy mä Diosë tyuunk, jyënaˈany: “Nitiiduungëtsë duˈun xykyayajnayjawëty agujk jotkujk extëm kots mbëdëˈëky tuˈuk tuˈugë xëëw ets nnijawëts kotsë njot nmëjääw nyajtunäˈäny parë Jyobaa”.

16. ¿Wiˈixë David tˈijxyë Jyobaa yˈanaˈamën ets kyäjpxwijën, ets tiko?

¹⁶ (Käjpxë Salmo 16:2, 4). * Mä jatuˈukpë artikulo ojts nˈijxëm ko Diosë yˈanaˈamën etsë  kyäjpxwijën, yëˈë xyyaˈijtëm awäˈätstum mët ko xypyudëjkëm parë nˈaxëkˈijxëm diˈib axëëk ets ntsojkëm diˈib oy (Amós 5:15). Diˈibë David myaytyäˈägan mä Salmo 16:2, yëˈë ko tukëˈëyë oyjyaˈayˈäjtën ak jam tsyoony mä Jyobaa. David tyuunë mëjääw parë jyaˈayˈajty extëmë Jyobaa ets ak yëˈë tyuun diˈib oy. Nan yˈaxëkˈijx tijatyë netyë Jyobaa yˈaxëkˈijxypy, extëm ko jäˈäy tˈawdatyë awinax. Pes nyijäˈäwëbë nety ko yajnaxypyëbë naxwinyëdë jäˈäy ets pyëjkëbë Jyobaa ja mëjˈäjtën diˈib pat nitëjkëp (Is. 2:8, 9; Diˈibʉ Jat. 4:11).

17, 18. 1) ¿Wiˈix wyimbëtsëmäˈäny ko nˈawdäjtëmë wiink dios, extëm jyënanyë David? 2) ¿Tiko näägë jäˈäy dyajmëjwiin dyajkajaajëdë jyäj jyëmuˈumën?

¹⁷ Ja tiempë mä jyukyˈäjttë ja israelitëty, ko ijtyë jäˈäy tˈawdattë wiink dios, tyukmëwijtsëdëp mëdë axëëkpë ijt tsënaaky (Os. 4:13, 14). Ets nimay ijty duˈun diosˈawdatäˈändë mët ko yˈitäˈän tsyëënëyäˈändë axëëk. Per ¿yajjotkujkˈäjtëdë? Kyaj. David jyënany mä Salmo 16:4 ko tyäˈädë jäˈäyëty diˈibë nety yˈawdäjttëbë wiink dios, “yajmëjwiin yajkajaajëdëbë jyäj jyëmuˈumën”. Pes axtë yaˈoˈktëbë nety ja yˈuˈunk yˈënäˈk ets ttukwintsëˈëgëdë ja dios diˈib yˈawdäjttëp (Is. 57:5). Jyobaa yˈaxëkˈijx ko duˈun yˈadëtstë (Jer. 7:31). Koxyëp mjukyˈajty mä tadë tiempë, ¿këdii ojtsxyëp xymyëjjawë ko ja mdääk mdeety tmëdundë Jyobaa?

¹⁸ Tyamë relijyonk diˈib kyaj tyëyˈäjtënëty, nan nyasˈijxëdëp parë jäˈäy axëëk yˈit tsyëënëdët o axtë kyupëjktëp tsyëënëdë ak yetyëjk. Tyäˈädë jäˈäyëty wyinmaytyë ko awäˈätstum yajpäättë, per “yajmëjwiin yajkajaajëdëbë jyäj jyëmuˈumën” (1 Kor. 6:18, 19). Waˈan mijts të xypyëjkyë kuentë ko dyuˈunëty. Pääty mmëmëdowë mDeetyë tsäjpotmëdë. It seguurë ko pën mëdoop, ta xytyukˈoyˈatäˈäny. Yaˈit mwinmäˈänyoty ko kajaa xykyumëdowäˈäny ko xytyuunëdë axëkˈäjtën diˈib jeˈeyë tuk ratë mdukxondäˈägëp (Gal. 6:8). Joshua, diˈib të yajmaytyaˈaky mä parrafo 10, jyënaˈany: “Mbäät nyajtuˈunëmë awäˈätstumˈäjtën extëm ndimtsojkëm. Per pën nyajtuˈunëm axëëk, kyaj nëjkx njotkujkˈäjtëm”.

19, 20. ¿Tijaty kunuˈkxën yˈaxäjëdëbë ënäˈktëjk diˈib myëdäjttëbë mëbëjkën mä Jyobaa ets myëmëdoowdëp?

¹⁹ Jesus tˈanmääy ja yˈëxpëjkpëty: “Pën mbadiimpy extëmts miits nˈanëëmëdë, nˈëxpëjkpëˈatëpts miitsëty, es mˈixyˈattëp ja tëyˈäjtën, es yëˈë tëyˈäjtën yëˈë myajwëˈëmëdëp awäˈätstuuy” (Fwank 8:31, 32). Tyäˈädë tëyˈäjtën yëˈë diˈib të xyyaˈˈawäˈätspëtsëˈëmëm mä relijyonk diˈib kyaj tyëyˈäjtënëty, mä tsuuˈat lokëˈat ets mä tijatyë jäˈäy yajkajpxypy. Per kyaj yëˈëyëty jeˈeyë, pes mä tiempë myiny kyëdaˈaky myajmoˈoyaˈany “ja awäˈatstuuyˈäjtën es ja kunuˈxën diˈibë pyäättëp ja Diosë yˈuˈungëty” (Rom. 8:21). Tyam mbäät xymyëdaty waanë tadë awäˈätstumˈäjtën. ¿Wiˈix? Ko xymyëmëdowët tijatyë Jesukristë tukniˈˈijxëp. Duˈuntsoo kyaj nëjkx jeˈeyë xynyijawë ja tëyˈäjtën mët ko mˈëxpëkët, yëˈë duˈun mët ko xykyuytyunët mä ja mjukyˈäjtën.

²⁰ Ënäˈktëjk, yajtsobäät ja awäˈätstumˈäjtën diˈibë Dios të mmoˈoyëty. Pën myajtuumpy yajxon, yëˈë mbudëkëyanëp parë tyam yajxon xywyinˈixtët diˈib nëjkx xytyukˈoyˈaty mä tiempë myiny kyëdaˈaky. Tuˈugë mixy diˈib Testiigë, jyënany: “Ko tyam xyyajtunët yajxon ja mˈawäˈätstumˈäjtën, yëˈë mbudëkëyanëp ok, ko nety xywyinˈixy diˈib jëjpˈam mdunaampy, extëm ko xywyinˈixët tuˈugë mduunk, pën mbëkäämp o pën mˈitäämp tuk tiempë naytyuˈuk”.

21. ¿Ti mbäät xytyuny parë xypyäädët ja diˈibën jyantsy xyëwˈäjtypy jukyˈäjtën?

²¹ Mä tyäˈädë jukyˈäjtën diˈib kugëxëyanëp, kyajë jäˈäy jyaktë jyotkujkˈäjtën. Pes nipën tkanijawë ti tunan jatanëp bom jëxtëjkm (Sant. 4:13, 14). Pääty, oy ko nyajpatëm mä ja nëë tuu diˈib mënëjkxp mä ja “jikyˈäjtën diˈibë tëyˈäjtënbë”, jaˈa njënäˈänëm, ja jukyˈäjtën diˈib itäämp xëmëkyëjxm (1 Tim. 6:19). Dios kyaj xytyukˈaguanëˈäjtëm parë jatsoo nëjkxëm, niduˈuk niduˈuk nwinˈixäˈänëm. Pääty, winˈix ets yëˈë Jyobaa xykyumäˈäyënˈatët. Yajtsobäät tukëˈëyë oyˈäjtën diˈib mmooyëp (Sal. 103:5). It seguurë ko yëˈë myajjotkujkˈatanëp winë xëëw winë tiempë (Sal. 16:11).