1, 2. ¿Nda̱saa náʼa̱ ña̱ ndo̱ʼo ta̱ Tony ña̱ kiviva nasamayó ña̱ kéʼéyó?

TÁ XI̱KUUMIÍ ta̱ Tony 14 ku̱i̱ya̱ va̱ása níxikutóora ku̱ʼu̱nra escuela, ta ni yivára va̱ása níxi̱yo xíʼinra. Nda̱a̱ nda̱kanixi̱níra ña̱ va̱ása ku̱ʼu̱nkara escuela. Ndiʼi tiempo xi̱kitáʼanra xíʼin na̱ migora á xi̱xika si̱íra. Va̱ása níxixiniñúʼura droga ta ni va̱ása kue̱ʼe̱ ni̱xi̱yora, soo ni va̱ása ndátura ni iin ña̱ʼa chí nu̱únínu, ta saátu xi̱xika-inira á ña̱ ndixa íyo Ndióxi̱. Tasaá nda̱ni̱ʼíra iin matrimonio na̱ kúú testigo Jehová ta ni̱nda̱ka̱tu̱ʼunrana xa̱ʼa ña̱ kǒo kúnda̱a̱-inira. Na̱kán ta̱xina ndaʼa̱ra folleto ña̱ naní El origen de la vida xíʼin inka ña̱ naní ¿Es la vida obra de un Creador?

² Tá ndi̱kó na̱yóʼo nu̱úra, xa̱a̱ inka ña̱ ke̱ʼé ta̱ Tony. Ni̱kutóoníra folleto ña̱ ta̱xina ndaʼa̱ra ta ka̱ʼvi ndiʼiraña. Ta̱ Tony ni̱ka̱ʼa̱nra xíʼinna: “Íyova Ndióxi̱”. Ki̱xaʼára káʼvira Biblia ta loʼo tá loʼo na̱samara ña̱ xi̱ndakanixi̱níra xa̱ʼa ña̱ tákura. Ta va̱ʼaníka ki̱xaʼá káʼvira escuela. Nda̱a̱ ta̱ director nda̱kanda̱-inira xíʼin ña̱ ke̱ʼéra. Ni̱ka̱ʼa̱nra xíʼinra: “Va̱ʼaní íyo ña̱ kéʼún vitin ta va̱ʼaní káʼviún. ¿Á xa̱ʼa ña̱ káʼviún xíʼin na̱ testigo Jehová kúúña?”. Ta̱ Tony ni̱ka̱ʼa̱nra xíʼinra xa̱ʼa ña̱ sákuaʼara xa̱ʼa Ndióxi̱. Tá sa̱ndíʼira ka̱ʼvira escuela ndu̱ura precursor regular xíʼin siervo ministerial ta nda̱a̱ vitin kéʼéra ña̱yóʼo.  Saátu kúsi̱íní-inira chi vitin Jehová kúú yivára (Sal. 68:5).

3. ¿Ndáa consejo táxi Jehová ndaʼa̱ na̱ va̱lí?

³ Ña̱ ndo̱ʼo ta̱ Tony náʼa̱ña nu̱úyó ña̱ ndíʼi-ini Jehová xa̱ʼa na̱ va̱lí kúaan. Ta̱kán kúni̱ra ña̱ va̱ʼaní ná koún ta kusi̱í-iniún. Xa̱ʼa ña̱yóʼo táxira consejo yóʼo ndaʼún: “Vitin tá válíndó ndakaʼánndó xa̱ʼa ta̱ i̱xava̱ʼa miíndó” (Ecl. 12:1, nota). Ñuyǐví ña̱ ndóoyó vitin íxayo̱ʼvi̱ña xíʼinyó ña̱ keʼéyó ña̱yóʼo, soo kiviva keʼéyóña. Mií Jehová chindeétáʼan xíʼún ña̱ va̱ʼa kana ña̱ keʼún, su̱ví kuití tiempo vitin chi ndiʼi tiempo keʼéra ña̱yóʼo. Ña̱ va̱ʼa kunda̱a̱ka-iniyó xíʼin ña̱yóʼo ná kotoyó ndáaña chi̱ndeétáʼan xíʼin na̱ ñuu Israel ña̱ va̱ʼa nda̱kiʼinna ñuʼú ña̱ ni̱ka̱ʼa̱n Ndióxi̱ taxira ndaʼa̱na, ta ndáaña ta̱xi ndée ndaʼa̱ ta̱ David ña̱ va̱ʼa sa̱ndíʼi-xa̱ʼara ta̱ Goliat.

4, 5. ¿Ndáaña sákuaʼayó xa̱ʼa nda̱saa chi̱ndeétáʼan Ndióxi̱ xíʼin na̱ ñuu Israel ta saátu xíʼin ta̱ David? (Koto na̱ʼná ña̱ va̱xi chí xa̱ʼa).

⁴ Tá xa̱a̱ ku̱nu̱mí ki̱ʼvi na̱ ñuu Israel nu̱ú ñuʼú ña̱ ni̱ka̱ʼa̱n Ndióxi̱ taxira ndaʼa̱na, va̱ása níka̱ʼa̱n Ndióxi̱ xíʼinna ña̱ sakuaʼa va̱ʼana koona soldado á ña̱ ku̱ʼu̱nna nu̱ú ku̱a̱chi (Deut. 28:1, 2). Ña̱ ni̱ka̱ʼa̱nra xíʼinna kúú ña̱ ná kuniso̱ʼona ña̱ káʼa̱nra ta ná kandíxanara (Jos. 1:7-9). Nu̱ú na̱ yiví va̱ása ndáyáʼvi consejo ña̱ ta̱xira ndaʼa̱na. Soo ña̱ va̱ʼava xi̱kuu consejo yóʼo chi Jehová chi̱ndeétáʼan xíʼinna ña̱ va̱ʼa ka̱nitáʼanna xíʼin na̱ ñuu Canaán ku̱a̱ʼá yichi̱ (Jos. 24:11-13). Ña̱ va̱ʼa kuniso̱ʼoyó ña̱ káʼa̱n Jehová xíniñúʼu kandíxayóra. Tá kándíxayóra, ndiʼi tiempo va̱ʼa kana ña̱ keʼéyó. Nda̱a̱ tiempo vitin chíndeétáʼanní ña̱yóʼo xíʼinyó.

⁵ Ta̱ Goliat xi̱kuu iin ta̱ va̱ʼaní kánitáʼan ta nda̱a̱ u̱ni̱ metro kúú ña̱ súkúnra. Saátu ni̱xi̱yo ku̱a̱ʼá ña̱ʼa ña̱ xi̱xiniñúʼura ña̱ va̱ʼa kanitáʼanra (1 Sam. 17:4-7). Soo ta̱ David u̱vi̱ loʼo ña̱ʼa níʼira ku̱a̱ʼa̱nra ña̱ kanitáʼanra xíʼinra: iin honda xíʼin ña̱ va̱ʼaní kándíxara Jehová. Na̱ va̱ása kándíxa Jehová nda̱kanixi̱nína ña̱ ta̱ kíʼvi kúú ta̱ David. Soo ta̱ Goliat xi̱kuu ta̱ kíʼvi (1 Sam. 17:48-51).

6. ¿Ndáaña sakuaʼayó nu̱ú artículo yóʼo?

⁶ Nu̱ú inka artículo sa̱kuaʼayó xa̱ʼa ku̱mí ña̱ʼa ña̱ chíndeétáʼan xíʼinyó ña̱ va̱ʼa kusi̱í-iniyó: ña̱ táxira sákuaʼayó xa̱ʼara, ña̱ táxira na̱ migo va̱ʼa kítáʼan xíʼinyó, ña̱ táxira ña̱ keʼéyó ku̱a̱ʼá chiñu ti̱xin ñuura ta saátu ña̱ ndixa kivi ndaka̱xinyó ña̱ kúni̱yó keʼéyó. Nu̱ú artículo yóʼo, ka̱ʼa̱nkayó xa̱ʼa ña̱yóʼo, ta kotoyó ndáaña káʼa̱n Salmo 16 xa̱ʼaña.

7. a) ¿Nda̱saa íyo na̱ yiví espiritual? b) ¿Ndáana va̱ʼaní xi̱kitáʼan xíʼin ta̱ David, ta nda̱saa xi̱kunira?

⁷ Na̱ yiví na̱ kúú espiritual kándíxanína Jehová ta chíka̱a̱na ndée ña̱ ndakanixi̱nína táki̱ʼva ndákanixi̱ní miíra. Íxato̱ʼóna ndiʼi ña̱ káʼa̱nra (1 Cor. 2:12, 13). Saá ni̱xi̱yo ta̱ rey David. Nu̱ú iin yaa ña̱ ke̱ʼéra, ni̱ka̱ʼa̱nra ña̱ Jehová kúú ta̱ va̱ʼaní kítáʼan xíʼinra (Sal. 16:5). Xi̱taxira tixaʼvi ndaʼa̱ Jehová xa̱ʼa ña̱ xi̱kuura migora ta xi̱kandíxanírara (Sal. 16:1). Xa̱ʼa ña̱yóʼo ni̱ka̱ʼa̱nra ña̱ kúsi̱í-inira. Ña̱yóʼo kúú ña̱ xi̱taxi ña̱ si̱íní ni̱xi̱yora xa̱ʼa ña̱ va̱ʼaní xi̱kitáʼanra xíʼin Jehová (kaʼvi Salmo 16:9, 11). *

8. ¿Ndáa ña̱ʼa kúú ña̱ kivi taxi ña̱ kusi̱í-iniún?

⁸ Na̱ kútóo keʼé ña̱ kúni̱ miína á na̱ kútóo koo ku̱a̱ʼá xu̱ʼún va̱ása kúsi̱í-inina táki̱ʼva xi̱kusi̱í-ini ta̱ rey David (1 Tim. 6:9, 10). Iin ta̱ hermano ta̱ ñuu Canadá káchira: “Su̱ví ña̱ keʼéyó ña̱ íyo ñuyǐví yóʼo kúú ña̱ táxi ña̱ kúsi̱í-iniyó, chi tá táxiyó ña̱ kúúmiíyó ndaʼa̱ Jehová ta̱ táxi ndiʼi ña̱ va̱ʼa ndaʼa̱yó, saá kúú ña̱ ndixa kúsi̱íní-iniyó” (Sant. 1:17). Tá va̱ʼaní íyo ña̱ kándíxaún  Jehová ta chíka̱ún ndée ña̱ va̱ʼa kachíñún nu̱úra, kusi̱íní-iniún. Ña̱ va̱ʼa kuaʼnuka ña̱ kándíxaún Jehová xíniñúʼu kuniñúʼún tiempo ña̱ va̱ʼa sakuaʼakaún xa̱ʼara. ¿Nda̱saa kivi keʼún ña̱yóʼo? Xíniñúʼu kaʼviún Biblia, kotoún ndiʼi ña̱ i̱xava̱ʼara ta saátu ndakanixi̱níún xa̱ʼa ña̱ va̱ʼa ña̱ kúúmiíra tá kúu ña̱ kúʼvi̱-inira xínira yóʼó (Rom. 1:20; 5:8).

9. ¿Ndáaña kivi keʼún ña̱ va̱ʼa nasama tu̱ʼun Ndióxi̱ miíún?

⁹ Jehová kúúra iin Ndióxi̱ ta̱ va̱ʼaní ta kúʼvi̱-inira xínira miíyó, xa̱ʼa ña̱yóʼo sava yichi̱ táxira consejo ndaʼa̱yó. Xi̱ndayáʼviní consejo yóʼo nu̱ú ta̱ rey David ta xa̱ʼa ña̱yóʼo ni̱ka̱ʼa̱nra: “Ndasakáʼnui̱ Jehová, ta̱ táxi consejo ña̱ va̱ʼa ndaʼíi̱. Chi tá ñu̱ú ndákanixi̱níi̱ xa̱ʼa ña̱ káʼún, ta ña̱yóʼo kúú ña̱ táxi yichi̱ ña̱ va̱ʼa nu̱úi̱” (Sal. 16:7). Ta̱ David xi̱ndakanixi̱níra xa̱ʼa consejo ña̱ ta̱xi Ndióxi̱ ndaʼa̱ra ta xa̱ʼa ña̱yóʼo chi̱ka̱a̱ra ndée ña̱ va̱ʼa ndakanixi̱níra táki̱ʼva ndákanixi̱ní Jehová. Xi̱taxira ña̱ nasama consejo yóʼo miíra ta saá va̱ʼa xa̱a̱ra keʼéra ña̱ va̱ʼa. Tá ná keʼétu miíún ña̱yóʼo, saá va̱ʼaníka xa̱ún kuʼvi̱-iniún kuniún Jehová ta kuni̱kaún kuniso̱ʼún ña̱ káʼa̱nra. Va̱ʼaní kuaʼnukaún xíʼin tu̱ʼun Ndióxi̱. Iin ñá hermana ñá naní Christin, ka̱chiñá: “Tá káʼvii̱ ta ndakanixi̱níi̱ xa̱ʼaña, ña̱ túvi kúú ña̱ ni̱ka̱ʼyi̱ña xa̱ʼa miíi̱”.

10. Nda̱a̱ táki̱ʼva káchi Isaías 26:3, ¿ndáaña va̱ʼa ndákiʼinyó tá kúúyó na̱ yiví espiritual?

¹⁰ Tá kúún iin na̱ yiví espiritual, mií Jehová taxi ña̱ ndíchi ndaʼún ta sanáʼa̱ra yóʼó ña̱ va̱ʼa ndaka̱xiún ña̱ keʼún nu̱ú ñuyǐví yóʼo. Chindeétáʼanra xíʼún chi kúni̱ra ña̱ ná kunda̱a̱-iniún ndáaña ndáyáʼvika keʼún, kúni̱ra ná ndaka̱xin va̱ʼún ña̱ keʼún ta va̱ása yi̱ʼviún xa̱ʼa ña̱ kixi chí nu̱únínu. Ta̱ profeta Isaías ni̱ka̱ʼa̱nra ña̱, Jehová kundaara na̱ ndixa kándíxañaʼá ta taxira ña̱ táxin koona (kaʼvi Isaías 26:3). * Iin ta̱ hermano ta̱ ñuu Estados Unidos ta̱ naní Joshua káchira ña̱yóʼo: “Tá yatin íyoún xíʼin Jehová, kunda̱a̱-iniún xa̱ʼa ndáaña ndáyáʼvika ta ndáaña va̱ása ndáyáʼvi”.

11. ¿Nda̱saa xi̱ndaka̱xin ta̱ David na̱ migora?

¹¹ (Kaʼvi Salmo 16:3). * Ta̱ rey David xi̱kunda̱a̱-inira ña̱ tá kúni̱ra kitáʼanra xíʼin na̱ yiví na̱ va̱ʼa, xíniñúʼu kutáʼanra xíʼin na̱ kúʼvi̱-ini xíni Jehová. Ni̱ka̱ʼa̱nra ña̱ kúúna na̱ santo saáchi chíka̱a̱na ndée ña̱ kéʼéna ña̱ kúni̱ Ndióxi̱. Ta ni̱ka̱ʼa̱nra ña̱ va̱ʼaní kúsi̱í-inira tá kítáʼanra xíʼinna. Iin kítáʼan ña̱yóʼo xíʼin ña̱ ni̱ka̱ʼa̱n inka ta̱ ka̱ʼyí tutu ña̱ Salmo. Ni̱ka̱ʼa̱nra ña̱ kúúra migo na̱ ndásakáʼnu Jehová tá kéʼéna ndiʼi ña̱ kúni̱ra (Sal. 119:63). Nda̱a̱ táki̱ʼva sa̱kuaʼayó nu̱ú inka artículo, kiviva koo migoún na̱ va̱ʼa tá kéʼéna ña̱ kúni̱ Jehová ta saátu tá kúʼvi̱-inina xíninara, ni nda̱a̱ ndáaka ku̱i̱ya̱ kúúmiína.

12. ¿Nda̱chun va̱ʼaní xi̱kitáʼan ta̱ David xíʼin ta̱ Jonatán?

¹² Ta̱ David su̱ví kuití níxi̱kitáʼanra xíʼin na̱ xi̱kuumií táʼan ku̱i̱ya̱ra. ¿Á ndákaʼún nda̱saa xi̱naní iin ta̱ va̱ʼaní xi̱kitáʼan xíʼinra? Ta̱yóʼo xi̱kuu ta̱ Jonatán. Va̱ʼaní káʼa̱n Biblia ña̱ xi̱kitáʼan na̱yóʼo. Soo, ¿á xíniún ña̱, ta̱ chéeka xi̱kuu ta̱ Jonatán nu̱ú ta̱ David? Ta, ¿nda̱chun va̱ʼaní xi̱kitáʼanna? Saáchi u̱vi̱ saána xi̱kandíxana Ndióxi̱, i̱xato̱ʼó xíʼin táʼanna ta xi̱kuumiína ku̱a̱ʼání ña̱ va̱ʼa, tá kúu ña̱ ndéení ni̱xi̱yo inina tá ka̱nitáʼanna xíʼin na̱ sáa̱-ini xíni na̱ ñuu Ndióxi̱ (1 Sam. 13:3; 14:13; 17:48-50; 18:1).

13. ¿Ndáaña kivi keʼún ña̱ va̱ʼa koo ku̱a̱ʼáka na̱ migoún? Ka̱ʼa̱n xa̱ʼa iin ejemplo.

¹³ Táki̱ʼva xi̱kitáʼan ta̱ David xíʼin ta̱ Jonatán, saátu miíyó kusi̱íní-iniyó tá ná kitáʼanyó xíʼin na̱ kúʼvi̱-ini xíni Jehová ta kándíxanara. Iin ñá hermana ñá naní Kiera, xa̱a̱ ku̱a̱ʼá ku̱i̱ya̱ káchíñuñá nu̱ú Jehová, káchiñá: “Íyo na̱ migoi̱  iníísaá ñuyǐví, na̱ íyo inka costumbre”. Tá ná keʼún táki̱ʼva kéʼé ñáyóʼo kunda̱a̱-iniún ña̱, tu̱ʼun Ndióxi̱ xíʼin espíritu yi̱i̱ra chíndeétáʼan xíʼinyó ña̱ kítáʼan va̱ʼayó.

14. a) ¿Ndáaña chindeétáʼan xíʼún ña̱ va̱ʼa kachíñukaún nu̱ú Jehová? b) ¿Ndáaña káʼa̱n sava na̱ va̱lí xa̱ʼa ña̱yóʼo?

¹⁴ (Kaʼvi Salmo 16:8). * Ña̱ xi̱ndayáʼvika nu̱ú ta̱ David kúú ña̱ kachíñura nu̱ú Ndióxi̱. Saátu miíún kivi kusi̱í-iniún tá ná kundiku̱n yichi̱ra. Siʼna chiñu Jehová keʼún ta chika̱a̱ ndée ña̱ va̱ʼa kachíñukaún nu̱úra tasaá keʼún ña̱ kúni̱ra. Iin ta̱ hermano ta̱ naní Steven ni̱ka̱ʼa̱nra: “Tá kéʼíi̱ iin ña̱ʼa ta sáxínui̱ña ta saátu tá xítoi̱ ña̱ va̱ʼaníka íyo ña̱ kéʼíi̱ vitin sákusi̱íníña-inii̱”. Iin ta̱ loʼo ta̱ ñuu Alemania ta̱ íyo inka país káchira: “Tá ná kuchéi̱ va̱ása kúni̱ ndandikó-inii̱ xa̱ʼa ña̱ kéʼíi̱ tá ná keʼíi̱ ña̱ kúni̱ miíi̱”. Kúni̱ndi̱ ná ndakanixi̱níún táki̱ʼva ndákanixi̱ní na̱yóʼo. Kuniñúʼu ndiʼi ña̱ kúúmiíún ña̱ va̱ʼa ndasakáʼnún Ndióxi̱ ta saátu chindeé inkana (Gál. 6:10). Chika̱a̱ ndée ña̱ va̱ʼa keʼún ku̱a̱ʼáka chiñu ti̱xin ñuura ta ka̱ʼa̱n xíʼinra ná chindeétáʼanra xíʼún ña̱ va̱ʼa saxínúnña. Kúsiíníva-ini Ndióxi̱ ña̱ ndúkuyó ña̱yóʼo nu̱úra (1 Juan 3:22; 5:14, 15).

15. ¿Ndáa inka ña̱ʼa kivi keʼún ti̱xin ñuu Ndióxi̱? (Koto recuadro “ Ña̱ kivi keʼún ña̱ va̱ʼa kachíñukaún nu̱ú Ndióxi̱”).

¹⁵ ¿Ndáa inka ña̱ʼa kivi keʼún ti̱xin ñuu Ndióxi̱? Kivi taxiún comentario xíʼin tu̱ʼun miíún tá xáʼún reunión, kivi koún precursor á kivi ku̱ʼu̱n kachíñún ti̱xin Betel. Kivitu sakuaʼún inka tu̱ʼun ña̱ va̱ʼa chindeétáʼún xíʼin na̱ káʼa̱n inka tu̱ʼun. Ta̱ Barak, iin ta̱ loʼo ta̱ káchíñu ku̱a̱ʼá tiempo nu̱ú Jehová káchira: “Kǒo inka ña̱ táxi ña̱ kúsi̱í-inii̱ tá ndákoi̱ ki̱vi̱ tá ki̱vi̱ ta xínii̱ ña̱ kachíñui̱ nu̱ú Jehová xíʼin ndiʼi ndeíi̱”.

16. ¿Ndáaña xi̱ndakanixi̱ní ta̱ David xa̱ʼa ña̱ káʼa̱n Jehová, ta nda̱chun?

¹⁶ (Kaʼvi Salmo 16:2, 4). * Nu̱ú inka artículo sa̱kuaʼayó xa̱ʼa ña̱ káʼa̱n tu̱ʼun Ndióxi̱ ta  ña̱yóʼo chíndeétáʼan xíʼinyó ña̱ va̱ʼa kuʼvi̱-iniyó kuniyó ña̱ va̱ʼa ta sa̱a̱-iniyó kuniyó ña̱ va̱ása va̱ʼa (Amós 5:15). Nu̱ú ña̱ Salmo 16:2, ta̱ David ni̱ka̱ʼa̱nra xa̱ʼa ña̱ va̱ʼaní ini, ta mií Jehová kúú ta̱ kúúmií ña̱yóʼo. Ta̱ David chi̱ka̱a̱ra ndée ña̱ ke̱ʼéra ña̱ va̱ʼa xíʼin inkana ta xi̱sa̱a̱-inira xi̱xinira ña̱ va̱ása kútóo Ndióxi̱, ta ni va̱ása níndasakáʼnura inka ndióxi̱. Va̱ása va̱ʼa ndasakáʼnuyó inka ndióxi̱ chi iinlá Jehová kúú ta̱ xíniñúʼu ndasakáʼnuyó (Is. 2:8, 9; Rev. 4:11).

17, 18. a) ¿Ndáaña ni̱ka̱ʼa̱n ta̱ David kundoʼo na̱ yiví na̱ ndásakáʼnu ndióxi̱ vatá? b) ¿Nda̱chun xóʼvi̱ sava na̱ yiví?

¹⁷ Tá tiempo xi̱naʼá, xi̱keʼéna ña̱ kini tá xi̱ndasakáʼnuna na̱ ndióxi̱ vatá (Os. 4:13, 14). Ku̱a̱ʼání na̱ yiví xi̱ndasakáʼnuna ndióxi̱ vatá chi xi̱kutóona keʼéna ña̱ kini. Soo va̱ása níxi̱kusi̱í-inina. Ta̱ David ni̱ka̱ʼa̱nra nu̱ú Salmo 16:4 ña̱ “ku̱a̱ʼá tu̱ndóʼo” va̱xi nu̱ú na̱ ndásakáʼnu ndióxi̱ vatá. Nda̱a̱ xi̱xaʼnína se̱ʼena ña̱ va̱ʼa keʼéna sacrificio nu̱ú ndióxi̱ vatá (Is. 57:5). Va̱ása níxikutóo Jehová ña̱yóʼo (Jer. 7:31). Tá níxi̱yoún tiempo kán, ¿á va̱ʼaní kuniún tá na̱ yiváún ndásakáʼnuna Jehová?

¹⁸ Tiempo vitin na̱ veʼe-ñu̱ʼu vatá táxina ña̱ kéʼé na̱ ndíku̱nñaʼá ña̱ kini, ta nda̱a̱ táxina ña̱ ná tindaʼa̱ na̱ ta̱a xíʼin inka ta̱a á ñaʼá xíʼin inka ñaʼá. Soo inkáchi íyo ña̱ ndóʼona xíʼin ña̱ ndo̱ʼo na̱ xi̱ndasakáʼnu ndióxi̱ vatá tiempo xi̱naʼá (1 Cor. 6:18, 19). Na̱ yiví ndákanixi̱nína ña̱ kivi keʼéna nda̱a̱ ndáaka ña̱ kúni̱ miína, soo “ku̱a̱ʼá tu̱ndóʼo” va̱xi nu̱úna. Sana xa̱a̱ xítoún ndáaña ndóʼona. Xa̱ʼa ña̱yóʼo kuniso̱ʼo ña̱ káʼa̱n Jehová ta kandíxaún ña̱ va̱ʼa miíún kúúña tá ná kuniso̱ʼún ña̱ káʼa̱nra. Va̱ása nandósóún ña̱, tá ná keʼún ña̱ va̱ása va̱ʼa, loʼova tiempo kusi̱í-iniún chi ku̱a̱ʼá tu̱ndóʼo kixi nu̱ún (Gál. 6:8). Ta̱ Joshua ta̱ ni̱ka̱ʼa̱nyó xa̱ʼa nu̱ú párrafo 10 káchira: “Kivi keʼéyó ndiʼi ña̱ kúni̱ miíyó. Soo tá va̱ása va̱ʼa ndáka̱xinyó ña̱ keʼéyó va̱ása kusi̱í-iniyó”.

19, 20. ¿Ndáaña va̱ʼa ndakiʼin na̱ va̱lí kúaan tá ná kandíxana Jehová ta saátu tá ná kuniso̱ʼona ña̱ káʼa̱nra?

¹⁹ Ta̱ Jesús ni̱ka̱ʼa̱nra xíʼin na̱ ndíku̱nñaʼá: “Tá kéʼéndó ña̱ káʼi̱n xíʼinndó saá kúúndó discípuloi̱, ta kunda̱a̱-inindó xa̱ʼa ña̱ nda̱a̱ ta ña̱yóʼo sañá ndóʼó” (Juan 8:31, 32). Ña̱ sákuaʼayó ña̱ nda̱a̱ kúú ña̱ sáña miíyó nu̱ú ña̱ veʼe-ñu̱ʼu vatá, nu̱ú ña̱ va̱ása kúnda̱a̱-iniyó ta chíndeétáʼanña xíʼinyó ña̱ kǒo kandíxayó ña̱ vatá. Soo su̱ví kuití xíʼin ña̱yóʼo chíndeétáʼanña xíʼinyó. Nda̱a̱ táki̱ʼva sa̱kuaʼayó, chí nu̱únínu taxira ‘ndakiʼún ku̱a̱ʼání bendición ta koún táki̱ʼva íyo na̱ se̱ʼe Ndióxi̱ʼ (Rom. 8:21). Soo saátu tiempo vitin kivi ndakiʼún loʼo ña̱yóʼo. ¿Nda̱saa kivi keʼúnña? Ixato̱ʼó ndiʼi ña̱ káʼa̱n ta̱ Jesús. Saá va̱ʼa kunda̱a̱-iniún ña̱ nda̱a̱, su̱ví xa̱ʼa ña̱ sákuaʼa kuitíúnña, chi xa̱ʼa ña̱ kéʼúnña kúúña.

²⁰ Tá kúún iin ta̱ loʼo á ñá loʼo, chindayáʼvi ña̱ táxi Jehová ndaʼún, ña̱ ndaka̱xiún ña̱ kúni̱ún keʼún. Tá va̱ʼa xíniñúʼúnña va̱ʼaní kana ña̱ keʼún chí nu̱únínu. Iin ta̱ loʼo ta̱ kúú testigo Jehová ka̱chira: “Tá va̱ʼa ndáka̱xiún ña̱ kúni̱ún keʼún vitin, tá ná kuaʼnún va̱ʼaníka keʼúnña tá kúu ña̱ ndaka̱xiún ndáa chiñu kachíñún á tindaʼún á kundatukaún loʼo tiempo ta saávi tindaʼún”.

21. ¿Ndáaña xíniñúʼu keʼún tá kúni̱ún kutakún ndiʼi tiempo?

²¹ Nu̱ú ñuyǐví yóʼo na̱ yiví na̱ káʼa̱n ña̱ va̱ʼaní íyona, loʼova tiempo kúsi̱í-inina. Ni iinna va̱ása xíni̱na ndáaña kivi kundoʼona inka ki̱vi̱ (Sant. 4:13, 14). Ña̱kán ña̱ va̱ʼaníka kúúña tá ná kundiku̱nyó yichi̱ ña̱ ndixa taxi ña̱ kutakuyó ndiʼi tiempo (1 Tim. 6:19). Ndióxi̱ va̱ása íxandúxara xíʼinyó ña̱ ku̱ʼu̱nyó yichi̱ yóʼo. Iin iinyó xíniñúʼu ndaka̱xin ndáaña keʼéyó. Ña̱kán xíniñúʼu kutáʼan va̱ʼún xíʼin Jehová. Chindayáʼvi ndiʼi ña̱ va̱ʼa ña̱ táxira ndaʼún (Sal. 103:5). Ta kandíxaún ña̱ taxira ña̱ va̱ʼa koún ta kusi̱íní-iniún ndiʼi tiempo (Sal. 16:11).