1, 2. E faapefea i le faaa‘oa‘oga a Tony ona iloa ai e mafai ona faia suiga i le olaga?

NA OLA a‘e Tony e leai sona tamā, ma na lē toe fia a‘oga ina ua oo i le kolisi. O lea, na ia faaalu ai le tele o lona taimi i faai‘uga o vaiaso e tifaga ai, ma faatasitasi ma ana uō. E lē faapea o ia o sē e fia malosi, ma e na te leʻi faaaogāina foʻi fualaau faasāina. Peita‘i, e le‘i iai se fuafuaga o lona olaga, ma e na te le‘i mautinoa pe e iai se Atua. O lea ina ua ia feiloa‘i i se ulugalii Molimau a Ieova, ona ia faailoa lea i ai o ona masalosaloga ma fai i ai ana fesili. Na la tuuina iā te ia polosiua The Origin of Life—Five Questions Worth Asking ma le Was Life Created?

² Ina ua toe fo‘i mai le ulugalii e asi Tony, na matuā sui lava ona manatu. E tele taimi na ia faitauina ai polosiua ma ua foliga maanuminumi ai. Na ia fai i le ulugalii: “Ou te iloa e iai le Atua.” Na ia talia se su‘esu‘ega faale-Tusi Paia ma faasolosolo ona sui lana vaai i le olaga. A o le‘i faia lana su‘esu‘ega, e le‘i lelei ona togi i le a‘oga. Peita‘i, na i‘u ina matuā lelei ona togi. E oo lava i le pule a‘oga, na faate‘ia o ia. Na ia fai iā Tony: “Ua matuā lelei lava lau amio ma lau a‘oga. Pe e māfua ona o lou faatasitasi ma Molimau a Ieova?” Na tali i ai Tony o le tulaga lenā, ma ia avatu  ai se molimau lelei. Na i‘u lelei lana a‘oga ma o loo auauna nei o se paeonia sauatoa ma se auauna o le faiva. Ua ia fiafia fo‘i ona ua avea Ieova ma ona Tamā alofa.​—Sala. 68:5.

3. O le ā le fautuaga a Ieova mo talavou?

³ O le mea na tupu iā Tony e faamanatu mai ai le manatu mamafa o Ieova iā te outou talavou. E finagalo o ia ina ia outou maua ni olaga taulau manuia ma faamalieina. O lea, ua ia fautua mai ai: “Ia e manatua o Lē e Sili na Foafoaina oe i aso o lou taule‘ale‘a.” (Fai. 12:1) I le lalolagi i aso nei, e lē faigofie ona maua le taulau manuia ma le faamalieina. Peita‘i, o le fesoasoani a Ieova e mafai ai ona e taulau manuia a o e talavou faapea lou olaga atoa. Ina ia manino lea manatu, se‘i o tatou iloiloina se lesona mai i le ulu atu o le nuu o Isaraelu i le Nuu Folafolaina, faapea le feiloa‘iga a Tavita ma Koliata.

4, 5. O le ā le lesona tāua e tatou te a‘oa‘oina mai i le faato‘ilaloina e Isaraelu o tagata Kanana, ma le faato‘ilaloina e Tavita o Koliata? (Taga‘i i ata i luga a‘e o le matua.)

⁴ Ina ua lata ina ulu atu le nuu o Isaraelu i le Nuu Folafolaina, e le‘i faatonuina i latou e Ieova e faaleleia o latou tomai e tau ai pe toleni mo taua. (Teu. 28:1, 2) Nai lo o lea, na ia faatonuina i latou ina ia usita‘ia ana poloaʻiga, ma faatuatuaina o ia. (Iosua 1:7-9) I le vaaiga faaletagata, e foliga mai e lē talafeagai lenā fautuaga. Peita‘i, o le fautuaga lenā e sili ona lelei, auā na foa‘i atu pea e Ieova iā i latou le manumalo mai i lea taimi i lea taimi, a o latou faato‘ilaloina tagata Kanana. (Iosua 24:11-13) Na mana‘omia le faatuatua ina ia usita‘i ai i le Atua, ma o lenā faatuatua na latou taulau manuia ai pea. O le tulaga moni lenā i taimi ua mavae, ma e faapena fo‘i aso nei.

⁵ O Koliata o se toa malosi e pe ā ma le iva ma le ‘afa futu (2.9 mita) lona maualuga, ma sa faaauupegaina lelei o ia. (1 Samu. 17:4-7) Peita‘i, e na o le lua mea sa iai iā Tavita: o lana maatā ma lona faatuatua i lona Atua o Ieova. I le vaai a le tagata e lē malosi le faatuatua, e foliga mai ua valea Tavita. Ae o le mea moni, o le tagata valea o Koliata.​—1 Samu. 17:48-51.

6. O ā vala o le a faalauteleina i lenei mataupu?

⁶ Na tatou talanoaina i le mataupu ua mavae mea e fā e saosaolaumea i lo tatou fiafia ma le taulau manuia i le olaga. O nei vala e aofia ai le faamalieina o o tatou mana‘oga faaleagaga, faia o uō lelei, faataatitia o sini aogā, ma le faatāuaina o lo tatou sa‘olotoga i le avea ai ma tagata o le Atua. O lea, se‘i o tatou faalauteleina nei vala e faaaogā ai le Salamo e 16.

7. (a) E faapefea ona e faamatalaina le tagata faaleagaga? (e) O le ā le “tofi” o Tavita, ma na faapefea ona aafia ai o ia?

⁷ O le tagata faaleagaga, e faatuatua i le Atua ma vaai i mea e pei ona silasila i ai le Atua. E sa‘ili i le Atua mo ta‘iala ma e maumaua‘i e usiusita‘i iā te ia. (1 Kori. 2:12, 13) O Tavita o se faaa‘oa‘oga lelei o lea vala, ma na ia pese: “O Ieova o lo‘u tofi ma o la‘u ipu.” (Sala. 16:5) O lenā “tofi” e aofia ai le faiā lelei a Tavita ma Ieova, o lē na ia sulufa‘i i ai. (Sala. 16:1) O le ā le i‘uga? Na ia tusi: “O le mea lea e olioli ai lo‘u loto.” Ioe, e leai se mea e sili atu na maua ai e Tavita le fiafia nai lo o lana faiā ma Ieova.​—Faitau le Salamo 16:9, 11.

8. O ā nisi o vala e mafai ona tatou maua ai se olaga e faamalieina moni?

⁸ E lē maua e i latou e faaautū o latou olaga i mea faafiafia ma ‘oa faaletino le fiafia sa maua e Tavita. (1 Timo. 6:9, 10) Ua  faapea mai se uso mai i Kanata: “O le faamalieina moni e lē maua mai i mea e tatou te mauaina mai i le olaga, ae o mea e tatou te foa‘iina atu i Lē e foa‘i maia meaalofa lelei uma, o Ieova le Atua.” (Iako. 1:17) O le atia‘e o le faatuatua i le Atua ma auauna iā te ia, e tatou te maua ai le fiafia ma le faamalieina. E faapefea ona tuputupu a‘e lou faatuatua? E tatau ona e faaalu se taimi mo Ieova e ala i le faitau i lana Afioga, mātau ana foafoaga, ma mafaufau i ona uiga e aofia ai lona alofa mo oe.​—Roma 1:20; 5:8.

9. E faapefea ona e faatagaina le Afioga a le Atua e faatonutonuina oe e pei ona faia e Tavita?

⁹ O nisi taimi e faailoa mai le alofa o le Atua iā i tatou e ala mai i faasa‘oga, e pei ona faia e se tamā alofa. Na talia fo‘i e Tavita faasa‘oga, ma na ia faapea mai: “Ou te vivii atu iā Ieova o lē na fautuaina a‘u. Ma i le pō e faasa‘oina ai a‘u e o‘u manatunatuga loloto.” (Sala. 16:7) Sa mafaufau loloto Tavita i manatu o Ieova, ma faatagaina na manatu e faatonutonuina ai o ia. Pe a e faia fo‘i faapea, o le a faamalosia lou alofa mo le Atua faapea lou faanaunauga e usiusita‘i iā te ia. O le a e matua ai faaleagaga ma loloto ai fo‘i lou malamalama faaleagaga. Ua faapea mai le tuafafine o Christin: “Pe a faia a‘u sa‘ili‘iliga ma manatunatu loloto i ai, e tai pei lava na tusia faapitoa e Ieova lenei mataupu mo a‘u.”

10. E pei ona taʻua i le Isaia 26:3, o le ā le aogā iā te oe o le mafaufau faaleagaga?

¹⁰ Pe a e mafaufau faaleagaga, o le a e malamalama ai i le tulaga o le lalolagi ma mea o le a tutupu i le lumana‘i, e pei ona silasila i ai Ieova. Ua foa‘i mai e Ieova lenā poto ma le malamalama. Aiseā? E finagalo o ia ina ia sa‘o mea e faamuamua i lou olaga, faia filifiliga atamai, ma iai se vaaiga mautinoa i le lumana‘i. (Faitau le Isaia 26:3.) Ua ta‘ua e Joshua o se uso e nofo i le Iunaite Setete, “O le mafuta vavalalata iā Ieova o le a e iloa ai mea e tatau ona faatāua i le olaga.” O le mea moni, o le a tatou maua ai ni olaga faamalieina.

11. O le ā se faamatalaga a Tavita e faatatau i le auala e maua ai uō moni?

¹¹ Faitau le Salamo 16:3. Na iloa e Tavita le auala e maua ai uō moni. Sa ia “matuā fiafia” i le faifaimea faatasi ma ē e alolofa iā Ieova. Ua faamatalaina i latou o “le ‘aupaia,” ona o a latou amioga mamā. O faalogona fo‘i na o se tasi o faisalamo e faatatau i le filifilia o ana uō. Na ia tusi: “Ua fai a‘u ma uō a i latou uma o ē e matata‘u iā te oe, ma i latou fo‘i o ē e tausi i au faatonuga.” (Sala. 119:63) E pei ona ta‘ua i le mataupu ua mavae, e mafai ona e maua uō lelei mai i ē e matata‘u ma usiusita‘i iā Ieova. E aofia ai fo‘i i latou e tou te lē tupulaga faatasi.

12. O le ā na faavae ai le faauōga a Tavita ma Ionatana?

¹² E lē na o ē na tupulaga ma Tavita na ia faauō i ai. Pe e te manatua se tasi o “alii sili” na avea ma ana uō pele? O lona igoa o Ionatana. O le mea moni, o la la‘ua faigāuō o se tasi o faigāuō e sili ona māfana o loo faamatalaina i le Tusi Paia. Ae pe e te iloa e toetoe 30 tausaga e matua atu ai Ionatana iā Tavita? O le ā na faavae ai la la‘ua faauōga? O le faatuatua i le Atua, faaaloalo loloto o le tasi i le isi, ma le vaaia e le tasi o le lototele o le isi a o tau ma fili o le Atua.​—1 Samu. 13:3; 14:13; 17:48-50; 18:1.

13. E faapefea ona e maua nisi uō? Aumai se faata‘ita‘iga.

¹³ E pei o Tavita ma Ionatana, e mafai fo‘i ona tatou “matuā fiafia” pe a faauō i ē e alolofa iā Ieova ma faatuatua iā te ia. Ua faapea mai Kiera, o sē ua loa tausaga o auauna iā Ieova: “E tele a‘u uō i so o se vaega o le lalolagi, ma e eseese uma o latou talaaga ma  aganuu.” Pe a e faauō atu i tagata eseese, o le a e iloa ai le auala ua autasia ai e le Tusi Paia ma le agaga paia i tatou o se aiga i le lalolagi aoao.

14. (a) O le ā e fesoasoani iā te oe ina ia faatutū ai ni sini aogā i le olaga? (e) O ā faalogona o nisi talavou i le faatutūina o sini faaleagaga?

¹⁴ Faitau le Salamo 16:8. Na taula‘i atu le olaga o Tavita i le auaunaga i le Atua. E mafai fo‘i ona e maua se olaga faamalieina pe a e faamuamua le auaunaga iā Ieova, ma manatua o ia pe a faatutū ou sini. Ua faapea mai se uso e igoa iā Steven, “E maua le faamalieina pe a ou galue e ausia se sini, aemaise pe a ou mātauina le tele o suiga lelei na ou faia.” Ua ta‘ua e se uso talavou mai i Siamani o loo auauna i se isi vaipanoa, “Pe a ou matua, ou te lē mana‘o e toe tepa i tua ma iloa ai, e pau mea sa ou faia o mea na ou mana‘o i ai.” E matou te faamoemoe o ou faalogona fo‘i na. Pe afai o lea, ia faaaogā au taleni ma tomai e faamamaluina ai Ieova, ma faia ai mea lelei mo isi. (Kala. 6:10) Ia faatutū ni ou sini faaleagaga ma tatalo iā Ieova e fesoasoani mai ina ia e ausia na sini, auā e fiafia o ia e tali mai i na talosaga.​—1 Ioa. 3:22; 5:14, 15.

15. O ā ni sini e mafai ona e faatutūina? (Taga‘i i le pusa “ Nisi o Sini Aogā.”)

¹⁵ O ā ni sini e mafai ona e faatutūina? Atonu e aofia ai le faia o tali i sauniga i au lava upu, auai i le auaunaga paeonia po o le Peteli fo‘i. Atonu e mafai fo‘i ona taumafai e a‘oa‘o se isi gagana, ina ia mafai ai ona e galue i se vaipanoa e tautatala i lenā gagana. Ua faapea mai se talavou o loo i le auaunaga faataimi atoa e igoa iā Barak, “Pe a ou ala ane i le taeao, ou te lagona le fiafia i le iloaina o loo faaaogā lo‘u malosi atoa e auauna ai iā Ieova, ma e pau lenei o le galuega e maua ai le fiafia moni.”

16. O ā faalogona o Tavita e faatatau i tulafono ma ta‘iala a Ieova, ma aiseā?

¹⁶ Faitau le Salamo 16:2, 4. E pei ona ta‘ua i le mataupu ua mavae, o tulafono ma ta‘iala amiotonu a le Atua e faasa‘olotoina ai i tatou, auā e fesoasoani e tatou te atia‘e ai le ‘ino‘ino i le leaga ae naunau i le lelei. (Amo. 5:15) I le ulua‘i gagana, o le uiga o le  faamatalaga a Tavita o Ieova o le Puna o mea lelei uma. Na taumafai malosi Tavita e faaa‘oa‘o i le Atua, ma faia mea lelei. Na ia atia‘e fo‘i le ‘ino‘ino i mea e ‘ino‘ino i ai le Atua. E aofia ai le ifo i tupua, o se faiga e aveesea ai le tulaga mamalu o tagata, ma lē avatu ai le viiga e tatau iā Ieova.​—Isa. 2:8, 9; Faaa. 4:11.

17, 18. (a) O le ā na ta‘ua e Tavita e faatatau i āuga leaga o tapua‘iga sesē? (e) Aiseā ua ‘matuā tele ai tigā’ o tagata i aso nei?

¹⁷ I taimi o le Tusi Paia, e masani ona aofia feusua‘iga lē mamā i tapua‘iga sesē. (Ho. 4:13, 14) Na fiafia tagata i tapua‘iga sesē ona o na amioga lē mamā. Peita‘i, e latou te le‘i maua ai le fiafia tumau. Na faapea mai Tavita: “Ua matuā tele lava mea tigā e oo iā i latou e televavave e mulimuli atu i se isi atua.” E lē gata i lea, na oo lava fo‘i ina latou ofoina atu a latou fanau e fai ai taulaga i atua sesē. (Isa. 57:5) Na ‘ino‘ino Ieova i na faiga leaga. (Iere. 7:31) Pe afai na e ola i lenā vaitaimi, e mautinoa lou lotofaafetai pe afai na faatuatua ou mātua iā Ieova ma usiusita‘i iā te ia.

¹⁸ I aso fo‘i nei, ua talia e tapua‘iga sesē amioga lē mamā taufeusua‘iga, e oo lava i faiga faatauatane ma tauafafine. Peita‘i, e le‘i suia lava le i‘uga o na amioga tuufau talu mai taimi o le Tusi Paia. (1 Kori. 6:18, 19) Atonu ua e mātauina, o i latou e faia nei amioga “ua matuā tele lava mea tigā e oo iā i latou.” O lea, talavou ia faalogo i lo outou Tamā i le lagi. Ia e matuā mautinoa, o lou usita‘i iā te ia e mo lou lava lelei. Ia matuā mafaufau lelei i āuga leaga o amioga lē mamā, ona iloa ai lea e na o sina taimi puupuu e faamalie ai tu‘inanauga, ae e mata‘utia aafiaga e oo i ai. (Kala. 6:8) Ua faapea mai Joshua lea na ta‘ua muamua: “E pule i tatou i le faaaogāina o lo tatou sa‘olotoga, ae e lē mafai ona faamalieina i tatou pe a faaaogā sesē lenā sa‘olotoga.”

19, 20. O ā faamanuiaga e maua e talavou e faatuatua ma usiusita‘i iā Ieova?

¹⁹ Na fetalai Iesu i ona soo: “O outou o o‘u soo moni pe a outou tumau i a‘u upu, ma e iloa e outou le upu moni, e tuusa‘oloto fo‘i outou e le upu moni.” (Ioa. 8:31, 32) O lenā sa‘olotoga e aofia ai lo tatou malamalama i le tele o mea, faapea le sa‘oloto mai i tapua‘iga sesē ma faiga faaagaga. I le lumana‘i, o le a aofia ai fo‘i ma “le sa‘olotoga mamalu o le fanau a le Atua.” (Roma 8:21) E mafai ona tatou tofo i lenā sa‘olotoga i lenei taimi, e ala i le ‘tumau i upu a Keriso’ po o ana a‘oa‘oga. O le faia faapea, e lē gata o le a tatou ‘iloa ai le upu moni,’ ae o le a tatou ola fo‘i e tusa ma lenā upu moni.

²⁰ Talavou, ia faatāua lou sa‘olotoga mai i le Atua. Ia faaaogā ma le atamai lenā sa‘olotoga ma faataatia ai se faavae lelei mo le lumana‘i. Ua faapea mai se uso talavou: “O le faaaogā ma le atamai e se talavou o lona sa‘olotoga, o le a fesoasoani iā te ia pe a feagai mulimuli ane ma filifiliga tetele, e pei o le sa‘ilia o se galuega talafeagai, po o le filifili fo‘i pe e faaipoipo pe e nofofua mo sina taimi.”

21. E faapefea ona tatou tumau i le ala i “le ola moni”?

²¹ I lenei faiga tuai o mea, e oo lava i le ituaiga olaga e fai mai tagata o se olaga lelei, e puupuu ma e lē mautinoa. E tatou te lē mautinoa le mea o le a tupu taeao. (Iako. 4:13, 14) O se faiga atamai la le tumau i le ala e tau atu i “le ola moni,” o le ola lea e faavavau. (1 Timo. 6:19) O le mea moni e lē faamalosia e le Atua i tatou e savavali i lenā ala. O le filifiliga lenā e pa‘ū iā i tatou lava. O lea, ia avea Ieova ma ou “tofi,” ma faatāua le tele o “mea lelei” ua ia foa‘i mai mo oe. (Sala. 103:5) Ia e mautinoa fo‘i, o le a ia foa‘i mai le tele o “le olioli e malie ai” ma “le olioli e oo i le faavavau.”​—Sala. 16:11.