1, 2. Fa na eksempre fu Tony e sori taki sma kan tyari kenki kon na ini den libi?

WAN boi di nen Tony gro kon bigi sondro wan papa. Di a ben de na middelbaar skoro, a no ben e span nanga skoro. Te satra nanga sonde a ben e go luku felem noso a ben e go koiri nanga den mati fu en. A no ben ogri èn a no ben e gebroiki drugs tu. Ma a no ben sabi san a ben musu du nanga en libi. A ben e tweifri tu efu wan Gado de. Wan dei a miti wan Kotoigi trowpaar èn a taigi den taki a e tweifri efu wan Gado de. Den gi en den tu brochure Vijf belangrijke vragen over het ontstaan van het leven nanga Is het leven geschapen?

² Di a trowpaar go luku Tony baka, den si taki a ben e denki tra fasi. A ben studeri den brochure so furu taki den kisi buriki yesi èn den ben kroiki. A taigi den: „Wan Gado musu fu de.” A bigin studeri Bijbel èn safrisafri a bigin denki tra fasi fu a libi. Boiti dati, a ben e wroko bun na skoro now. A ben e kisi den moro hei cijfer. Srefi a driktoro fu a skoro di ben sabi taki Tony ben e studeri nanga Yehovah Kotoigi, no ben man bribi fa Tony kenki. A aksi en: „Na fu di yu e bumui nanga den Kotoigi, meki yu e tyari yusrefi bun now èn yu e kisi bun cijfer?”  Tony taigi en Iya, èn a preiki gi en. Te fu kaba a klari en skoro èn now a e dini leki gewoon pionier nanga dinari ini a diniwroko. A breiti tu taki now a abi wan lobi Papa, Yehovah.​—Ps. 68:5.

3. Sortu rai Yehovah e gi yonguwan?

³ A tori fu Tony e sori taki Yehovah e broko en ede nanga yu leki yonguwan. A wani taki yu abi wan koloku libi. Dati meki a e taigi yu: „Memre yu Gran Mekiman na ini yu yongu yari” (Preik. 12:1). A sani disi no makriki na ini a ten disi, ma a no de fu taki dati wi man du en. Gado kan yepi yu fu de koloku te yu yongu èn srefi te yu kon owru. Fu yepi yu fu frustan disi, wi o go luku san yepi den Israelsma fu teki a Pramisi Kondre abra èn san gi David a krakti fu wini Goliat.

4, 5. San wi kan leri fu a fasi fa den Israelsma wini den Kanansma èn fa David wini Goliat? (Luku den prenki na a bigin fu na artikel.)

⁴ Di den Israelsma ben de krosibei fu go na ini a Pramisi Kondre, Gado no taigi den fu oefen fu tron moro bun fetiman (Deut. 28:1, 2). Ma a taigi den taki den musu gi yesi na den wet fu en èn den musu frutrow na en tapu (Yos. 1:7-9). Gi libisma a kan gersi leki a rai disi no o wroko! Ma a ben de a moro bun rai, fu di ibri leisi baka Yehovah ben meki en pipel wini den Kanansma (Yos. 24:11-13). Iya, fu man gi yesi na Gado wi musu abi bribi. Te wi abi bribi, dan ala ten sani o waka bun gi wi. Disi ben de so na ini owruten èn te now a de so ete.

⁵ Goliat, wan tranga fetiman ben langa sowan 2.9 meter èn a ben abi bun fetisani (1 Sam. 17:4-7). Ma David ben abi tu sani nomo: Wan slenger nanga bribi na ini Yehovah Gado. Wan sma di no abi bribi ben o denki taki David du wan don sani fu go feti nanga Goliat. Ma dati no de so! Na Goliat du wan don sani fu go feti nanga David.​—1 Sam. 17:48-51.

6. San wi o luku na ini na artikel disi?

⁶ Na ini na artikel na fesi, wi luku fo sani di kan meki taki wi abi wan koloku libi. Wi si taki wi musu gebroiki den sani di Yehovah gi wi fu tron mati fu en, wi musu suku mati di lobi Yehovah Gado, wi musu poti marki di kan meki wi go na fesi èn wi musu warderi a fri di Gado gi wi. Wi o taki moro fara fu den sani disi èn wi o luku fa Psalm 16 kan yepi wi fu du den sani disi.

7. (a) Fa wi kan sabi efu wan sma abi a yeye fu Gado? (b) San na a wan-enkri sani di David ben abi fanowdu èn fa disi ben meki a firi?

⁷ Wan sma di abi a yeye fu Gado, na wan sma di abi bribi na ini Gado èn di e denki leki Gado. So wan sma e meki Gado tiri en èn a e gi yesi na Gado ala ten (1 Kor. 2:12, 13). David ben de so wan sma. A ben singi: „Mi e dini Yehovah èn dati na ala san mi abi fanowdu. Na en e furu a kan fu mi” (Ps. 16:5). David ben de nanga tangi taki a ben abi wan bun matifasi nanga Gado èn a ben e go suku yepi na en (Ps. 16:1). Dati meki a ben taki: „Mi breiti srefisrefi.” Iya, nowan tra sani ben e gi David so furu prisiri leki a bun matifasi di a ben abi nanga Yehovah.​—Leisi Psalm 16:9, 11.

8. San na wan tu sani di kan meki taki wi de koloku?

⁸ Sma di lobi moni èn sma di e denki soso prisiri, no o man de koloku leki David (1 Tim. 6:9, 10). Wan brada na ini Kanada e taki: „A no den sani di wi e kisi e meki wi de koloku, ma na den sani di wi e gi Yehovah, a Gado di gi wi furu bun  presenti” (Yak. 1:17). Iya, te wi e bribi na ini Yehovah èn te wi e dini en, dan wi o du wan bun sani nanga wi libi èn dati o meki taki wi de trutru koloku. San yu kan du fu kon abi wan moro tranga bribi? Yu musu meki ten gi Yehovah. Sobun, yu musu leisi Gado Wortu, yu musu luku den sani di a meki èn yu musu prakseri den moi fasi di a abi, soleki a lobi fu en.​—Rom. 1:20; 5:8.

9. Fa yu kan meki Gado Wortu kenki yu neleki fa a ben kenki David?

⁹ Fu di Gado lobi wi, meki son leisi a e gi wi piri-ai neleki fa wan papa e du dati. David ben e teki den piri-ai dati. A ben taki: „Mi o prèise Yehovah, a Gado di gi mi rai. Iya, te neti mi niri piri-ai gi mi” (Ps. 16:7). David ben e denki dipi fu a fasi fa Gado ben e si sani, a ben e pruberi fu denki leki Gado èn a ben e tyari kenki kon te dati ben de fanowdu. Te yu e du a srefi sani, dan yu o kon kisi moro lobi gi Gado èn ala ten yu o wani arki en. Boiti dati, yu o tron wan lepi Kresten. Wan sisa di nen Christin e taki: „Te mi e studeri wan tori èn mi e denki dipi fu san mi leisi, dan mi e kisi a firi taki na gi mi Yehovah skrifi a tori!”

10. Soleki fa Yesaya 26:3 e taki, dan sortu wini a abi te wi abi a denki fu Yehovah?

¹⁰ Te yu abi a denki fu Gado, dan yu o si a grontapu disi neleki fa Yehovah e si en. Yehovah e gi yu koni nanga frustan. Fu san ede a e du dati? Fu di a wani taki yu sabi san moro prenspari na ini a libi, a wani taki yu teki bun bosroiti èn a no wani taki yu frede den sani di o pasa na ini a ten di e kon. (Leisi Yesaya 26:3.) Wan brada di nen Joshua èn di e libi na ini Amerkankondre e taki: „Te yu e tan krosibei fu Yehovah, dan yu o si ala sani na a yoisti fasi.” A sani disi tru èn a e meki taki wi de koloku!

11. Nanga suma David ben e meki mati?

¹¹ Leisi Psalm 16:3. David ben sabi fa fu meki bun mati. A ben e suku mati di ben lobi Yehovah èn di ben e gi yesi na den wet fu En. Disi ben gi David furu prisiri. A ben kari den „santawan”, fu di den ben e tyari densrefi na wan krin fasi. Wan tra psalm skrifiman ben abi den sortu mati disi tu. A ben skrifi: „Mi na wan mati fu ala den sma di abi lespeki gi yu èn fu den wan di e hori den komando fu yu” (Ps. 119:63). Soleki fa wi si na ini na artikel na fesi, dan yu srefi kan feni furu bun mati di e lespeki Yehovah èn di e gi yesi na en. Den mati disi kan de yu speri, ma den kan owru moro yu tu.

12. San meki taki David nanga Yonatan ben de bun mati?

¹² David no ben e tron mati soso nanga den speri fu en. Yu sabi wan fu den bun mati fu David? En nen na Yonatan. A matifasi fu David nanga Yonatan, na wan fu den moiwan na ini Bijbel. Ma yu ben sabi taki Yonatan ben owru sowan 30 yari moro David? San meki taki den ben de so bun mati fu makandra? Den ben abi bribi na ini Gado, den ben e lespeki makandra èn den ben e si den bun fasi fu makandra, soleki a deki-ati di den sori di den feti nanga den feanti fu Gado.​—1 Sam. 13:3; 14:13; 17:48-50; 18:1.

13. Fa yu kan meki moro mati? Gi wan eksempre.

¹³ Neleki David nanga Yonatan, wi kan feni mati tu di lobi Yehovah èn di e bribi na ini en. Kiera, di e dini Yehovah furu yari kaba e taki: „Mi meki mati nanga sma na heri grontapu. Sma di kweki na difrenti fasi èn sma fu difrenti kulturu.” Te yu e du a srefi, dan yu o si taki a Wortu fu Gado nanga a santa yeye e meki taki  wánfasi de na mindri brada nanga sisa na heri grontapu.

14. (a) Fa wi kan poti marki di o meki taki wi de koloku? (b) San son yonguwan e taki fu den sani di den du na ini na anbegi?

¹⁴ Leisi Psalm 16:8. David ben feni en prenspari fu dini Gado. Yu srefi o de koloku te yu e poti na anbegi fu Yehovah na a fosi presi èn te yu e poti marki di o meki taki Yehovah breiti nanga yu. Wan brada di nen Steven e taki: „Te mi wroko tranga fu doro wan marki di mi ben poti, dan mi e firi koloku te mi si taki mi ben man du en èn taki mi go na fesi.” Wan yongu brada fu Doisrikondre di e dini now na ini wan tra kondre, e taki: „Te mi kon owru èn mi prakseri fa mi libi waka, dan a no musu de so taki ala sani di mi du ben de gi misrefi nomo.” Wi howpu taki yu e denki so tu. Efu na so yu e denki, dan gebroiki den koni di yu abi fu gi grani na Gado èn fu yepi trawan (Gal. 6:10). Poti marki di o yepi yu fu go na fesi èn aksi Yehovah fu yepi yu fu doro den marki disi. Yu kan de seiker taki Yehovah o piki den begi disi.​—1 Yoh. 3:22; 5:14, 15.

15. Sortu marki yu kan poti gi yusrefi? (Luku a faki „ Wan tu marki di yu kan poti”.)

¹⁵ Sortu marki yu kan poti gi yusrefi? Yu kan du muiti fu gi piki na den konmakandra nanga yu eigi wortu, yu kan pionier noso yu kan go dini na Betel. Yu kan pruberi fu leri wan tra tongo, so taki yu kan go dini na ini wan tra gemeente. Barak, wan yongu brada di e du furuten diniwroko, e taki: „Ibri mamanten te mi wiki mi e firi bun, fu di mi sabi taki mi e wroko tranga gi Yehovah. Nowan tra sani e gi mi so wan switi firi.”

16. Fa David ben e denki fu den wet fu Yehovah èn fu san ede?

¹⁶ Leisi Psalm 16:2, 4. Soleki fa wi si na ini na artikel na fesi, dan wi o de fri te wi e hori wisrefi na den wet fu Gado. Den wet disi e yepi wi fu lobi san bun èn fu tegu gi ogri (Amos 5:15). Na ini  a Bakratongo Nyun-Grontapuvertaling, David e taki na ini Psalm 16:2 taki ala bun sani e kon fu Yehovah. Sobun, David ben e si Yehovah leki a Gado di bun dorodoro. Dati meki a ben e wroko tranga fu teki na eksempre fu Gado èn fu du bun gi trawan tu. Boiti dati, a leri fu no lobi sani di Yehovah no lobi. Wan tu fu den sani dati na a anbegi di sma e anbegi falsi gado. Den sma di e du disi e lagi densrefi èn den no e gi Yehovah a grani di a musu kisi.​—Yes. 2:8, 9; Openb. 4:11.

17, 18. (a) Soleki fa David taki, dan san e pasa te sma e anbegi falsi gado? (b) San e meki taki sma „e kisi furu problema” na ini a ten disi?

¹⁷ Na ini Bijbel ten, sma di ben e anbegi falsi gado ben e libi wan hurulibi tu (Hos. 4:13, 14). Furu sma ben e anbegi falsi gado fu di den ben lobi du san a sondu skin wani. Ma a sani disi ben e meki den de koloku? Kwetikweti! David ben taki dati den sma di e anbegi falsi gado „e kisi furu problema”. Boiti dati, den sma disi ben e du ogri nanga furu pikin (Yes. 57:5). Yehovah e tegu gi den sani disi! (Yer. 7:31) Efu yu ben e libi na ini a ten dati, dan yu ben o breiti efu yu papa nanga mama ben e bribi na ini Yehovah èn efu den ben e gi yesi na en.

¹⁸ Na ini a ten disi tu, falsi kerki no e krutu sma di e libi wan hurulibi. Den feni en bun srefi taki sma e libi wan homo sekslibi. Son sma di e du den sani disi denki taki den fri, ma dati no de so (1 Kor. 6:18, 19). Soleki fa yu srefi si, dan sma di e libi na a fasi disi „e kisi furu problema”. Sobun, yonguwan, un arki un hemel Papa. Unu kan de seiker taki unu o kisi furu wini te unu e gi yesi na en. Hori na prakseri taki na fu wan syatu pisi ten nomo yu o prisiri te yu trangayesi Gado, ma den takru bakapisi e tan fu wan langa pisi ten (Gal. 6:8). Joshua di wi ben taki fu en kaba, e taki dati wi fri fu du iniwan sani, ma efu wi e trangayesi Gado, wi no o de koloku.

19, 20. Sortu blesi yonguwan di abi bribi èn di e gi yesi na Yehovah o kisi?

¹⁹ Yesus ben taigi den bakaman fu en: „Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri” (Yoh. 8:31, 32). Wi e kon fri fu falsi anbegi, fu falsi gwenti èn fu tra sani. Soleki fa wi si, dan te fu kaba wi „o kon fri na wan tumusi moi fasi leki pikin fu Gado” (Rom. 8:21). Ma nownow kaba yu kan de fri te yu e ’tan du den sani di Yesus taki’. Na so yu o kon „sabi san tru”. A no fu di yu e studeri Bijbel nomo, ma fu di yu e du san yu leri tu.

²⁰ Yonguwan, warderi a fri di Gado gi yu. Gebroiki en na wan koni fasi. Te yu e du dati, dan yu o teki bosroiti di o meki taki yu libi waka bun na ini a ten di e kon. Wan yongu brada ben taki: „Te yu e gebroiki a fri di yu abi fu teki koni bosroiti te yu yongu, dan a o makelek gi yu fu teki prenspari bosroiti te yu kon bigi. Yu o man bosroiti sortu wroko yu o du, efu yu o trow noso efu yu o tan yu wawan fu wan pisi ten.”

21. Fa yu kan kisi „a trutru libi”?

²¹ Na ini a grontapu disi, ala sani na fu wan syatu pisi ten. Srefi sma di abi wan bun libi kan lasi en. Nowan sma sabi san tamara o tyari kon (Yak. 4:13, 14). Dati meki a moro bun sani di yu kan du na fu teki bosroiti di o meki taki yu kisi „a trutru libi”, dati na têgo libi (1 Tim. 6:19). Yehovah no e dwengi sma fu dini en. Wisrefi musu bosroiti efu wi o du dati. Sobun, dini Yehovah èn de nanga tangi gi ala den „bun” sani di a gi yu (Ps. 103:5). Yu kan de seiker taki Yehovah o meki yu „prisiri fu ala ten”.​—Ps. 16:11.