1, 2. ¿La limasiya tuku titaxtulh Tony pi tlan tlawakan talakgpalit kkilatamatkan?

TONY chatum kgawasa tiku ni xkgalhi xtlat chu ni xlakgati xʼan kʼescuela. Asta xlakpuwanit pi namakgxtakga xtakgalhtawakga. Akxni ksputa semana ankgalhin wa xʼamigos xkatatawila o kaj xʼan kcine. Ni lixkajni xlikatsi ni xmaklakaskin drogas, pero kaj nitu xlilakpuwan pi wi tuku natlawa kxlatamat chu ni lu xkanajla komo wi Dios. Wa xlakata lakgapasli akgtum tamakgaxtokgat tiku xtatayananin Jehová chu kalitachuwinalh tuku xlakpuwan. Chu xlakan maxkikgolh folletos nema wanikan El origen de la vida chu ¿Es la vida obra de un Creador?

² Akxni uma tamakgaxtokgat taspitli, Tony xtalakgpalinit. Xlikgalhtawakganit maktiy folletos chu xtasiya pi makglhuwa xlikgalhtawakganit xlakata xtalakkunchinit revista. Tony kawanilh: «Xlikana pi max lama Dios». Makgamakglhtinalh takgalhtawakga xalak Biblia chu tsinu tsinu lakgpalilh la xlakpuwan. Nachuna lu tlan tsukulh kitaxtuni kʼescuela. Chu director lu kaks lilakawa. Wanilh: «Lu lakgpalinita mintayat chu lu tlan lipimpat mintakgalhtawakga. ¿Wa xlakata katalikgalhtawakgapat Biblia xtatayananin Jehová?». Tony wanilh pi chuna  chu lixakgatlilh tuku xkatsininit. Alistalh masputulh xtakgalhtawakga chu la uku precursor regular chu siervo ministerial. Nachuna la uku lu paxuwa xlakata kgalhi chatum xTlat tiku tlan likatsi, Jehová (Sal. 68:5).

3. ¿Tuku tastakyaw kamaxki Jehová la uku kamanan?

³ Xpalakata tuku titaxtulh Tony, Jehová kinkamasiyaniyan pi xla lu kalilakgaputsa kamanan. Xla lakaskin pi kalipaxuwa akgtum tlan latamat. Wa xlakata maxkiyan uma tastakyaw: «Kalakapastakti lu xaTlan miMalakatsukina la uku akxni kgawasaku wix» (Ecl. 12:1, nota). La uku, max tuwa namakgkatsiya chuna natlawaya pero namatlaniya. Xlakata xtamakgtay Jehová tlan nakinkakitaxtuniyan, ni kaj xman akxni la kajku kgawasa wix, nachuna xliputum milatamat. Xlakata tlakg tlan naʼakgatekgsaw uma, kaʼakxilhwi tuku kamakgtayalh israelitas xlakata naʼakgchipakgo Tiyat nema xkamalaknunikanit chu tuku maxkilh litliwakga David xlakata tlan natlaja Goliat.

4, 5. Akxni lilakpuwanaw tuku kamakgtayalh israelitas xlakata tlan naʼakgchipakgo Tiyat nema xkamalaknunikanit chu tuku makgtayalh David xlakata tlan natlaja Goliat, ¿tuku katsiniyaw? (Kaʼakxilhti xapulana dibujo).

⁴ Akxni israelitas atsinu xtsankga natanukgo kTiyat nema xkawanikanit nakamaxkikan, Dios ni kawanilh pi xlitsakgsakgolh xlakata tlakg tlan soldados xlitaxtukgolh ni para naʼankgo kʼguerra (Deut. 28:1, 2). Wata kawanilh pi xkgalhakgaxmatkgolh xtastakyaw chu xlipawankgolh (Jos. 1:7-9). Max kxpalakatakan latamanin uma kaj nitu xlitaxtu. Pero uma tlakg tlan tastakyaw nema makglhtinankgolh, xlakata xtamakgtay Jehová tlan katlajakgolh cananeos (Jos. 24:11-13). Xlikana, xlakata nakgalhakgaxpata Dios talakaskin nakgalhiyaw takanajla. Komo nakgalhiyaw takanajla, ankgalhin tlan nakinkakitaxtuniyan. Uma lu xlikana la uku chuna la xamakgasa kilhtamaku.

⁵ Goliat chatum tliwakga soldado xwanit nema xkgalhi akgtutu metro xlilanka (9,5 pies). Nachuna xatakgatsin xlin tuku xmaklakaskinkan kʼguerra (1 Sam. 17:4-7). Pero David kajwatiya akgtiy tuku xlin: xlixkgontalatni chu xlakata xkanajlani Jehová. Tiku nitu kgalhikgo takanajla xʼakxilhkgo David la chatum tonto. Pero uma nichuna, wata Goliat tiku xatonto xwanit (1 Sam. 17:48-51).

6. ¿Tuku nalichuwinanaw kʼuma artículo?

⁶ Kʼartículo nema titaxtulh pulaktati tuku lichuwinaw nema tlawa pi tlan tapaxuwan natawilayaw: namatliwakglhaw kintakanajlakan, nakgalhiyaw laktlan amigos kxkachikin Jehová, wi tuku nalakgchamputunaw kkilatamatkan chu lanka xtapalh naliʼakxilhaw xlakata tlan nalaksakaw tuku tlawaputunaw. Kʼuma artículo tlakg nalichuwinanaw xlakata uma chu naʼakxilhaw makgapitsi tastakyaw xalak Biblia nema tekgsaw kSalmo 16.

7. 1) ¿Tuku litalakgapasa tiku matliwakglha xtakanajla? 2) ¿Tuku xkilhchanima David akxni wa pi «xtapakgsini» chu la xlimakgtaya uma?

⁷ Tiku matliwakglha xtakanajla kanajlani Dios chu liskuja xlakata nachuna naʼakxilha tuku tlan chu tuku nitlan chuna la xla. Putsa xtamakgtay chu liwana lakpuwanit nakgalhakgaxmata (1 Cor. 2:12, 13). Chuna xlikatsi David. Kʼakgtum takilhtlin wa pi Jehová wa «xtapakgsini», xwamputun pi tlan xtalalin (Sal. 16:5). Lu xpaxtikatsini xlakata xʼamigo Dios xlitaxtu chu wa xlipawan (Sal. 16:1). Wa xlakata tsokgli pi lu xpaxuwa. Xlikana, nitu atanu tuku tlakg xlipaxuwa kaj xman wa pi lu tlan xtalalin Jehová (kalikgalhtawakga Salmo 16:9, 11).

8. ¿Tuku natlawa pi tlan nakgalhiyaw xaxlikana tapaxuwan kkilatamatkan?

⁸ Tiku kajwatiya lilakgaputsakgo tumin ni kgalhikgo tapaxuwan nema xkgalhi David (1 Tim. 6:9, 10). Chatum tala xalak Canadá lichuwinan: «Xaxlikana tapaxuwan ni kajwatiya kilhchanima tuku tlan natlawayaw kkilatamatkan, wata wa tuku maxkiyaw Jehová, tiku kinkamaxkiyan putum tuku xatlan» (Sant. 1:17). Chuna la akxilha, komo tliwakga kgalhiniya takanajla Jehová chu  skujnaniya, nakgalhiya akgtum tlan latamat chu nalipaxuwaya. Xlakata tlakg nakgalhiya takanajla talakaskin «nalimaxtuya kilhtamaku» xlakata akxtum natatawilaya. ¿La natlawaya? Nalikgalhtawakgaya Biblia, naʼakxilha xtamalakatsukin chu nalilakpuwana xtayat, la komo tapaxkit nema kgalhiniyan (Rom. 1:20; 5:8).

9. Chuna la David, ¿tuku tlan natlawaya xlakata xTachuwin Dios nalakgpali milatamat chu mintayat?

⁹ Xlakata Jehová chatum xatlan Tlat chu kinkapaxkiyan, lakgachunin kinkastakyawayan. David lu lanka xtapalh xʼakxilha uma tastakyaw chu wa xlakata wa: «Oh Dios, akit kaman paxkatlikatsiniyan, porque laktlan tastakyaw kimaxkiya, y asta katsisni akxni ktamaj, wix lhuwa laktlan talakapastakni kimaxkiya» (Sal. 16:7, SXP). Xlikana, xlilakpuwan xtastakyaw Dios chu xliskuja xlakata nakatsini la xla lakpuwan. Xmasta talakaskin pi uma tastakyaw xlakgpalinilh xlatamat chu tlan tayat xkgalhilh. Komo wix nachuna natlawaya, tapaxkit nema kgalhiniya Jehová tlakg natatliwakglha chu tlakg nakgalhakgaxpata. Nachuna tliwakga nakgalhiya mintakanajla. Chatum tala wanikan Christin, lichuwinalh: «Akxni kkgalhtawakga chu klilakpuwan, liwana kkatsi pi wa Jehová matsokgninalh kimpalakata».

10. Chuna la wan Isaías 26:3, ¿tuku xlakata tlan kitaxtu tliwakga nakgalhiya mintakanajla?

¹⁰ Komo wix matliwakglha mintakanajla, Jehová namaxkiyan liskgalala chu taʼakgatekgsni xlakata nachuna naʼakxilha kakilhtamaku chuna la xla. Chuna natlawa xlakata lakaskin pi nakatsiya tuku tlakg xlakaskinka kmilatamat, pi liwana nalaksaka tuku natlawaya chu ni napekuaniya kakilhtamaku nema aku mima. Palakachuwina Isaías lichuwinalh pi nakamakgtaya tiku nalipawankgo chu ankgalhin nakamaxki takaksni (kalikgalhtawakga Isaías 26:3). Chatum tala wanikan Joshua, tiku xalak Estados Unidos, lichuwinan: «Komo ni natamakgatliniya Jehová, liwana naʼakxilha tuku tlakg xlakaskinka chu tuku ni».

11. ¿La xkalaksaka David xʼamigos?

¹¹ (Kalikgalhtawakga Salmo 16:3). David xkatsi pi xlakata nakgalhi xalaktlan amigos xtalakaskin nakalaksaka tiku paxkikgo Jehová. Kalimapakuwilh «xasantos» xlakata xliskujkgo natlawakgo tuku wan xlimapakgsin Jehová. Chu lichuwinalh pi akxni akxtum xkatatawila xlimini «tapaxuwan». Atanu tiku na tsokgli Salmo nachuna lichuwinalh. Tsokgli pi xla putum xʼamigos xlitaxtukgo tiku xpekuanikgo Dios chu xmakgantaxtikgo tuku xla wan (Sal. 119:63). Chuna la lichuwinaw kʼartículo nema titaxtulh, wix nachuna tlan nakgalhiya miʼamigos tiku paxkikgo Jehová chu kgalhakgaxmatkgo. Xlikana, tlan nakatalalinaw tiku ni watiya kata kgalhikgo la akinin.

12. ¿Tuku xlakata David chu Jonatán lu tlan amigos xwankgonit?

¹² David ni kajwatiya xkatalalin tiku watiya kata xkgalhikgo chuna la xla. ¿Lakapastaka tuku wanikan tiku lu tlan xʼamigo xwanit? Jonatán. Lichuwinan Biblia pi lu tlan la xlatalalinkgo. Pero ¿xkatsiya pi Jonatán xlipulanima 30 kata David? Komo chuna, ¿tuku xlakata lu tlan xlatalalinkgo? Xlakata xchatiykan xkanajlanikgo Dios, xlamaxkikgo kakni chu lakwan tayat xkgalhikgo, chuna la ni pekuankgolh akxni talatlawakgolh xtalamakgasitsin Jehová (1 Sam. 13:3; 14:13; 17:48-50; 18:1).

13. ¿Tuku tlan natlawaya xlakata nakgalhiya lhuwa amigos? Kalichuwinanti akgtum liʼakxilhtit.

¹³ Chuna la David chu Jonatán, nachuna akinin nakgalhiyaw «tapaxuwan» komo xʼamigos nalitaxtuyaw tiku paxkikgo Jehová chu limasiyakgo takanajla. Chatum tala wanikan Kiera, tiku lhuwata kata la skujnanima Dios, lichuwinan: «Kgalhi lhuwa amigos xlikalanka katiyatni, latamanin tiku tanu tanu xkilhtsukutkan chu xtalismaninkan». Komo nachuna natlawaya liwana naʼakxilha la xtachuwin Dios chu xʼespíritu santo makxtum kinkatlawayan

14. 1) ¿Tuku namakgtayayan namakgantaxtiya tuku natlawaputuna? 2) ¿Tuku lichuwinankgonit makgapitsi kamanan xlakata tlakg naskujnanikgo Jehová?

¹⁴ (Kalikgalhtawakga Salmo 16:8). Xpalakata David, tuku tlakg xlakaskinka xwanit kxlatamat wa naskujnani Jehová. Nachuna wix nalipaxuwaya milatamat komo nastalaniya xliʼakxilhtit. Pulana kawili kmilatamat naskujnaniya Jehová chu kaliskujti xlakata wi tuku natlawaya kmilatamat pero ankgalhin kalilakpuwanti tuku xla lakaskin. Chatum tala wanikan Steven, lichuwinalh: «Akxni wi tuku kliskuja naktlawa chu kakxilha pi wi tuku tlakg tlan ktlawalh nixawa xapulana uma lu tlan kimamakgkatsini». Chatum kgawasa xalak Alemania tiku skujma atanu kpaís lichuwinan: «Akxni tlakg naklin kinkata, ni klakpuwamputun pi putum tuku ktlawalh kkilatamat kaj kiʼakstu kililakpuwanka». Klakaskinaw pi nachuna nalakpuwana. Komo chuna, kamaklakaskinti tuku tlan tlawaya xlakata nalimaxkiya kakni Dios chu wi tuku natlawaya xpalakata amakgapitsin (Gál. 6:10). Wi tuku kaliskujti natlawa kxkachikin Jehová chu kaskini xtamakgtay. Xla lu lakgati kgalhti kiʼoracioneskan (1 Juan 3:22; 5:14, 15).

15. ¿Tuku tlan naliskuja xlakata tlakg naskujnaniya Jehová? (Kaʼakxilhti recuadro « Makgapitsi tuku tlan natlawaya»).

¹⁵ ¿Tuku tlan naliskuja xlakata tlakg naskujnaniya Jehová? Makgapitsi wa pi tlan kmintachuwin namastaya mintakgalhtin ktamakxtumit, precursor nalitaxtuya o napina kBetel. Nachuna tlan nakatsiniya atanu tachuwin xlakata napina makgtayanana niku chuwinankan atanu tachuwin. Chatum kgawasa wanikan Barak, tiku putum kilhtamaku skujnanima Jehová, lichuwinan: «Nitu atanu tuku tlakg kimakgapaxuwa la komo sokgku naktaki chali chali chu kkatsi pi wa nakskujnani Jehová xliputum kilitliwakga».

16. ¿Tuku xlakpuwan David xlakata xlimapakgsin chu xtastakyaw Jehová chu tuku xlakata?

¹⁶ (Kalikgalhtawakga Salmo 16:2, 4). Kʼartículo nema titaxtulh, akxilhwi pi limapakgsin chu xtastakyaw Dios kinkamaxkiyan talakaskin tlan nalaksakaw tuku natlawayaw xlakata kinkamakgtayayan napaxkiyaw tuku xatlan chu nalakgmakganaw tuku nitlan (Amós 5:15). Ktachuwin nema tsokgka, tuku David xwamputun kSalmo 16:2 wa pi Jehová xmaxki putum tuku tlan. David liskujli xlakata nakgalhi  uma tayat chu xlakata nalakgmakgan tuku nixatlan, la komo kakninanikan ídolos. Uma talismanin kamaktuju latamanin chu makglhtikgo takaknin nema lakgchan Jehová (Is. 2:8, 9; Rev. 4:11).

17, 18. 1) ¿Tuku wa David xlakata nakakninaniyaw nixaxlikana dioses? 2) ¿Tuku xlakata makgapitsi latamanin lhuwa patinankgo?

¹⁷ Makgasa kilhtamaku, ankgalhin xʼanan talakgxtumit xalimaxana niku xkakninanikan nixaxlikana dioses (Os. 4:13, 14). Lhuwa latamanin xmakgtapakgsikgo knixaxlikana takanajla xlakata lu xlakgatikgo xtlawakgo tuku xalixkajni. Pero uma ni xkamakgapaxuwa. David lichuwinalh anta kSalmo 16:4 pi kgalhikgolh «lanka talakgaputsit nak xlatamatkan» tiku xkakninanikgo nixaxlikana dioses. Nachuna ama latamanin xmakamastakgo xkamanankan (Is. 57:5). Jehová lu nitlan xakxilha tuku xtlawakgo (Jer. 7:31). Komo xtilatapa ama kilhtamaku, ¿nixlikana pi tlan xmakgkatsi komo minatlatni xkakninanikgolh Jehová?

¹⁸ La uku kilhtamaku, nixaxlikana takanajla masta talakaskin natlawakgo talakgxtumit xalimaxana, nachuna tiku lakgati xtachixku o xtapuskat. Pero lu nitlan tuku kitaxtu chuna la makgasa kilhtamaku (1 Cor. 6:18, 19). Latamanin lakpuwankgo pi tlan kakitaxtuni tuku laksakkgo natlawakgo pero nixlikana xlakata «lanka talakgaputsit» kgalhikgo. Max wix akxilhnita pi chuna. Wa xlakata kakgalhakgaxpatti minTlat xalak akgapun. Liwana kakatsi pi tlan nakitaxtuniyan komo wa nakgalhakgaxpata. Ankgalhin kuenta katlawa pi komo natlawaya tuku nitlan tlakg nitlan kitaxtu nixawa tuku lipaxuwaya (Gál. 6:8). Joshua, tiku lichuwinaw kpárrafo 10 wan: «Tlan natlawayaw tuku tlawaputunaw. Pero komo nitlan tuku nalaksakaw ni katilipaxuwaw».

19, 20. ¿Tuku tasikulunalin namakglhtinankgo kamanan tiku limasiyanikgo takanajla Jehová chu kgalhakgaxmatkgo?

¹⁹ Jesús kawanilh kstalaninanin: «Lapi wixin lu akgstituma namakgantaxtiyatit wantu kkalimapakgsiyan, chuna tlan nalitaxtuyatit la xaxlikana kilimakgalhtawakgat. Chu chuna wixin tlan nalakgapasatit wantu xtalulokgtat xtalakapastakni Dios, chu wa yama talakapastakni nakamaxkiyan lakgtaxtut» (Juan 8:31, 32). Uma nakinkamakgtayayan xlakata ni namakgtanuyaw knixaxlikana takanajla chu ktaskuwan. Chu ni kaj xman wa uma. Chuna la akxilhnitaw, kkilhtamaku nema aku mima «natalipaxuwakgoy xlakgskgatan Dios wa yuma lilakgatit ntalakgtaxtun ntu namin» (Rom. 8:21). Pero xlikana, la uku kilhtamaku tlan nalipaxuwaya uma xlakata tlan nalaksaka tuku natlawaya. ¿La natlawaya? Nakgalhakgaxpata xtamasiy Cristo. Chuna nalakgapasa xaxlikana, ni kaj xman xlakata katsinipat, wata nachuna xlakata wix liskujpat kmilatamat.

²⁰ Kgawasa, lanka xtapalh kaliʼakxilhti xlakata Dios maxkiyan talakaskin natlawaya tuku lakaskina. Komo liwana namaklakaskina, lu tlan nakitaxtuniyan kmilatamat. Chatum kgawasa tiku xtatayana Jehová lichuwinan: «Komo liwana namaklakaskina tuku nalaksaka natlawaya la uku namakgtayayan akxni tlakg nalipinata minkata chu natalakaskin nalaksaka kmilatamat tuku lu xlakaskinka la komo nalaksaka akgtum tlan taskujut o komo natamakgaxtokga o asta alistalh».

21. ¿Tuku talakaskin militlawat komo nakgalhiputuna «xatlan latamat»?

²¹ Kʼuma xaʼawatiya kilhtamaku, tuku lilakgapaskan «tlan latamat» ni makgapala. Niti katsi tuku nala chali (Sant. 4:13, 14). Wa xlakata tlakg tlan anta natawilayaw ktiji nema linan «kxatlan latamat», kilhchanima latamat nema ni kgalhi xlisputni (1 Tim. 6:19). Xlikana Dios ni fuerza kinkawaniyan tuku natlawayaw. Kinchatunukan talakaskin nalaksakaw. Wa xlakata kamasta talakaskin pi natapakgsiniya Jehová. Lhuwa xtapalh kaliʼakxilhti tuku tlan maxkinitan (Sal. 103:5). Chu kalipawanti pi xla namaxkiyan akgtum tlan latamat nema nalipaxuwaya putum kilhtamaku (Sal. 16:11).