1, 2. Ambe enga Tony nitamakuarhika, ¿néna xarhatasïni eska ma úsïnga mójtakurhini?

TONY tumbi máespti enga amambajku kʼuiriperaka ka no káni jánguarhintasïrendi eskuelarhu. Asta eratsixapti nóteru estudiarinia. Fini de semanechani puru amiguecha jingoni jámasïrendi o sinerhu nirani. Tumbi máespti enga no no ambakipka ni droga ambe úrani, peru no sési irekaxapti ka no káni jakajkusïrendi eska Tata Diosï jarhaska. Jiájkani, mítispti temungurhirini ma engaksï Testigueka ka eianguaspti ambe enga no káni jakajkuenga ka kurhamarhikuechani enga jatsiapka. Temungurhiri, íntskusptiksï foietuechani El origen de la vida ka ¿Es la vida obra de un Creador?

² Enga temungurhiri kʼuanhatsintapka, Tony ménderuenisptia. Kánikua jánguarhintaspti foietuechani estudiariuani engaksï jamberi iámu no sési járhapkia ka eskinechaksï chunukukata jarhaspti. Tony arhiaspti: “Tata Diosï meru jati”. Uékaspti Bibliaeri ambe jorhenguarhini ka sánhani arhispti mójtakuni na enga exenga tsípikuani. Ístu, niáraspti sánderu ambakiti estudianti máeni eskuelarhu. Asta direktori jamberi ísku pakaraspti. Arhispti: “Kánikuari mójtakurhiska ka ístu chíti kalifikasionicha. ¿Jindeski jimbokari Bibliani estudiarixaka Jeobaeri testiguecha jingoni?”. Tony arhispti eska jo ka aianguspti ambe enga jorhenguarhini  japka. Tátsekua, uéntaspti preparhu ka iásï prekursori regularistia ka orhejtsïkutiri jarhuajpiri. Ístu kánikua sési pʼikuarherasïndi jimboka iásï ambakiti Tátini ma jatsiskia, Jeobani (Sal. 68:5).

3. ¿Náki konseju íntsasïni Jeoba uátsïchani ka tumbichani?

³ Ambe enga Tony nitamakuarhipka, xarhatasïndi eska Jeoba pendienti pásïnga uátsïcha ka tumbicha jimbo. Ima uékasïndi eskari kánikua tsípikua jingoni irekaaka, jimbokinisï arini konseju íntskujti: “Miá chíti Ambakiti Kuerajpirini iásï engari sapichkueka” (Ecl. 12:1). Ini jurhiatikuecha jimbo, no fásilisti ísï úni, pero ístu no jindesti ambe ma engachi meru no uáka úni. Jeobaeri jarhuajperata jimbo, uákari úni eskakini sési nicheaka, no solu iásï engari sapichku jaka, sino para méntkisï. Parajtsïni jarhuatani sési kurhanguni ini ambe, ju exeni ambe jarhuataaspi israelitechani paraksï úni pʼirani Echerini engaksï Aiaminhapka ka ambe úspi Dabidi para jatsini uinhapikua para úni Goliatini andani.

4, 5. Exeparini ambe enga jarhuataapka israelitechani pʼirani Echerini engaksï Aiaminhapka ka ambe enga jarhuatapka Dabidini para Goliatini andani, ¿ambechi jorhenguarhisïni? (Exea dibujuechani engaksï uénakuarhu jaka).

⁴ Enga sánderku kueratani japkia paraksï israelitecha inchani Echerirhu engaksï Aiaminhapka, Tata Diosï no arhiaspti eskaksï jánguarhintapiringa para sánderu ambakiti soldaduecheni ni paraksï guerrarhu nirani (Deut. 28:1, 2). Sánderu sési, arhiaspti eskaksï kurhajchapiringa imani ka mintsikanksï (Jos. 1:7-9). Para kʼuiripuecha, i ambe ísï xarharasïrendi eska no jarhuataapiringa. Peru sánderu ambakiti konseju máespti para imecha jimboka Jeobaeri jarhuajperata jingoni, úsptiksï kananeuechani someni andaani (Jos. 24:11-13). Ísïsti, para kurhajchani Tata Diosïni, uétarhisïndi mintsikani. Engachi mintsikaska, méntkisïjtsïni sési nicheati. Ka ísï úni, desde iónisï marhuastia asta iásï jamberi.

⁵ Goliati guerrarhu anapu achamasï máespti enga sáno tanimu metru iójtarhapka (9.5 pies). Ístu, sési armadu jarhaspti (1 Sam. 17:4-7). Peru Dabidi tsimani ambe jingontkusï nirani japti: jonda ma jingoni ka Jeobani mintsikaparini. Para imecha engaksï no mintsikenga Jeobani, Dabidi ísï xarharendi enajki tontu máepi. Peru no ísïspti: ima enga tontuepka, jindespti Goliati (1 Sam. 17:48-51).

6. ¿Ambechi exea ini artikulu jimbo?

⁶ Máteru artikulu jimbochi exeska tʼámu ambe engajtsïni jarhuatajka parachi sési pʼikuarherani ka felisini: jánguarhintani jorhenguarhini Tata Diosïri ambe, jatsiani amiguechani engaksï xénchajka Jeobani, jatsikukuarhiani metechani engajtsïni marhuachijka ka jukaparharani imani libertadini engajtsïni Tata Diosï íntskujka. Ini artikulu jimbochi jorhenguarhiaka sánderu íri ambe, exepariani uánikua prinsipiuechani engaksï Salmo 16 jimbo jaka.

7. a) ¿Na jásïski kʼuiripu espirituali ma? b) ¿Ambespi enga Dabidi xáni jukaparharenga ka na pʼikuaskusïreni inde ambe?

⁷ Kʼuiripu ma enga espiritualika, jakajkusïndi Tata Diosïni ka jánguarhintasïndi para ísï exeni ambe ma eska ima. Jánguarhintasïndi exeni ambe enga Tata Diosï uéjka eska uáka ka uékasïndi kurhajchani (1 Kor. 2:12, 13). Dabidi inde jásï ma kʼuiripuespti. Pirekua ma jimbo uandaspti eska Jeoba jindespka enga íntskuenga iámindu ambe enga uétarhinchenga, ini ambe jingoni arhikuekaxapti na enga xáni sési pájperenga imani jingoni (Sal. 16:5). Kánikua agradesidu jarhaspti enga Jeobaeri amiguepka ka imani mintsinharhisïrendi (Sal. 16:1). Jimbosï karapti eska kánikua tsípixapka. Ísïsti, no ma ambe sánderu tsíperasïrendi eska jatsini ambakiti pájperakua ma Jeoba jingoni (arhinta Salmo 16:9, 11).

8. ¿Ambe ka ambe uá eskari meru tsípikua jingoni irekaaka?

⁸ Imecha engaksï irekajka solu para tsípikuarhini o para tumina andani, nóksï úsïndi ísï sési pʼikuarherani eska Dabidi (1 Tim. 6:9, 10). Canadá anapu erachi ma uandasïndi: “Parari meru sési pʼikuarherani, no imani ambe jimboesïndi ambe engari uáka úni chíti tsípikua jingoni, sino ambe engachi íntskujka Jeobani, engajtsïni ambakiti ambe íntskujka” (Sant. 1:17). Eskari na exejka, engari meru  mintsikaska Jeobani ka marhuakundi, ambakitiri irekua ma jatsiaka ka tsípikua jingoni. Parari jatsini sánderu jakajkukua, jatsiskari para imani jingoni “jarhani”. ¿Néna? Arhintaparini imeri karakatani, exeparini ambe enga ima kueraaka ka eratsintapariani imeri kualidadichani, komu na engakini xáni xénchajka (Rom. 1:20; 5:8).

9. Májkueni eska Dabidi, ¿amberi uá úni parakini Tata Diosïri Karakata jarhuatani mójtakurhini?

⁹ Komu Jeoba ambakiti Táti máeka ka uékantsïni, ménisïjtsïni jurhimberantasïndi. Dabidi jukaparharasïrendi indeni jurhimberantskuani ka jimbosï uandapti: “Kʼéri ambe arhiaka Jeobani, engarini íntsaaka konsejuechani. Asta chúrikuechani, ima ambe engani uinhamu pʼikuarhinhijka jurhimberantasïndirini” (Sal. 16:7). Eratsiantasïrendi Tata Diosïri konsejuechani ka jánguarhintasïrendi para ísï eratsini eska ima. Jurajkusïrendi eskaksï i konsejuecha jarhuatapiringa, o sea, eskaksï mójtakupiringa ka úni eska sánderu ambakiti kʼuiripu máepiringa. Engari tʼu májkueni uáka, sánderuri xénchaaka Jeobani ka sánderuri uékaaka kurhajchani. Ísturi niáraka ambakiti kristianu máeni. Pirenchi enga Christin arhinhajka, uandaspti: “Engani estudiarijka ka eratsintani ambe engani arhintajka, ísï pʼikuarherasïnga eska Jeoba karaska meru para ji”.

10. Seguni ambe enga Isaías 26:3 arhijka, ¿néna marhuasïni kʼuiripu espirituali máeni?

¹⁰ Engari kʼuiripu máeka enga espiritualika, Jeobakini íntskuati mímixekua ka jánhaskakua parari ísï exeni eska ima na exejka parhakpinini ka ambe enga úkuarhiaka sánderu orhepani. Ísï uáti jimboka uékasïnga eskari mítiaka ambe enga sánderu jukaparhakueka irekuarhu, eskari ambakiti ambe erakuaka úni ka eskari no chéaka ambe enga úkuarhiaka sánderu orhepani. Profeta Isaiasi uandaspti eska Jeoba kuájchakuauaka imechani engaksï mintsita jingoni mintsikajka imani ka uáti eskaksï seguirini jauaka pínandikua jatsini (arhinta Isaías 26:3). Estados Unidos anapu ma erachi enga Joshua arhinhajka, uandasïndi ambe ma enga meru ísïka: “Engari no jarhariska Jeobani, sésiri exeaka ambe enga jukaparhakueka ka ambe nómbe”.

11. ¿Néna erakuasïreni Dabidi imeri amiguechani?

¹¹ (Arhinta Salmo 16:3). Dabidi mítispti eska para úni ambakiti amiguechani jatsiani, jatsispka para imechani erakuani engaksï xénchenga Jeobani. Arhiaspti “pímbinharhaticha”, jimbokaksï jánguarhintasïrenga úraani Tata Diosïri juramukuechani. Ka uandaspti eska imecha jingoni jarhani kánikua sési pʼikuarherasïrenga. Máteru salmueri karari sáno májkueni ambe uandaspti. Karaspti eska ima iámindu imecheri amiguespka engaksï janhanharhienga ka kumplirini imani ambe enga Tata Diosï arhiauenga (Sal. 119:63). Eskachi na exeka máteru artikulu jimbo, tʼujturi uáka uánikua ambakiti amiguechani jatsiani engaksï xénchajka Jeobani ka kurhajchani. Jo ísïsti, uátiksï jindeni engaksï mámaru jatiriuaka.

12. ¿Andiksïsï Dabidi ka Jonatani xáni sési pájpereni?

¹² Dabidi no solu erakuaspti amiguechani engaksï májkueni jatiripka eska ima. ¿Miásïniri na enga arhinhenga ma imeri sánderu ambakiti amigu? Jonatani. Na engaksï xáni sési pájperenga jindesti ma ejemplu enga Biblia uandajka. Peru ¿mítispiri eska Jonatani ma treinta uéxurhinisï sánderu jatirispka eska Dabidi? Jimajkani, ¿andiksïsï xáni sési pájpereni? Jimbokaksï tsimarhani mintsikasïrenga Tata Diosïni, janhanharperasïrendiksï ka exesïrendiksï eskaksï ambakiti kualidadichani xarhatasïrenga, komu na engaksï balori xarhatapka engaksï uarhiperapka Tata Diosïri enemiguecha jingoni (1 Sam. 13:3; 14:13; 17:48-50; 18:1).

13. ¿Nénari uá mámaru járhati amiguechani jatsiani? Jatsiku ejemplu ma.

¹³ Májkueni eska Dabidi ka Jonatani, juchajtuchi uáka sési pʼikuarherani engachi imani amiguechani jatsiauaka engaksï xénchajka Jeobani ka xarhatanksï eskaksï mintsinharhisïnga imani. Pirenchi ma enga Kiera arhinhajka enga ióni marhuakukia Jeobani, uandasïndi: “Interu parhakpini jatsiaska amiguechani engaksï no májku jásï irekua ka pʼindekuechani jatsiaka eska ji”. Engari ísï úska eska i pirenchi, exeakari na enga Tata Diosïri Karakata ka espiritu santu újka eskachi májku kʼéri jauaka.

14. a) ¿Ambekini jarhuataa jatsikukuarhiani metechani engaksïni marhuachiaka? b) ¿Ambeksï uandasïni máru uátsïcha ka tumbicha para sánderu marhuakuni Jeobani?

¹⁴ (Arhinta Salmo 16:8). Ambe enga Dabidi sánderu jukaparharenga imeri irekuarhu, jindespti Tata Diosïni marhuakuni. Tʼujturi tsípikua jingoni irekaaka engari májkueni úska eska Dabidi. Ú eska Tata Diosïni marhuakuni, jindeuaka ambe ma engari sánderu jukaparharaaka ka jatsikukuarhia metechani méntkisï miáparini imani ambe enga Jeoba uéjka eskari uáka. Erachi ma enga Steven arhinhajka uandaspti: “Jatsikukuarhini meta ma, ísï úni ka tátsekua exeni ambe engani sánderu sési úkia sésirini pʼikuastasïndi”. Alemania anapu tumbi ma enga máteru paisirhu marhuani jaka, uandaspti: “Engani jatiriuakia, no uékasïnga miántani imani ambe engani uáka ka kuenta íntskukuarhini eskani iámindu ambe úska solu para jíjkuni sési jarhani”. Uékasïngachi eskari májkueni eratsiaka eska imecha. Enga ísïka, úra imani ambe engari jorhenaka úni parari kʼéri ambe arhini Tata Diosïni ka jarhuataani máteruechani (Gal. 6:10). Jatsikukuarhia metechani parari sánderu marhuakuni Jeobani ka kurhaku eskakini jarhuataaka parari ísï úni. Ima tsitisïndi inde járhati kómarhikuechani mókuantani (1 Juanu 3:22; 5:14, 15).

15. ¿Náki metechaniri úpirini jatsikukuarhiani? (Exe rekuadruni “ Máru metecha engari úpiringa jatsikukuarhiani”).

¹⁵ ¿Náki metechaniri úpirini jatsikukuarhiani? Máruksï jindesti, komentarini tánguarhikuecharhu chíti uandakuecha jingoni, prekursori úkuarhini o Beteli marhuani. Ísturi úpiringa máteru idioma jorhenguarhini parari nirani máteru nani ísï marhuani. Barak, tumbi ma enga tiempu kompletueri marhuani jaka, uandasïndi: “No jarhasti máteru ambe engarini sánderu sési pʼikuastajka eska pauani pauani jauarani mítiparini eskani Jeobani ánchikuarhikuaka iámu juchiti uinhapikua jingoni”.

16. ¿Néna pʼikuarherasïreni Dabidi Jeobaeri leicha ka prinsipiuecha jimbo ka andi?

¹⁶ (Arhinta Salmo 16:2, 4). Máteru artikulurhu, exespkachi eskaksï Diosïri leicha ka prinsipiuecha úsïnga eskachi libreuaka jimbokajtsïni jarhuatasïnga para xénchani ambakiti ambe ka kurhunhini no sési jásï ambe (Amós 5:15). Dabidi uandaspti eska iámindu ambakiti ambe Jeobani jimbo jurhasïnga. Jeoba xarhatasïndi eska ambakitisti iámindu ambe jimbo enga újka, ka iámindu ambe engajtsïni ima íntskujka ambakitisti. Dabidi jánguarhintaspti ísïni eska Jeoba, para kurhunhini  ambe enga ima kurhunhijka komu diosï úkatechani kómarhiani. Diosï úkatechani kómarhiani, úsïndi eskaksï kʼuiripuecha menusi exenhaaka ka ístu eska Jeoba no kʼéri ambe arhinhaaka (Is. 2:8, 9; Jaŋ. 4:11).

17, 18. a) ¿Ambe uandaspi Dabidi na enga xáni no sésika para diosï úkatechani kómarhiani? b) ¿Andiksïsï máru xáni kómu nitamakuarhejki?

¹⁷ Bibliaeri tiempuecha jimbo, ísku jándikua ambe sáno méntkisï úrakuarhisïrendi para diosï úkatechani kómarhiani (Os. 4:13, 14). Uánikua kʼuiripu diosï úkatechani kómarhiasïrendi jimbokaksï tsitisïrenga ísku jándikua ambe úni. Peru ini ambe úni, no úsïrendi eskaksï felisipiringa. Dabidi Salmo 16:4 jimbo uandaspti eskaksï kánikua kómu nitamakuarhisïnga imecha engaksï diosï úkatechani kómarhiajka. Ima kʼuiripuechaksï niáraspti íntspiani uájpechani komu kéjtsïtakua ma para diosï úkatecha (Is. 57:5). Jeoba kánikua no sési exesïrendi imani xáni no sési jásï ambe (Jer. 7:31). Engari tʼu jiánisï irekapiringa, ¿a no eskari kánikua agradesidu japiringa engaksï chíti táticha Jeobani kómarhipiringa?

¹⁸ Ini jurhiatikuecha jimbo, ístu relijioni no jurhimbitichaksï no no sési exesïndi ísku jándikua ambe úni ka ni omosexualidadi. Ini ambe jimboksï kʼuiripuecha úpirindi ísï pʼikuarherani eskaksï libreska, peru sési jimboksï kánikua kómu nitamakuarhisïndi (1 Kor. 6:18, 19). Jamberiri kuenta íntskukuarhikia eska ísïska. Ísï jimbo, kurhajcha chíti Táti auandarhu anapuni. Jánguarhinta exeni eska imani kurhajchani sánderu sésiska para tʼu. Asï méni mirikurhi eskari ma ratujkusï sési pʼikuarheraaka engari no sési ambe úska, peruri kánikua kómu nitamakuarhiaka imani ambe jimbo (Gal. 6:8). Joshua, engachi párrafu 10 jimbo exeka, uandasïndi: “Uákachi úrani juchari libertadi ísï eskachi na uékaaka. Peru engachi no sési úraska, nochi felisiuaka”.

19, 20. ¿Náki kóntperatechanksï jatsiaua ima uátsïcha ka tumbicha engaksï xarhatajka eskaksï Jeobani mintsikasïnga ka kurhajchani?

¹⁹ Jesusi arhiaspti imeri chúxapatichani: “Engajtsï cha méntku jauenaska úni eskaksïni ji na arhijka, sési jimbo cha jindeuaka juchiti jorhenguarhiticha. Ka mítiakajtsï indeni ambe enga sési jimboeka, ka inde enga sési jimboeka, uáti eska cha nóteru jindeaka jántspiricha” (Juanu 8:31, 32). Jurhimbikua ambe mítini úsïndi eskachi nóteru jántspiriuakia relijioni no jurhimbitiri, eskachi uánikua ambe mítiaka ka eskachi nóteru ísku ambe ma jakajkuakia. Ka no solu inde ambe. Eskachi na exekia, sánderu orhepani uáti eskari jatsiaka libertadi “jimajkani engaksï Diosïri uájpecha xarhantaaka tʼíntskua jingoni” (Rom. 8:21). Peru asta iásïri uáka marhuatani imani libertadini engari jatsika. ¿Néna? No jurajkuni imani ambe enga tata Jesukristu uandapka, enga jindeka úni ambe enga ima jorhentpipka. Ísïri mítiaka jurhimbikuani, no solu jimbokari jorhenguarhini jauaka, sino jimbokari ísï úni jauaka.

²⁰ Uátsï ka tumbi, jukaparhara imani libertadini engakini Tata Diosï íntskujka. Engari sési úraska, uákari eskakini sési nicheaka sánderu orhepani. Tumbi ma enga Testigueka, uandaspti: “Sési úrani iásï chíti libertadini, jarhuatatikini engari kʼériuakia ka engari jatsiaka para sánderu jukaparhakua ambe erakuni, komu ánchikuarhita ma jatsini enga sési jauaka ori sini uambucha o tembucha ori ma tiempu jimbo erokuarhia”.

21. ¿Amberi jatsiski para úni engari uéjka jatsini tsípikua para méntkisï?

²¹ Ini parhakpini jimbo enga asta ima ambe enga arhinhajka “ambakiti irekua ma jatsini” no ióni marhuasïndi. No nema mítisti ambe enga úkuarhiaka pauani (Sant. 4:13, 14). Ísï jimbo, sánderu sésisti imani ambe erakuni úni engakini jarhuataaka jatsini “tsípikua [para] méntkisï” (1 Tim. 6:19). Ísïsti, Tata Diosï no uékasïndi eskachi afuersa uáka indeni ambe. Mándani arhini jatsiskachi para erakukuarheni. Ísï jimbo, ú eska Jeobaeuaka engakini íntskuaka iámindu ambe. Jukaparhara iámindu ambakiti ambe engakini íntskujka (Sal. 103:5). Ka mintsika eska ima uáka eskari ambakiti irekua ma jatsiaka ka tsípikua jingoni para méntkisï (Sal. 16:11).